Bakı Şəhəri Nərimanov Rayon Məhkəməsi Qərar — İş №3(005)-1148/2021

Azərbaycan Respublikası adından QƏRAR Bakı şəhəri İş № 3(005)-1148/2021 18.06.2021 BAKI ŞƏHƏRİ NƏRİMANOV RAYON MƏHKƏMƏSİ Hakim Qurbanov Vüsal Rafiq oğlunun sədrliyi, Ələkbərova Aysel Ceyhun qızının katibliyi, barəsində inzibati xəta haqqında iş üzrə icraat aparılan hüquqi şəxs Şəxs MMC-nin nümayəndəsi və vəkili X2 iştirakı ilə, Şəxs MMC-nin barəsində Azərbaycan Respublikası İnzibati Xətalar Məcəlləsinin 430.4-cü maddəsi ilə inzibati tənbeh tədbirinin tətbiq edilməsinə dair Azərbaycan Respublikasının Mərkəzi Bankından daxil olmuş inzibati xəta haqqında materiala məhkəmənin binasında, açıq məhkəmə iclasında baxaraq MÜƏYYƏN ETDİ: Azərbaycan Respublikasının Mərkəzi Bankından daxil olmuş 07.05.2021-ci il tarixli, MN seriyalı ******* nömrəli inzibati xəta haqqında protokolda göstərilmişdir ki, Şəxs MMC 210.000.00 ABŞ dolları məbləğində olan vəsaiti bank hesabından 12 aprel 2019-cu il tarixdə Azərbaycan Respublikasından kənara qabaqcadan ödəniş etməklə köçürmüşdür. Lakin ödənişin aparıldığı gündən 2 (iki) ildən artıq müddətin keçməsinə baxmayaraq həmin vəsait hesabına alınan malların ölkəyə idxalını təsdiq edən sənədlər banka təqdim edilməmiş, qabaqcadan ödənilmiş valyuta vəsaiti xaricdən geri qaytarılmamışdır. Məhkəmə iclasında iştirak edən Şəxs MMC-nin nümayəndəsi və vəkili X5 izahatında göstərmişdir ki, Azərbaycan Respublikasının Mərkəzi Bankı tərəfindən Şəxs MMC şirkətinə MN ******* saylı, 7 may 2021-ci il tarixli inzibati xəta haqqında protokol tərtib edilmişdir. Tərtib edilmiş protokol İnzibati Xətalar Məcəlləsinin 430.4-cü maddəsinin pozulması ilə bağlı olmuşdur. Belə ki, Mərkəzi Bank hesab etmişdir ki, MMC tərəfindən başqa ölkədə yerləşən xarici şirkətə 12 aprel 2019-cu il tarixində bank hesabından 210 000.00 (iki yüz on min) ABŞ dolları məbləğində qabaqcadan köçürülmüş ödəniş edilmiş, lakin köçürülmənin aparıldığı tarixdən 2 il ərzində müvafiq mallar ölkəyə idxal edilmədiyindən və ya ödənilmiş məbləğ geri qaytarılmadığından inzibati xəta törədilmişdir. MMC-yə protokol barədə məlumat 16-01383- 2021 saylı, 17 may 2021-ci il tarixli məktub vasitəsi ilə verilmişdir. Tərtib edilmiş protokolun əsassız və qanunsuz olması ilə bağlı qeyd etmişdir ki, protokolun hansı əsaslarla tərtib edildiyi naməlum olaraq qalır. Belə ki, “Şəxs" MMC (Sifarişçi) və “İmpex İnternational FZE” (İcraçı) şirkətləri arasında ümumi dəyəri 3 000 000 (üç milyon) ABŞ Dolları olan 07.11.2017ci il tarixli, 88H nömrəli alqı-satqı müqaviləsi imzalanmışdır. Sonradan bu müqaviləyə əlavə razılaşmalarla müqavilənin ümumi dəyərinə və bir sıra şərtlərinə əlavələr edilmişdir. Əsas müqavilə və əlavə razılaşmalara uyğun olaraq Sifarişçi mütəmadi olaraq İcraçı tərəfindən ona təqdim edilmiş hesab-fakturalar əsasında İcraçıya elektron bank köçürmələri şəklində ödənişlər etmiş, İcraçı isə mütəmadi şəkildə Sifarişçinin sifarişləri əsasında malları Sifarişçiyə çatdırmışdır. 