Bakı Şəhəri Yasamal Rayon Məhkəməsi Qərar — İş №3(004)-7283/2025

Azərbaycan Respublikası adından QƏRAR Bakı şəhəri İş № 3(004)-7283/2025 08.10.2025 BAKI ŞƏHƏRİ YASAMAL RAYON MƏHKƏMƏSİ Bakı Şəhəri Yasamal Rayon Məhkəməsinin hakimi Məmmədli Orxan Qədir oğlunun sədrliyi, X4 iclas katibliyi ilə İnzibati xəta haqqında protokolu tərtib etmiş şəxs Azərbaycan Respublikası Ədliyyə Nazirliyi Bakı şəhəri Yasamal rayon İcra şöbəsinin icra məmuru X5, Barəsində inzibati xəta haqqında iş üzrə icraat aparılan şəxs Şəxs, X1 iştirakları ilə, xx.xx.1973-cü ildə Bakı şəhərində anadan olmuş, Azərbaycan Respublikasının vətəndaşı, ünvan 1 ünvanında qeydiyyatda olan və yaşayan Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə Bakı Şəhəri Yasamal Rayon İcra Şöbəsindən daxil olmuş inzibati xəta haqqında işə baxaraq, məhkəmə MÜƏYYƏN ETDİ: Yasamal Rayon İcra Şöbəsi (icra məmuru X8) tərəfindən Şəxs barəsində İXM-in 528.1-ci maddəsi ilə xx.xx.2025-ci il tarixdə MN № ******* saylı inzibati xəta haqqında protokol və protokola əlavə tərtib edilmişdir ondan ötəri ki, Bakı Şəhəri 19 saylı Notariat Kontorunun 8İ-2909 saylı, xx.xx.2023-cü il tarixli icra qeydinə əsasən 43625 manat məbləğində pul borclu Şəxs tutularaq X6 ödənilməlidir. Borclu icra vərəqəsində göstərilən tələbləri icra etmir və icra sənədinin icrası ilə bağlı icra məmurunun qanuni tələblərini yerinə yetirmir. Protokol tərtib etmiş Yasamal Rayon İcra Şöbəsinin icra məmuru X8 məhkəməyə verdiyi izahatında bildirdi ki, borclu müxtəlif bəhanələrlə icradan yayınmış və üzrsüz səbəbdən icra vərəqəsini icra etməmişdir. Bununla da həmin şəxs tərəfindən İXM-in 528.1-ci madldəsinin tələbləri pozulmuşdur. Barəsində tənbeh tətbiq edilməsini məhkəmədən xahiş etdi. Əlavə olaraq icra məmuru bildirdi ki, icraata başlama haqqında qərar və tələbin könüllü icrası barədə bildiriş şəxsə xx.xx.2025-ci il tarixdə təqdim edilmişdir. İcra sənədinə əsasən borcludan 43000 manat tutularaq zərərçəkmiş Elza xanıma ödənilməlidir. Adına daşınmaz əmlak olsa da, həmin əmlak bankda girovdadır. Və orada faktiki xanım özü yaşayır. Borcun yaranmağına səbəb xanımın bildirdiyinə onun daş-qaşlarını oğurlaması ilə əlaqədardır. Borcdan heç bir məbləğ ödənilməyib. Təqsirləndirilən şəxs adına yeni nömrə alıb, o nömrədən xabəri olmayıb. Barəsində inzibati xətalar haqqında iş üzrə icraat aparılan Şəxs məhkəmə iclasında bildirdi ki, o, xanımın dedikləri ilə razı deyil. 52 yaşı var. Yasamalda inzibati binada qeydiyyatdadır. Harda gəldi yaşayır. Özünü təqsirli bilmir. Ailəli olublar, 25 yaşı olacaq uşağın. Elə bir uşağı var. İcra sənədini ona görə vermişdi ki, xanım narahat olmasın. O, Novxanıdakı evi satanda onu pulsuz qoymasın. Ondan nə pul almış, nə başqa bir şey. Saydıqları şeyləri birgə əldə etmişlər. O, öz pulu ilə ev tikmişdir. Dostu satmaq adı ilə evi girova qoymuşdu. Dedi ki, sat mənə, banka standarda girov qoysun. Həmin şəxs Bank Standarddan 2 milyon dollara yaxın pul almışdı. 10 il idi ki, yox idi ölkədə. Özü ali təhsillidir, fizika üzrə. Hazırda Novxanıda kənddə yaşayır. O, ata-ana evini satıb, zərərçəkmişə ev aldı. İcra məmuruna izahat da vermişdir ki, Səid adlı dostu da işin içindədir. 