Bakı Şəhəri Yasamal Rayon Məhkəməsi Qərar — İş №3(004)-3965/2023

Azərbaycan Respublikası adından QƏRAR Bakı şəhəri İş № 3(004)-3965/2023 28.07.2023 BAKI ŞƏHƏRİ YASAMAL RAYON MƏHKƏMƏSİ Bakı şəhəri Yasamal Rayon Məhkəməsinin hakimi Hüseyn Akif oğlu Səfərovun sədrliyi, X1 iclas katibliyi ilə, X2 inzibati xəta haqqında iş üzrə qərardan verdiyi şikayətə baxaraq, MÜƏYYƏN ETDİ: X8 onun barəsində İXM-nin 192.1-ci maddəsi ilə qəbul edilmiş Azərbaycan Respublikası Əmək və Əhalinin Sosial Müdafiəsi Nazirliyi yanında X7 Xidmətinin Bakı Şəhər İdarəsinin qəbul etdiyi MN ******* saylı, xx.xx.2023-cü il tarixli qərarından şikayət verərək, Azərbaycan Respublikası Əmək və Əhalinin Sosial Müdafiəsi Nazirliyi yanında X7 Xidmətinin Bakı şəhər İdarəsinin rəis müavini X3 qəbul etdiyi MN ******* saylı xx.xx.2023cü il tarixli qərarın ləğv edilməsi və iş üzrə icraata xitam verilməsinə dair qərar qəbul edilməsini xahiş etmişdir. Şikayətçi şikayətində və məhkəmə iclasında verdiyi izahatında göstərmişdir ki, Azərbaycan Respublikası Əmək və Əhalinin Sosial Müdfiəsi Nazirliyi yanında X7 Xidməti Bakı şəhər idarəsinin MN ******* nömrəli, 13 iyul 2023-cü il tarixli inzibati tənbeh vermə haqqında qərarı ilə Azərbaycan Respublikası İnzibati Xətalar Məcəlləsinin 192.1-ci maddəsi ilə 4000 (dörd min) manat məbləğində cərimə edilmişdir. Həmin qərarın qəbul edilməsinə əsas fiziki şəxs kimi onun X5 əmək müqaviləsi (kontrakt) hüquqi qüvvəyə minmədən xx.xx.2023-cü il tarixdən xx.xx.2023-cü il tarixədək işlərin yerinə yetirilməsinə cəlb etməsi olmuşdur. Hesab edir ki, Azərbaycan Respublikası Əmək və Əhalinin Sosial Müdfiəsi Nazirliyi yanında X7 Xidməti Bakı şəhər idarəsinin MN ******* nömrəli, 13 iyul 2023-cü il tarixli inzibati tənbeh vermə haqqında qərarı ilə onun 4000 (dörd min) manat məbləğində cərimə olunması qanunsuz və əsassızıdır. Belə ki, Azərbaycan Respublikası İnzibati Xətalar Məcəlləsinin 192.1-ci maddəsinə əsasən Azərbaycan Respublikasının Əmək Məcəlləsində nəzərdə tutulmuş qaydada əmək müqaviləsi (kontraktı) hüquqi qüvvəyə minmədən işəgötürən tərəfindən fiziki şəxsləri hər hansı işlərin (xidmətlərin) yerinə yetirilməsinə cəlb edilməsinə görə-fiziki şəxslər min manatdan iki min manatadək məbləğdə, vəzifəli şəxslər üç min manatdan beş min manatadək məbləğdə, hüquqi şəxslər iyirmi min manatdan iyirmi beş min manatadək məbləğdə cərimə edilir. O, heç vaxt vəzifəli şəxs statusuna malik olmamışdır və buna görə də, onun vəzifəli şəxs qismində inzibati məsuliyyətə cəlb edilməsi qanunsuz və əsassızdır. Onu da qeyd etmək istəyir ki, Azərbaycan Respublikası İnzibati Xətalar Məcəlləsinin 192.1-ci maddəsi ilə 4000 (dörd min) manat məbləğində cərimə edilməsi ədalətsiz qərardır. Çünki o, əvvəllər heç vaxt inzibati və ya cinayət xarakterli əməl törətməmişdir. Həmçinin himayəsində iki azyaşlı övladı var. 4000 manat məbləğində cərimə edilməsi isə ailəsinin maddi