Bakı Şəhəri Nərimanov Rayon Məhkəməsi Qərardad — İş №3(005)-244/2025

Azərbaycan Respublikası adından QƏRARDAD Bakı şəhəri İş № 3(005)-244/2025 22.01.2025 BAKI ŞƏHƏRİ NƏRİMANOV RAYON MƏHKƏMƏSİ Hakim Kamranov Hafiz Eldar oğlu, "xxxx" MMC-nin əməkdaşları barədə tədbir görülməsinə dair Goranboy Rayon Polis Şöbəsindən daxil olmuş inzibati xəta haqqında materialı nəzərdən keçirib MÜƏYYƏN ETDİ: Goranboy Rayon Polis Şöbəsindən daxil olmuş materialda göstərilmişdir ki, xx.xx.2024-cü il tarixdə Goranboy rayonu ərazisində hərəkətdə olan “KİA Optima” markalı, 77MP685 dövlət qeydiyyat nişanlı avtomobil Goranboy RPŞ-nin DUPB-si əməkdaşları tərəfindən saxlanılarkən sürücü Şəxs nəqliyyat vasitəsini sürücülük hüququ olmadan idarə etməsi aşkarlanmışdır. Araşdırma zamanı izahatı alınmış Şəxs bildirmişdir ki, "xxxx" MMCdən icarəyə avtomobil götürən zaman sürücülük vəsiqəsi olmadığı üçün avtomobili tanışı vasitəsi ilə atası Samit Əliyev yanında olmadığı halda onun adına sənədləşdirmişdir. Toplanmış material "xxxx" MMC-nin əməkdaşları barədə tədbir görülməsi üçün Bakı şəhəri Nərimanov Rayon Məhkəməsinə göndərilmişdir. Məhkəmə hesab edir ki, Goranboy Rayon Polis Şöbəsindən daxil olmuş material düzgün tərtib olunmadığından geri qaytarılmalıdır. Belə ki, materialda "xxxx" MMC-nin əməkdaşları barədə tədbir görülməsi xahiş edilsə də, lakin inzibati xətanın törədilməsi haqqında protokol tərtib edilməmişdir. Azərbaycan Respublikası İnzibati Xətalar Məcəlləsinin: 100.1-ci maddəsinə əsasən bu Məcəllənin 54-cü maddəsində nəzərdə tutulmuş hallar istisna olmaqla, inzibati xətanın törədilməsi haqqında protokol tərtib edilir. İnzibati xəta haqqında protokolda aşağıdakılar göstərilir: 100.1.1. protokolun tərtib edildiyi tarix və yer; 100.1.2. protokolu tərtib etmiş şəxsin vəzifəsi, soyadı, adı, atasının adı; 100.1.3. barəsində inzibati xəta haqqında iş üzrə icraat aparılan şəxs haqqında məlumat, o cümlədən vətəndaşın fərdi identifikasiya nömrəsi; 100.1.4. inzibati xətanın törədildiyi yer, vaxt və bu xətanın mahiyyəti; 100.1.5. inzibati xətaya görə məsuliyyət nəzərdə tutan bu Məcəllənin müvafiq maddəsi; 100.1.6. olduğu halda, şahidlərin və zərər çəkmiş şəxslərin adı, atasının adı, soyadı və onların yaşadığı yerin ünvanı; 100.1.7. barəsində inzibati xəta haqqında iş üzrə icraat aparılan fiziki şəxsin və ya hüquqi şəxsin nümayəndəsinin izahatları; 100.1.8. inzibati xətanın aşkar edilməsində xüsusi texniki vasitələrdən istifadə olunmuşdursa, onların göstəriciləri, habelə istifadə olunmuş xüsusi texniki vasitənin tipi, markası, modeli, yerləşdiyi yer, ölçmə vasitəsinin son dəfə müqayisəli dövlət yoxlamasından keçdiyi vaxt (bunu təsdiq edən sənədin nömrəsi, tarixi) və növbəti yoxlamanın keçirilməli olduğu vaxt barədə məlumatlar; 100.1.9. inzibati xətanın törədilməsi nəticəsində şəxsin sağlamlığına yüngül zərər vurulmuşdursa və ya maddi zərər yetirilmişdirsə, bu hallar barədə qeydlər; 100.1.10. inzibati xəta haqqında iş üzrə icraat üçün zəruri olan digər məlumatlar. 109.1 və 109.1.6-cı maddələrinə əsasən inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə qərardad qəbul edilir. Qeyd olunanları nəzərə alaraq məhkəmə hesab edir ki, Goranboy Rayon Polis Şöbəsindən "xxxx" MMC-nin əməkdaşları barədə tədbir görülməsinə dair daxil olmuş inzibati xəta haqqında material geri qaytarılmalıdır. Qeyd olunanlara əsasən və İXM-in 109-cu maddəsini rəhbər tutaraq QƏRARA ALDİ: Goranboy Rayon Polis Şöbəsindən "xxxx" MMC-nin əməkdaşları barədə tədbir görülməsinə dair daxil olmuş inzibati xəta haqqında material geri qaytarılsın. Hakim Hafiz Kamranov