08 iyun 2021-ci ilə qədər Sifarişçi tərəfindən İcraçıya ödənilmiş ümumi məbləğ 7 396 636 ABŞ dolları və 1 611 000 Avro təşkil etmişdir, idxal edilmiş malların gömrük məbləği isə 6 412 812, 45 ABŞ dolları və 410 000 Avro olmuşdur. Müqavilənin müddəti üzrə son tarix olan 31 dekabr 2021-ci ilə qədər isə İcraçının Sifarişçiyə olan borcunu tam hissədə ödəyəcəkdir. Müqavilə üzrə son tarix olan 31 dekabr 2021-ci ilə qədər isə İcraçı Sifarişçiyə olan 983 823, 55 ABŞ dolları və 1 201 000 Avro məbləğində borcu ödəyəcəkdir, sifarişçi tərəfindən İcraçıya ödənilən digər ödənişlər sırasında həmçinin Sifarişçi tərəfindən icraçıya 12 aprel 2019-cu ildə elektron bank ödənişi şəklində ödənilən 210 000 (iki yüz on min) ABŞ dolları məbləği də olmuşdur. Bu məbləğin əvəzi olaraq mallar, 25.11.2019 tarixli, **********917 saylı və 05.02.2020 tarixli, **********774 saylı gömrük bəyannamələrinin də təsdiq etdiyi kimi, ölkəyə idxal edilmişdir. Protokol tərtib etməklə Mərkəzi Bankı tərəfindən Azərbaycan Respublikası Konstitusiyasının 12-ci maddəsinin, 15ci və 16-cı maddəsinin, 29-cu maddəsinin, 60-cı maddəsinin, 71-ci maddəsinin habelə İnzibati Xətalar Məcəlləsinin 1.2-ci, 2-ci, 3-cü, 6-cı, 8-ci, 11-ci maddələrinin tələbləri pozulmuşdur. Mərkəzi Bank tərəfindən göstərilən protokol tərtib edilərkən inzibati hüquq pozuntusuna görə inzibati məsuliyyətə cəlb etmə müddətləri tamamilə diqqətdən kənarda qalmışdır. Qabaqcadan ödənilmiş məbləğin köçürüldüyü zaman qüvvədə olan Azərbaycan Respublikası Mərkəzi X4 2016-cı il 28 noyabr tarixli 45/1 nömrəli Qərarı ilə təsdiq edilmiş “Azərbaycan Respublikasının rezidentlərinin xarici valyutada, habelə qeyri-rezidentlərin milli və xarici valyutada əməliyyatlarının aparılması Qaydaları”na əsasən, ödənişin aparıldığı gündən 270 (iki yüz yetmiş) gün müddətində malların ölkəyə idxalını təsdiq edən gömrük bəyannaməsi və ya idxal olunan xidmətlərin göstərilməsini təsdiq edən sənəd banka təqdim olunmalı idi. Həmin müddət ərzində mallar idxal edilmədikdə, xidmətlər göstərilmədikdə və ya qabaqcadan ödənilmiş məbləğ geri qaytarılmadıqda (xeyrinə qabaqcadan ödənişin edildiyi şəxs və ya üçüncü şəxs tərəfindən) bank qabaqcadan ödəniş əməliyyatına dair bütün sənədləri Azərbaycan Respublikasının İnzibati Xətalar Məcəlləsinin 430.4-cü maddəsində nəzərdə tutulmuş məsuliyyət tədbirlərinin həyata keçirilməsi üçün 5 (beş) iş günü ərzində Azərbaycan Respublikasının Mərkəzi Bankına təqdim edilməli idi. Göstərilən protokolda istinad edilən 12 aprel 2019-cu il tarixli qabaqcadan edilmiş ödənişin aparıldığı gündən 270 (iki yüz yetmiş) gün müddət isə 2020-ci ilin yanvar ayının 07-də başa çatmışdır. Bundan sonra Mərkəzi Bank tərəfindən MMC-yə 29 yanvar 2020-ci il tarixli bildiriş göndərilmiş və qabaqcadan edilmiş ödənişlə bağlı inzibati xəta haqqında icraata başlanılacağı barədə məlumat verilmişdir. Lakin ötən müddət ərzində bildiriş verildiyi halda heç bir inzibati tənbeh tədbiri tətbiq edilməmişdir. Azərbaycan Respublikasının İnzibati Xətalar