Bakı Şəhəri Nərimanov Rayon Məhkəməsi Qərar — İş №3(005)-3842/2024

Azərbaycan Respublikası adından QƏRAR Bakı şəhəri İş № 3(005)-3842/2024 11.12.2024 BAKI ŞƏHƏRİ NƏRİMANOV RAYON MƏHKƏMƏSİ Hakim Kamranov Hafiz Eldar oğlunun sədrliyi, Abdurəhmanlı Pınar Zakir qızının katibliyi, Şikayət vermiş şəxs – X1 iştirakı ilə, AR DİN-in Baş Dövlət Yol Polis İdarəsinin xx.xx.2024-cü il tarixli, EQ 24283496 nömrəli inzibati tənbeh vermə haqqında qərarından X2 tərəfindən verilmiş şikayətə açıq məhkəmə iclasında baxaraq MÜƏYYƏN ETDİ: X2 AR DİN-in Baş Dövlət Yol Polis İdarəsinin xx.xx.2024-cü il tarixli, EQ 24283496 nömrəli inzibati tənbeh vermə haqqında qərarından məhkəməyə şikayətlə müraciət edərək qərarın ləğv edilməsini xahiş etmişdir. Şikayət onunla əsaslandırılmışdır ki, X2 21 oktyabr 2024-cü ildə idarə etdiyi ** ZL *** dövlət qeydiyyat nişanlı, “Xəzər LX” markalı nəqliyyat vasitəsilə Maştağa qəsəbəsindən Yasamal rayonu istiqamətində hərəkət edərkən naviqatorun göstərişi ilə Balaxanı yolu ilə gəlməli olmuşdur. Həmin yoldan Ziya Bünyadov prospektinə çıxarkən “Santral” mağazasının yanında ümumi istifadədə olan nəqliyyat vasitələri üçün nəzərdə tutulmuş hərəkət zolağında qoyulmuş yol nişanının altında yerləşdirilmiş lövhəcikdə 07:00-10:00; 17:00-20:00; rəqəmlərini görmüşdür. Ona görə də həmin zolaqla hərəkətini davam etdirmişdir. Evə çatanda telefonuna AsanPay-dən “X3. Sizin EQ24283496 protokol üzrə xx.xx.2024 tarixindən etibarən icra qərarı qüvvəyə minib.” məzmunlu mesaj gəldiyini görmüşdür. O, lövhəcikdəki rəqəmləri dəqiq gördüyünü, məhdudiyyət saatlarında ümumi istifadədə olan nəqliyyat vasitələri üçün nəzərdə tutulmuş hərəkət zolağına girmədiyini bildiyinə görə təəccüb eləmişdir. Güclü yağış yağdığı üçün səhəri gözləmiş, ertəsi gün Ziya Bünyadov prospektinə getmişdir. Koroğlu metrosu yaxınlığında şəhər istiqamətində gələn 7 nömrəli marşrut avtobusuna minib gələndə Bakı olimpiya stadionunun qarşısında həmin zolaqda qoyulmuş yol nişanının altındakı lövhəcikdə “07:00-21:00” rəqəmlərinin, onun Balaxanı yolundan “Santral” mağazasının yanında Ziya Bünyadov prospektinə çıxdığı yerdə “07:00- 10:00; 17:00-20:00” rəqəmlərinin olduğunu görmüşdür. “Evrohome” mağazasının yanında yenə “07:00-10:00" rəqəmlərini görmüşdür. Beləcə həmin yolda dediyi rəqəmlərin 100-200 metrdən bir növbələndiyinin şahidi oldmuşdur. O, Bakı şəhərinin küçələrində müəyyən edilmiş ümumi istifadədə olan nəqliyyat vasitələri üçün nəzərdə tutulmuş hərəkət zolağının hər birində yol boyu eyni məhdudiyyət saatlarının olduğu lövhəcikləri müşahidə etmişdir. Məsələn, Zabrat-Maştağa yolunda 07:00-22:00; Şərifzadə küçəsində 07:00-21:00, Ə.Salamzadə küçəsində 07:00-10:00, 17:00-20:00 və i. Həmin küçələrin heç birində məhdudiyyət saatlarının dəyişməsi halı yoxdur. Hesab edir ki, Ziya Bünyadov prospektində qoyulmuş lövhəciklərin tez-tez dəyişməsi sürücüləri çaşdırmaq üçündür. Belə ki, diqqəti yolda olan sürücünün gözü göydə asılmış lövhəciklərdə qalmalıdır ki, bu da yol-nəqliyyat hadisələrinin baş verməsi üçün zəmin yaradan haldır. O, zolağa daxil olanda 5.9 nişanının altındakı lövhəcikdə “07:00+10:00; 17:00- 20:00" rəqəmləri var idi. Yəni, saat 07:00-dan 10:00-a kimi və 17:00-dan 20:00-a kimi olan vaxt ərzində həmin zolaqda digər nəqliyyat vasitələri hərəkət edə bilməz. O da yol nişanının bu göstəricisinə əsasən günorta saatlarında həmin zolağa daxil olmuşdur. O, eyni yolda hər 100-200 metrdən bir yol nişanının dəyişildiyini bilə