Bakı Şəhəri Nərimanov Rayon Məhkəməsi Qərar — İş №3(005)-1139/2025

Azərbaycan Respublikası adından QƏRAR Bakı şəhəri İş № 3(005)-1139/2025 01.05.2025 BAKI ŞƏHƏRİ NƏRİMANOV RAYON MƏHKƏMƏSİ Hakim Əlisoy Xalidə Kəramət qızının sədrliyi, Məhkəmə iclas katibi Ələkbərzadə Qafur Hikmət oğlunun katibliyi ilə, Barəsində protokol tərtib olunan qərardan şikayət vermiş şəxs X1 iştirakları ilə, X1 Bakı Şəhər Dövlət Yol Polisi İdarəsi Yol Patrul Xidməti baş inspektor polis leytenantı X4 tərəfindən qəbul edilmiş xx.xx.2025-ci il tarixli, TP seriyalı ******* saylı inzibati tənbeh vermə haqqında qərardan verdiyi şikayətə məhkəmənin inzibati binasında, açıq məhkəmə iclasında baxaraq, məhkəmə MÜƏYYƏN ETDİ: X1 Bakı Şəhər Dövlət Yol Polisi İdarəsi Yol Patrul Xidməti baş inspektor polis leytenantı X4 tərəfindən qəbul edilmiş xx.xx.2025-ci il tarixli, TP seriyalı ******* saylı qərarından şikayətlə Bakı Şəhəri Yasamal Rayon Məhkəməsinə müraciət edərək, qərarın ləğv edilməsi və inzibati xəta haqqında iş üzrə icraata xitam verilməsini xahiş etmişdir. Bakı Şəhəri Yasamal Rayon Məhkəməsinin xx.xx.2025-ci il tarixli 3(004)-1914/2025 nömrəli qərardadına əsasən X1 barəsində qəbul edilmiş inzibati tənbeh vermə haqqında qərardan verdiyi şikayət üzrə iş aidiyyati üzrə baxılması üçün Baş Şəhəri Nərimanov Rayon Məhkəməsinə göndəriləsi qərara alınmışdır. Şikayətdə qeyd edilmişdir ki, X2 Bakı şəhəri Yasamal rayonu Məsən ünvan 1 ünvanında yaşayır. Axşam radələrində xx.xx.2025 tarixində, işdən evə geri qayıdarkən, idarə etdiyi avtomobili ilə işıqforu keçərkən, yol polisi əməkdaşı tərəfindən saxlanılmışdır Yol polisi əməkdaşı ona qırmızı işıqda keçdiyini bildirmişdir. O isə qırmızı işıqda keçmədiyini söyləyib. Yol polisi əməkdaşı ona "Yerində cəriməni ödə, yoxsa 100 manat yazacam və 3 bal da gələcək" ifadəsini işlətmişdir. O isə heç bir halda nağd şəkildə ödəniş etməyəcəyini bildirmişdir. Bundan sonra yol polisi əməkdaşı onda görərsən deyib getmişdir. Bir müddət sonra ona gələn sms-dən məlumum oldu ki, guya qırmızı işıqda keçdiyi üçün 100 manat və 3 bal cərimə olunmuşdur. Lakin, "Asan ödəniş" səhifəsində nə foto, nə də video görüntü mövcud deyil. Bununla belə, mygov.az-dakı kabinetinə daxil olduqda barəsində inzibati protokol tərtib edildiyini görmüşdür. Təkrar bildirir ki, o yol hərəkəti qaydalarına uyğun olaraq avtomobili idarə etmiş, qeyd olunan. protokol, ona təqdim olunmamışdır. Məsələni aydınlaşdırmaq və protokolu əldə etmək üçün 102 mətinə zəng etdi. Həmin xidmətdən məsələ ilə əlaqədar maraqlanacaqlarını və Protokolun təqdim olunacağını bildirdilər. Bir müddət sonra ona telefon vasitəsi ilə zəng gəldi özünü Bakı Şəhəri Baş Polis İdarəsinin əməkdaşı kimi təqdim elən şəxs dedi ki, “dur gəl bura mən sənə dakazat eliyəcəm ki, sən səhvsən". O, isə mühabisə etmək istəmədiyini söyləmiş və xahiş eləmiş ki, cərimə əsasında haqqında tərtib olunan protokolun sürətini təqdim etsinlər. Yalnız bundan sonra 15 mart 2025-ci il tarixində İXP *** **** saylı Protokol və TP ******* saylı Qərar ona e-mail yolu ilə