Bakı Şəhəri Nərimanov Rayon Məhkəməsi Qərar — İş №3(005)-2803/2020

Azərbaycan Respublikası adından QƏRAR Bakı şəhəri İş № 3(005)-2803/2020 17.11.2020 BAKI ŞƏHƏRİ NƏRİMANOV RAYON MƏHKƏMƏSİ Hakim Qurbanov Vüsal Rafiq oğlunun sədrliyi, Hüseynov Elçin Rövşən oğlunun katibliyi, barəsində inzibati xəta haqqında protokol tərtib edilmiş şəxs Şəxs iştirakı ilə, xx.xx.1965-ci il tarixdə Gürcüstan Respublikası Marneuli rayonunda anadan olmuş, Gürcüstan vətəndaşı, evli, ali təhsilli, Bakı şəhəri Xətai rayonu Əbilov küçəsi ev 2C-də qeydiyyatda olan Şəxs barəsində Azərbaycan Respublikası İnzibati Xətalar Məcəlləsinin 211.1-ci maddəsi ilə tərtib olunan inzibati xəta haqqında protokol üzrə inzibati xəta haqqında işə məhkəmənin binasında, açıq məhkəmə iclasında baxaraq MÜƏYYƏN ETDİ: Məhkəmənin icraatına xx xxxxxxx 2020-ci il tarixdə Bakı şəhəri Nərimanov Rayon Polis İdarəsinin 18-ci PŞ-nin polis sahə inspektoru X1 tərəfindən Şəxs barəsində tərtib olunmuş inzibati xəta haqqında protokol və əlavə edilmiş sənədlər daxil olmuşdur. MN seriyalı ******* nömrəli, xx xxxxxxx 2020-ci il tarixli inzibati xəta haqqında protokolda göstərilir ki, Şəxs xx xxxxxxx 2020-ci il tarixdə Bakı şəhəri, Nərimanov rayonu Hidayətzadə küçəsində yerləşən “Yaşıl Park” adlı kafedə karantin rejimi qaydalarını pozmuşdur. Məhkəmə iclasında barəsində inzibati xəta haqqında protokol tərtib edilmiş şəxs Şəxs izahat verərək bildirmişdir ki, 2006-cı ildən Azərbaycan yazıçılar birliyinin fəxri üzvüdür. Eyni zamanda Borçalı Cəmiyyətinin İdarə Heyətinin fəxri üzvüdür. Cəmiyyətinin sədri Zəlimxan Məmmədlidir. Borçalı Cəmiyyətinin fəaliyyəti Borçalıda yaşayan soydaşlarımızın problemlərini müvafiq dövlət orqanları qarşısında qaldırmaqdır. Cəmiyyətlərinin üzvləri mütəmadi olaraq paytaxtın müxtəlif tədbir ocaqlarında yığışıb mədəni kütləvi tədbirlər keçirirlər. Cari ildə pandemiya dövründə təxminən 200-ə yaxın ailəyə daxili hesabları ilə ərzaq yardımı edibər. Ölkədə baş verən prosesləri öz aralarında müzakirə edib, ehtiyac olduğu təqdirdə cəmiyyətləri tərəfindən mümkün ola biləcək yardımları ehtiyacı olanlara çatdırırlar. O, özü şəxsən heç bir siyasi proseslərdə iştirak etmir. O, özü yazıçı olduğu üçün kitabları nəşr olunmuşdur. Lakin hazırda əlavə gəlir yeri yoxdur. Maddi gəlir mənbəyi sadəcə həmin kitablardandır. Lakin onların cəmiyyəti sadəcə ictimai vəziyyət çətin olduqda xeyriyyə işləri ilə məşğul olur. xx.xx.2020-ci il tarixdə saat 12:00 radələrində Cəmiyyətlərinin sədri Zəlimxan Məmmədli, o və digər cəmiyyət üzvlərini evinin yaxınlığında olan, Nərimanov rayonu, Təbriz küçəsində yerləşən “Green Park” çay evinə dəvət ediblər. Bu dəfəki yığışmalarının səbəbi, hal-hazırda ölkə ərazisində baş verən müharibə şəraitini müzakirə etmək, orduya maddi və mənəvi dəstək göstərmək olub. Cəmiyyət üzvləri çay evinin içərisində yerləşən ümumi zalda ayrı-ayrı masalarda 4 nəfərdən ibarət qruplarla 5 masada əyləşiblər. Onlar oturduqdan 10 dəqiqə keçdikdən sonra polis əməkdaşları gəlib onları Polis Şöbəsinə dəvət ediblər. Məhkəmə iclasının vaxtı və yeri barədə lazımi qaydada xəbərdar olmasına baxmayaraq, inzibati xəta haqqında protokolu tərtib etmiş Bakı şəhəri Nərimanov Rayon Polis İdarəsinin 18-ci PŞ-nin nümayəndəsi məhkəmə iclasında iştirak etməmiş və məhkəmə iclasının təxirə salınması barədə ondan vəsatət daxil olmamışdır. Məhkəmə, inzibati xəta haqqında protokolu tərtib etmiş Bakı şəhəri Nərimanov Rayon Polis İdarəsinin 18-ci PŞ-nin nümayəndəsinin iştirakı olmadan baxılmasını mümkün hesab etmişdir. Məhkəmə, işdə iştirak edən şəxsin izahatını dinləyib, inzibati xəta haqqında protokolu və ona əlavə olunmuş sənədləri araşdıraraq hesab edir ki, Şəxs tərəfindən