Bakı Şəhəri Yasamal Rayon Məhkəməsi Qərar — İş №3(004)-2171/2020

Azərbaycan Respublikası adından QƏRAR Bakı şəhəri İş № 3(004)-2171/2020 10.09.2020 BAKI ŞƏHƏRİ YASAMAL RAYON MƏHKƏMƏSİ Hakim Daşdəmirov Rauf Məhərrəməli oğlunun sədrliyi, İsmayılzadə Turan Tahir qızının katibliyi, inzibati xəta haqqında protokolu tərtib edən Yasamal RPİ-nin 27-ci PB-nin sahə inspektoru X1, barəsində inzibati xəta haqqında iş üzrə icraat aparılan şəxs Rəhmanov Şəxs və onun müdafiəçisi X2 iştirakı ilə, xx.xx.1987-ci ildə Bakı şəhərində anadan olmuş, Azərbaycan Respublikası vətəndaşı, subay, Bakı şəhəri, Topçubaşov küçəsi, ev 88-də qeydiyyatda olan və yaşayan Rəhmanov Şəxs barəsində Azərbaycan Respublikası İnzibati Xətalar Məcəlləsinin 510-cu maddəsi ilə Bakı şəhəri Yasamal rayon Polis İdarəsinin 27-ci Polis Bölməsindən daxil olmuş inzibati xəta haqqında işə baxaraq, MÜƏYYƏN ETDİ: Rəhmanov Şəxs xx.xx.2020-ci il tarixdəsaat 03:00 radələrində Ş.Qurbanov küçəsində avtomobilin qadağan olunmuş yerdə saxladığından polis əməkdaşı həmin avtomobilin düzgün saxlanılmadığını irad bildirərkən, o isəpolislərə uca səslərlə “siz kimsiz, gedin işinizlə məşğul olun” deyərək, “sizinlə mülki geyimdə söhbət edəcəm” bildirmiş, bir neçə şəxs halında polisin üzərinə gələrək, polislə mübahisə yaratmış, səs küy salaraq, ətrafdakıların diqqətini özünə cəlb edərək, ictimai qaydanı pozmuşdur, uca səslərlə polisi nüfuzdan salan hərəkətlər etmiş, polis əməkdaşları ona iradlarını bildirmiş, lakin o polislərə məhəl qoymamış, öz hərəkətlərini davam etdirmiş, bununla da ictimai qaydanı pozaraq xırda xuliqanlıq etmişdir. Bununla da o, İXM-in 510-cu maddəsində nəzərdə tutulmuş inzibati xətanı törətmişdir.Onun barəsində Azərbaycan Respublikası Daxili İşlər Nazirliyinin Bakı şəhəri Yasamal rayon Polis İdarəsinin 27-ci Polis Bölməsi tərəfindən xx.xx.2020-ci il tarixli, MN ******* saylı inzibati xəta haqqında protokol tərtib olunmuşdur. Rəhmanov Şəxs məhkəməyə verdiyi izahatında göstərdi ki, DYP əməkdaşları avtomobilin düzgün saxlanılmadığını irad bildirmiş, həmin yerdə o, dostu və 2 nəfər qadın tanışları olmuşdur. Gənc olduqlarından polisin onlara irad bildirməsindən aralarında mübahisə yaranmışdır. Törətdiyi əmələ görə yol polisi əməkdaşlarından üzr istəyir, əməlindən peşmandır, yüngül cəza verilməsini xahiş etdi. Protokol tərtib etmiş Bakı şəhəri Yasamal rayon Polis İdarəsinin 27-ci Polis Bölməsinin sahə inspektoru Faiq Aslanov məhkəməyə verdiyi izahatında bildirdi ki, Rəhmanov Şəxs xx.xx.2020-ci il tarixdəsaat 03:00 radələrində Ş.Qurbanov küçəsində avtomobilin qadağan olunmuş yerdə saxladığından YPX əməkdaşı həmin avtomobilə yaxınlaşıb nişanın tələbinin pozduğunu izah etmiş, Ə.Rəhmanov “siz kimsiz, gedin işinizlə məşğul olun” deyərək, “sizinlə mülki geyimdə söhbət edəcəm” bildirmiş, polislə mübahisə yaratmış, səs küy salaraq, ətrafdakıların diqqətini özünə cəlb edərək, ictimai