göndərildi. Həmçinin qeyd edir ki, barəsində tərtib edilmiş inzibati protokolun heç bir əsası yoxdur.Qırmızı işıqda keçdiyini göstərən heç bir video görüntü və heç bir sübut da yoxdur çünki, pozuntu etmədiyindən bu barədə heç bir sübut da ola bilməz. Nəticə etibarilə mübahisəli protokol tam olaraq qanunsuz və əsası olmadan tərtib olunmuş və inzibati qərar qəbul edilmişdir. Məhkəmə iclasının yeri və vaxtı barəsində məlumat verilməsinə baxmayaraq məhkəmə iclasında qərardan şikayət vermiş şəxs, inzibati qərar qəbul edən qurumun nümayəndəsi iştirak etməmişdir. Məhkəmə onların iştirakı olmadan məhkəmə iclasının keçirilməsini mümkün hesab etmişdir. Məhkəmə şikayət ərizəsini və iş materiallarını araşdıraraq hesab edir ki, şikayət qismən təmin edilməlidir. İş materiallarında olan və məhkəmə iclasında tədqiq edilmiş Bakı Şəhər Dövlət Yol Polisi İdarəsi Yol Patrul Xidməti baş inspektor polis leytenantı X4 tərəfindən qəbul edilmiş xx.xx.2025-ci il tarixli, TP seriyalı ******* saylı inzibati tənbeh vermə haqqında qərara əsasən X2 xx.xx.2025-ci il tarixdə **-KA-*** dövlət qeydiyyat nişanlı, “CHANGAN CS 35 PLUS” minik markalı nəqliyyat vasitəsini idadə edərkən İXM-in 327.2-ci maddəsində nəzərdə tutulan inzibati xətanı törətmişdir. X2 İXM-in 327.2-ci maddəsində nəzərdə tutulan inzibati xəta törətdiyi üçün 100 manat məbləğində cərimə edilmişdir. Azərbaycan Respublikası İnzibati Xətalar Məcəlləsinin (bundan sonra İXM) 327.2-ci maddəsinə əsasən Svetoforun və ya nizamlayıcının qadağanedici işarəsi verilərkən hərəkətin davam etdirilməsinə, 3.1 “Giriş qadağandır” yol nişanının tələblərinin və ya sərnişin daşıma, əks istiqamətli hərəkət zolağına çıxmaqla ötmə və ya manevr etmə, yolayrıcını keçmə qaydalarının pozulmasına, ümumi istifadədə olan nəqliyyat vasitələrinin, yaxud adamlar daşınan yük avtomobillərinin sərnişinlərlə yanacaqdoldurma məntəqəsinə daxil olmasına, 1.1, 1.3 və 1.11 üfüqi nişanlanma xətlərinin tələblərinə riayət etməyərək sola və ya geriyə dönməyə, yaxud maneəni kənardan keçməyə görə - yüz manat məbləğində cərimə edilir. İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və hərəkətsizlik) törətmiş şəxs inzibati məsuliyyətə cəlb olunur və tənbeh edilir. İXM-nin 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İXM-nin 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İXM-nin 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. İXM-nin 124.3-cü maddəsinə əsasən barəsində inzibati xəta haqqında iş üzrə icraat aparılan şəxs inzibati xəta hadisəsinin mövcudluğu ilə razılaşmadıqda, səlahiyyətli vəzifəli şəxs inzibati xəta haqqında protokol tərtib edir. İXM-nin 124.4-cü maddəsinə əsasən inzibati tənbeh tətbiq etmə haqqında qərar və ya inzibati xəta haqqında protokol operativ nəqliyyat vasitəsində quraşdırılmış bortkompüter vasitəsilə tərtib olunaraq dərhal, yaxud belə kompüter olmadıqda həmin günün sonunadək müvafiq icra hakimiyyəti orqanının mərkəzi informasiya sistemində yerləşdirilir və barəsində inzibati xəta haqqında iş üzrə icraat aparılan şəxsə bu Məcəllənin 