Bakı Şəhəri Yasamal Rayon Məhkəməsi Qərar — İş №3(004)-2757/2022

Azərbaycan Respublikası adından QƏRAR Bakı şəhəri İş № 3(004)-2757/2022 24.06.2022 BAKI ŞƏHƏRİ YASAMAL RAYON MƏHKƏMƏSİ Hakim Məmmədov Murad Akif oğlunun sədrliyi, Əlizadə Emin Kamil oğlunun katibliyi, şikayətçi X1 iştirakı ilə, Bakı şəhəri Yasamal RPİ-nin 28-ci PB-nin xx.xx.2021-ci il tarixli, EPQ ******* saylı inzibati tənbeh vermə haqqında qərarından X2 tərəfindən verilmiş şikayətə açıq məhkəmə iclasında baxaraq, məhkəmə MÜƏYYƏN ETDİ: X2 şikayətlə məhkəməyə müraciət edərək, Bakı şəhəri Yasamal RPİ-nin 28-ci PB-nin xx.xx.2021-ci il tarixli, EPQ ******* saylı inzibati tənbeh vermə haqqında qərarının ləğv edilməsini və barəsində başlanılmış inzibati iş üzrə icraata xitam verilməsini xahiş etmişdir. Şikayətçi ərizəsini onunla əsaslandırmışdır ki, o, Yasamal rayon Polis İdarəsinin 28-ci Polis Bölməsinin sahə rəisi X3 tərəfindən tərtib edilmiş xx.xx.2021-ci il tarixli, EPQ № ******* nömrəli "İnzibati tənbeh vermə haqqında" qərarı əsasında Azərbaycan Respublikasının İnzibati Xətalar Məcəlləsinin 211.3-cü maddəsində nəzərdə tutulmuş, inzibati xətanın törədilməsinə görə 200 (iki yüz) manat məbləğində cərimə olunmuşdur Yasamal rayon Polis İdarəsinin 28-ci Polis Bölməsi tərəfindən qəbul olunmuş xx.xx.2021-ci il tarixli, EPQ ******* nömrəli "İnzibati tənbeh vermə haqqında" Qərarını qanunsuz və əsassız hesab edir: Belə ki, bu inzibati xəta haqqında icraatdan onun bu yaxınlarda xəbəri olmuşdur. E-gov saytından haqqında olan inzibati protokollara baxarkən, EXP1162509 nömrəli inzibati xəta haqqında protokol ilə 200 (iki yüz) manat məbləğində cərimə olunduğumu öyrənmişdir. Bu cərimənin harada və necə olduğu barədə hər hansı bir fikri voxdur. Belə ki, Bakı Metropolitenində polis əməkdaşlarının aktiv koronavirus xəstəliyinin və yaxud vaksin sertifikatımın olub-olmamasını yoxlamaq məqsədi ilə bəzən şəxsiyyət vəsiqəmi istədikləri, onun da onlara vəsiqəni təqdim etdikdən adımı portala vurduqları biriki məqam olmuşdu. Lakin cərimə olunmağı haqqında ona hər hansı məlumat verilməmiş, ona inzibati protokol təqdim edilməmiş, və digər ciddi prosessual pozuntulara yol verilərək haqqında əsassız və cur.unsuz inzibati xəta haqqında icraat başlanılmışdır. İnzibati qərar və protokolda da onun imzasının olmaması öz növbəsində bunu təsdiq edir. İnzibati məsuliyyətə cəlb olunduğumu biləndən sonra o, bu protokolun hansı polis bölməsi tərəfindən tərtib edildiyini öyrənmək istəmiş. Buna görə ən yaxın polis bölməsinə gedib, haqqında olan inzibati protokolun hansı polis bölməsi tərəfindən tərtib edildiyini öyrənmişdir. İlk öncə ona verilən məlumat əsasında Yasamal rayonu 28-ci Polis Bölməsinə yaxınlaşmışdır. Ordan bildirdilər ki, cərimə ona Yasamal rayonu 26-cı Polis Bölməsi tərəfindən yazılmışdır. O da həmin göstəriş ilə 26-cı Polis Bölməsinə qərar və protokolun təqdim edilməsi üçün yaxınlaşmışdır. Halbuki bunu vətəndaşa təqdim etmək onların vəzifəsidir. 