Bakı Şəhəri Yasamal Rayon Məhkəməsi Qərar — İş №3(004)-6686/2024

Azərbaycan Respublikası adından QƏRAR Bakı şəhəri İş № 3(004)-6686/2024 11.12.2024 BAKI ŞƏHƏRİ YASAMAL RAYON MƏHKƏMƏSİ Hakim Daşdəmirov Rauf Məhərrəməli oğlunun sədrliyi, Məhkəmə iclas katibi Eyvazzadə Maya Adil qızının katibliyi ilə, İnzibati xəta haqqında protokolu tərtib etmiş şəxs: Azərbaycan Respublikası Daxili İşlər Nazirliyi Yasamal Rayon Polis İdarəsinin 27-ci Polis Şöbəsinin sahə inspektoru, polis kapitanı X2, Barəsində inzibati xəta haqqında iş üzrə icraat aparılan şəxsin müdafiəçisi, Abşeron Rayon Vəkil Bürosunun vəkili X1, Barəsində inzibati xəta haqqında iş üzrə icraat aparılan şəxs Şəxs iştirakları ilə, xx.xx.2003-cü il tarixdə Bakı şəhərində anadan olmuş, Azərbaycan Respublikasının vətəndaşı, subay, ünvan 1 ünvanında qeydiyyatda olan Şəxs Azərbaycan Respublikası İnzibati Xətalar Məcəlləsinin (bundan sonra - İXM) 535.1-ci maddəsində nəzərdə tutulan inzibati xətanı törətməsinə dair Azərbaycan Respublikası Daxili İşlər Nazirliyi Yasamal Rayon Polis İdarəsinin 27-ci Polis Şöbəsindən daxil olmuş materiallara məhkəmənin inzibati binasında, açıq məhkəmə iclasında baxaraq, məhkəmə MÜƏYYƏN ETDİ: Məhkəmənin icraatına Şəxs Azərbaycan Respublikasının İnzibati Xətalar Məcəlləsinin 535.1-ci maddəsi ilə nəzərdə tutulmuş inzibati xətanı törətməsinə dair 11 dekabr 2024-cü il tarixli MN seriyalı ******* saylı inzibati xəta haqqında protokol və ona əlavə edilmiş materiallar daxil olmuşdur. Məhkəmə iclasında inzibati xəta haqqında protokolu tərtib edən Bakı şəhəri Yasamal Rayon Polis İdarəsinin 27-ci Polis Şöbəsinin sahə inspektoru, polis kapitanı X4 protokolu müdafiə edərək bildirmişdir ki, xx.xx.2024-cü il tarixdə, saat 22:50 radələrində Yasamal RPİ-nin DYPŞ-nin polis əməkdaşları H.Cavid-Parlament prospektlərinin kəsişməsində xidmətdə olarkən üzərində dövlət qeydiyyat nişanı olmayan, görünüş etibarilə konstruksiya dəyişikliyi olan “VAZ 2107 MİNİK” markalı nəqliyyat vasitəsinə saxla əmri vermişdir. Nəqliyyat vasitəsinin sürücüsü saxla əmrinə tabe olmayaraq dəfələrlə manevr qaydalarını pozmuş, bir sıra inzibati xətaya yol verərək və qəza şəraiti yaradaraq hərəkətini davam etdirmişdir. Bütün bu hadisələri polis əməkdaşları avtomobili uzaqdan təqib edərək müşahidə etmişdir. Daha sonra şəxs T.Şahbazi küçəsinə daxil olmuş və hərəkətini ara küçələrdə davam etdirmişdir. Yol bitdiyindən şəxs nəqliyyat vasitəsini məcburən saxlamış və sürücü daxil olmaqla aralarında Şəxs olmaqla 4 nəfər şəxs nəqliyyat vasitəsini tərk edərək qaçmağa başlamışdır. Polis əməkdaşları Şəxs saxlayıb şəxsdən sürücünün kimliyi barədə məlumat verməsini tələb etmişlər. Lakin Şəxs polisin qanuni tələbinə qərəzli olaraq tabe olmamışdır. Bununla da, şəxs polis şöbəsinə dəvət olunmuş və barəsində İXM-nin 535.1-ci maddəsi ilə inzibati xəta haqqında protokol tərtib olunmuşdur və baxılması üçün aidiyyəti üzrə Bakı şəhəri Yasamal Rayon Məhkəməsinə göndərilmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs özünü təqsirli bilərək bildirmişdir ki, qorxması səbəbilə polisin qanuni tələbinə tabe olmamışdır. Əməlindən peşmandır. Göstərilənləri nəzərə alaraq barəsində yüngül inzibati tənbeh tədbirinin tətbiq edilməsini məhkəmədən xahiş etmişdir. Məhkəmə iclasında Barəsində inzibati xəta haqqında iş üzrə icraat aparılan şəxsin müdafiəçisi, Abşeron Rayon Vəkil Bürosunun vəkili X3 izahatında bildirmişdir ki, Şəxs qorxması səbəbilə polisin qanuni tələbinə tabe olmamışdır. Hüquqlarını müdafiə etdiyi şəxs cəmiyyətdə müsbət xarakterize olunur. Şəxs ona məxsus "xxxx" MMC-ndə işçi kimi çalışır