Bakı Şəhəri Yasamal Rayon Məhkəməsi Qərar — İş №3(004)-4696/2024

Azərbaycan Respublikası adından QƏRAR Bakı şəhəri İş № 3(004)-4696/2024 30.09.2024 BAKI ŞƏHƏRİ YASAMAL RAYON MƏHKƏMƏSİ X1 Məhəmməd qızının sədrliyi, Abdullayeva Məryəm Zaur qızının katibliyi, «Azərbaycan Respublikası Milli Paralmpiya Komitəsi”nin Azərbaycan Respublikasının İnzibati Xətalar Məcəlləsinin 347-ci maddəsi ilə nəzərdə tutulmuş inzibati xətanı törətməsinə dair materiala açıq məhkəmə iclasında baxaraq, məhkəmə MÜƏYYƏN ETDİ: «Azərbaycan Respublikası Milli Paralmpiya Komitəsi”nin Azərbaycan Respublikasının İnzibati Xətalar Məcəlləsinin 347-ci maddəsi ilə nəzərdə tutulmuş inzibati xətanı törətməsinə dair xx.xx.2024-cü il tarixli, İXP ******* saylı inzibati xəta haqqında protokol və ona əlavə edilmiş sənədlər Yasamal Rayon Məhkəməsinə daxil olmuşdur. Məhkəməyə elektron ünvanından daxil olmuş etirazdan görünür ki, xx.xx.2024-cü il tarixli, İXP6374732 nömrəli protokolu tamamilə əsassızdır. Belə ki, protokola əlavə edilən poçt xəbərnaməsində göstərilən soyad və imza komitənin əməkdaşına aid deyil, çünki Komitədə nə həmin soyada sahib şəxs işləyir, nə də ki, belə bir imzası olan əməkdaş yoxdur. Bundan əlavə, poçt xəbərnaməsinin aşağı xanalarına diqqət yetirdikdə görünür ki, şəxsin nə etibarnamə ilə, nə də ki digər qaydada çıxış etməsi göstərilməyib. Yəni xəbərnamədə hər hansı bir şəxsin imzası ola bilər və bu, sənədin Komitə tərəfindən təhvil alınmasını sübuta yetirmir. Onu da qeyd edək ki, Milli Paralimpiya Komitəsinin hüquqi ünvanı “Bakı şəhəri, Yasamal rayonu, Vidadi 64” olsa da, hazırda Komitə faktiki olaraq “ünvan 3 ünvanında yerləşir. Lakin sənədlərdən göründüyü kimi Yasamal Rayon DYPŞ tərəfindən faktiki ünvana ümumiyyətlə məktub ünvanlanmamışdır, hüquqi ünvanda isə məktubun hər hansı bir əməkdaş tərəfindən təhvil alınması qeyri- mümkündür. Bu da bir daha onu göstərir ki, inzibati xəta haqqında protokolun tərtib olunmasının əsaslığını göstərən heç bir sübut mövcud deyil. Hesab edir ki, tərəfindən polis orqanının verdiyi sorğu əldə olunmadığına görə sorğuya cavab verilməsinin mümkün olmamasını nəzərə alaraq xx.xx.2024-cü il tarixli, İXP6374732 nömrəli protokol məhkəmə tərəfindən rədd olunmalıdır.Ona görə də inzibati xəta haqqında iş üzrə icraata xitam verilməsini məhkəmədən xahiş etmişdir. Məhkəmə təqdim edilmiş etirazı, inzibati xəta haqqında protokolu nəzərdən keçirib, toplanmış sübutlara məcmu halda hüquqi qiymət verərək hesab edir ki, «Azərbaycan Respublikası Milli Paralmpiya Komitəsi”nin İnzibati Xətalar Məcəlləsinin 347-ci maddəsində nəzərdə tutulan əməli törətməsi sübuta yetirilmir. Belə ki, iş materiallarında olan xx.xx.2024-cü il tarixli, İXP ******* saylı inzibati xəta haqqında protokoldan görünür ki, «Azərbaycan Respublikası Milli Paralmpiya Komitəsi”nin mülkiyyətində olan nəqliyyat vasitələrini idarə etmiş fiziki şəxs haqqında məlumatları səlahiyyətli orqanın bu barədə sorğusu daxil olduğu vaxtdan 5 gün müddətinə məlumat verməmişdir. İş materiallarında olan Bakı şəhəri Yasamal RPİ-nin «Azərbaycan Respublikası Milli Paralmpiya Komitəsinə ünvanladığı sorğudan görünür ki, həmin