Məcəlləsinin 18-ci maddəsinə əsasən, hüquqi şəxs barəsində inzibati tənbeh yalnız hakim tərəfindən tətbiq edilir. Səlahiyyətli orqanlar (vəzifəli şəxslər) bu Məcəllənin 18.2-ci maddəsində müəyyən edilmiş əsasların olması qənaətinə gəldikdə, inzibati xəta haqqında protokolu baxılmaq üçün məhkəməyə göndərirlər. Bu Məcəllənin 18.2-ci maddəsində müəyyən edilmiş əsaslar olmadıqda, səlahiyyətli orqanlar (vəzifəli şəxslər) inzibati xəta haqqında iş üzrə qərar qəbul edir. İnzibati Xətalar Məcəlləsinin 38.1-ci maddəsinə görə isə maliyyə, vergilərin və rüsumların ödənilməsi qaydaları əleyhinə olan inzibati xətalara görə inzibati tənbeh inzibati xətanın törədildiyi gündən ən geci bir il keçənədək verilə bilər. Göstərilən 29 yanvar 2020-ci il tarixli bildirişlə bağlı isə ötən 1 ildən çox müddətdə sadalanan inzibati tənbeh tədbirlərinin heç biri görülməmişdir və inzibati tənbeh ilə bağlı bütün müddətlər ötürülmüşdür. 2.4. Azərbaycan Respublikası Mərkəzi X4 2016-cı il 28 noyabr tarixli 45/1 nömrəli Qərarı ilə təsdiq edilmiş “Azərbaycan Respublikasının rezidentlərinin xarici valyutada, habelə qeyri-rezidentlərin milli və xarici valyutada əməliyyatlarının aparılması Qaydaları”na 20 fevral 2020-ci il tarixli 06/1 nömrəli Azərbaycan Respublikası Mərkəzi X4 Qərarı ilə dəyişiklik edilmiş, müvafiq sənədlər üçün tələb edilən 270 gün müddət 2 il müddət ilə əvəzlənmişdir. Bu zaman Mərkəzi Bank göstərilən 12 aprel 2019-cu il tarixli qabaqcadan edilən ödənişlə bağlı 270 gün müddətinin 07 yanvar 2020-ci il tarixində başa çatdığını bir kənara qoyaraq, məlum olmayan səbəblərə görə qabaqcadan edilmiş ödənişlə tələb edilən müddətin başa çatmadığı qənaətinə gəlmiş, 26 aprel 2021-ci il tarixində yeni bir bildirişlə MMC-dən müvafiq sənədləri tələb etmişdir. Halbuki, İnzibati Xətalar Məcəlləsinin 11-ci maddəsinə əsasən, Azərbaycan Respublikasında inzibati xətalar haqqında işlər üzrə icraatın aparılması, inzibati xətalar haqqında işlər üzrə qərarların qəbul və icra edilməsi həmin vaxtda qüvvədə olan Azərbaycan Respublikasının inzibati xətalar qanunvericiliyinə uyğun olaraq həyata keçirilir. Mərkəzi Bank tərəfindən protokolda ifadə edilmiş mövqe ədalətli deyil, MMC tərəfindən ona təqdim edilmiş sənədlərin obyektiv və ədalətli öyrənilməsinə söykənmir. Mərkəzi Bank MMC-nin təqdim etdiyi sənədləri obyektiv araşdırma və qanunçuluq prinsipləri əsasında qiymətləndirməmiş, sənədlərə qısa müddət ərzində ümumən baxaraq əsassız və qanunsuz qərar qəbul etmişdir. Göstərilən protokolun hansı şəraitdə, kimlərin iştirakı ilə çıxarılması müəmmalıdır. Belə ki, protokolun bilavasitə tərtib edilməsi prosesinin yeri, vaxtı barədə MMC-yə heç bir məlumat verilməmiş, MMC-nin iştirakı təmin edilməmişdir. Mərkəzi Bank ona təqdim edilmiş sənədləri aşkarlıq prinsipi əsasında, obyektiv şəkildə qiymətləndirməmiş, protokol tərtib edilərkən MMC-nin iştirakını və öz mövqeyini bildirməsini lazım bilməmiş, mübahisəli məsələ ilə bağlı MMC-nin öz mövqeyini əsaslandırmasına