və hər zaman nizam-intizam qaydalarına riayət etmişdir. Hətta fəaliyyətinə görə rəhbərlik tərəfindən mükafata layiq görülmüşdür. Şəxs 2021-ci il sentyabr döyüşlərində iştirak etmişdir. Manqa komandiri olmuşdur. Göstərilənləri nəzərə alaraq Şəxs barəsində yüngül inzibati tənbeh tədbirinin tətbiq edilməsini məhkəmədən xahiş etmişdir. Məhkəmə iclasında şahid qisimndə dindirilmiş Bakı şəhəri BPİ-nin DYPİ-nə bilavasitə tabe olan Yol-Patrul Xidməti Alayı yol-patrul xidməti inspektoru, polis baş serjantı X5 inzibati xəta haqqında protokolun məzmununa uyğun çıxış edərək Şəxs barəsində qanuni tədbir görülməsini məhkəmədən xahiş etmişdir. İş materiallarında olan və məhkəmə clasında tədqiq olunmuş: Bakı şəhəri BPİ-nin DYPİ-nə bilavasitə tabe olan Yol-Patrul Xidməti Alayının 3-cü taqım inspektorları tərəfindən 27-ci PŞ-nin rəisi vəzifəsini müvəqqəti icra edən, polis polkovnik-leytenantı Firuz İsmayılova ünvanlanmış 10 dekabr 2024-cü il tarixli raportdan görünür ki, xx.xx.2024-cü il tarixdə, saat 22:50 radələrində Yasamal RPİ-nin DYPŞ-nin polis əməkdaşları H.Cavid-Parlament prospektlərinin kəsişməsində xidmətdə olarkən üzərində dövlət qeydiyyat nişanı olmayan, görünüş etibarilə konstruksiya dəyişikliyi olan “VAZ 2107 MİNİK” markalı nəqliyyat vasitəsinə saxla əmri vermişdir. Nəqliyyat vasitəsinin sürücüsü saxla əmrinə tabe olmayaraq dəfələrlə manevr qaydalarını pozmuş, bir sıra inzibati xətaya yol verərək və qəza şəraiti yaradaraq hərəkətini davam etdirmişdir. Bütün bu hadisələri polis əməkdaşları avtomobili uzaqdan təqib edərək müşahidə etmişdir. Daha sonra şəxs T.Şahbazi küçəsinə daxil olmuş və hərəkətini ara küçələrdə davam etdirmişdir. Yol bitdiyindən şəxs nəqliyyat vasitəsini məcburən saxlamış və sürücü daxil olmaqla aralarında Şəxs olmaqla 4 nəfər şəxs nəqliyyat vasitəsini tərk edərək qaçmağa başlamışdır. Polis əməkdaşları Şəxs saxlayıb şəxsdən sürücünün kimliyi barədə məlumat verməsini tələb etmişlər. Lakin Şəxs polisin qanuni tələbinə qəsdən tabe olmamışdır. xx.xx.2024-cü il tarixli, MN seriyalı ******* nömrəli inzibati xəta haqqında protokoldan görünür ki, Şəxs tərəfindən Azərbaycan Respublikası İnzibati Xətalar Məcəlləsinin 535.1-ci maddəsində nəzərdə tutulan inzibati xəta törədilmişdir. xx.xx.2024-cü il tarixli “İnzibati qaydada tutma haqqında” protokoldan görünür ki, Şəxs xx.xx.2024-cü il tarixdə saat 24:00-da inzibati qaydada tutulmuşdur. Məhkəmə iclasında təqdim olunmuş CD diskə baxış zamanı müəyyən olunmuşdur ki, Şəxs 10 dekabr 2024-cü il tarixdə Bakı şəhəri, T.Şahbazi küçəsində polis əməkdaşlarının qanuni tələblərinə qəsdən tabe olmamışdır. İnzibati material üzrə araşdırılan sübutların məcmusunu hərtərəfli, tam və obyektiv qiymətləndirərək məhkəmə hesab edir ki, Şəxs İXM-in 535.1-ci maddəsində nəzərdə tutulan inzibati xətanı törətməsi araşdırılmış sübutlarla tam sübuta yetir. Belə ki, Şəxs xidməti vəzifəsini yerinə yetirən polis əməkdaşlarının qanuni tələblərinə qəsdən tabe olmaması prosses iştirakçılarının izahatından başqa, məhkəmə iclasında araşdırılan digər sübutlarla təsdiqini tapmışdır. Azərbaycan Respublikası İnzibati Xətalar Məcəlləsinin 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmama həmin maddədə nəzərdə tutulmuş inzibati məsuliyyətə səbəb olur və fiziki şəxslər iki yüz manat miqdarında cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Qeyd edilən maddənin dispozisiyasından göründüyü kimi, polis işçisi və ya hərbi qulluqçu ictimai qaydanın mühafizəsi ilə bağlı vəzifələrini icra edərkən, ictimai qaydanı pozan şəxs tərəfindən onların qanuni tələblərinə qəsdən tabe olmama İXM-in 535.1-ci maddəsində nəzərdə tutulan məsuliyyətə səbəb olur. Hazırki halda Şəxs hərəkətlərində də İXM-nin 535.1-ci maddəsində nəzərdə tutulmuş həmin halların mövcud olması məhkəmə iclasında öz təsdiqini tapmışdır. Belə ki, tərtib edilmiş inzibati xəta haqqında protokol və məhkəmə iclasında araşdırılan sübutlarla müəyyən edildi ki, Şəxs 10 dekabr 2024-cü il tarixdə Bakı şəhəri, T.