qaydanı pozmuşdur, uca səslərlə polisi nüfuzdan salan hərəkətlər etmiş, polis əməkdaşları ona iradlarını bildirmiş, lakin o polislərə məhəl qoymamış, öz hərəkətlərini davam etdirmiş, bununla da ictimai qaydanı pozaraq xırda xuliqanlıq etmişdir. Bu barədə Bakı şəhər BPİ DYP-nin əməkdaşları raport tərtib etmişlər və materiallar əsasında inzibati xəta haqqında protokol tərtib edilmişdir. İXM-in 510-cu maddəsinə əsasən xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlər inzibati xəta kimi müəyyən edilmişdir. Həmin xətaya görə inzibati cərimə və ya inzibati həbs nəzərdə tutulmuşdur. İXM-in 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. İş materiallarında olan Bakı şəhəri BPİ DYPİ-yə bilavasitə tabe olan YPX Alayının və Yasamal RPİ-nin PDXB-nin əməkdaşları N.Sadıyev, F.Əhmədov, Yasamal PRİ PPXBnin polis nəfərləri A.Kazımov, Ə.Əsədbəylinin tərəfindən tərtib edilmiş xx.xx.2020-ci il tarixli raportlarla Rəhmanov Şəxs hazırkı inzibati xəta haqqında protokolda göstərilən əməli törətməsi öz əksini tapmışdır. Beləliklə sadalananlara əsasən Rəhmanov Şəxs həmin inzibati xətanı törətməsi onun barəsində tərtib olunmuş yuxarıda qeyd edilən inzibati xəta haqqında protokol, özünün məhkəməyə verdiyi izahatı, yuxarıda qeyd edilən raportla tam sübuta yetirilir. İnzibati məsuliyyəti istisna edən və icraatı rədd edən hallar yoxdur. İş materiallarındakı xx.xx.2020-ci il tarixli tutma protokoluna əsasən Ə.Rəhanov xx.xx.2020-ci il tarixdə saat 04:15 radələrində tutulmuşdur. İXM-in 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə törədilmiş inzibati xətaya görə, xəta törətmiş şəxsin əməlini etiraf etməsini, əməlindən peşman olmasını nəzərə alaraq sanksiyada nəzərdə tutulmuş cərimə növündə inzibati tənbeh verilməsini məqsədə müvafiq hesab edir. Həmçinin İXM-nin 31.4-cü maddəsinə əsasən həmin Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yalnız yuxarı həddi müəyyən edildikdə, tətbiq edilən inzibati tənbeh onun yuxarı həddinin dörddə birindən az ola bilməz. İXM-nin 31.4-1-ci maddəsinə əsasən inzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz. Ona görə də şəxs saxlanılarkən və tutularkən həbsdə qaldığı müddət nəzərə alınmaqla tənbeh yüngülləşdirilərək, tənbehin həddi müəyyən edilir. Yuxarıda göstərilənlərə və Azərbaycan Respublikası İnzibati Xətalar Məcəlləsinin 40, 43, 48-51, 114,128-130-cu maddərini rəhbər tutaraq, QƏRARA ALDİ: Rəhmanov Şəxs Azərbaycan Respublikası İnzibati Xətalar Məcəlləsinin 510-cu maddəsində nəzərdə tutulmuş inzibati xətaları törətməkdə təqsirli bilinərək onun barəsində 100 (yüz) manat məbləğində inzibati cərimə növündə tənbeh tədbiri tətbiq edilsin. Rəhmanov Şəxs həbsdən dərhal azad edilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı şəhəri Yasamal Rayon Məhkəməsi vasitəsilə və ya birbaşa Bakı Apellyasiya Məhkəməsinə apellyasiya şikayəti və ya protesti verilə bilər. Hakim: Rauf Daşdəmirov