26-cı Polis Bölməsində isə yenidən bildirdilər ki, cərimə 28-ci Polis Bölməsi tərəfindən yazılmışdır. Bundan sonra yenidən 28-ci Polis Bölməsinə getmiş və ordan ona təkidlə cərimənin 26-cı Polis Bölməsi tərəfindən yazıldığını bildirdilər. O, Sumqayıtda yaşayır. Göründüyü kimi sözügedən inzibati iş üzrə qərar və protokolun ona təqdim edilməsində süni süründürməçiliyə məruz qalmışdır. Daha sonra bu barədə Daxili İşlər Nazirliyinə ünvanladığı şikayət ərizəsi əsasında xx.xx.2022-ci il tarixdə Yasamal Rayon Polis İdarəsinin məsul şəxsləri onu qəbul etmiş, yazılı izahatını aldıqdan sonra qərar və protoklu ona təqdim etmişlər. Göstərilənlərə əsasən barəsində tərtib edilmiş Bakı şəhəri Yasamal RPİ-nin 28-ci PB-nin xx.xx.2021-ci il tarixli, EPQ ******* saylı inzibati tənbeh vermə haqqında qərarının ləğv edilməsi və iş üzrə icraata xitam verilməsi barədə qərar qəbul edilməsini xahiş etmişdir. Məhkəmə iclasında iştirak edən şikayətçi Ə.Ə.Qarayev ərizəsinin mahiyyətinə uyğun izahat verərək şikayətinin təmin edilməsini xahiş etdi. Məhkəmə iclasının yeri və vaxtı barədə məlumat verilməsinə baxmayaraq Bakı şəhəri Yasamal RPİ-nin 28-ci PB-nin nümayəndəsi məhkəmə iclasında iştirak etməmiş və iştirak etməməsinin səbəbi barədə məlumat verməmişdir. Məhkəmə işə onun iştirakı olmadan baxılmasını mümkün hesab etmişdir. Məhkəmə proses iştirakçısını dinləyib, şikayət ərizəsini və digər iş materiallarını araşdıraraq hesab edir ki, şikayət təmin olunmalıdır. Belə ki, iş materiallarına əlavə edilmiş xx.xx.2021-ci il tarixli, EXP ******* saylı protokoldan görünür ki, Ə.Ə.Qarayev xx.xx.2021-ci il tarixdə Bakı şəhəri, B.Vahabzadə məhəllə 555 ünvanında olan zaman Azərbaycan Respublikasının İnzibati Xətalar Məcəlləsinin 211.3-cü maddəsində nəzərdə tutulmuş inzibati xətanı törətmişdir. İş materiallarına əlavə edilmiş Bakı şəhəri Yasamal RPİ-nin 28-ci PB-nin xx.xx.2021ci il tarixli, EPQ ******* saylı inzibati tənbeh vermə haqqında qərarından görünür ki, Ə.Ə.Qarayev Azərbaycan Respublikasının İnzibati Xətalar Məcəlləsinin 211.3-cü maddəsində nəzərdə tutulan inzibati xətanı törətməkdə təqsirli bilinərək 200 manat məbləğində inzibati cərimə edilmişdir. Beləliklə, məhkəmə iclasında müəyyən edilmişdir ki, Ə.Ə.Qarayev xx.xx.2021-ci il tarixdə Bakı şəhəri, B.Vahabzadə məhəllə 555 ünvanında olan zaman barəsində EXP ******* saylı inzibati xəta haqqında protokol tərtib edilmiş, daha sonra Bakı şəhəri Yasamal RPİ-nin 28-ci PB-nin xx.xx.2021-ci il tarixli, EPQ ******* saylı inzibati xəta haqqında iş üzrə qərarı ilə sonuncu Azərbaycan Respublikasının İnzibati Xətalar Məcəlləsinin 211.3-cü maddəsində nəzərədə tutulan inzibati xətanı törətməkdə təqsirli bilinərək 200 manat məbləğində inzibati cərimə edilmişdir. Qeyd edilən qərar qəbul edilərkən Ə.Ə.Qarayevə istinad edilən inzibati xətanın törədilməsini təsdiq edən heç bir sübut araşdırılmamış, bundan əlavə hazırki işə məhkəmədə baxılarkən Bakı şəhəri Yasamal RPİ-nin 28-ci PB-nin nümayəndəsi məhkəmə prosesində iştirak etməmiş və Ə.