Şahbazi küçəsində polis əməkdaşlarının qanuni tələblərinə tabe olmamışdır. Bütün bunlar məhkəməyə Şəxs hərəkətlərində ictimai qaydanın mühafizə vəzifələrini icra edərkən qanuni tələb irəli sürən polis işçisinə tabe olmama kimi halların, yəni İXM-in 535.1-ci maddəsində nəzərdə tutulmuş inzibati xətanın tərkibinin olması barədə nəticəyə gəlməyə əsas verir. Azərbaycan Respublikası İnzibati Xətalar Məcəlləsinin: 3-cü maddəsinə əsasən, yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. 4-cü maddəsinə əsasən İXM insan və vətəndaş hüquqlarına və azadlıqlarına hörmət edilməsi, qanunçuluq, qanun qarşısında bərabərlik, təqsirsizlik prezumpsiyası, ədalətlilik və inzibati xətaların qarşısının alınması prinsiplərinə əsaslanır; 9.1-ci maddəsinin tələbinə görə, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. 12.1-ci maddəsinə əsasən İXM-lə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Həmin Məcəllənin 31.4-cü maddəsinə əsasən həmin Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yalnız yuxarı həddi müəyyən edildikdə, tətbiq edilən inzibati tənbeh onun yuxarı həddinin dörddə birindən az ola bilməz. Həmin Məcəllənin 31.4-1-ci maddəsinə əsasən inzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz. Azərbaycan Respublikasının İnzibati Xətalar Məcəlləsinin 32-ci maddəsinə əsasən Şəxs əməlini səmimi etiraf edərək peşman olmasını məsuliyyəti yüngülləşdirən hal kimi qiymətləndirir. Həmin Məcəllənin 33-cü maddəsinə əsasən Şəxs məsuliyyətini ağırlaşdıran hallar müəyyən edilməmişdir. Məhkəmə Şəxs törətdiyi inzibati xətanın hallarını, şəxsiyyətini xarakterizə edən halları və cəmiyyətin maraqlarını nəzərə alaraq hesab edir ki, o, Azərbaycan Respublikasının İnzibati Xətalar Məcəlləsinin 535.1-ci maddəsi ilə təqsirli bilinməli və həmin Məcəllənin 31.4-1-ci maddəsi nəzərə alınmaqla, onun barəsində cərimə növündə inzibati tənbeh tədbirinin tətbiq edilməsi məqsədəmüvafiqdir. Beləliklə, məhkəmə belə nəticəyə gəlir ki, Şəxs İXM-in 535.1-ci maddəsində nəzərdə tutulmuş inzibati xətanı törətməkdə təqsirli bilinməli, törədilmiş xətanın xarakterini və hallarını, məsuliyyəti yüngülləşdirən halları və ağırlaşdıran halların olmamasını, inzibati xəta törədən şəxsin şəxsiyyətini xarakterizə edən halları, onun təqsirinin dərəcəsini və tətbiq olunacaq inzibati tənbehin şəxsin islah olunmasına təsirini nəzərə alaraq, belə nəticəyə gəlir ki, o, Azərbaycan Respublikasının İnzibati Xətalar Məcəlləsinin 535.1-ci maddəsi ilə təqsirli bilinməli və onun barəsində cərimə növündə inzibati tənbeh tədbirinin tətbiq edilməsi məqsədəmüvafiqdir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 34.3, 40, 43, 48-51, 114-117, 128-130 və 535.1-ci maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikasının İnzibati Xətalar Məcəlləsinin 535.1-ci maddəsində nəzərdə tutulmuş inzibati xətanı törətməkdə təqsirli bilinsin və həmin Məcəllənin 31.4-1-ci maddəsi nəzərə alınmaqla, barəsində 100 (yüz) manat məbləğində inzibati cərimə növündə tənbeh tədbiri tətbiq edilsin. Qərarın surəti tərəfə təqdim edildiyi və ya alındığı gündən 10 (on) gün müddətində Bakı Şəhəri Yasamal Rayon Məhkəməsi vasitəsilə Bakı Apellyasiya Məhkəməsinə şikayət verilə bilər. Hakim: Rauf Daşdəmirov