şərait yaradılmamışdır. Protokol tərtib edilərkən MMC-nin bu prosesdə iştirak etmək, mövqeyini bildirmək, sübutlar təqdim etmək, etiraz etmək, mülahizələrini ifadə etmək kimi beynəlxalq və milli hüquqla tanınmış prosessual hüquqları pozulmuşdur. Halbuki, protokol tərtib edilərkən X6 Xətalar Məcəlləsinin 1.2-ci və 4-cü maddələrinə əsasən, MMC-nin ümumtanınmış hüquqlarını və azadlıqlarını təmin etməli, ədalətli davranmalı və hüquqi prinsiplərə əsaslanmalı idi. Yuxarıda qeyd edilənləri və Azərbaycan Respublikası Mərkəzi Bankının MMC-yə qarşı tərtib etdiyi MN ******* saylı, 7 may 2021-ci il tarixli inzibati xəta haqqında protokolun qanunsuz və əsassız olduğunu nəzərə alaraq iş üzrə icraata xitam verilməsini xahiş etmişdir. Azərbaycan Respublikasının Mərkəzi Bankına məhkəmə iclasının vaxtı və yeri barədə lazımi qaydada məlumat verilsə də, məhkəmə iclasında səlahiyyətli nümayəndəsinin iştirakını təmin etməmiş və bunun səbəbləri barədə hər hansı məlumat verməmişdir. Məhkəmə işə inzibati xəta haqqında protokol tərtib etmiş səlahiyyətli orqanın nümayəndəsinin iştirakı olmadan baxılması mümkün hesab edilmişdir. İşdə iştirak edən şəxsin izahatını dinləyib, inzibati material üzrə araşdırılan sübutların məcmusunu hərtərəfli, tam və obyektiv qiymətləndirərək məhkəmə hesab edir ki, Şəxs MMC tərəfindən Azərbaycan Respublikası İXM-in 430.4-cü maddəsində nəzərdə tutulan inzibati xətanı törətməsi sübuta yetirilmədiyindən inzibati xəta haqqında iş üzrə icraata xitam verilməlidir. İş materiallarında olan İnternet Vergi İdarəsinin kommersiya qurumlarının dövlət reyestri məlumatları haqqında çıxarışdan görünür ki, nizamnamə kapitalı 100000,00 manat olan Şəxs MMC 19.09.2008-ci il tarixdə dövlət qeydiyyatına alınmışdır. İş materiallarında olan inzibati xəta haqqında iş üzrə icraata başlanılacağı barədə 26 aprel 2021-ci il tarixli bildirişdən görünür ki, Şəxs MMC tərəfindən “xxxx” ASC-dəki bank hesabından 12 aprel 2019-cu il tarixində 210000.00 ABŞ dolları məbləğində qabaqcadan köçürülmüş ödənişin bəyan edilməyən 210000.00 ABŞ dolları hissəsi ilə əlaqədar köçürülmənin aparıldığı tarixdən 2 il ərzində müvafiq malların ölkəyə idxalını (idxal olunan xidmətlərin göstərilməsini) və ya qabaqcadan ödənilmiş məbləğin geri qaytarılmasını təsdiq edən sənədlər müvəkkil banka təqdim edilmədiyindən əməldə İnzibati Xətalar Məcəlləsinin (İXM) 430.4-cü maddəsinin tərkib əlamətləri müşahidə edilmişdir. Göstərilən faktla bağlı cəmiyyətin əməlində inzibati xəta tərkibinin olmasını istisna edən sübutlarınızın 07 may 2021-ci il tarixinədək təqdim edilmədiyi təqdirdə, müvafiq qaydada inzibati xəta haqqında protokol tərtib olunacaq. İş materiallarında olan “xxxx” ASC-nin 12 aprel 2021-ci il tarixli Azərbaycan Respublikasının Mərkəzi Bankına ünvanlanmış məktubundan görünür ki, siyahıda təqdim olunan müştəri vəsaitini “xxxx” ASC-də olan bank hesablarından müvafiq rekvizitlər üzrə köçürmüşdür. Azərbaycan Respublikasının rezident və qeyri-rezidentlərinin xarici valyuta əməliyyatlarının aparılması Qaydalarına əsasən malların idxal edilmədiyi, xidmətlərin göstərilmədiyi və ya qabaqcadan ödənilmiş vəsaitin geri göndərilmədiyi nəzərə alınmaqla, qabaqcadan ödəniş əməliyyatına dair bütün sənədlər əlavə edilməklə Sizə təqdim edilir. Məhkəməyə təqdim edilmiş 25.11.2019-cu il tarixli Gömrük Bəyannaməsinin surətindən görünür ki, Şəxs MMC tərəfindən “Sedna Bilgi və İletişim Sistemləri A.