Bakı Şəhəri Yasamal Rayon Məhkəməsi Qərardad — İş №3(004)-2049/2021

Azərbaycan Respublikası adından QƏRARDAD Bakı şəhəri İş № 3(004)-2049/2021 20.10.2021 BAKI ŞƏHƏRİ YASAMAL RAYON MƏHKƏMƏSİ Hakim Məmmədov Murad Akif oğlunun sədrliyi, Əlizadə Emin Kamil oğlunun katibliyi, barəsində inzibati xəta haqqında iş üzrə icraat aparılan hüquqi şəxs Şəxs MMC-nin nümayəndəsi X1 iştirakı ilə, Şəxs MMC-nin Azərbaycan Respublikasının İnzibati Xətalar Məcəlləsinin 430.4-cü maddəsi ilə nəzərdə tutulmuş inzibati xətanı törətməsinə dair materiala açıq məhkəmə iclasında baxaraq, məhkəmə MÜƏYYƏN ETDİ: Şəxs MMC-nin Azərbaycan Respublikasının İnzibati Xətalar Məcəlləsinin 430.4-cü maddəsi ilə nəzərdə tutulmuş inzibati xətanı törətməsinə dair 02.09.2021-ci il tarixli, MN ******* saylı inzibati xəta haqqında protokol və ona əlavə edilmiş sənədlər Yasamal Rayon Məhkəməsinə daxil olmuşdur. İnzibati xəta haqqında protokola əsasən "xxxx" ASC-dən təqdim edilmiş məlumat və sənədlərə əsasən Şəxs MMC 80000.00 ABŞ dolları məbləğində xarici valyutada olan vəsaiti ödəniş tapşırığına əsasən Bankda olan hesabından 15.08.2019-cu il tarixdə Azərbaycan Respublikasından kənara qabaqcadan ödəniş etməklə köçürmüşdür. Lakin ödənişin aparıldığı gündən 02 (iki) il müddət keçməsinə baxmayaraq, 80000.00 ABŞ dolları məbləğində vəsait hesabına alınan malların ölkəyə idxalını təsdiqləyən gömrük bəyannaməsini və ya idxal olunan xidmətlərin göstərilməsini təsdiq edən sənədi banka təqdim etməmiş, qabaqcadan ödənilmiş valyuta vəsaiti xaricdən geri qaytarılmamışdır. Bununla da, Şəxs MMC Azərbaycan Respublikasının İnzibati Xətalar Məcəlləsinin 430.4-cü maddəsi ilə nəzərdə tutulmuş inzibati xətanı törətmişdir. Məhkəmə iclasında iştirak edən barəsində inzibati xəta haqqında iş üzrə icraat aparılan hüquqi şəxs Şəxs MMC-nin nümayəndəsi Y.M.Əhmədov bildirmişdir ki, Şəxs MMC-nin barəsində əssasız olaraq inzibati xəta haqqında protokol tərtib edilmişdir. Belə ki, iş materiallarında olan 02.09.2021-ci il tarixli, MN ******* saylı inzibati xəta haqqında protokolda qeyd edilir ki, "xxxx" MMC tərəfindən 15.08.2019-cu il tarixində 80.000 (səksən min) ABŞ dolları pul vəsaiti xaricə köçürülmüş, lakin vəsait hesabın alınan mallar ölkəyə idxal edilməmişdir. Mərkəzi Bank tərəfindən inzibati xəta haqqında protokol tərtib olunarkən "xxxx" MMC dəvət olunmayıb. X2 Məcəlləsinin 60-cı maddəsinə əsasən, xəta üzrə protokol tərtib edən dövlət orqanı barəsəsində icraat aparılan şəxsə ən azı 5 gün qabaqcadan rəsmi qaydada xəbər verməli və ona öz müdafiəsini hazırlamağa şərait yaratmalı idi. Buna görə də əslində həmin tarixdə köçürmənin olmadığını təsdiq edən sənədləri təqdim edirlər. "xxxx" MMC tərəfindən 15.08.2019-cu il tarixində "xxxx" ASC vasitəsi ilə xarici ölkəyə hər hansı pul vəsaiti köçürülməyibdir. Protokola əlavə olunmuş "xxxx" MMC-nin bank hesabından çıxarışda həmin tarixdə hər hansı xarici ölkəyə köçürülmənin olmadığı öz təsdiqini tapır. Göründüyü kimi Şəxs MMC-yə istinad edilən inzibati xəta hadisəsi yoxdur. Ona görə də inzibati iş üzrə icraata xitam verilməsini xahiş etmişdir. Məhkəmə iş materiallarını araşdıraraq hesab edir ki, Şəxs MMC-nin barəsində Azərbaycan Respublikasının İnzibati Xətalar Məcəlləsinin 430.4-cü maddəsi ilə tərtib edilmiş inzibati xəta haqqında protokol və ona əlavə edilmiş sənədlər geri qaytarılmalıdır. Belə ki, inzibati xəta haqqında protokola əsasən "xxxx" ASC-dən təqdim edilmiş məlumat və sənədlərə əsasən Şəxs MMC 80000.00 ABŞ dolları məbləğində xarici valyutada olan vəsaiti ödəniş tapşırığına əsasən Bankda olan hesabından 15.08.2019-cu il tarixdə Azərbaycan Respublikasından kənara qabaqcadan ödəniş etməklə köçürmüşdür. Lakin iş materiallarında olan sənədlərə, həmçinin "xxxx" ASC-nin Mərkəzi Banka ünvanladığı məktuba da əsasən, həmin tarixdə Şəxs MMC tərəfindən hər hansı bir köcürmənin aparılmadığı müəyyən edilir. Buna baxmayaraq qeyd edilən hallar üzrə araşdırma aparılmadan Şəxs MMC-nin barəsində inzibati xəta haqqında protokol tərtib edilərək məhkəməyə göndərilmişdir. Məhkəmə qeyd edir ki, Şəxs MMC-nin nümayəndəsinin izahatında göstərdiyi hal üzrə araşdırma aparıldıqdan sonra istinad edilən inzibati xətanın törədilib-törədilməməsini müəyyən etmək mümkündür. İndiki halda isə qeyd edilən halla bağlı hər hansı araşdırma aparılmamış və inzibati araşdırma natamam şəkildə aparılaq iş məhkəməyə göndərilmişdir. Azərbaycan Respublikasının İXM-nin 109.1.6-cı maddəsinə əsasən protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə qərardad qəbul edilir. Göstərilənlərə əsasən məhkəmə hesab edir ki, Şəxs MMC-nin barəsində Azərbaycan Respublikasının İnzibati Xətalar Məcəlləsinin 430.4-cü maddəsi ilə olan inzibati xəta haqqında protokol və ona əlavə edilmiş materiallar materiallar natamam olduğundan və mövcud natamamlıqları işə baxılarkən tamamlamaq mümkün olmadığından geri qaytarılmalıdır. Qeyd olunanları və Azərbaycan Respublikasının İnzibati Xətalar Məcəlləsinin 40, 100, 109, 110 və 114-cü maddələrini rəhbər tutaraq, məhkəmə QƏRARA ALDİ: Şəxs MMC-nin barəsində Azərbaycan Respublikasının İnzibati Xətalar Məcəlləsinin 430.4-cü maddəsi ilə olan inzibati xəta haqqında protokol və ona əlavə edilmiş materiallar Azərbaycan Respublikasının Mərkəzi Bankına qaytarılsın. Sədrlik edən: Murad Məmmədov