Bakı Şəhəri Nərimanov Rayon Məhkəməsi Qərar — İş №3(005)-1683/2022

Azərbaycan Respublikası adından QƏRAR Bakı şəhəri İş № 3(005)-1683/2022 09.06.2022 BAKI ŞƏHƏRİ NƏRİMANOV RAYON MƏHKƏMƏSİ Hakim Qurbanov Vüsal Rafiq oğlunun sədrliyi, X1 oğlunun katibliyi Şikayət vermiş şəxs X2 iştirakı ilə, Bakı şəhəri Nərimanov RPİ-nin 17-ci Polis Şöbəsi tərəfindən qəbul edilmiş xx.xx.2020-ci il tarixli, MN seriyalı ******* nömrəli “İnzibati tənbeh vermə haqqında” qərarın ləğv olunması barədə qərar qəbul edilməsinə dair X2 şikayətinə məhkəmənin binasında, açıq məhkəmə iclasında baxaraq, MÜƏYYƏN ETDİ: X4, Bakı şəhəri Nərimanov RPİ-nin 17-ci Polis Şöbəsi tərəfindən qəbul edilmiş xx.xx.2020-ci il tarixli, MN seriyalı ******* nömrəli “İnzibati tənbeh vermə haqqında” qərarın ləğv olunması barədə qərar qəbul edilməsinə dair şikayətlə məhkəməyə müraciət etmişdir. Şikayət onunla əsaslandırılmışdır ki, o, ünvan 1 ünvanında yerləşən "xxxx" MMC-yə aid olan “Kaeser Compressors" ehtiyat hissələrinin pərakəndə satışı mağazasında 07 Noyabr 2019 ildən etibarən əmək müqaviləsi üzrə satış meneceri vəzifəsində çalışır. 28 noyabr 2020-ci il tarixdə çalışdığı mağazada digər iş yoldaşı Əzizağa Əhmədov və Elmar Sadıqov ilə birlikdə mağazada dezinfeksiya, təmizlik işləri aparan zaman mülki geyimli şəxslər mağazanın bağlı qapılarına yaxınlaşaraq qapının açılmasını tələb ediblər. Onlar isə mağazanın məlum pandemiya ilə əlaqədar olaraq işləmədiyini bildirib və qapını açmayıblar. Dəfələrlə onlara, çalışmadıqlarını bildiriblər. Lakin həmin şəxslər Nərimanov Rayon Polis İdarəsinin əməkdaşları olduqlarını bildirərək xidməti sənəd göstərərək yenədə qapının açılmasını tələb ediblər, xidməti sənəd göstərdikləri üçün qapını açıblar, onlar məcburi şəkildə içəri daxil olublar. Polis əməkdaşları onlara Azərbaycan Respublikası İXMnin 211.1-ci maddəsinin tələblərinin pozduqlarını bildirərək onları cəzalandıracaqlarını bildiriblər, onlar isə polis əməkdaşlarına fəaliyyət göstərmədikləri, mağazanın qapısının bağlı olduğunu, mağazada təmizlik işlərinin aparılması məqsədilə gəldiklərini onlara dəfələrlə izah ediblər. Lakin polis əməkdaşları onların dediklərinə məhəl qoymayaraq Nərimanov Polis İdarəsinə aparılmaları üçün polis maşını çağırıblar və onları şübhəli şəxs kimi Nərimanov Polis idarəsinə aparıblar. Saatlarla koridorda ayaq üstə saxladıqdan sonra hər birinin barəsində Azərbaycan Respublikası İXM-nin 211.1-ci maddəsi ilə protokol tərtib edərək 200 manat məbləğdə cərimə ediblər. Hesab edir ki, Azərbaycan Respublikası İXMnin 211.1-ci maddəsi ilə onun barəsində tərtib edilmiş protokol qanunsuz və əsassız olduğundan ləğv olunmalıdır. Belə ki, məlum pandemiya ilə əlaqədar olaraq mağaza həmin gün heç bir fəaliyyət göstərməmişdir. Mağazanın qapısının bağlı olması, kənar şəxslərin içəridə olmaması buna bir sübutdur. Mağazanın fəaliyyət istiqaməti müvafiq Dövlət idarəsinin təqdim etdiyi arayışda öz əksini tapıb, mağazaları müştərilər ilə canlı tizarət obyektidir. Qapısının bağlı olması artıq mağazanın fəaliyyət göstərməməsi deməkdir. Çünki mağazaları başqa cürə fəaliyyət göstərədə bilməz. Bunu təhlükəsizlik kamerasından da aydın şəkildə görmək mümkündür. Bundan başqa polis əməkdaşlarının mülki geyimdə gəlməsi və onların həmin şəxslərə mağazanın fəaliyyət göstərmədiyini bildirməkləri, eyni zamanda mağazada olan satış kompyuterlərinin sönülü olması bunu bir daha sübut edir. Bundan başqa həmin polis əməkdaşları yerində protokol tərtib etmədən onları polis idarəsinə apararaq bir neçə saat orada saxladıqdan