Ş, İmpex İnternational FZE tap/ilə (İstanbul/Türkiyə)” şirkətindən 202950,00 ABŞ dolları məbləğində 1148 ədəd GC420t Printerlər və s. əşyalar alınmışdır. Məhkəməyə təqdim edilmiş 05.02.2020-ci il tarixli Gömrük Bəyannaməsinin surətindən görünür ki, Şəxs MMC tərəfindən “X3 FZCO, İmpex İnternational FZE tap/ilə (X1)” şirkətindən 36564,00 ABŞ dolları məbləğində 4 ədəd məlumatın işləmə blokları/Server alınmışdır. Azərbaycan Respublikası İnzibati Xətalar Məcəlləsinin 3-cü maddəsində inzibati məsuliyyətin əsasları müəyyən edilmişdir. Həmin maddənin tələbinə əsasən, yalnız həmin Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir; 4-cü maddəsinə əsasən, bu Məcəllə insan və vətəndaş hüquqlarına və azadlıqlarına hörmət edilməsi, qanunçuluq, qanun qarşısında bərabərlik, təqsirsizlik prezumpsiyası, ədalətlilik və inzibati xətaların qarşısının alınması prinsiplərinə əsaslanır; 6.1-ci maddəsinə əsasən, inzibati xətalara görə inzibati tənbeh həmin Məcəlləyə uyğun olaraq tətbiq edilir; 9.1-ci maddəsinə əsasən, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına uyğun, qanuni və əsaslı olmalıdır; 12.1-ci maddəsində göstərilir ki, həmin Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur; Azərbaycan Respublikası Gömrük Məcəlləsinin 1.0.11-ci maddəsinə əsasən gömrük bəyannaməsi – malların müvafiq gömrük proseduru altında yerləşdirilməsi üçün tələb olunan məlumatları əks etdirən, şəxslər tərəfindən müvafiq icra hakimiyyəti orqanının müəyyən etdiyi formada gömrük orqanına təqdim olunan sənəddir. Azərbaycan Respublikasının Mərkəzi Bankının 45/1 nömrəli 28 noyabr 2016-cı il tarixli qərarı ilə təsdiq edilmiş “Azərbaycan Respublikasının rezident və qeyrirezidentlərinin xarici valyuta əməliyyatlarının aparılması” Qaydarının 4.3.1.3-cü bəndinə əsasən qabaqcadan ödəniş aparıldıqda banka ödənişin təyinatını, şərtlərini və məbləğini əks etdirən sənəd təqdim edilir. Bu zaman ödənişin aparıldığı gündən 270 (iki yüz yetmiş) gün müddətində malların ölkəyə idxalını təsdiq edən gömrük bəyannaməsi və ya idxal olunan xidmətlərin göstərilməsini təsdiq edən sənəd banka təqdim olunmalıdır. Həmin müddət ərzində mallar idxal edilmədikdə, xidmətlər göstərilmədikdə və ya qabaqcadan ödənilmiş məbləğ geri qaytarılmadıqda (xeyrinə qabaqcadan ödənişin edildiyi şəxs və ya üçüncü şəxs tərəfindən) bank qabaqcadan ödəniş əməliyyatına dair bütün sənədləri Azərbaycan Respublikasının İnzibati Xətalar Məcəlləsinin 430.4-cü maddəsində nəzərdə tutulmuş məsuliyyət tədbirlərinin həyata keçirilməsi üçün 5 (beş) iş günü ərzində Azərbaycan