vəziyyətini daha da ağırlaşdırır. Azərbaycan Respublikası Əmək və Əhalinin Sosial Müdafiəsi Nazirliyi yanında X7 Xidməti Bakı şəhər İdarəsinin MN ******* nömrəli, 13 iyul 2023-cü il tarixli qərarının ləğv edilməsini məhkəmədən xahiş etdi. Qərarından şikayət verilən orqan məhkəmə iclasının yeri və vaxtı barədə müvafiq qaydada xəbərdar edilsə də, məhkəmə iclasına gəlməmiş və gəlməməsinin üzürlü səbəbləri barədə məhkəməyə məlumat verməmişdir. Buna görə də, məhkəmə onun iştirakı olmadan işə baxılmasını mümkün hesab etmişdir. Məhkəmə izahatı dinləyib, şikayəti və materialları nəzərdən keçirdərək hesab edir ki, aşağıdakı əsaslara görə şikayət qismən təmin edilməlidir. Belə ki, iş materiallarında olan Azərbaycan Respublikası Əmək və Əhalinin Sosial Müdafiəsi Nazirliyi yanında X7 Xidmətinin Bakı Şəhər İdarəsinin MN ******* saylı, xx.xx.2023-cü il tarixli inzibati xəta haqqında iş üzrə qərarına əsasən vətəndaş X2 Azərbaycan Respublikası Əmək Məcəlləsində nəzərdə tutulmuş qaydada əmək müqaviləsi (kontraktı) hüquqi qüvvəyə minmədən xx.xx.2023-cü il tarixdən xx.xx.2023-cü il tarixədək işin yerinə yetirilməsinə cəlb edildiyindən, ona görə də X8 İXM-in 192.1-ci maddəsi ilə təqsirli bilinib 4000 manat cərimə edilmişdir. Həmin qərar MN ******* saylı, xx.xx.2020-ci il tarixli inzibati xəta haqqında protokol əsasında qəbul edilmişdir. Şikayətçinin şikayətində istinad etdiyi faktlardan da görünür ki, faktiki olaraq şikayət vermiş şəxs tərəfindən qərarda göstərilən əməlin törədilməsi təsdiq edilir. Şikayətdə həmçinin tətbiq edilmiş inzibati cərimənin həddindən də şikayətlənilir. Bununla bağlı qeyd edilməlidir ki, İXM-in 17-ci maddəsinə əsasən vəzifəli şəxslər öz vəzifələrinin yerinə yetirilməməsi və ya lazımınca yerinə yetirilməməsi ilə bağlı inzibati xətalara görə inzibati məsuliyyətə cəlb olunurlar. İXM-nin 17-ci maddəsinin qeydində hansı fiziki şəxslərin vəzifəli şəxs hesab edilməsi müəyyən edilmişdir. İXM-nin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. İXM-nin 192.1-ci maddəsinə əsasən Azərbaycan Respublikasının Əmək Məcəlləsində nəzərdə tutulmuş qaydada əmək müqaviləsi (kontraktı) hüquqi qüvvəyə minmədən işəgötürən tərəfindən fiziki şəxsləri hər hansı işlərin (xidmətlərin) yerinə yetirilməsinə cəlb edilməsi inzibati xəta kimi müəyyən edilmişdir, həmin xətaya görə fiziki şəxslər 1000 manatdan 2000 manatadək məbləğdə, vəzifəli şəxslər 3000 manatdan 5000 manatadək məbləğdə, hüquqi şəxslər 20000 manatdan 25000 manatadək məbləğdə cərimə edilir. Göründüyü kimi iş materialları ilə müəyyən edilir ki, şikayətçi hüquqi şəxs yaratmadan sahibkarlıq fəaliyüyəti ilə məşğul olan fiziki şəxsdir. Yəni şikayətçi hüquqi şəxsin rəhbəri deyildir. Şəxsin təqsirli bilindiyi maddənin sanksiyasında 3000 manatdan 5000 manatadək inzibati cərimə nəzərdə tutulsa da, hansı səbəbdən məhz şəxsin 3000 manat deyil, 4000 manat cərimə edilməsi