sonra barələrində protokol tərtib etmişlər. Bundan başqa protokol tam və dolğun tərtib edilməməklə yanaşı İnzibati Xətalar Məcəlləsinin tələbləri kobud şəkildə pozulmuşdur. Belə ki, protokolun tərtib edildiyi yer, kimin tərəfindən tərtib edilməsi, tərtib edənin səlaiyyəti və vəzifəsi göstərilməmiş və ya natamam göstərilməklə ciddi hesabat sənədi olan protokol düzgün tərtib edilməmişdir. Natamam tərtib edilmiş protokolun surəti ona tam olaraq təqdim edilməmişdir, belə ki, 4 nüsxədən ibarət olan Protokolun 2-ci və 3-cü nüsxələri ona təqdim edilmişdir. Eyni zamanda inzibati tənbeh vermə haqqında qərarı dəfələrlə tələb etməyinə baxmayaraq yalnız 20 may 2022-ci il tarixində ona poçt vasitəsi ilə göndərilmişdir, poçta aid olan möhürlü konvertin nüsxəsini də sənədlər toplusuna əlavə etmişdir. Qeyd etdiklərinin nəzərə alınaraq barəsində tərtib edilmiş “İnzibati tənbeh vermə haqqında” qərarın ləğv olunmasını xahiş etmişdir. Məhkəmə iclasında şikayət vermiş şəxs X4 şikayətin məzmununa uyğun çıxış edərək təmin olunmasını məhkəmədən xahiş etdi. Məhkəmə iclasının vaxtı və yeri barədə lazımi qaydada xəbərdar olmasına baxmayaraq, inzibati xəta haqqında qərarı qəbul etmiş Bakı şəhəri Nərimanov RPİ-nin 17ci Polis Şöbəsinin nümayəndəsi məhkəmə iclasında iştirak etməmiş və məhkəmə iclasının təxirə salınması barədə ondan vəsatət daxil olmamışdır. Məhkəmə, işə inzibati xəta haqqında qərarı qəbul etmiş Bakı şəhəri Nərimanov RPİnin 17-ci Polis Şöbəsinin nümayəndəsinin iştirakı olmadan baxılmasını mümkün hesab etmişdir. Məhkəmə, işdə iştirak edən şəxsin izahatını dinləyib, şikayət ərizəsini və ona əlavə edilmiş sənədləri araşdıraraq hesab edir ki, şikayət qismən təmin edilməlidir. İş materiallarında olan Bakı şəhəri Nərimanov RPİ-nin 17-cı Polis Şöbəsi tərəfindən qəbul edilmiş xx.xx.2020-ci il tarixli, MN seriyalı ******* nömrəli “İnzibati tənbeh vermə haqqında” qərarın surətindən görünür ki, xüsusi karantin rejiminin pozulması faktına görə X4 Azərbaycan Respublikası İXM-nin 211.1-ci maddəsində nəzərdə tutulmuş inzibati xətanı törətdiyinə görə barəsində 200 manat inzibati cərimə tənbeh tədbiri tətbiq edilmişdir. Məhkəmə, işin faktiki hallarına hüquqi qiymət verərək hesab edir ki, X2 barəsində inzibati icraat qanun pozuntularına yol verilməsi ilə aparılmışdır. Belə ki, iş üçün əhəmiyyət kəsb edən halların inzibati xəta haqqında protokolda göstərilməməsi, inzibati xəta haqqında qərar qəbul etmiş şəxsin məhkəmə iclasına dəvət olunmasına baxmayaraq gəlməməsi, inzibati xəta haqqında protokolda işin baxılma yeri, hər-hansı texniki vasitədən istifadə edilib-edilməməsi barədə qeyd aparılmaması belə nəticəyə gəlməyə əsas verir ki, səlahiyyətli orqan (vəzifəli şəxs) tərəfindən iş üçün əhəmiyyətli olan hallar sübuta yetirilməmişdir. Məhkəmə qeyd etməyi zəruri hesab edir ki, iş yenidən araşdırılmalı və barəsində inzibati tənbeh tətbiq edilmiş şəxsin xətanı törətməsinə dair hər hansı sübut olduğu halda, göstərilməklə, X2 iştirakı ilə yenidən araşdırılmalı, əsaslı qərar qəbul olunmalıdır. Azərbaycan Respublikasının İnzibati Xətalar Məcəlləsinin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktiki məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Məhkəmə qeyd edir ki, hazırki şəraitdə inzibati xəta haqqında protokol və inzibati tənbeh vermə haqqında qərar inzibati xətalar haqqında qanunvericiliyin tələblərini pozmaqla aparılmışdır və onlara iş üzrə əhəmiyyət kəsb edən halların müəyyən edilməsində istinad oluna bilməz. Azərbaycan Respublikası İnzibati Xətalar Məcəlləsinin 115.1.