Bakı Şəhəri Yasamal Rayon Məhkəməsi Qərar — İş №3(004)-3338/2024

Azərbaycan Respublikası adından QƏRAR Bakı şəhəri İş № 3(004)-3338/2024 09.07.2024 BAKI ŞƏHƏRİ YASAMAL RAYON MƏHKƏMƏSİ Hakim Seyidov Mirsadiq Mirsəttar oğlunun sədrliyi, Nəcəfli İlham Əmrah oğlunun katibliyi, Azərbaycan Respublikasının Fövqəladə Hallar Nazirliyi X4i Xidməti 2-ci Ərazi X4i İdarəsinin nümayəndəsi X1 iştirakı ilə, Şəxs MTK barəsində Azərbaycan Respublikasının İXM-in 518.1-ci maddəsi ilə Azərbaycan Respublikasının Fövqəladə Hallar Nazirliyi X4i Xidməti 2-ci Ərazi X4i İdarəsindən daxil olmuş inzibati xəta haqqında iş materiallarına açıq məhkəmə iclasında baxaraq MÜƏYYƏN ETDİ: İnzibati xəta haqqında MN ******* saylı, 07 iyun 2024-cü il tarixli protokola əsasən Yasamal rayonu, M.Rahim küçəsi, ev 4A ünvanında yerləşən Şəxs MTK-a məxsus yaşayış binasında YTM keçirilən zaman YTQ №02-2002, 2.9.4-2.3.14, 2.4-2.4.31, 4.1-4.6 bəndlərinin tələblərinin pozulması aşkar edilmişdir. Bununla da Şəxs MTK tərəfindən Azərbaycan Respublikasının İXM-in 518.1-ci maddəsi ilə nəzərdə tutulmuş inzibati xəta törədilmişdir. Məhkəmə iclasında iştirak edən Azərbaycan Respublikasının Fövqəladə Hallar Nazirliyi X4i Xidməti 2-ci ərazi X4i idarəsinin nümayəndəsi X2 inzibati xəta haqqında protokolun məzmununa uyğun izahat verərək X4 Xidməti olaraq Şəxs MTK-ya məxsus yaşayış binasında yoxlama keçirildiyini, yoxlama zamanı binanın elektrik təsərrüfatının istismar vəziyyəti, isitmə və havalandırma sistemlərinin istismar vəziyyəti və yanğın baş verdiyi hallarda insanların təhlükəsizliyinin təmin edilməsi istiqamətində həyata keçirilən tədbirlərlə bağlı qaydaların pozulduğunun müəyyən edildiyini, qeyd olunanları nəzərə alaraq, Şəxs MTK barəsində inzibati tənbeh tədbirinin tətbiq edilməsini xahiş etmişdir. Əlavə olaraq protokolun həmin ünvana göndərildiyini və qəbul olunmasından imtina edildiyini, yoxlamağa şərait yaradıldığını və heç bir maneə olmadığını bildirmişdir. Məhkəmə iclasının vaxtı və yeri barədə qanunamüvafiq qaydada məlumat verilməsinə baxmayaraq barəsində inzibati qaydada icraat aparılan hüquqi şəxsin səlahiyyətli nümayəndəsi gəlməmiş, gəlməməsinin səbəbləri barədə məhkəməyə məlumat verməmişdir. Məhkəmə inzibati işə barəsində inzibati qaydada icraat aparılan hüquqi şəxsin nümayəndəsinin iştirakı olmadan baxılmasını mümkün hesab etmişdir. İş materiallarında olan və məhkəmə baxışında tədqiq edilmiş: Azərbaycan Respublikasının Fövqəladə Hallar Nazirliyi X4i Xidməti tərəfindən qəbul edilmiş “Yanğın-texniki müayinənin aparılması haqqında” 2619 saylı, 24 may 2024-cü il tarixli qərardan görünür ki, Şəxs MTK-a məxsus ünvan 1 ünvanında yerləşən yüksək mərtəbəli yaşayış binasında planlı yoxlamanın aparılması qərara alınmışdır. 2619 nömrəli, 06 iyun 2024-cü il tarixli “Yanğın-texniki müayinə aktı”ndan və “Yanğın-texniki müayinə materiallarına baxılmasının nəticələri üzrə” 2619 saylı, 11 iyun 2024-cü il tarixli qərardan görünür ki, yaşayış binasında tikinti-yaşayış kooperativlərinin, mehmanxanaların və yataqxanaların, eləcə də inzibati müəssisələrin elektrik təsərrüfatının istismar vəziyyətinin, tikinti-yaşayış kooperativlərinin, mehmanxanaların və yataqxanaların, eləcə də inzibati müəssisələrinin isitmə və havalandırma (ventilyasiya) sistemlərinin istismar vəziyyətinin, tikinti-yaşayış kooperativlərinin, mehmanxanaların və yataqxanaların, eləcə də inzibati müəssisələrdə yanğınsöndürmə