Bakı Şəhəri Yasamal Rayon Məhkəməsi Qərar — İş №3(004)-2230/2024

Azərbaycan Respublikası adından QƏRAR Bakı şəhəri İş № 3(004)-2230/2024 15.05.2024 BAKI ŞƏHƏRİ YASAMAL RAYON MƏHKƏMƏSİ Bakı şəhəri Yasamal Rayon Məhkəməsinin hakimi Məmmədli Orxan Qədir oğlunun sədrliyi, X1 iclas katibliyi ilə Hüquqi ünvanı Bakı şəhəri, Yasamal rayonu, Şəhriyar küçəsi, mənzil 40 ünvanında qeydiyyatda olan Şəxs MMC (VÖEN: **********) barəsində Azərbaycan Respublikası İnzibati Xətalar Məcəlləsinin 482.2-ci maddəsi ilə Azərbaycan Respublikası Dövlət Gömrük Komitəsi Bakı Baş Gömrük İdarəsindən daxil olmuş inzibati xəta haqqında işə baxaraq, MÜƏYYƏN ETDİ: "xxxx" MMC-nin ünvanına 31AB627/31AB628 nömrə nişanlı yük avtomobili ilə göndərilmiş, Mehaz-49 saylı xx.xx.2024-cü il tarixli invoys sənədi ilə müşayiət edilən yüklər **********0151 sorğu nömrəli xx.xx.2024-cü il tarixli gömrük bəyannaməsi ilə gömrük orqanına bəyan edilmişdir. Sərhəd gömrük orqanının apardığı qeydə əsasən xx.xx.2024cü il tarixində idxalatçının anbarında şirkətin nümayəndəsinin və 2 nəfər hal şahidinin iştirakı ilə gömrük orqanı tərəfindən mallara gömrük yoxlaması keçirilmişdir. Yoxlama zamanı, sözügedən bəyannamədə qeyd edilməyən 7 qutuda ümumi brutto çəkisi 77 kq, ümumi netto çəkisi isə 73.5 kq olan pendir aşkar edilmişdir. İnzibati xətanın bilavasitə obyekti olan 73.5 kq olan pendir yükünün qiymətləndirilməsi üçün xüsusi biliyə malik ekspertlər tərəfindən ekspertiza tədqiqatının aparılması zərurəti yarandığından 3-33-1100/2-001722/2024 nömrəli xx.xx.2024-cü il tarixli məktubla “Azərekspertiza” Birliyinə müraciət edərək iş üzrə ekspertiza təyin edilməsi haqqında qərardada əsasən ekspertizanın aparılması 'Azərekspertiza” Birliyinin ekspertlərinə həvalə edilmişdir. “Azərekspertiza” Birliyindən xx.xx.2024-cü il tarixdə Bakı Baş Gömrük idarəsinə daxil olmuş 37 nömrəli ekspert aktına əsasən ekspertiza tədqiqatına təqdim edilmiş 1 kq pendir yükünün xx.xx.2024-cü il tarixə olan orta bazar topdansatış qiymətinin təxminən 10 manat, 73.5 kq-nın orta bazar topdansatış qiymətinin isə 735 (yeddi yüz otuz beş) manat olduğu müəyyən edilmişdir. Beləliklə, aparılan araşdırma nəticəsində müəyyən edilmişdir ki, Şəxs MMC (VÖEN:**********) tərəfindən gömrük orqanına düzgün bəyan olunmayan 73.5 kq “pendir” yükünün orta bazar qiyməti 735 (yeddi yüz otuz beş) manat manat təşkil edir. Bununla da o, İXM-in 482.2-ci maddəsində nəzərdə tutulmuş inzibati xətanı törətmişdir. Onun barəsində xx.xx.2024-cü il tarixli, № 00100-00971/24 (EP 0118730) saylı inzibati xəta haqqında protokol tərtib olunmuşdur. Barəsində inzibati xətalar haqqında iş üzrə icraat aparılan şəxsə və protokol tərtib etmiş səlahiyyətli orqana (vəzifəli şəxs) məhkəmə iclasının vaxtı və yeri barədə məlumat verilməsinə baxmayaraq, məhkəmə iclasına gəlməmiş, nümayəndələrini göndərməmiş və gəlməmələrinin üzrlü səbəbləri barədə məhkəməyə heç bir məlumat verməmişlər. Ona görə də məhkəmə onların iştirakı olmadan işə baxılmasını mümkün hesab edir. İXM-in 482.2-ci maddəsinə əsasən Azərbaycan Respublikasının gömrük sərhədindən keçirilən malların və nəqliyyat vasitələrinin düzgün bəyan edilməməsinə görə, yəni gömrük bəyannaməsində, təkrar ixrac bildirişində, qısa idxal (ixrac) bəyannaməsində, sadələşdirilmiş bəyannamədə, gömrük rəsmiləşdirilməsinə dair ərizədə və gömrük orqanlarının Azərbaycan Respublikasının Gömrük Məcəlləsinə uyğun olaraq tələb etdiyi digər sənədlərdə və məlumatlarda Azərbaycan Respublikasının gömrük sərhədindən keçirilən malları və nəqliyyat vasitələrini gömrük ödənişlərindən, habelə qanunvericiliklə müəyyənləşdirilmiş qadağan və məhdudiyyətlərdən azad etməyə, yaxud gömrük ödənişlərinin məbləğini azaltmağa əsas verən, malların və nəqliyyat vasitələrinin gömrük proseduru, miqdarı, sayı, gömrük dəyəri, mənşə ölkəsi barədə və ya digər düzgün olmayan məlumatların göstərilməsinə görə, bu az miqdarda olduqda inzibati xəta kimi müəyyən edilmişdir. Maddənin sanksiyasına əsasən inzibati xətanın bilavasitə obyekti olan mallar və nəqliyyat vasitələrinin dəyərinin otuz faizindən altmış faizinədək məbləğdə cərimə edilir. "xxxx" MMC-nin həmin inzibati xətanı törətməsi onun barəsində tərtib olunmuş yuxarıda qeyd edilən inzibati xəta haqqında protokolla və iş materiallarına əlavə edilmiş yuxarıda qeyd edilən gömrük bəyənnaməsi ilə tam sübuta yetirilir. İnzibati məsuliyyəti istisna edən və icraatı rədd edən hallar yoxdur. Yuxarıda göstərilənlərə və Azərbaycan Respublikası İnzibati Xətalar Məcəlləsinin 31, 40, 43, 48-51, 114, 128-130-cu maddərini rəhbər tutaraq, QƏRARA ALDİ: "xxxx" MMC İnzibati Xətalar Məcəlləsinin 482.2-ci maddəsi ilə təqsirli bilinərək, inzibati xətanın obyekti olmuş, 735 manatın 30% məbləğində, yəni 220,50 manat (iki yüz iyirmi manat 50 qəpik) məbləğində inzibati cərimə edilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı Şəhəri Yasamal Rayon Məhkəməsi vasitəsilə və ya birbaşa Bakı Apellyasiya Məhkəməsinə apellyasiya şikayəti və ya protesti verilə bilər. Sədrlik edən, Orxan Məmmədli