Bakı Şəhəri Yasamal Rayon Məhkəməsi Qərar — İş №3(004)-2092/2021

Azərbaycan Respublikası adından QƏRAR Bakı şəhəri İş № 3(004)-2092/2021 09.09.2021 BAKI ŞƏHƏRİ YASAMAL RAYON MƏHKƏMƏSİ Hakim Daşdəmirov Rauf Məhərrəməli oğlunun sədrliyi, İsmayılzadə Turan Tahir qızının katibliyi ilə, İnzibati xəta haqqında protokolu müdafiə edən şəxs: Azərbaycan Respublikası Daxili İşlər Nazirliyi Yasamal Rayon Polis İdarəsinin 26-cı Polis Bölməsinin polis sahə inspektoru Xudafirimov Hicran Tapdıq oğlunun, Barəsində inzibati xəta haqqında iş üzrə icraat aparılan şəxs Şəxs iştirakları ilə, xx xxxx 1992-ci il tarixdə Abşeron rayonu, Xırdalanda anadan olmuş, Azərbaycan Respublikasının vətəndaşı, subay, Abşeron rayonu, Xırdalan şəhəri, Heydər Əliyev prospekti 6 ünvanında qeydiyyatda olan Şəxs Azərbaycan Respublikası İnzibati Xətalar Məcəlləsinin (bundan sonra - İXM) 535.1-ci maddəsində nəzərdə tutulan inzibati xətanı törətməsinə dair Azərbaycan Respublikası Daxili İşlər Nazirliyi Yasamal Rayon Polis İdarəsinin 26-cı Polis Bölməsindən daxil olmuş materiallara məhkəmənin inzibati binasında, açıq məhkəmə iclasında baxaraq, məhkəmə MÜƏYYƏN ETDİ: Azərbaycan Respublikası Daxili İşlər Nazirliyi Yasamal Rayon Polis İdarəsinin 26-cı Polis Bölməsinin polis sahə inspektoru X1 tərəfindən Şəxs barəsində İXM-in 535.1-ci maddəsi ilə nəzərdə tutulmuş inzibati xətanı törətməsinə dair 09 sentyabr 2021-ci il tarixli inzibati xəta haqqında protokol tərtib edilərək baxılması üçün məhkəməyə göndərilmişdir. MN seriyalı ******* nömrəli inzibati xəta haqqında protokolda göstərilir ki, Şəxs 09 iyul 2021-ci il tarixdə Yasamal rayonu, H.Cavid prospektində polisin qanuni tələbinə tabe olmamışdır. Məhkəmə iclasında Xudafirimov Hicran Tapdıq oğlu protokolu müdafiə edərək bildirmişdir ki, Yasamal RPİ-nin DYPŞ-nin əməkdaşları Bakı şəhəri, Yasamal rayonu, H.Cavid prospektində xidmətdə olarkən “Ravon” markalı **-PF-*** dövlət qeydiyyat nişanlı avtomobilin sürücüsü tərəfindən yol hərəkəti qaydalarının dəfələrlə pozulması müşayiət etmiş və bu səbəbdən həmin sürücüyə saxla əmri verilmişdir. Sürücüyə törətdiyi qayda pozuntuları izah edilmiş, ondan müvafiq sənədlər tələb edilmiş, lakin bu zaman həmin sürücü yüksək səslə polis əməkdaşlarının ünvanına nalayiq ifadələr işlətmiş və özünə xəsaət yetirməyə başlamışdır. Bundan sonra Yol polisi əməkdaşları tərəfindən əməliyyat qrupunun üzvləri dəvət edilmiş və onlar tərəfindən Şəxs polis bölməsinə təmin edilmişdir. Yekun olaraq o Şəxs Azərbaycan Respublikasının İXM 535.1-ci maddələrində nəzərdə tutulmuş əməli törətməkdə təqsirli bilinərək, barəsində qanuni tədbir görülməsini məhkəmədən xahiş etdi. Məhkəmə iclasında barəsində inzibati xəta haqqında iş üzrə icraat aparılan şəxs Şəxs özünü İXM-in 535.1-ci maddəsində nəzərdə tutulmuş əməli törətməkdə təqsirli bilərək izahatında göstərdi ki, 08 sentyabr 2021-ci il tarixdə Yasamal rayonu, H.Cavid prospektində maşınla hərəkətdə olarkən polis əməkdaşları saxlanılmış və bu zaman əsəbi halda olduğu üçün onlarla polis şöbəsinə getmək istəməmiş, həmçinin özünə çoxsaylı xəsarətlər yetirməyə çalışmışdır. Əməlindən peşmandır. Himayəsində 2 üşağının olmasını nəzərə alaraq barəsində yüngül inzibati tənbeh tədbiri tətbiq edilməsini məhkəmədən xahiş etdi. Məhkəmə iclasında şahid qismində dindirilmiş X2 bildirmişdir ki, 08 sentyabr 2021-ci il tarixdə saat 20 radələrində Yasamal rayonu, H.Cavid prospektində xidmətdə