Bakı Şəhəri Nərimanov Rayon Məhkəməsi Qərar — İş №3(005)-1394/2025

Azərbaycan Respublikası adından QƏRAR Bakı şəhəri İş № 3(005)-1394/2025 15.05.2025 BAKI ŞƏHƏRİ NƏRİMANOV RAYON MƏHKƏMƏSİ Hakim Əlisoy Xalidə Kəramət qızının sədrliyi, Məhkəmə iclas katibi Ələkbərzadə Qafur Hikmət oğlunun katibliyi ilə, Qərarından şikayət verilmiş Azərbaycan Respublikası Daxili İşlər Nazirliyi Baş X7 İdarəsinin nümayəndəsi X2, Barəsində protokol tərtib olunan qərardan şikayət vermiş şəxs X1 iştirakları ilə, X1 Azərbaycan Respublikası DİN-nin Baş X7 İdarəsi tərəfindən qəbul edilmiş xx.xx.2025-ci il tarixli EQ 27677137 nömrəli inzibati tənbeh vermə haqqında qərardan verdiyi şikayətə məhkəmənin inzibati binasında, açıq məhkəmə iclasında baxaraq, məhkəmə MÜƏYYƏN ETDİ: X1 Azərbaycan Respublikası DİN-nin Baş X7 İdarəsi tərəfindən qəbul edilmiş xx.xx.2025-ci il tarixli EQ 27677137 nömrəli qərarından şikayətlə Bakı Şəhəri Nərimanov Rayon Məhkəməsinə müraciət edərək, qərarın ləğv edilməsi və inzibati xəta haqqında iş üzrə icraata xitam verilməsini xahiş etmişdir. Şikayətdə qeyd edilmişdir ki, o, xx.xx.2025-ci il tarixində Bakı şəhəri X8 küçəsində ona məxsuz "Hyunday Sonata" markalı **-TE-*** dövlət nömrə nişanlı avtomobillə hərəkətdə olan zaman həmin ərazidə olan nəzarət kamerası tərəfindən inzibati xəta kimi qeydə alınmış və bu barədə xx.xx.2025-ci il tarixli EQ 27677137 nömrəli elektron protokol tərtib olunmuşdur. Həmin protokol əsasında onun AR İXM-nın 327.1.1-ci maddəsinə əsasən yəni yol nişanlarının tələblərinə riayət edilməməsinə gərə 100 manat 2 bal məbləğində cərimə edilmişdir. Hesab edir ki, onun barəsində olan xx.xx.2025-cü il tarixli EQ 27677137 nömrəli qərar əsassızdır və həmin qərar ləğv edilməli və onun ödədiyi 100 manat geri qaytarılmalıdır. Qeyd edir ki. avtobus zolağının təyinatı üzrə daxil olmayan digər nəqliyyat vasitələri inzibati Xətalar məcəlləsinin 327.1.1-ci maddəsinində 100 manat 2 bal məbləğində nəzərdə tutulmuş cərimənin təyin oluması üçün əsas yoxdur. Çünki həmin ərazidə avtobus zolağının olması barədə heç bir yol tənzimləyici işarə yoxdur. Ona inzibati xəta protokolu tərtib edərkən öndəki yol nişanı ilə bağlı tərtib edilmişdir. Azərbaycan Respublikasının Milli Məclisinin parlamentində İXM-nin 327.1 5.9-ci maddəsi üzə qanunda hansısa bir dəyişiklik edilməmişdir. Bütün bunlara əsasən hesab edir ki, barəsində olan AR İXM-nın 321.1.1-ci maddəsinə əsasən yani yol nişanlarının tələblərinə riayət edilməməsinə görə 100 manat 2 bal məbləğində cərimə edilməyinə dair AR DİN Baş X7 İdarəsi tərəfindən qəbul edilmiş xx.xx.2025-ci il tarixli EQ 27677137 nömrəli Qərarı ləğv edilməlidir. Və onun tərəfindən ödənilmiş 100 manat geri qaytarılmalı və 2 bal silinməlidir. Pratakoldan narazı olmasına baxmayaraq isə protokol ilə əlaqədar olaraq ödəniş etməyinə səbəb olaraq qeyd edir ki, xx.xx.2025-ci il tarixində maşınının texniki baxışdan keçməyinin son günü olub, əks halda yenə 50 manat cərimə olunacaqmış. Həmin müddətdə avtomobilini idarə etməyi ilə bağlı isə qeyd