Bakı Şəhəri Nərimanov Rayon Məhkəməsi Qərar — İş №3(005)-1077/2025

Azərbaycan Respublikası adından QƏRAR Bakı şəhəri İş № 3(005)-1077/2025 17.04.2025 BAKI ŞƏHƏRİ NƏRİMANOV RAYON MƏHKƏMƏSİ Hakim Əlisoy Xalidə Kəramət qızının sədrliyi, Əhmədova Aynur Əvəz qızının katibliyi, X1 Bakı Nəqliyyat Agentliyi tərəfindən BNA ******* nömrəli, 05 noyabr 2019-cu il tarixli protokol əsasında qəbul edilmiş “İnzibati tənbeh vermə haqqında” qərardan verdiyi şikayətə məhkəmənin inzibati binasında, açıq məhkəmə iclasında baxaraq, məhkəmə MÜƏYYƏN ETDİ: X1 Bakı Nəqliyyat Agentliyi tərəfindən BNA ******* nömrəli, 05 noyabr 2019-cu il tarixli protokol əsasında qəbul edilmiş “İnzibati tənbeh vermə haqqında” qərardan şikayətlə məhkəməyə müraciət etmişdir. Şikayətini onunla əsaslandırmışdır ki, Bakı Nəqliyyat Agentliyinin BNA ******* nömrəli, 05 noyabr 2019-cu il tarixli qərarı ilə İXM-nin 346.1-ci maddəsi ilə barəsində elektron cərimə tətbiq edilərək sistemə yerləşdirilmişdir. 2025-ci ilin yanvar, fevral və mart aylarında Azərbaycan Yerüstü Nəqliyyat Agentliyinə (AYNA) rəsmi müraciətlər edərək “Mercedes Benz” markalı, **-LK-*** d.q.n. nəqliyyat vasitəsinə 2019-cu il tarixdə tətbiq edilərək icra müddəti keçmiş elektron qərarların İXM-nin 146.1-1-ci maddəsinə əsasən icrasına xitam verilməsini və cərimələrin sistemdən silinməsini xahiş etməklə elektron poçt vasitəsi ilə office@ ayna.gov.az elektron ünvana rəsmi müraciətlər göndərmişdim. Belə ki, İXM-nin 146.1-1-ci maddəsinə əsasən inzibati cərimə növündə inzibati tənbeh tətbiq etmə haqqında qərar qanuni qüvvəyə mindiyi gündən 5 (beş) il müddətində icra edilməmişdirsə, daha icra edilmir. Bildirir ki, Bakı Nəqliyyat Agentliyi tərəfindən 2019-cu ildə barəsində İXM- nin 346.1 və 346.2 maddələri ilə cəmi 6 elektron cərimə qərar çıxarılaraq həmin vaxt sistemə yerləşdirilmişdir. Elektron müraciətləri əsasında 6 qərardan 3 qərar sistemdən silinmiş, digər 3 qərarla bağlı şikayətlə müraciət edilərkən baxılacağı bildirilmişdir. Buna görə də hazırda Bakı Nəqliyyat Agentliyinin BNA ******* nömrəli, 05 noyabr 2019-cu il tarixli qərarın icrasına xitam verilməsi barədə ərizə ilə Bakı şəhəri Nərimanov Rayon Məhkəməsinə müraciət etməli olmuşdur. Azərbaycan Yerüstü Nəqliyyat Agentliyinin hərəkətləri Qanunvericiliyin tələblərinə ziddir. Odur ki, barəsində Bakı Nəqliyyat Agentliyi tərəfindən qəbul edilmiş BNA ******* saylı, 05 noyabr 2019-cu il tarixli elektron qərarın icra müddəti keçdiyindən onun icrasına xitam verilməsi barədə qərar çıxarılmasını və icra edilməsi üçün Bakı Nəqliyyat Agentliyinə göndərilməsini xahiş etmişdir. Məhkəmə iclasının yeri və vaxtı barədə məlumat verilməsinə baxmayaraq barəsində tərtib edilmiş inzibati qərardan şikayət vermiş şəxs və qərarından şikayət verilmiş səlahiyyətli orqanın nümayəndəsi məhkəmə iclasında iştirak etməmişdir. Məhkəmə işə inzibati qərardan şikayət vermiş şəxsin və qərarından şikayət verilmiş səlahiyyətli orqanın nümayəndəsinin iştirakları olmadan baxılmasını mümkün hesab etmişdir. Məhkəmə şikayətin dəlillərini nəzərdən keçirərək və iş materiallarını araşdıraraq hesab edir ki, şikayət təmin olunmalı X1 İXM-nin 346.1-ci maddəsi ilə təqsirli bilinərək cərimə olunmasına dair Bakı Nəqliyyat Agentliyi tərəfindən qəbul edilmiş BNA ******* nömrəli, 05 noyabr 2019-cu il tarixli inzibati qərar ləğv edilməli, başlanılmış inzibati xəta haqqında icraata xitam verilməlidir. Azərbaycan Respublikası İnzibati Xətalar