Bakı Şəhəri Nərimanov Rayon Məhkəməsi Qərar — İş №3(005)-355/2022

Azərbaycan Respublikası adından QƏRAR Bakı şəhəri İş № 3(005)-355/2022 28.02.2022 BAKI ŞƏHƏRİ NƏRİMANOV RAYON MƏHKƏMƏSİ Hakim Kamranov Hafiz Eldar oğlunun sədrliyi, Mansurov Elvin Vidadi oğlunun katibliyi, İnzibati xəta haqqında protokol tərtib etmiş Azərbaycan Respublikası Ekologiya və Təbii Sərvətlər Nazirliyinin 11 saylı Regional Ekologiya və Təbii Sərvətlər İdarəsinin nümayəndəsi X1 iştirakları ilə, Şəxs barəsində Azərbaycan Respublikası İnzibati Xətalar Məcəlləsinin 266.2 və 271ci maddəsi ilə tərtib olunan inzibati xəta haqqında materiala açıq məhkəmə iclasında baxaraq MÜƏYYƏN ETDİ: Azərbaycan Respublikası Ekologiya və Təbii Sərvətlər Nazirliyinin 11 saylı Regional Ekologiya və Təbii Sərvətlər İdarəsi Şəxs barəsində Azərbaycan Respublikası İnzibati Xətalar Məcəlləsinin 266.2 və 271-ci maddəsi ilə MN seriyalı ******* nömrəli 21 yanvar 2022-ci il tarixli inzibati xəta haqqında protokol tərtib edərək, baxılması üçün məhkəməyə göndərilmişdir göndərmişdir. İnzibati xəta haqqında həmin protokoldan görünür ki, Şəxs tərəfindən inşa olunan çoxmərtəbəli yaşayış binasının ərazisində tullantıların (məişət tikinti və s.) qanunsuz qalaqlanması və tullantıların emalı yerlərinin müəyyənləşdirilməməsi faktı aşkar edilmişdir. Bununla da Şəxs tərəfindən Azərbaycan Respublikası İnzibati Xətalar Məcəlləsinin 266.2 və 271-ci maddəsi ilə nəzərdə tutulmuş inzibati xəta törədilmişdir. İnzibati xəta haqqında protokol tərtib etmiş Azərbaycan Respublikası Ekologiya və Təbii Sərvətlər Nazirliyinin 11 saylı Regional Ekologiya və Təbii Sərvətlər İdarəsinin nümayəndəsi X2 məhkəmə iclasında çıxış edərək bildirmişdir ki, əməkdaşlar tərəfindən 19-21 yanvar 2022-ci il tarixdə Şəxs tərəfindən inşa olunan çoxmərtəbəli yaşayış binasının ərazisində yoxlama keçirilmiş yoxlama zamanı MTK-nın sədri E. Məmmədzadənin iştirakı ilə araşdırma aparılmış və ərazidə fəaliyyət zamanı yaranan tullantıların ərazidə bir neçə yerdə qeyri-qanuni qalaqlandığını, əraziyə atıldığı müəyyən edilmişdir. Müəyyən edilmişdir ki, Bakı şəhər İcra Hakimiyyəti başçısının 24.10.2014-cü il tarixli 505 nömrəli sərəncamı ilə Nərimanov rayonu 1929-cu məhəllə İ. Hidayətzadə küçəsi, 130 nömrəli ünvanda olan 0.14 ha və ona bitişik cəmi 1.087 ha torpaq sahəsində yaşayış binaları tikintisinin layihələndirilməsi məqsədi ilə MTK-ya icazə verilmişdir. Ərazdiə tikinti işlərinin aparılmasına dair Ekologiya və Təbii Sərvətlər Nazirliyinin 15/2459 saylı ekoloji ekspertizası rəyi verilmişdir. Araşdırma zamanı sözügedən yaşayış binasının tikintisi işlərinin başa çatdırıldığı və binada təmir işlərinin aparıldığı müəyyən edilmiş, tikinti ərazisində toz yayılması və ağac kəsilməsi faktı müəyyən edilməmişdir. Həmin ünvanın ərazisində tullantıların qanunsuz qalaqlanması və əraziyə atılması nəticəsində “Ətraf mühitin mühafizəsi haqqında” AR Qanunun 47-ci maddəsinin, “İstehsalat