edir ki, onun 1 ayağı yoxdu 2-ci qrup əlildir. O, avtomobilsiz hərəkət edə bilmir. Çox çətinlik çəkir. Qeyd etdiklərinin nəzərə alınaraq barəsində AR İXM-nın 327.1.1-ci maddəsinə əsasən, yəni yol nişanlarının tələblərinə riayət edilməməsinə görə 100 manat 2 bal məbləğində cərimə edilməyinə dair AR DİN Baş X7ni İdarəsi tərəfindən qəbul edilmiş xx.xx.2025-ci il tarixli EQ 27677137 nömrəli qərarın ləğv edilməsini və onun tərəfindən ödənilmiş 100 manatın geri qaytarılmasını və yazılan 2 balın silinməsini xahş etmişdir. Qərardan şikayət vermiş şəxs X3 şikayət ərizəsini müdafiə edərək heç bir yol hərəkəti qaydalarını pozmadığını bildirmiş, pozuntunun olduğunu əks etdirən görüntünü təqdim etmədiklərini və qərarın qanunsuz olaraq tərtib olunduğunu söyləmişdir. Şikayətin təmin edilməsini məhkəmədən xahiş etmişdir Məhkəmə iclasında iştirak edən Azərbaycan Respublikası Daxili İşlər Nazirliyi Baş X7 İdarəsinin nümayəndəsi X4 şikayətin təmin edilməməsini məhkəmədən xahiş etmişdir. Məhkəmə proses iştirakçılarının izahatını dinləyib, şikayət ərizəsini və iş materiallarını araşdıraraq hesab edir ki, şikayət qismən təmin edilməlidir. İş materiallarında olan və məhkəmə iclasında tədqiq edilmiş Azərbaycan Respublikası DİN-nin Baş X7 İdarəsi tərəfindən qəbul edilmiş xx.xx.2025-ci il tarixli EQ 27677137 nömrəli inzibati tənbeh vermə haqqında qərara əsasən X3 “HYUNDAİ SONATA” minik markalı, **-TE-*** dövlət qeydiyyat nişanlı nəqliyyat vasitəsini idarə edərkən İXM-in 327.1-1-ci maddəsində nəzərdə tutulan inzibati xətanı törətmişdir. X3 İXM-in 327.1-1-ci maddəsində nəzərdə tutulan inzibati xəta törətdiyi üçün 100 manat məbləğində cərimə edilmişdir. Azərbaycan Respublikası İnzibati Xətalar Məcəlləsinin (bundan sonra İXM) 327.1-1-ci maddəsinə əsasən “Yol hərəkəti haqqında” Azərbaycan Respublikası Qanununun yol verdiyi hallar istisna olmaqla, 5.9, 5.10.1–5.10.3 nişanları ilə işarələnmiş, ümumi istifadədə olan nəqliyyat vasitələri üçün nəzərdə tutulmuş hərəkət zolağı olan yollarda hərəkət edən digər nəqliyyat vasitələrinin həmin zolaqda hərəkət etməsinə görə – yüz manat məbləğində cərimə edilir. İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və hərəkətsizlik) törətmiş şəxs inzibati məsuliyyətə cəlb olunur və tənbeh edilir. İXM-nin 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İXM-nin 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İXM-nin 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. İXM-nin 124.3-cü maddəsinə əsasən barəsində inzibati xəta haqqında iş üzrə icraat aparılan şəxs inzibati xəta hadisəsinin mövcudluğu ilə razılaşmadıqda, səlahiyyətli vəzifəli şəxs inzibati xəta haqqında protokol tərtib edir. İXM-nin 124.4-cü maddəsinə əsasən inzibati tənbeh tətbiq etmə haqqında qərar və ya inzibati xəta haqqında protokol operativ nəqliyyat vasitəsində quraşdırılmış bortkompüter vasitəsilə tərtib olunaraq dərhal, yaxud belə kompüter olmadıqda həmin günün sonunadək müvafiq icra hakimiyyəti orqanının mərkəzi informasiya sistemində yerləşdirilir və barəsində