191 nömrəli köşkdə satıcı işləyirəm. Köşk departamentə məxsusdur. Əlilliyi yoxdur, amma xəstəliyi var. Maddi vəziyyətim ağırdır, bəzən marşruta pul tapmır. Amma qarşı tərəfin 3 evi var. 2013-cü ildə qarşı tərəfə ev almışdır. Onda antiimmun xəstəliyi peyda oldu, hamısını eləyən Elza oldu. Onun veteran vəsiqəsini, əmək kitabçasınıı və sürücülük vəsiqəsini tələf edib. İcra məmuru tərəfindən sənədlər isə ona dünən təqdim olunub, icra sənədindən xəbərsizdir. Odur ki, işə xitam verilməsini məhkəmədən xahiş edir. Məhkəmə iclasında iştirak edən tələbkar (zərər çəkmiş şəxs) X7 bildirdi ki, təqsirləndirilən şəxs tək daş-qaş deyil, oğlunun kompüterinə kimi satıb, pulunu mənimsəyib. O, da bununla bağlı polisə şikayət etmişdir. Hər şey sənəd sübutla var. Müqavilə bağladı ki, bütün zərəri bağlayacaq. Hesabladılar 43000 manat elədi. Onun yazığı gəldi, 3 il vaxt verdi. Ona güzəşt elədi. Amma artıq 7 ildir ki, heç nə ödəmir. Şikayətçidir, pulunu qaytarsın. Özü könüllü bağlayıb müqaviləni. Amma təqsirləndirilən şəxs yalanlar danışmaqda davam edir. 13 il bir yerdə yaşamışlar. Saxtakarlıqla məşğuldur şəxs. Ekspertiza rəyi var ki, onun imzası saxtalaşdırıb, əmlakı girov qoyub. O, məhkəməni aldatmaq istəyir. Qarşı tərəfin məhkumluğu da var. Şəxs məhz özü evi girova qoyub, onda notariusun şəkilləri var. Əyani şəkildə olmasa, evi necə girova qoya bilərdilər? Oğlu da atasına qarşıdır. Polisə ərizə də var ki, şikayətçidir. Oğlunun atasından, indiki təqsirləndirilən şəxsdən zəhləsi gedir. Heç kim ona ev verməyib, özü öz evini almışdır. Nikah dövründə alınan hər şeyi o, öz pulu ilə alırdı. Bu şəxs onları öz adına keçirirdi. Hətta şəxsin sevgilisi də var idi. Onunla nikahda ola-ola şantajla başqasından uşağı oldu. Gəlirdi hər ay 1000 manat pul alırdı. Özü boşanandan sonra ərə getmiş. Təzə yoldaşı onu saxlayırdı. Həmin bu pulları Fariz ondan götürürdü. Təsadüf deyil ki, həmin pulları kəsəndən sonra şəxs bu vəziyyətə düşdü. Boşanmadan sonra da o, bu şəxsə baxırdı. Onu saxlayırdı. Yazığı gəlirdi. Həmin pullarla gedib, təzə ailəsin saxlayırdı. Təzə sevgilisi pulu olmadığına görə, bunu buraxdı. Çünki o, pulları kəsmişdi. O qadın da hər uşağını bir kişidən doğmuşdu. Bir qadına görə həyatlarını məhv etdi. Pulun ödənilməsini tələb edir. Məhkəmə aşağıdakılara əsasən hesab edir ki, inzibati xəta haqqında iş üzrə icraata xitam verilməsi üçün əsaslar vardır. Belə ki, şəxsin İXM-in 528.1-ci maddəsi ilə təqsirli bilinməsinə və barəsində inzibati xəta haqqında protokol tərtib edilməsinə səbəbə olmuş məhkəmə qərarı Bakı Şəhəri 19 saylı Notariat Kontorunun 8İ-2909 saylı, xx.xx.2023-cü il tarixli icra qeydinin icrası ilə əlaqədardır. Həmin icra sənədi üzrə icra məmuru tərəfindən xx.xx.2023-cü il tarixli qərarla icraata başlanılmış, qərara əsasən tələbin könüllü icrası barədə borcluya 10 günlük müddət verilmişdir. Həmin icra sənədi barədə, icraata başlama barədə, könüllü icra müddəti barədə borcluya 07 oktyabr 2025-ci il tarixində çatdırılmışdır. İcra məmuru tərəfindən təqdim edilmiş protokol və əlavə edilmiş sənədlərdən, icra işinin materiallarından görünür ki, protokol xx.xx.2025-ci il tarixdə Şəxs barəsində tərtib edilmişdir. Şəxs icra sənədi barədə bildirişi də xx.xx.2025-ci il tarixdə almışdır, yəni barəsində protokol tərtib edilən gündən bir gün əvvəl, həmçinin izahatı da həmin gün vermişdir. Beləliklə, borclu üçün həmin icra sənədinin icrasına dair könüllü icra müddəti müəyyən edilmişdir. Həmin müddətin başlanğıcı