əsaslandırılmamışdır. Qərarda hər hansı bir ağırlaşdlırıcı hala istinad edilməmişdir. İş materiallarına əsasən şəxs ailəli olmaqla, himayəsində xx.xx.2013-cü il təvəllüdlü X9, xx.xx.2016-cı il təvəllüdlü X4 adlı uşaqları vardır. Məhkəmə hesab edir ki, əgər iş üzrə ağırlaşdırıcı hallar mövcud deyildirsə, şəxs ailəli olmaqla yüngülləşdirici hallar mövcuddursa, ilk əvvəl inzibati tənbehin aşağı həddi verilməlidir. Çünki daha ağır tənbeh təyin edilməsi üçün ixtiyari bir əsaslandırma deyil, yəni qanundan kənar əsaslandırma deyil, qanuni əsaslandırma, bunun üçünsə İXM-nin ümumi hissəsindəki müəyyən edilmiş hallar üzrə əsaslandırılma aparılmalıdır. Hazırkı şəxsə münasibətdə inzibati tənbehin aşağı həddinin tətbiq edilməsinin mümkünsüzlüyü üçün həmin əsaslar mövcud deyildir. Ona görə də ona təyin edilmşi cərimə tənbehi azaldılmalıdır. İXM-in 133.2.8-ci maddəsinə əsasən inzibati xəta haqqında iş üzrə qərardan verilən şikayətə və ya protestə baxılarkən qəbul edilmiş qərarın qanuniliyi və əsaslılığı iş üzrə olan və əlavə təqdim edilmiş materiallar əsasında yoxlanılır. İXM-in 135.1.1-ci maddəsinə əsasən səlahiyyətli orqanın (vəzifəli şəxsin) gəldiyi nəticələr üzrə mühüm əhəmiyyət kəsb edən bütün faktiki halların araşdırılmaması; 135.1.2-ci maddəyə əsasən səlahiyyətli orqanın (vəzifəli şəxsin) gəldiyi nəticələrin işin faktiki hallarına uyğun olmaması; 135.1.5-ci maddəyə əsasən tətbiq edilmiş tənbehin bu Məcəllənin 31 – 34-cü maddələrinin tələblərinə uyğun olmaması; 135.1.6-cı maddəsinə əsasən İXM-lə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması inzibati xəta haqqında iş üzrə qərarın ləğv edilməsi və ya dəyişdirilməsi üçün əsaslardan biridir. İnzibati xəta haqqında iş üzrə qərardan verilən şikayətə və ya protestə baxılarkən çıxarılan qərarlar siyahısında İXM-in 134.1.2-ci maddəsinə əsasən həmin Məcəllənin 135.1.2 – 135.1.5-ci maddələri ilə müəyyən edilmiş hallarda qərarın dəyişdirilməsi haqqında və ya qərarı ləğv edərək yeni qərarın çıxarılması haqqında haqqında qərarlardan biri qəbul edilir. Yuxarıda göstərilənlərə və Azərbaycan Respublikası İnzibati Xətalar Məcəlləsinin 128-137-ci maddərini rəhbər tutaraq, QƏRARA ALDİ: Şikayət qismən təmin edilsin. X2 barəsində İXM-nin 192.1-ci maddəsi ilə qəbul edilmiş Azərbaycan Respublikası Əmək və Əhalinin Sosial Müdafiəsi Nazirliyi yanında X7 Xidmətinin Bakı Şəhər İdarəsinin MN ******* saylı, xx.xx.2023-cü il tarixli inzibati xəta haqqında iş üzrə qərarı dəyişdirilsin. Həmin qərarla X6 tətbiq edilmiş inzibati cərimənin məbləği azaldılsın, ona təyin edilmiş 4000 manat məbləğindəki inzibati cərimə, 3000 manata endirilsin. Qərar digər hissədə dəyişdirilmədən saxlanılsın. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı şəhəri Yasamal Rayon Məhkəməsi vasitəsilə və ya birbaşa Bakı Apellyasiya Məhkəməsinə apellyasiya şikayəti və ya protesti verilə bilər. Sədrlik edən, Hüseyn Səfərov