inzibati xəta haqqında iş üzrə icraat aparılan şəxsə bu Məcəllənin 125.2.1-ci maddəsində nəzərdə tutulmuş qaydada bu barədə məlumat verilir. İnzibati tənbeh tətbiq etmə haqqında qərarın və ya inzibati xəta haqqında protokolun kağız daşıyıcıda surəti səlahiyyətli orqan (vəzifəli şəxs) tərəfindən yerindəcə barəsində inzibati xəta haqqında iş üzrə icraat aparılan şəxsə, həmçinin belə müraciəti olduqda inzibati xəta haqqında iş üzrə zərər çəkmiş şəxsə verilir. Bu Məcəllənin 124.3-cü maddəsində nəzərdə tutulmuş hallarda inzibati xəta haqqında protokol baxılması üçün yuxarı səlahiyyətli orqana (vəzifəli şəxsə) göndərilir. Yuxarı səlahiyyətli orqan (vəzifəli şəxs) tərəfindən həmin iş üzrə qəbul edilən qərar qəbul edildiyi gün müvafiq icra hakimiyyəti orqanının mərkəzi informasiya sistemində yerləşdirilir və barəsində inzibati xəta haqqında iş üzrə icraat aparılan şəxsə həmin qərar barədə bu Məcəllənin 125.2-ci maddəsində nəzərdə tutulmuş qaydada məlumat verilir. İXM-nin 134.1, 134.1.4-cü maddələrinə əsasən inzibati xəta haqqında iş üzrə qərardan verilən şikayətə və ya protestə baxılaraq bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilir. Məhkəmə qeyd edir ki, barəsində inzibati xəta haqqında iş üzrə icraat aparılan şəxs X3 inzibati xətanın mövcudluğu ilə razılaşmadığı halda, inzibati orqan heç bir araşdırma aparmadan X3 barəsində xx.xx.2025-ci il tarixli, EQ seriyalı 25683376 saylı inzibati tənbeh vermə haqqında qərar qəbul edərək X1 iştirakını təmin etməmiş və bununla onun hüquqlarını pozmuşdur. Beləliklə, məhkəmə hesab edir ki, inzibati xəta haqqında icraat aparılarkən səlahiyyətli orqan (vəzifəli şəxs) İXM-lə müəyyən edilmiş tələbləri işin hallarının hərtərəfli, tam və obyektiv araşdırılmasına maneə törədəcək dərəcədə pozaraq, X3 barəsində inzibati xəta haqqında qərar qəbul edərək, sonuncunun hüquqlarını pozmuşdur. X3 inzibati xətanın mövcudluğu ilə razı olmadığından iş üzrə yenidən araşdırma aparılmalı və müvafiq qərar qəbul edilməlidir. Ona görə də, şikayət qismən təmin edilməli, Baş X9 İdarəsinin vəzifəli şəxsi tərəfindən qəbul edilmiş X1 İXM-nin 327.1-1-ci maddəsi ilə cərimə olunmasına dair xx.xx.2025-ci il tarixli EQ 27677137 nömrəli qərar ləğv edilməli X3 barəsində işə yenidən baxılması Baş X9 İdarəsinə tapşırılmalıdır. Göstərilənlərə əsasən və Azərbaycan Respublikası İXM-nin 128, 129 və 133-136-cı maddələrini rəhbər tutaraq, məhkəmə QƏRARA ALDİ: Şikayət qismən təmin edilsin. Azərbaycan Respublikası Daxili İşlər Nazirliyinin Baş X7 İdarəsinin vəzifəli şəxsi tərəfindən qəbul edilmiş X1 İnzibati Xətalar Məcəlləsinin 327.1-1-ci maddəsi ilə cərimə olunmasına dair xx.xx.2025-ci il tarixli EQ 27677137 nömrəli inzibati tənbeh vermə haqqında qərar ləğv edilsin və işə yenidən baxılması Azərbaycan Respublikası Daxili İşlər Nazirliyinin Baş X9 İdarəsinə tapşırılsın. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı Şəhəri Nərimanov Rayon Məhkəməsi vasitəsilə və ya birbaşa Bakı Apellyasiya Məhkəməsinə şikayət verilə bilər. Hakim Xalidə Əlisoy