-ci maddəsinə əsasən inzibati xəta haqqında iş üzrə qərarda qərarı çıxarmış hakimin, vəzifəli şəxsin vəzifəsi, soyadı, adı, atasının adı, kollegial orqanın adı və tərkibi, işin baxılması tarixi və yeri, işinə baxılan şəxs haqqında məlumat, işə baxılarkən müəyyən edilmiş hallar, inzibati xətaya görə məsuliyyət nəzərdə tutan bu Məcəllənin müvafiq maddəsi və inzibati xətaya görə tətbiq edilən inzibati tənbeh növü, inzibati cərimə şərti olaraq tətbiq edildikdə, hüquqpozmanın aradan qaldırılması üçün müəyyən edilmiş müddət və bu müddətdə hüquqpozma aradan qaldırıldığı təqdirdə, cərimənin ödənilməməsi barədə qeyd, iş üzrə icraata xitam verilməsi və ya dayandırılması üçün əsas olan bu Məcəllənin müvafiq maddəsi, qərardan şikayət verilməsi müddəti və qaydası göstərilir. Azərbaycan Respublikası İnzibati Xətalar Məcəlləsinin: 48-ci maddəsinə əsasən, inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri vəşəraiti aşkar etməkdən və inzibati xətaların qarşısını almaqdan ibarətdir; 133.2.8-ci maddəsinə görə inzibati xəta haqqında iş üzrə qərardan verilən şikayətə və ya protestə baxılarkən qəbul edilmiş qərarın qanuniliyi və əsaslılığı iş üzrə olan və əlavə təqdim edilmiş materiallar əsasında yoxlanılır. Azərbaycan Respublikası İnzibati Xətalar Məcəlləsinin 134.1.4-cü maddəsinə əsasən bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilir. Azərbaycan Respublikası İnzibati Xətalar Məcəlləsinin 135.1.3-cü maddəsinə görə hakimin, səlahiyyətli orqanın (vəzifəli şəxsin) gəldiyi nəticələr üzrə mühüm əhəmiyyət kəsb edən bütün faktiki halların araşdırılmaması inzibati xəta haqqında iş üzrə qərarın ləğv edilməsi və ya dəyişdirilməsi üçün əsasdır. X5 barəsində qəbul edilmiş inzibati tənbeh vermə haqqında protokol Azərbaycan Respublikası İnzibati Xətalar Məcəlləsinin 211-ci maddəsi ilə tərtib edilsə də, işə baxılarkən müəyyən edilmiş hallar əsaslandırılmamışdır. Bu isə belə nəticəyə gəlməyə əsas verir ki, inzibati tənbeh vermə haqqında qərar heç bir sübuta əsaslanmadan qəbul edilmişdir. Beləliklə, məhkəmə hesab edir ki, inzibati xəta haqqında icraat aparılarkən səlahiyyətli orqan gəldiyi nəticələr üzrə mühüm əhəmiyyət kəsb edən bütün faktiki halları araşdırmamış və X4 barəsində xx.xx.2020-ci il tarixli “İnzibati tənbeh vermə haqqında” qərar qəbul edərək sonuncunun hüquqlarını pozmuşdur. Bu səbəbdən də X4 Azərbaycan Respublikası İXM-in 211.1-ci maddəsi ilə inzibati məsuliyyətə cəlb edilə bilməz. Buna görə də, inzibati icraat zamanı yol verilmiş natamamlıqlarla bağlı iş üzrə yenidən araşdırma aparılmalı və müvafiq qərar qəbul edilməli və Bakı şəhəri Nərimanov RPİ-nin 17-ci Polis Şöbəsi tərəfindən qəbul edilmiş xx.xx.2020-ci il tarixli, MN seriyalı ******* nömrəli “İnzibati tənbeh vermə haqqında” qərar ləğv edilməli və iş yenidən baxılması üçün həmin orqana göndərilməlidir. Şərh olunanlara əsasən və Azərbaycan Respublikası İnzibati Xətalar Məcəlləsinin 133, 134, 135-ci maddələrini rəhbər tutaraq, məhkəmə QƏRARA ALDİ: Şikayət qismən təmin edilsin. Bakı şəhəri Nərimanov RPİ-nin 17-ci Polis Şöbəsi tərəfindən qəbul edilmiş xx.xx.2020-ci il tarixli, MN seriyalı ******* nömrəli “İnzibati tənbeh vermə haqqında” qərar ləğv edilsin. X4 barəsində Azərbaycan Respublikası İXM-in 211.1-ci maddəsi ilə inzibati xəta haqqında iş yenidən baxılması üçün Bakı şəhəri Nərimanov RPİ-nin 17-ci Polis Şöbəsinə göndərilsin. Qərarın surəti təqdim edildiyi və ya alındığı gündən 10 (on) gün müddətində Bakı Apelyasiya Məhkəməsinə apelyasiya şikayəti verilə bilər. Hakim Vüsal Qurbanova