Azərbaycan Respublikası İXM-nin 211.1-ci maddəsində nəzərdə tutulan inzibati xətanın törədilməsi öz təsdiqini tapır. İnzibati material üzrə araşdırılan sübutlarla müəyyən olundu ki, Şəxs xx xxxxxxx 2020-ci il tarixdə ünvan 1 ünvanında yerləşən “Yaşıl Park” adlı kafedə karantin rejimi qaydalarını pozmuşdur. İş materiallarında olan Bakı şəhəri Nərimanov RPİ-nin 18-ci PŞ-nin polis sahə inspektorları Faiq Süleymanov və Cavid Yusifkənan tərəfindən həmin Şöbənin rəisi Bayram Alıyevin adına yazılmış raportdan görünür ki, xx xxxxxxx 2020-ci il tarixdə saat 12:00 radələrində ünvan 1 ünvanında yerləşən “Samir Xasıyev adına istirahət parkında fəaliyyət göstərən “Yaşıl Ada” restoranının ümumi zalında 21 nəfər şəxsin karantin rejimi qaydalarını pozaraq ara məsafəsi saxlamadan toplaşdıqları müəyyən olunmuşdur. Məhkəmə iclasında tədqiq edilmiş sübutlarla barəsində inzibati xəta haqqında iş üzrə icraat aparılan Şəxs tərəfindən Azərbaycan Respublikası İXM-nin 211.1-ci maddəsində nəzərdə tutulan inzibati xətanın törədilməsi sübuta yetdiyindən, məhkəmə hesab edir ki, Şəxs həmin maddə ilə təqsirli bilinərək inzibati məsuliyyətə cəlb edilməlidir. Azərbaycan Respublikası İnzibati Xətalar Məcəlləsinin 211.1-ci maddəsinə əsasən epidemiya əleyhinə rejimin, sanitariya-gigiyena və karantin rejimlərinin pozulmasına görə fiziki şəxslər iki yüz manatdan dörd yüz manatadək məbləğdə, vəzifəli şəxslər üç min manatdan dörd min manatadək məbləğdə cərimə edilir, yaxud işin hallarına görə, xətanı törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, hüquqi şəxslər dörd min manatdan on min manatadək məbləğdə cərimə edilir. Məhkəmə iclasında barəsində inzibati xəta haqqında iş üzrə icraat aparılan Şəxs əməlində Azərbaycan Respublikası İXM-nin 32 və 33-cü maddəsinə əsasən inzibati xətaya görə məsuliyyəti yüngülləşdirən və ağırlaşdıran hallar müəyyən edilməmişdir. Azərbaycan Respublikası İnzibati Xətalar Məcəlləsinin 3-cü maddəsində inzibati məsuliyyətin əsasları müəyyən edilmişdir. Həmin maddənin tələbinə əsasən, yalnız həmin Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir; 4-cü maddəsinə əsasən, bu Məcəllə insan və vətəndaş hüquqlarına və azadlıqlarına hörmət edilməsi, qanunçuluq, qanun qarşısında bərabərlik, təqsirsizlik prezumpsiyası, ədalətlilik və inzibati xətaların qarşısının alınması prinsiplərinə əsaslanır; 6.1-ci maddəsinə əsasən, inzibati xətalara görə inzibati tənbeh həmin Məcəlləyə uyğun olaraq tətbiq edilir; 9.1-ci maddəsinə əsasən, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına uyğun, qanuni və əsaslı olmalıdır; 12.1-ci maddəsində göstərilir ki, həmin Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Beləliklə, məhkəmə törədilmiş inzibati xətanın xarakterini, inzibati xətanı törətmiş şəxsin şəxsiyyətini və iş üzrə məsuliyyəti yüngülləşdirən və ağırlaşdıran halların müəyyən edilməməsini nəzərə alıb hesab edir ki, Şəxs Azərbaycan Respublikası İXM-nin 211.1-ci maddəsində nəzərdə tutulmuş inzibati xətanı törətməkdə təqsirli bilinərək barəsində həmin maddənin sanksiyasında nəzərdə tutulmuş inzibati cərimə növündə tənbeh tətbiq edilməlidir. Şərh olunanlara əsasən və Azərbaycan Respublikası İXM-nin 40.0.1, 43, 48-51, 55,114, 115,128-130 maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikası İnzibati Xətalar Məcəlləsinin 211.1-ci maddəsi ilə nəzərdə tutulan inzibati xətanı törətməkdə təqsirli bilinsin və barəsində 200 (iki yüz) manat məbləğində inzibati cərimə növündə tənbeh tədbiri tətbiq edilsin. Qərarın surəti təqdim edildiyi və ya alındığı gündən 10 gün müddətində Bakı Şəhəri Nərimanov Rayon Məhkəməsi vasitəsilə və ya bilavasitə Bakı Apelyasiya Məhkəməsinə şikayət verilə bilər. Hakim Vüsal Qurbanov