və məişət tullantıları haqqında” Qanunun 9, 10, 11 və 12-ci maddələrinin və “Şəhərlər və digər yaşayış məntəqələri ərazisinin sanitariya və qaydalarına”, “Gigiyena və ekoloji normativlərə uyğun olaraq təmizlənməsi, məişət tullantıların müvəqqəti saxlanması, müntəzəm daşınması və zərərsizləşdirilməsi Qaydalarının” təsdiq edilməsi haqqında AR NK-nin 21.04.2005-ci il tarixli qərarının tələbləri pozulmuşdur. Bundan əlavə tərəflərindən dəfələrlə qanunvericiliyin tələblərinə riayət olunması bildirilsə də, hər dəfə eyni vəziyyətlə tanış olmuşlar. Birmənalı olaraq qanunvericiliyin tələbi həmin MTK tərəfindən icra edilmir. Odur ki, hüquqi şəxsin barəsində tənbeh tədbirinin tətbiq edilməsini xahiş etmişdir. Barəsində inzibati xəta haqqında icraat aparılan hüquqi şəxsə məhkəmə iclasının vaxtı və yeri barədə qanunla müəyyən edilmiş qaydada məlumat verilməsinə baxmayaraq məhkəmə iclasında nümayəndəsinin iştirakını təmin etməmiş və iştirak etməməsinin səbəbi barədə məhkəməyə hər hansı bir məlumat verməmişdir. Buna görə də məhkəmə barəsində inzibati xəta haqqında icraat aparılan hüquqi şəxsin nümayəndəsinin iştirakı olmadan işə baxılmasını mümkün hesab etmişdir. İnzibati material üzrə araşdırılan sübutların məcmusunu hərtərəfli, tam və obyektiv qiymətləndirərək məhkəmə hesab edir ki, Şəxs tərəfindən İXM-in 266.2 və 271-ci maddəsində nəzərdə tutulan inzibati xətanın törədilməsi öz təsdiqini tapır. İş materiallarında olan və məhkəmə baxışında tədqiq edilmiş: Azərbaycan Respublikası Ekologiya və Təbii Sərvətlər Nazirliyinin 11 saylı Regional Ekologiya və Təbii Sərvətlər İdarəsinin MN seriyalı ******* nömrəli 21 yanvar 2022-ci il tarixli inzibati xəta haqqında protokoldan görünür ki, Şəxs tərəfindən inşa olunan çoxmərtəbəli yaşayış binasının ərazisində tullantıların (məişət tikinti və s.) qanunsuz qalaqlanması və tullantıların emalı yerlərinin müəyyənləşdirilməməsi faktı aşkar edilmişdir. İş materiallarına əlavə edilmiş hadisə yerinin fotoşəkillərində tikilməkdə olan binanın ərazisində tullantıların (məişət tikinti və s.) qanunsuz qalaqlanması və tullantıların emalı yerlərinin müəyyənləşdirilməməsi müəyyən olunur. Azərbaycan Respublikası İnzibati Xətalar Məcəlləsinin 266.2-ci maddəsinə əsasən tullantıların emalı yerlərinin müəyyənləşdirilməsi, layihələşdirilməsi, tikintisi, istifadəsi və ya ləğv edilməsi normalarının və qaydalarının pozulmasına görə-vəzifəli şəxslər üç min beş yüz manatdan dörd min beş yüz manatadək məbləğdə, hüquqi şəxslər on min manatdan on beş min manatadək məbləğdə cərimə edilir. Azərbaycan Respublikası İnzibati Xətalar Məcəlləsinin 271-ci maddəsinə əsasən sənaye və məişət tullantılarının qalaqlanması qaydalarının pozulmasına, göstərilən tullantıları yandırarkən ətraf mühitin mühafizəsi tələblərinə əməl edilməməsinə görə-fiziki şəxslər beş yüz manatdan səkkiz yüz manatadək məbləğdə, vəzifəli şəxslər iki min manatdan üç min manatadək