Bakı Şəhəri Yasamal Rayon Məhkəməsi Qərardad — İş №3(004)-4596/2023

Azərbaycan Respublikası adından QƏRARDAD Bakı şəhəri İş № 3(004)-4596/2023 07.09.2023 BAKI ŞƏHƏRİ YASAMAL RAYON MƏHKƏMƏSİ Bakı şəhəri Yasamal Rayon Məhkəməsinin hakimi Hüseyn Akif oğlu Səfərov Şəxs tərəfindən İnzibati Xətalar Məcəlləsinin 529.3-cü maddəsində nəzərdə tutulmuş inzibati xətanın törədilməsi barədə Bakı şəhəri Yasamal rayon Polis İdarəsindən daxil olmuş inzibati xəta haqqında xx.xx.2023-cü il tarixdə tərtib edilmiş İXP ******* saylı, xx.xx.2023-cü il tarixdə tərtib edilmiş İXP ******* saylı protokollara və əlavə edilmiş materiala baxaraq, MÜƏYYƏN ETDİ: Məhkəməyə təqdim edilmiş yuxarıda qeyd edilən inzibati xəta haqqında protokollar və materialları araşdıraraq hesab edirəm ki, təqdim edilmiş materiallar natamam olmuşdur. Belə ki, iş materiallarında olan AZEMİS Elektron sistemdən çıxarışa əsasən müəyyən edilir ki Şəxs xx.xx.2020-ci il tarixdə vəfat etmişdir. Yasamal Rayon Polis İdarəsinin DYPŞ-nin tərtib etdiyi protokollardan görünür ki, avtomobili idarə edən şəxs yol hərəkəti qaydalarını 2023-cü il tarixdə müxtəlif vaxtlarda pozmuşdur. Belə olan halda 2020-ci ildə vəfat etmiş şəxs 2023-cü ildə avtomobil idarə edə bilməz. Deməli yol hərəkəti qaydalarını da poza bilməz. Həmin ölmüş şəxs barəsində protokolda tərtib edilə bilməz. Buna görə də, protokollarda qeyd edilmiş avtomobili idarə etmiş həmin şəxs müəyyən edilməli, bundan sonra onun barəsində protokol tərtib edilməlidir. Bundan əlavə protokol, onu tərtib etmiş şəxs tərəfindən imzalanmayıb. Halbuki, İXM-in 100.4-cü maddəsinə əsasən protokolu onu tərtib etmiş şəxs imzalamalıdır. Qeyd edilənlər hazırlıq mərhələsində müəyyənləşdirilmədən işə baxmaq mümkün deyildir. Çünki İXM-in 106-cı maddəsinə əsasən hakim inzibati xəta haqqında işin baxılmağa hazırlanması zamanı işin baxılmasının onun səlahiyyətinə aid olub-olmamasını (mad 106.0.1), inzibati xəta haqqında protokollar və işin digər materiallarının İXM-in tələblərinə müvafiq olaraq tərtib edilib-edilmədiyini (mad. 106.0.3), işin icraatını rədd edən hallar mövcud olub-olmadığını (mad 106.0.4), mahiyyəti üzrə baxılması üçün işdə kifayət qədər sübutlar toplanıb-toplanılmamasını (106.0.5) həll etməlidir. İXM-in 109.1.6-cı maddəsinə əsasən inzibati xəta haqqında işin baxılmağa hazırlanması zamanı protokollar və digər materiallar səlahiyyəti olmayan şəxslər tərəfindən tərtib edildikdə, protokollar və digər sənədlər düzgün tərtib olunmadıqda, yaxud təqdim edilmiş materiallar natamam olduqda işə baxılarkən tamamlamaq mümkün olmadıqda, inzibati xətalar haqqında protokollarun və ya digər sənədlərin onu tərtib etmiş orqana, vəzifəli şəxsə geri qaytarılması barəsində qərardad qəbul edilir. Şərh olunanlara əsasən və İnzibati Xətalar Məcəlləsinin 106, 109-cu maddələrinə əsasən, QƏRARA ALDİ: İnzibati xəta haqqında protokollar və əlavə edilmiş sənədlər Bakı şəhəri Yasamal rayon Polis İdarəsi DYPŞ-yə geri qaytarılsın. Hakim, Hüseyn Səfərov