borclunun bu barədə rəsmi məlumatlandırıldığı gündən hesablanır. Adından da göründüyü kimi, könüllü icra müddəti ərzində borclu icra sənədini icra etməkdə könüllüdür. Ona görə də həmin könüllü icra müddətinin sonuna qədər gözlənilib, borclunun bu müddət ərzində icra sənədini könüllü icra etmək hüququ təmin edilməlidir. Lakin icra məmuru tərəfindən təqdim edilmiş protokol və əlavə edilmiş sənədlərdən, icra işinin materiallarından könüllü icra müddəti barədə göndərilmiş, həmin bildirişin borcluya vaxtında rəsmi qaydada çatdırılması, borclunun həmin bildirişi alması, lakin bildirişdə göstərilmiş könüllü icra müddətinin bitsə də, icra sənədinin icra edilməməsi müəyyən edilmir. Həmin bildirişin vaxtında çatdırılmasına dair sübut mövcud deyildir. Buna görə də məhkəmə qeyd edir ki, inzibati xəta əlamətlərinin formal mövcudluğu, şəxsin inzibati məsuliyyətə cəlb edilməsi üçün yetərli deyildir. İnzibati xəta əlamətləri formal cəhətdən mövcuddursa da, həmin xətanın törədilməsində şəxsin təqsiri müəyyən edilməlidir. Təqsirsiz olaraq və ya şəxsin iradəsindən asılı olmayaraq baş vermiş nöqsan, şəxsin inzibati məsuliyyətinə səbəb ola bilməz. Azərbaycan Respublikası Konstitusiyasının 125-ci maddəsinin Vİİ hissəsinə əsasən məhkəmə icraatı həqiqətin müəyyən edilməsini təmin etməlidir. Şəxsin əməlində inzibati xətanın elementlərindən olan obyektiv və subyektiv cəhətlər yoxdur. Belə bir vəziyyətdə şəxsin inzibati xətanın törədilməsində qəsdinin və ya ehtiyatsızlığının nədən ibarət olmasına dair də sübut təqdim edilməmişdir. Ümumiyyətlə bunları təsdiq edən sübut toplamamışdır. Hər hansı bir şəxs barəsində inzibati məsuliyyətin yaranması üçün həmin şəxs, törədilmiş inzibati xətanın ilk əvvəl subyekti olmalıdır və təqsirli bilindiyi maddənin dispozisiyasında nəzərdə tutulmuş hərəkətlərə və yaxud hərəkətsizliyə onun tərəfindən yol verilməsi sübutlarla müəyyən olunmalı və bu halların olması toplanmış sənədlərlə kifayət qədər öz təsdiqini tapmalıdır. Təqsirliliyi sübut etmək yükü məhkəmənin və ya barəsində protokol tərtib edilmiş şəxsin üzərinə düşmür. Bu yük protokol tərtib etmiş səlahiyyətli orqanın üzərinə düşür. Çünki barəsində protokol tərtib edilmiş şəxs sübut etməli deyildir ki, inzibati xəta törədilməyib. Şəxs təqsirsizliyini sübut edə bilməməsi əsası ilə inzibati məsuliyyətə cəlb edilə bilməz. Çünki belə bir vəziyyətdə şəxs təqsirsizliyini sübut etməlidir ki, təqsirli sayılmasın. X3 Məcəlləsinin vəzifələri və prinsiplərinə əsasən məhkəmənin ziddiyyətli və şübhəli məqamların şəxsin ziyanına aradan qaldırıb, barəsində protokol tərtib edilmiş şəxsin ziyanına onun inzibati xəta törətməsini təsdiq edən sübutlar toplamaq yox, həmin şübhələri və ziddiyyətli məqamları həmin şəxsin xeyrinə həll etməli olması müəyyən edilib. Məhkəmənin bu qənaəti həmçinin İXM-nin aşağıdakı normaları ilə də təsdiq edilir. Belə ki, əməlin (hərəkət və ya hərəkətsizliyin) inzibati xəta hesab olunması üçün İXM-lə müəyyən edilmiş 4 əlamətin hər biri mövcud olmalıdır, yəni həmin əməllə İXM-lə qorunan ictimai münasibətlərə qəsd edilməli, əməl hüquqazidd olmalı, təqsirli sayılmalı (qəsdən və ya ehtiyatsızlıqdan törədilən) və inzibati məsuliyyətə səbəb olmalıdır. İXM-nin 1.1-ci maddəsinə əsasən Azərbaycan Respublikasının inzibati xətalar qanunvericiliyi həmin Məcəllədən ibarətdir. İXM-nin 