Bakı Şəhəri Nərimanov Rayon Məhkəməsi Qərardad — İş №3(005)-3155/2020

Azərbaycan Respublikası adından QƏRARDAD Bakı şəhəri İş № 3(005)-3155/2020 24.11.2020 BAKI ŞƏHƏRİ NƏRİMANOV RAYON MƏHKƏMƏSİ Mən, Bakı Şəhəri Nərimanov Rayon Məhkəməsinin hakimi Ələkbərov Tural Mehman oğlu, Cəmil Rüstəmovun Bakı şəhəri Nərimanov Rayon Polis İdarəsinin 16-cı Polis bölməsinin qərarından verdiyi şikayəti və ona əlavə edilmiş sənədləri məhkəmə iclasında baxılmağa hazırlayarkən MÜƏYYƏN ETDİM: X1 Bakı şəhəri Nərimanov Rayon Polis İdarəsinin 16-cı Polis bölməsinin qərarından şikayətlə məhkəməyə müraciət etmişdir. Verilmiş şikayəti nəzərdən keçirərək hesab edirəm ki, şikayət geri qaytarılmalıdır. Belə ki, Azərbaycan Respublikası İnzibati Xətalar Məcəlləsinin (bundan sonra - İXM) 128.1-ci maddəsinə əsasən barəsində qərar çıxarılmış fiziki şəxs, yetkinlik yaşına çatmayanların qanuni nümayəndəsi, hüquqi şəxsin nümayəndəsi, zərər çəkmiş şəxs, müdafiəçi və nümayəndə, həmçinin bu Məcəllənin 43.2-ci maddəsində nəzərdə tutulan vəzifəli şəxs inzibati xəta haqqında iş üzrə qərardan şikayət, prokuror isə protest verə bilər. Həmin Məcəllənin 128.2, 128.2.3-cü maddələrinə əsasən isə inzibati xəta haqqında iş üzrə qərardan şikayət və ya protest səlahiyyətli orqanın (vəzifəli şəxsin) qərarından yuxarı səlahiyyətli orqana (vəzifəli şəxsə) və ya məhkəməyə verilir. Məhkəmə qeyd edir ki, şikayətdə şikayətçinin ünvanı qeyd edilmədiyindən şikayətin məhkəmə aidiyyətini müəyyən etmək qeyri-mümkündür. Eyni zamanda şikayətdə mübahisələndirilən qərarın tarixi, ümumiyyətlə həmin qərar haqqında hər hansı məlumat, yəni şikayətçinin İXM-in hansı maddəsi ilə inzibati məsuliyyətə cəlb olunması qeyd olunmamışdır. Qeyd edilənlər isə şikayətin mahiyyəti üzrə baxılmasına maneçilik törədən hallar olmaqla şikayətin icraata qəbul edilməsini istisna edir. İXM-in: 132.1-ci maddəsinə əsasən inzibati xəta haqqında iş üzrə qərardan verilən şikayətə və ya protestə baxmağa hazırlıq zamanı hakim, səlahiyyətli orqan (vəzifəli şəxs) tərəfindən aşağıdakı məsələlər həll edilir: 132.1.1. inzibati xəta haqqında iş həmin hakimə, səlahiyyətli orqana (vəzifəli şəxsə) aiddirmi; 132.1.2. inzibati xəta haqqında iş üzrə icraatı rədd edən hallar mövcuddurmu; Qeyd olunanlara əsasən və İXM-in 128, 132-ci maddələrini rəhbər tutaraq, QƏRARA ALDİM: Cəmil Rüstəmovun Bakı şəhəri Nərimanov Rayon Polis İdarəsinin 16-cı Polis bölməsinin qərarından verdiyi şikayət və ona əlavə olunmuş sənədlər geri qaytarılsın. Hakim Tural Ələkbərov