vasitələrinin istismar vəziyyəti YTQ-na uyğun olmadığı aşkar edilmiş, həmçinin tikinti-yaşayış kooperativlərinin, mehmanxanaların və yataqxanaların, eləcə də inzibati müəssisələrdə yanğın baş verdiyi halda insanların təhlükəsizliyinin təmin edilməsi istiqamətində tədbirlər həyata keçirilməmişdir.. İnzibati xəta haqqında MN ******* saylı, 07 iyun 2024-cü il tarixli protokoldan görünür ki, Yasamal rayonu, M.Rahim küçəsi, ev 4A ünvanında yerləşən Şəxs MTK-a məxsus yaşayış binasında YTM keçirilən zaman YTQ №02-2002, 2.9.4-2.3.14, 2.4-2.4.31, 4.1-4.6 bəndlərinin tələblərinin pozulması aşkar edilmiş, protokolun surəti 11 iyun 2024-cü il tarixli, 3-18-63/2-3310/2024 nömrəli məktubla MTK-nın ünvanına göndərilmişdir. Azərbaycan Respublikası İnzibati Xətalar Məcəlləsinin: 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. 12-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur; 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. 518.1-ci maddəsinə əsasən mülkiyyət formasından asılı olmayaraq müəssisə, idarə və təşkilatlarda, ictimai yerlərdə, anbarlarda, yataqxanalarda və ya digər yaşayış sahələrində, meşələrdə və nəqliyyatda yanğın təhlükəsizliyi standartlarının, normalarının və qaydalarının tələblərinin pozulmasına və ya yerinə yetirilməməsinə görə fiziki şəxslərə xəbərdarlıq edilir və ya onlar iyirmi manatdan otuz manatadək məbləğdə cərimə edilir, vəzifəli şəxslərə xəbərdarlıq edilir və ya onlar yüz manatdan yüz əlli manatadək məbləğdə, hüquqi şəxslər üç yüz əlli manatdan beş yüz manatadək məbləğdə cərimə edilir. Məhkəmə hesab edir ki, iş materiallarında olan sübutlarla Şəxs MTK-ın AR İXM-nin 518.1-ci maddəsi ilə təqsirli olması sübuta yetirildiyindən hüquqi şəxs barəsində inzibati tənbeh tədbiri tətbiq edilməlidir. Azərbaycan Respublikasinin İnzibati Xətalar Məcəlləsinin: 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. 21-ci inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. 31.3-cü maddəsinə əsasən hüquqi şəxslər barəsində inzibati tənbeh tətbiq edilərkən, inzibati xətanın xarakteri, inzibati xəta nəticəsində hüquqi şəxsin əldə etdiyi xeyrin həcmi və ya onun maraqlarının təmin edilməsinin xarakteri və dərəcəsi, hüquqi şəxsi xarakterizə edən hallar, o cümlədən onun maliyyə və əmlak vəziyyəti, xeyriyyəçilik və ya digər ictimai faydalı fəaliyyətlə məşğul olması, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə inzibati icraat aparılan Şəxs MTK barəsində inzibati tənbeh tətbiq edərkən törədilmiş inzibati xətanın xarakterini, hüquqi şəxsin əmlak vəziyyətini, məsuliyyətini yüngülləşdirən və ağırlaşdıran halların olmadığını nəzərə alaraq belə qənaətə gəlir ki, Şəxs MTK barəsində AR İXM-nin 518.1-ci maddəsinin sanksiyasının hədləri daxilində müəyyən məbləğdə inzibati cərimə növündə inzibati tənbeh tədbiri tətbiq edilməlidir. Göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 48-51, 53, 55, 114, 115, 128-130-cu maddələrini rəhbər tutaraq QƏRARA ALDİ: Şəxs MTK Azərbaycan Respublikası Azərbaycan Respublikası İnzibati Xətalar Məcəlləsinin 518.1-ci maddəsi ilə nəzərdə tutulmuş inzibati xətanı törətməkdə təqsirli bilinərək barəsində 350 manat məbləğində inzibati cərimə növündə inzibati tənbeh tədbiri tətbiq edilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı şəhəri Yasamal Rayon Məhkəməsi vasitəsilə və ya birbaşa Bakı Apellyasiya Məhkəməsinə apellyasiya şikayəti verilə bilər. Hakim: Mirsadiq Seyidov