Ə.Qarayevə istinad edilən inzibati xətanın törədilməsini təsdiq edən hər hansı sübutu məhkəməyə təqdim etməmişdir. Barəsində inzibati tənbeh vermə haqqında qərar qəbul edilmiş şəxs Ə.Ə.Qarayev isə ona istinad edilən inzibati xəta hadisəsini törətmədiyini bildirmişdir. Məhkəmə qeyd etməyi zəruri hesab edir ki, hər hansı şəxsin inzibati xəta törədibtörətməməsini sübut etmək vəzifəsi səlahiyyətli dövlət orqanının üzərinə düşür. İndiki halda isə Ə.Ə.Qarayevə istinad edilən inzibati xəta hadisəsinin törədilməsini təsdiq edən heç bir mötəbər sübut məhkəməyə təqdim edilməmişdir. Belə olan halda məhkəmə hesab edir ki, Ə.Ə.Qarayevin təqsiri Azərbaycan Respublikasının İnzibati Xətalar Məcəlləsində nəzərdə tutulmuş qaydada sübuta yetmədiyi üçün o, təqsirsiz hesab edilməli və barəsində başlanılmış inzibati iş üzrə icraata xitam verilməlidir. Belə ki, Azərbaycan Respublikasının İnzibati Xətalar Məcəlləsinin 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. Həmin Məcəllənin 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. Həmin Məcəllənin 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Həmin Məcəllənin 48-ci maddəsinə əsasən inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri və şəraiti aşkar etməkdən və inzibati xətaların qarşısını almaqdan ibarətdir. Həmin Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Həmin Məcəllənin 129.1.3-cü maddəsinin tələbinə əsasən inzibati xəta haqqında iş üzrə səlahiyyətli orqanın (vəzifəli şəxsin) qərarından məhkəməyə verilən şikayət - şikayət verən şəxsin yaşayış yeri və ya hüquqi şəxsin ünvanının olduğu yer üzrə rayon (şəhər) məhkəməsinə verilir. Həmin Məcəllənin 134.1.3-cü maddəsinə əsasən inzibati xəta haqqında iş üzrə qərardan verilən şikayət və ya protest baxıldıqda bu Məcəllənin 53-cü maddəsində nəzərdə tutulduğu hallarda qərarı ləğv edərək inzibati xəta haqqında iş üzrə icraata xitam verilməsi haqqında qərar qəbul edilir. Həmin Məcəllənin 53.0.1-ci maddəsinə əsasən inzibati xəta hadisəsi olmadıqda 53.0.2-ci maddəsinə əsasən isə inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Beləliklə, məhkəmə hesab edir ki, şikayətçi Ə.Ə.Qarayevin əməlində inzibati xəta tərkibi olmadığından onun şikayəti təmin edilməli, Bakı şəhəri Yasamal RPİ-nin 28-ci PBnin xx.xx.2021-ci il tarixli, EPQ ******* saylı inzibati tənbeh vermə haqqında qərarı ləğv edilməli və başlanmış inzibati iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 133-137-ci maddələrini rəhbər tutaraq, məhkəmə QƏRARA ALDİ: X1 şikayəti təmin olunsun. Bakı şəhəri Yasamal RPİ-nin 28-ci PB-nin xx.xx.2021-ci il tarixli, EPQ ******* saylı inzibati tənbeh vermə haqqında qərarı ləğv edilsin və başlanmış inzibati iş üzrə icraata xitam verilsin. Qərardan rəsmi qaydada verildiyi gündən 10 (on) gün müddətində Bakı şəhəri Yasamal Rayon Məhkəməsi vasitəsi ilə Bakı Apellyasiya Məhkəməsinə apellyasiya şikayəti verilə bilər. Sədrlik edən:Murad Məmmədov