olarkən “Ravon” markalı **-PF-*** dövlət qeydiyyat nişanlı avtomobil tərəfindən ardıcıl olaraq bir neçə qayda pozuntusu törədildiyinin, həmçinin işıqtoforun qırmızı işığında hərəkəti davam etdirərək qəza şəraitinin yaradılmasının şahidi olduğu üçün həmin sürücü onun tərəfindən saxlanılmışdır. Bu zaman özünü sürücüyə təqdim edərək törətdiyi qayda pozuntuları barədə ona məlumat verilmiş, və sürücüdən müvafiq sənədləri tələb etmiş, lakin sürücü ona qulaq asmayaraq yüksək səslə nalayiq ifadələr işlətmiş, özünə xəsarət yetirməyə başlamışdır. Bundan sonra əməliyyat qrupunun üzvlərinə məlumat verilmiş və onların köməyi ilə həmin şəxs 26-cı polis şöbəsinə təmin edilmişdir. İş materiallarında olan və məhkəmə iclasında tədqiq edilmiş: Yasamal Rayon Polis İdarəsinin DYPŞ-nin əməkdaşları Adil Feyzullayev və Nurlan Məmmədov tərəfindən Yasamal RPİ-nin 26-cı Polis Bölməsinin rəhbərliyinə ünvanlanmış raportdan görünür ki, 08.09.2021-ci il tarixdə ərazidə xidmətdə olarkən H.Cavid prospektində dövlət qeydiyyat nişanı **-PF-*** “Ravon” markalı nəqliyyat vasitəsinin sürücüsü yol hərəkəti qaydalarının müxtəlif üsullarla pozulması ilə müşayiət olunan qərəzli hərəkətlərini, işıqforun qırmızı işığından dəfələrlə keçdiyini görüb saxlanılmışdır. Sürücüyə yaxınlaşıb özlərini təqdim edərək qayda pozuntularını başa salmaq istəyəndə sürücü yüksək səslə ətrafdakıların diqqətini cəlb edən hərəkətlərə yol verərək maşınından lezva götürərək, “Məni buraxın özümü doğrayacam” deyərək, və küçə söyüşləri ilə onları təhqir etmişdir. Sürücü özünə xəsarət yetirməyə başlamış və polisin qanuni tələbinə məhəl qoymamışdı. Onlar əməliyyat qruppası ilə həmin sürücünü 26-cı polis şöbəsinə dəvət etmişlər. 08 sentyabr 2021-ci il tarixli inzibati qaydada tutma haqqında protokoldan görünür ki, Şəxs həmin tarixdə saat 20:00-da inzibati qaydada tutulmuşdur. Məhkəmə iclası zamanı Bakı şəhəri Yasamal Rayon Polis İdarəsinin DYPŞ-nin nümayəndəsi X2 tərəfindən təqdim edilmiş videogörüntüyə baxış keçirilmiş və məlum olmuşdur ki, Şəxs polis əməkdaşlarını nalayiq ifadələrlə təhqir edərək özünə xəsarətlər yetirmişdir. İnzibati material üzrə araşdırılan sübutların məcmusunu hərtərəfli, tam və obyektiv qiymətləndirərək məhkəmə hesab edir ki, Şəxs İXM-in 535.1-ci maddəsində nəzərdə tutulan inzibati xətanı törətməsi araşdırılmış sübutlarla tam sübuta yetir. İXM-in 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmama həmin maddədə nəzərdə tutulmuş inzibati məsuliyyətə səbəb olur və fiziki şəxslər iki yüz manat miqdarında cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Qeyd edilən maddənin dispozisiyasından göründüyü kimi, polis işçisi və ya hərbi qulluqçu ictimai qaydanın mühafizəsi ilə bağlı vəzifələrini icra edərkən, ictimai qaydanı pozan şəxs tərəfindən onların qanuni tələblərinə qəsdən tabe olmama İXM-in 535.1-ci maddəsində nəzərdə tutulan məsuliyyətə səbəb olur. Hazırki halda Şəxs hərəkətlərində də həmin halların mövcud olması məhkəmə iclasında öz təsdiqini tapmışdır. Belə ki, tərtib edilmiş inzibati xəta haqqında protokol və məhkəmə iclasında araşdırılan sübutlarla müəyyən edildi ki, Şəxs 08 sentyabr 2021-ci il tarixdə Bakı şəhəri, Yasamal rayonu, H.Cavid prospektində polis əməkdaşlarının qanuni tələbinə tabe olmamışdır. Bütün bunlar məhkəməyə Şəxs hərəkətlərində ictimai qaydanın mühafizə vəzifələrini icra edərkən qanuni tələb irəli sürən polis işçisinə tabe olmama kimi