125.2.1-ci maddəsində nəzərdə tutulmuş qaydada bu barədə məlumat verilir. İnzibati tənbeh tətbiq etmə haqqında qərarın və ya inzibati xəta haqqında protokolun kağız daşıyıcıda surəti səlahiyyətli orqan (vəzifəli şəxs) tərəfindən yerindəcə barəsində inzibati xəta haqqında iş üzrə icraat aparılan şəxsə, həmçinin belə müraciəti olduqda inzibati xəta haqqında iş üzrə zərər çəkmiş şəxsə verilir. Bu Məcəllənin 124.3-cü maddəsində nəzərdə tutulmuş hallarda inzibati xəta haqqında protokol baxılması üçün yuxarı səlahiyyətli orqana (vəzifəli şəxsə) göndərilir. Yuxarı səlahiyyətli orqan (vəzifəli şəxs) tərəfindən həmin iş üzrə qəbul edilən qərar qəbul edildiyi gün müvafiq icra hakimiyyəti orqanının mərkəzi informasiya sistemində yerləşdirilir və barəsində inzibati xəta haqqında iş üzrə icraat aparılan şəxsə həmin qərar barədə bu Məcəllənin 125.2-ci maddəsində nəzərdə tutulmuş qaydada məlumat verilir. İXM-nin 134.1, 134.1.4-cü maddələrinə əsasən inzibati xəta haqqında iş üzrə qərardan verilən şikayətə və ya protestə baxılaraq bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilir. Məhkəmə qeyd edir ki, barəsində inzibati xəta haqqında iş üzrə icraat aparılan şəxs X2 inzibati xətanın mövcudluğu ilə razılaşmadığı halda, inzibati orqan heç bir araşdırma aparmadan X2 barəsində xx.xx.2025-ci il tarixli, TP seriyalı ******* saylı inzibati tənbeh vermə haqqında qərar qəbul edərək X1 iştirakını təmin etməmiş və bununla onun hüquqlarını pozmuşdur. Beləliklə, məhkəmə hesab edir ki, inzibati xəta haqqında icraat aparılarkən səlahiyyətli orqan (vəzifəli şəxs) İXM-lə müəyyən edilmiş tələbləri işin hallarının hərtərəfli, tam və obyektiv araşdırılmasına maneə törədəcək dərəcədə pozaraq, X2 barəsində inzibati xəta haqqında qərar qəbul edərək, sonuncunun hüquqlarını pozmuşdur. X2 inzibati xətanın mövcudluğu ilə razı olmadığından iş üzrə yenidən araşdırma aparılmalı və müvafiq qərar qəbul edilməlidir. Ona görə də, şikayət qismən təmin edilməli, Bakı Şəhər Dövlət Yol Polisi İdarəsi Yol Patrul Xidmətinin vəzifəli şəxsi tərəfindən qəbul edilmiş X1 İXM-nin 327.2ci maddəsi ilə cərimə olunmasına dair xx.xx.2025-ci il tarixli, TP seriyalı ******* saylı qərar ləğv edilməli X2 barəsində işə yenidən baxılması Bakı Şəhər Dövlət Yol Polisi İdarəsi Yol Patrul Xidmətinə tapşırılmalıdır. Göstərilənlərə əsasən və Azərbaycan Respublikası İXM-nin 128, 129 və 133-136-cı maddələrini rəhbər tutaraq, məhkəmə QƏRARA ALDİ: Şikayət qismən təmin edilsin. Bakı Şəhər Dövlət Yol Polisi İdarəsi Yol Patrul Xidməti baş inspektor polis leytenantı X4 tərəfindən qəbul edilmiş X1 İnzibati Xətalar Məcəlləsinin 327.2-ci maddəsi ilə cərimə olunmasına dair xx.xx.2025-ci il tarixli, TP seriyalı ******* saylı inzibati tənbeh vermə haqqında qərar ləğv edilsin və işə yenidən baxılması Bakı Şəhər Dövlət Yol Polisi İdarəsi Yol Patrul Xidmətinə tapşırılsın. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı Şəhəri Nərimanov Rayon Məhkəməsi vasitəsilə və ya birbaşa Bakı Apellyasiya Məhkəməsinə şikayət verilə bilər. Hakim Xalidə Əlisoy