şirkətdən mülkiyyətində olan “Chevrolet Malibu minik» markalı, **-YG-*** dövlət qeydiyyat nişanlı avtomobili xx.xx.2024-cü il tarixdə, saat 14:24-də idarə edən sürücü barədə Bakı şəhəri Yasamal RPİ-nin DYPŞ-nə məlumat verilməsi xahiş edilmiş, eyni zamanda həmin məlumatların 5 gün müddətində verilməməsinə görə hüquqi şəxs barəsində Azərbaycan Respublikasının İnzibati Xətalar Məcəlləsinin 347-ci maddəsi ilə tədbir görüləcəyi barədə xəbərdarlıq edilmişdir. İş materiallarında olan poçt göndərişinin verilməsi haqqında xəbərnamədən görünür ki, Bakı şəhəri Yasamal RPİ-nin sorğusu xx.xx.2024-cü il tarixdə «Azərbaycan Respublikası Milli Paralmpiya Komitəsinə ünvanlanmış məktub səlahiyyəti və vəzifəsi göstərilməyən məsul şəxsi tərəfindən qəbul edilmişdir. Məhkəmə qeyd edir ki, hüquqi şəxsin mülkiyyətində və ya istifadəsində olan nəqliyyat vasitəsini inzibati xətanın törədilməsi zamanı idarə etmiş fiziki şəxs haqqında məlumatın səlahiyyətli orqanın (vəzifəli şəxsin) bu barədə sorğusu daxil olduğu vaxtdan 5 gün müddətində verilməməsi Azərbaycan Respublikasının İnzibati Xətalar Məcəlləsinin 347-ci maddəsinin tərkibini yaradır. Lakin məhkəmə iclasında isə müəyyən edilmişdir ki, «Azərbaycan Respublikası Milli Paralmpiya Komitəsinə ünvanlanmış məktubun kim tərəfindən qəbul edildiyi dəqiq müəyyən edilməmiş, səlahiyyəti göstərilməmişdir. Azərbaycan Respublikasının İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. Həmin Məcəllənin 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. Həmin Məcəllənin 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Həmin Məcəllənin 53.0.1-ci maddəsinə əsasən inzibati xəta hadisəsi olmadıqda, 53.0.2-ci maddəsinə əsasən isə inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 105.1-ci maddəsinə əsasən həmin Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olanhakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Həmin Məcəllənin 109.2-ci maddəsinə əsasən, bu Məcəllənin 53 və 104.1-ci maddələrində nəzərdə tutulmuş hallar olduqda inzibati xəta haqqında iş üzrə icraata xitam verilməsi və ya inzibati xəta haqqında iş üzrə icraatın dayandırılması barədə qərar qəbul edilir. Beləliklə məhkəmə hesab edir ki, hazırkı iş üzrə barəsində protokol tərtib edilmiş şəxsə münasibətdə təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) mövcud deyildir, onun əməlində inzibati məsuliyyətə səbəb ola biləcək inzibati xəta tərkibinin bütün əlamətləri mövcud deyildir. Ona görə də «Azərbaycan Respublikası Milli Paralmpiya Komitəsi”nin barəsində Azərbaycan Respublikasının İnzibati Xətalar Məcəlləsinin 347-ci maddəsi ilə başlanılmış inzibati iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 40, 43, 48-51, 53, 114-117, 128-130 və 347-ci maddələrini rəhbər tutaraq, məhkəmə QƏRARA ALDİ: «Azərbaycan Respublikası Milli Paralmpiya Komitəsi”nin barəsində Azərbaycan Respublikasının İnzibati Xətalar Məcəlləsinin 347-ci maddəsi ilə başlanılmış inzibati iş üzrə icraata xitam verilsin. Qərarın surəti təqdim edildiyi və ya alındığı gündən 10 (on) gün müddətində Bakı Apellyasiya Məhkəməsinə şikayət və ya protest verilə bilər. Sədrlik edən: Sevinc Quliyeva