Bakı Şəhəri Yasamal Rayon Məhkəməsi Qərardad — İş №3(004)-384/2021

Azərbaycan Respublikası adından QƏRARDAD Bakı şəhəri İş № 3(004)-384/2021 25.01.2021 BAKI ŞƏHƏRİ YASAMAL RAYON MƏHKƏMƏSİ Bakı şəhəri Yasamal Rayon Məhkəməsinin hakimi Hüseyn Akif oğlu Səfərov Şikayətçi Məlikov Zöhrab Məlikrza oğlunun Azərbaycan Respublikası Ekologiya və Təbii Sərvətlər Nazirliyinin Dövlət Ekspertiza Agentliyinin MN ******* saylı, xx.xx.2020-ci il tarixli inzibati xəta haqqında protokol əsasında qəbul edilmiş MN ******* saylı, xx.xx.2021ci il tarixli inzibati qərarından verdiyi şikayətə baxaraq, MÜƏYYƏN ETDİ: Yuxarıda qeyd edilən şikayət məhkəməyə daxil olmuşdur. Şikayəti və təqdim edilmiş sənədləri nəzərdən keçirərək hesab edirəm ki, şikayətə baxılması qeyri-mümkündür, ona görə də geri qaytarılmalıdır. Belə ki, Azərbaycan Respublikası İnzibati Xətalar Məcəlləsinin 129.1.3-cü maddəsinin şərh olunmasına dair Azərbaycan Respublikası Konstitusiya Məhkəməsinin Plenumunun xx.xx.2020-ci il tarixli qərarında müəyyən edilmişdir ki, qanunverici tərəfindən Azərbaycan Respublikası İnzibati Xətalar Məcəlləsinin 129.1.3-cü maddəsində dəyişikliklər edilənədək səlahiyyətli orqanın (vəzifəli şəxsin) qərarından məhkəməyə şikayət həmin Məcəllənin 110.1-ci maddəsində müəyyən olunmuş qaydaya uyğun olaraq inzibati xətanın törədildiyi və yaxud barəsində qərar çıxarılmış şəxsin vəsatətinə əsasən onun yaşadığı yer üzrə verilə bilər. Həmçinin inzibati xəta haqqında iş üzrə qərardan verilən şikayətə baxmağa hazırlıq zamanı ərazi üzrə məhkəmə aidiyyəti, barəsində qərar çıxarılmış şəxsin “Yaşayış yeri və olduğu yer üzrə qeydiyyat haqqında” Azərbaycan Respublikası Qanununun 3-cü maddəsində əks olunan yaşayış yerinin müəyyən edilməsi barədə sənədlərdə və (və ya) onların elektron daşıyıcısında göstərilən yaşayış yeri üzrə müəyyən edilir. Hazırkı iş üzrə barəsində şikayət verilmiş qərardan və şikayətin məzmunundan görünür ki, barəsində şikayət verilən inzibati xəta Yasamal rayonu ərazisində törədilməmişdir. İnzibati xəta Qaradağ rayon ərazisində törədilmişdir. Bundan əlavə iş üzrə müəyyən edilir ki, Məlikov Zöhrab Məlikrza oğlunun şəxsiyyət vəsiqəsi məlumatlarına əsasən qeydiyyat və yaşayış ünvanı Bakı şəhəri, Qaradağ rayonu, Qobustan qəsəbəsi, N.Niftəliyev küçəsidir. Qeyd edilənlərə əsasən hazırkı şikayətin ərazi üzrə məhkəmə aidiyyəti Yasamal Rayon Məhkəməsinə aid deyildir. Çünki “Yaşayış yeri və olduğu yer üzrə qeydiyyat haqqında” Qanunun 3-cü maddəsinə əsasən yaşayış yerini müəyyən edən sənəd Azərbaycan Respublikası vətəndaşı barədə -Azərbaycan Respublikası vətəndaşının şəxsiyyət vəsiqəsi və ya fərdi identifikasiya kartıdır. Şəxsin yaşayış yerinin müəyyən edilməsi üçün ondan əlavə hər hansı digər sənəd (arayış) tələb edilə bilməz. Beləliklə, həmin şikayət inzibati xəta haqqında iş üzrə qərardan şikayət verilməsi qaydası pozulmaqla verilmiş, şikayətə Yasamal Rayon Məhkəməsində baxıla bilməz. Həmçinin hazırkı şikayətin ərazi üzrə məhkəmə aidiyyəti alternativ olduğundan, həmin alternativ məhkəmələrdən birini seçmək hüququ, Azərbaycan Respublikası İnzibati Xətalar Məcəlləsinin 129.1.3-cü maddəsinin şərh olunmasına dair Azərbaycan Respublikası Konstitusiya Məhkəməsinin Plenumunun xx.xx.2020-ci il tarixli qərarında müəyyən edilmiş qaydada şikayət vermiş şəxsə aiddir. Bu hüququndan istifadə edib, ərazi üzrə məhkəmə aidiyyətini seçmək hüququ şikayətçiyə aid olduğundan, məhkəmə hazırkı şikayəti öz təşəbbüsü ilə aidiyyəti üzrə göndərə bilmir. Bu səbəbdən də şikayət əlavə edilmiş sənədlərlə birlikdə, şikayətçinin ərazi üzrə məhkəmə aidiyyətini seçmək hüququ təmin edilmək üçün geri qaytarılmalıdır. Şikayət inzibati xətanın törədildiyi yer üzrə məhkəməyə və yaxud barəsində qərar çıxarılmış şəxsin vəsatətinə əsasən onun yaşadığı yer üzrə verilə bilər. Konstitusiya Məhkəməsinin qeyd edilən qərarına əsasən inzibati xəta haqqında iş üzrə qərardan verilən şikayətə və ya protestə baxmağa hazırlıq zamanı qəbul edilən qərardaddan apellyasiya şikayəti verilə bilməz. Şərh olunanlara əsasən və Azərbaycan Respublikası İnzibati Xətalar Məcəlləsinin 128-137-ci maddələrinə əsasən, QƏRARA ALDİ: Şikayət və əlavə edilmiş sənədlər geri qaytarılsın. Şikayətçiyə izah edilir ki, qərarda göstərilən çatışmamazlıqlar aradan qaldırıldıqdan sonra, Azərbaycan Respublikası İnzibati Xətalar Məcəlləsinin 129.1.3-cü maddəsinin şərh olunmasına dair Azərbaycan Respublikası Konstitusiya Məhkəməsi Plenumunun xx.xx.2020-ci il tarixli qərarında müəyyən edilmiş ərazi üzrə məhkəmə aidiyyəti qaydalarına əməl etməklə məhkəməyə şikayət verilə bilər. Hakim, Hüseyn Səfərov