1.3-cü maddəsinə əsasən inzibati məsuliyyət müəyyən edən və inzibati xəta törətmiş şəxsin tənbeh edilməsini nəzərdə tutan qanunlar yalnız bu Məcəlləyə daxil olduqdan sonra tətbiq edilir. İXM-in İXM-in 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. İXM-nin 6.3-cü maddəsinə əsasən Azərbaycan Respublikasının inzibati xətalar qanunvericiliyinin analogiya üzrə tətbiqinə yol verilmir. İXM-in 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İXM-in 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İXM-in 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. İnzibati xətanın anlayışından bəhs edilən İXM-in 12-ci maddəsinə əsasən həmin Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Məhkəmədə müəyyən edilmiş yuxarıda qeyd edilən işin halları və sadalanan normalara əsasən hazırkı iş üzrə barəsində protokol tərtib edilmiş şəxsə münasibətdə və protokolda təqsirli bilindiyi İXM-in maddəsi üzrə təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) mövcud deyildir, protokolda göstərilən İXM-in maddəsi üzrə inzibati məsuliyyətə səbəb ola biləcək inzibati xəta tərkibinin bütün əlamətləri mövcud deyildir. Bu barədə sübutlar kifayət etmir. İXM-in 53.1.1-ci maddəsinə əsasən inzibati xəta hadisəsi olmadıqda, həmçinin İXMin 53.1.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. İXM-nin 53.2-ci maddəsinə əsasən hər hansı şəxs barəsində başlanılmış inzibati xətalar haqqında işlər üzrə icraata, həmçinin onun inzibati xəta törədilməsinə aidiyyəti olmadıqda və ya təqsirliliyi sübuta yetirilmədikdə, o cümlədən təqsirliliyin sübuta yetirilməsində qanuna zidd olaraq əldə edilmiş sübutlardan istifadə edildikdə xitam verilir. Maddənin dizpozisiyasından məlum olur ki, həmin inzibati xətanın tərkibinin yaranması üçün borclu icra məmurunun qanuni tələblərini yerinə yetirməməli və ya icra sənədini üzrsüz səbəbdən icra etməməlidir. Məhkəmə iclası zamanı müəyyən edilir ki, borclu icra sənədi barədə yeni məlumat almış, 10 gün ərzində icra sənədini icra edəcəyini bildirmiş, bundan əlavə borclunun mülkiyyətində əmlak var, ümumiyyətlə icra işində icra sənədinin icrası ilə bağlı hər hansı tədbir görülməsi öz təsdiqini tapmır. İnzibati xətalar haqqında işlərə baxılarkən çıxarılan qərarlardan biri də İXM-in 114.1.4-cü maddəsinə əsasən inzibati xəta haqqında iş üzrə icraata xitam verilməsi haqqında qərardır. İXM-in 114.2.1-ci maddəsinə əsasən həmin Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Qeyd edilənlərə əsasən hazırkı iş üzrə barəsində protokol tərtib edilmiş şəxsə münasibətdə təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) mövcud deyildir, onun əməlində inzibati məsuliyyətə səbəb ola biləcək inzibati xəta tərkibinin bütün əlamətləri mövcud deyildir. Qeyd olunanlara əsasən inzibati xəta haqqında işi üzrə icraata xitam verilməlidir. Yuxarıda göstərilənlərə və Azərbaycan Respublikası İnzibati Xətalar Məcəlləsinin 40, 43, 48-51, 114, 128-130-cu maddərini rəhbər tutaraq, məhkəmə QƏRARA ALDİ: Şəxs barəsində İnzibati Xətalar Məcəlləsinin 528.1-ci maddəsi ilə başlanmış inzibati xəta haqqında iş üzrə icraata xitam verilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı Şəhəri Yasamal Rayon Məhkəməsi vasitəsilə və ya birbaşa Bakı Apelyasiya Məhkəməsinə apelyasiya şikayəti və ya protesti verilə bilər. Sədrlik edən, Orxan Məmmədli