Respublikasının Mərkəzi Bankına təqdim edir. 28 fevral 2020-ci il tarixdə qüvvəyə minmiş Azərbaycan Respublikası Mərkəzi X4 20 fevral 2020-ci il tarixli, 06/1 nömrəli Qərarı ilə “Azərbaycan Respublikasının rezidentlərinin xarici valyutada, habelə rezident və qeyri rezidentlərinin milli və xarici valyutada əməliyyatlarının aparılması Qaydaları”nın 4.3.1.3-cü yarımbəndində nəzərdə tutulmuş “270 (iki yüz yetmiş)” sözləri “02 (iki) il” sözləri ilə əvəz edilmişdir. Azərbaycan Respublikası İXM-in 430.4-cü maddəsinə əsasən, avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir. Qeyd edilən maddənin dispoziyasından göründüyü kimi, avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə inzibati məsuliyyət müəyyən edilir. Məhkəmə qeyd edir ki, Şəxs MMC MMC tərəfindən köçürülmüş vəsait hesabına mallar ölkəyə idxal edilmişdir. Bu fakt məhkəməyə təqdim edilmiş Gömrük Bəyannamələri ilə öz təsdiqini tapır. Bu səbəbdən məhkəmə, Şəxs MMC tərəfindən Azərbaycan Respublikasından kənara qabaqcadan ödəniş etməklə köçürülmüş məbləğ müqabilində malların idxal olunmaması kimi hərəkətlərə yol verilməməsi qənaətinə gəlir. Azərbaycan Respublikası İXM-in 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Azərbaycan Respublikası İXM-nin 75-ci maddəsində göstərildiyi kimi, inzibati xətalar haqqında işlərin icraatı üzrə inzibati xəta hadisəsi (inzibati xəta törədilmişdirmi), inzibati xəta törətməkdə şəxsin təqsiri və s. müəyyən edilməlidir. Eyni Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etməkdən ötrü hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Beləliklə, məhkəmə hesab edir ki, Şəxs MMC tərəfindən qabaqcadan ödəniş aparıldığı gündən pulun müqabilində malların idxal edilməməsi kimi hərəkətlər edilmədiyindən onun İXM-in 430.4-cü maddəsi ilə inzibati məsuliyyəti istisna edilir. Bu baxımdan Şəxs MMC-nin hərəkətlərində inzibati xəta tərkibi yoxdur, tərtib edilmiş inzibati protokol əsasında o, inzibati məsuliyyətə cəlb edilə bilməz. Bu səbəbdən Şəxs MMC barəsində başlanmış inzibati xəta haqqında iş üzrə icraata, hərəkətlərində inzibati xəta tərkibi olmadığından, xitam verilməlidir. Azərbaycan Respublikası İXM-in 53.0.2-ci maddəsinin tələbinə görə inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Azərbaycan Respublikası İXM-in 105.1-ci maddəsinə əsasən bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Şərh olunanlara əsasən və Azərbaycan Respublikası İXM-nin 40.0.1,43, 48-51, 53, 55,114.1.4, 125,128-130 maddələrini rəhbər tutaraq, məhkəmə QƏRARA ALDİ: Şəxs MMC barəsində Azərbaycan Respublikası İnzibati Xətalar Məcəlləsinin 430.4cü maddəsi ilə tərtib edilmiş MN seriyalı ******* nömrəli, 07 may 2021-ci il tarixli inzibati xəta haqqında protokola dair inzibati xəta haqqında iş üzrə icraata xitam verilsin. Qərarın surəti təqdim edildiyi və ya alındığı gündən 10 gün müddətində Bakı Şəhər Nərimanov Rayon Məhkəməsi vasitəsilə və ya bilavasitə Bakı Apelyasiya Məhkəməsinə şikayət verilə bilər. Hakim Vüsal Qurbanov