halların, yəni İXM-in 535.1-ci maddəsində nəzərdə tutulmuş inzibati xətanın tərkibinin olması barədə nəticəyə gəlməyə əsas verir. İXM-in: 3-cü maddəsində inzibati məsuliyyətin əsasları müəyyən edilmişdir. Həmin maddənin tələbinə əsasən yalnız İXM-lə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir; 4-cü maddəsinə əsasən İXM insan və vətəndaş hüquqlarına və azadlıqlarına hörmət edilməsi, qanunçuluq, qanun qarşısında bərabərlik, təqsirsizlik prezumpsiyası, ədalətlilik və inzibati xətaların qarşısının alınması prinsiplərinə əsaslanır; 6.1-ci maddəsinə əsasən inzibati xətalara görə inzibati tənbeh İXM-ə uyğun olaraq tətbiq edilir; 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına uyğun, qanuni və əsaslı olmalıdır; 12.1-ci maddəsinə əsasən İXM-lə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Məhkəmə inzibati tənbeh tədbiri tətbiq edərkən Azərbaycan Respublikasının İnzibati Xətalar Məcəlləsinin 32-ci maddəsinə əsasən Şəxs əməlini səmimi etiraf etməklə peşman olmasını məsuliyyəti yüngülləşdirən hallar kimi nəzərə alır. Azərbaycan Respublikasının İnzibati Xətalar Məcəlləsinin 33-cü maddəsinə əsasən Şəxs əməlində məsuliyyəti ağırlaşdıran hallar müəyyən edilməmişdir. Məhkəmə barəsində inzibati icraat aparılan şəxs Şəxs barəsində inzibati tənbeh tətbiq edərkən onun törətdiyi inzibati xətanın xarakterini və ictimai təhlükəlilik dərəcəsini, inzibati xəta törədən şəxsin şəxsiyyətini, onun əmlak vəziyyətini, o cümlədən Azərbaycan Respublikasının İXM-nin 32 və 33-cü maddələrində nəzərdə tutulmuş məsuliyyəti yüngülləşdirən və ağırlaşdıran halları nəzərə alır. Məhkəmə, İXM-in 31.2-ci maddəsinə əsasən Şəxs barəsində inzibati tənbeh tətbiq edərkən, xətanın xarakterini, onun şəxsiyyətini xarakterizə edən halları, onun təqsirinin dərəcəsini, əmlak vəziyyətini, habelə məsuliyyəti yüngülləşdirən halları və ağırlaşdıran halların olmamasını nəzərə alır və hesab edir ki, Şəxs İXM-in 535.1-ci maddəsində nəzərdə tutulan inzibati xətanı törətməkdə təqsirli bilinərək inzibati həbs növündə inzibati tənbeh tədbiri tətbiq edilməlidir. Məhkəmə qeyd edir ki, inzibati həbs növündə tənbeh tədbiri inzibati tənbehin məqsədlərinə, yəni Şəxs qanunlara əməl edilməsi ruhunda tərbiyələndirməyə, habelə onun tərəfindən yeni inzibati xəta törədilməsinin qarşısını almağa uyğundur. Şəxs həbsetməsinin əvvəlinin hansı vaxtdan hesablanmasına dair məhkəmə qeyd edir ki, Şəxs azadlığının faktiki məhdudlaşdırıldığı vaxtdan yəni 08 sentyabr 2021-ci il tarixdən, saat 20:00-dan hesablanmalıdır. Qeyd olunanlara əsasən və İXM-in 40, 43, 48-51, 61, 114, 128-131-ci maddələrini rəhbər tutaraq, məhkəmə QƏRARA ALDİ: Şəxs İXM-in 535.1-ci maddəsində nəzərdə tutulan inzibati xətanı törətməkdə təqsirli bilinsin və onun barəsində 15 (on beş) gün müddətində inzibati həbs növündə inzibati tənbeh tədbiri tətbiq edilsin. İnzibati həbs haqqında qərar dərhal icra edilsin. Həbsetmənin əvvəli 08 sentyabr 2021-ci il saat 20:00-dan hesablansın. Şəxs Azərbaycan Respublikası Daxili İşlər Nazirliyi tərəfindən müəyyən edilən yerdə mühafizə altında saxlanılsın. Qərarın icrası Azərbaycan Respublikası Daxili İşlər Nazirliyi Yasamal rayon Polis İdarəsinin 26-cı Polis Bölməsinə həvalə edilsin. Qərarın surəti təqdim edildiyi və ya alındığı gündən 10 gün müddətində Bakı Şəhəri Yasamal Rayon Məhkəməsi vasitəsilə və ya bilavasitə Bakı Apellyasiya Məhkəməsinə şikayət verilə bilər. Hakim: Rauf Daşdəmirov