Məcəlləsinin 142.1-ci maddəsinə əsasən inzibati tənbeh tətbiq etmə haqqında qərarın icrasının təxirə salınması, dayandırılması, onun icrasına möhlət və ya xitam verilməsi, yaxud yetkinlik yaşına çatmayan şəxsin üzərinə qoyulmuş cərimənin onun valideynlərindən və ya digər qanuni nümayəndələrindən tutulması məsələlərinin baxılmasına əsaslar olduqda, həmin məsələlərə qərarı çıxarmış hakim, səlahiyyətli orqan (vəzifəli şəxs) tərəfindən üç gün müddətində baxılır. Həmin Məcəllənin 142.3-cü maddəsinə əsasən qərarın icrasının təxirə salınması, dayandırılması, onun icrasına möhlət və ya xitam verilməsi, yaxud yetkinlik yaşına çatmayan şəxsin üzərinə qoyulmuş cərimənin onun valideynlərindən və ya digər qanuni nümayəndələrindən tutulması barədə qərardad qəbul edilir. Qərardadın surəti, barəsində bu qərardad qəbul edilmiş fiziki şəxsə və ya hüquqi şəxsin nümayəndəsinə, yetkinlik yaşına çatmayan şəxsin qanuni nümayəndəsinə, habelə zərər çəkmiş şəxsə bu barədə müvafiq qeyd aparılmaqla verilir. Həmin Məcəllənin 146.1-ci maddəsinə əsasən bu məcəllənin 146.1-1-ci maddəsində nəzərdə tutulmuş hallar istisna olmaqla, digər inzibati tənbeh tətbiq etmə haqqında qərar qanuni qüvvəyə mindiyi gündən sonra bir il müddətində icra edilməmişdirsə, daha icra edilmir. Bundan əlavə Məcəllənin 146.1-1-ci bəndinə əsasən inzibati cərimə növündə inzibati tənbeh tətbiq etmə haqqında qərar qanuni qüvvəyə mindiyi gündən 5 (beş) il müddətində icra edilməmişdirsə, daha icra edilmir. İş materiallarında olan və məhkəmə iclasında tədqiq edilmiş Bakı Nəqliyyat Agentliyi tərəfindən qəbul edilmiş BNA ******* nömrəli, 05 noyabr 2019-cu il tarixli protokol əsasında qəbul edilmiş “İnzibati tənbeh vermə haqqında” qərardan görünür ki, X2 Azərbaycan Respublikası İnzibati Xətalar Məcəlləsinin 346.1-ci maddəsində nəzərdə tutulmuş əməli törətməkdə təqsirli bilinərək 20 (iyirmi) manat miqdarında cərimə edilməsi qərara alınmışdır. İXM-nin 145.1.3-cü maddəsinə əsasən inzibati tənbeh tətbiq etmə haqqında qərarı qəbul etmiş hakim, səlahiyyətli orqan (vəzifəli şəxs) inzibati tənbeh tətbiq etmə haqqında qərarın bu Məcəllənin 146.1-ci maddəsində müəyyən edilmiş icra müddəti keçdikdə qərarın icrasına xitam verir. İXM-nin 145.2-ci maddəsinə əsasən isə İnzibati tənbeh tətbiq etmə haqqında qərarın icrasına xitam verilməsi barədə hakim, səlahiyyətli orqan (vəzifəli şəxs) tərəfindən qərardad qəbul edilir. Odur ki, məhkəmə işin hallarını, habelə qanunvericiliyin tələblərini nəzərə alıb hesab edir ki, X1 barəsində Bakı Nəqliyyat Agentliyi tərəfindən BNA ******* nömrəli, 05 noyabr 2019-cu il tarixli inzibati tənbeh vermə haqqında elektron qərarı qanuni qüvvəyə mindiyi gündən 5 (beş) ildən artıq müddətində icra edilmədiyindən inzibati tənbeh tətbiq etmə haqqında qərarın icrasına xitam verilməlidir. Göstərilənlərə əsasən Azərbaycan Respublikası İXM-nin 145-ci maddəsini rəhbər tutaraq, məhkəmə QƏRARA ALDİ: Şikayət təmin edilsin. X1 barəsində Bakı Nəqliyyat Agentliyi (indiki Azərbaycan Yerüstü Nəqliyyat Agentliyi) tərəfindən qəbul edilmiş BNA ******* nömrəli, 05 noyabr 2019-cu il tarixli inzibati tənbeh vermə haqqında qərarın icrasına Azərbaycan Respublikasının İnzibati Xətalar Məcəlləsinin 145.1.3-cü maddəsinə əsasən xitam verilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı şəhəri Nərimanov Rayon Məhkəməsi vasitəsilə və ya birbaşa Bakı Apellyasiya Məhkəməsinə apellyasiya şikayəti və ya protesti verilə bilər. Hakim Xalidə Əlisoy