məbləğdə, hüquqi şəxslər altı min beş yüz manatdan səkkiz min manatadək məbləğdə cərimə edilir. Məhkəmə iclasında araşdırılan sübutlarla Şəxs tərəfindən inşa olunan çoxmərtəbəli yaşayış binasının ərazisində tullantıların (məişət tikinti və s.) qanunsuz qalaqlanması və tullantıların emalı yerlərinin müəyyənləşdirilməməsi müəyyən edilmişdir ki, həmin hərəkətlər İXM-in 266.2 və 271-ci maddəsi ilə əhatə olunur. İnzibati Xətalar Məcəlləsinin 3-cü maddəsinə əsasən yalnız həmin Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir; İnzibati Xətalar Məcəlləsinin 4-cü maddəsinə əsasən İnzibati Xətalar Məcəlləsi insan və vətəndaş hüquqlarına və azadlıqlarına hörmət edilməsi, qanunçuluq, qanun qarşısında bərabərlik, təqsirsizlik prezumpsiyası, ədalətlilik və inzibati xətaların qarşısının alınması prinsiplərinə əsaslanır; İnzibati Xətalar Məcəlləsinin 6.1-ci maddəsinə əsasən, inzibati xətalara görə inzibati tənbeh həmin Məcəlləyə uyğun olaraq tətbiq edilir; İnzibati Xətalar Məcəlləsinin 9.1-ci maddəsinə əsasən, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır; İnzibati Xətalar Məcəlləsinin 12.1-ci maddəsində göstərilir ki, həmin Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur; İnzibati Xətalar Məcəlləsinin 76.1-ci maddəsinə əsasən inzibati xətanın olubolmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir; İnzibati Xətalar Məcəlləsinin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir; Məhkəmə iclasında Şəxs məsuliyyətini yüngülləşdirən və ya ağırlaşdıran hallar müəyyən edilmədi. Məhkəmə törədilmiş inzibati xətanın xarakterini, məsuliyyəti yüngülləşdirən və məsuliyyəti ağırlaşdıran halların olmamasını nəzərə alıb, iş üzrə sübutları qiymətləndirərək hesab edir ki, Şəxs Azərbaycan Respublikasının İnzibati Xətalar Məcəlləsinin 266.2 və 271-ci maddələri ilə təqsirli bilinməli və həmin Məcəlləsinin 34.3-cü maddəsinə əsasən daha ciddi xətaya görə barəsində Azərbaycan Respublikası İnzibati Xətalar Məcəlləsinin 266.2-ci maddəsində nəzərdə tutulan inzibati xətanı törətməkdə təqsirli bilinməli və barəsində həmin maddənin sanksiyası həddində cərimə növündə inzibati tənbeh tədbiri tətbiq edilməlidir. Şərh olunanlara əsasən və Azərbaycan Respublikası İXM-nin 25, 40.0.1, 43, 48-51, 55, 114, 115,128-130 maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikası İnzibati Xətalar Məcəlləsinin 266.2 və 271-ci maddələri ilə nəzərdə tutulmuş inzibati xətanı törətməkdə təqsirli bilinsin və həmin Məcəlləsinin 34.3-cü maddəsinə əsasən daha ciddi xətaya görə barəsində Azərbaycan Respublikası İnzibati Xətalar Məcəlləsinin 266.2-ci maddəsində nəzərdə tutulan inzibati xətanı törətməkdə təqsirli bilinərək 10.000 (on min) manat məbləğində cərimə edilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı şəhəri Nərimanov Rayon Məhkəməsi vasitəsilə və ya birbaşa Bakı Apellyasiya Məhkəməsinə apellyasiya şikayəti və ya protesti verilə bilər. Hakim Hafiz Kamranov