bilməzdi. Yəni inzibati xəta törədilməsində onun təqsiri yoxdur. Şikayət vermiş X2 verilmiş şikayət ərizəsinin məzmununa uyğun şəkildə çıxış edərək şikayət ərizəsinin təmin edilməsini xahiş etmişdir. Qərarından şikayət verilən orqan məhkəmə iclasının yeri və vaxtı barədə müvafiq qaydada xəbərdar edilsə də, məhkəmə iclasında iştirak etməmişdir. Buna görə də, səlahiyyətli orqanın nümayəndəsinin iştirakı olmadan işə baxılmasını mümkün hesab etmişdir. İş materiallarında olan və məhkəmə iclasında tədqiq edilmiş: AR DİN-in Baş Dövlət Yol Polis İdarəsinin xx.xx.2024-cü il tarixli, EQ 24283496 nömrəli nömrəli inzibati tənbeh vermə haqqında qərardan görünür ki, X2 Azərbaycan Respublikası İnzibati Xətalar Məcəlləsinin 327.1-1-ci maddəsi ilə 100 manat məbləğində cərimə edilmişdir. Şikayətçi şikayətində onun tərəfindən qeyd edilən pozuntunun törədilməməsini qeyd etsə də, bu barədə əsaslı dəlil məhkəməyə təqdim edə bilməmişdir. Azərbaycan Respublikası İnzibati Xətalar Məcəlləsinin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Azərbaycan Respublikası İnzibati Xətalar Məcəlləsinin 327.1-1-ci maddəsinə əsasən “Yol hərəkəti haqqında” Azərbaycan Respublikası Qanununun yol verdiyi hallar istisna olmaqla, 5.9, 5.10.1–5.10.3 nişanları ilə işarələnmiş, ümumi istifadədə olan nəqliyyat vasitələri üçün nəzərdə tutulmuş hərəkət zolağı olan yollarda hərəkət edən digər nəqliyyat vasitələrinin həmin zolaqda hərəkət etməsinə görə – yüz manat məbləğində cərimə edilir. Barəsində inzibati tənbeh vermə haqqında qərar qəbul edilmiş X2 öz şikayət ərizəsində inzibati xəta törətmədiyini irəli sürmüşdür. Halbuki təqdim edilmiş sənədlər və hadisə görüntülərini əks etdirən videogörüntüdən müəyyən edilmişdir ki, X2 ümumi istifadədə olan nəqliyyat vasitələri üçün nəzərdə tutulmuş hərəkət zolağına daxil olmuş, beləliklə, yol hərəkəti qaydalarını pozmuşdur. Beləliklə, məhkəmə hesab edir ki, X2 tərəfindən İnzibati Xətalar Məcəlləsinin həmin maddəsində göstərilən inzibati xəta törədilmişdir. Həmçinin şikayətçi onun həmin maddədə göstərilən inzibati xətanı törətməməsini bildirsə də, məhkəmədə müəyyən edildi ki, o həmin maddədə göstərilən inzibati xətanı törətmişdir, bu barədə onun barəsində protokol tərtib edilmişdir. İnzibati Xətalar Məcəlləsinin yuxarıda qeyd edilən maddəsinə əsasən isə protokol inzibati iş üzrə sübut kimi qəbul edilir. Həmin protokolla şəxsin inzibati xəta törətməsi tam sübut olunur. Qeyd edilənlərə əsasən məhkəmə hesab edir ki, qərar qanunidir, şikayət əsassızdır və təmin edilməməlidir. Həmçinin həmin qərarla xəta törətmiş şəxs maddənin sanksiyada nəzərdə tutulmuş həddə inzibati tənbeh edilmişdir. Ona görə də inzibati tənbehin daha da yüngülləşdirilməsi və qərarın dəyişdirilməsi üçün əsaslar da yoxdur. Həmçinin İXM-in 135.1.6-cı maddəsinə əsasən həmin Məcəllə ilə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması inzibati xəta haqqında iş üzrə qərarın ləğv edilməsi və ya dəyişdirilməsi üçün əsaslardan biri kimi müəyyən edilmişdir. Lakin hazırkı iş üzrə işin hallarının hərtərəfli, tam və obyektiv araşdırılmasına maneçilik törədəcək dərəcədə İnzibati Xətalar Məcəlləsinin tələblərinin pozuntusu müəyyən edilmədi. İnzibati xəta haqqında iş üzrə qərardan verilən şikayət və ya protestə baxılması nəticəsində İnzibati Xətalar Məcəlləsinin 134-cü maddəsində sadalanmış qərarlardan biri çıxarılır. Göstərilənlərə əsasən məhkəmə hesab edir ki, X1 şikayəti təmin edilməməli, barəsində AR DİN-in Baş Dövlət Yol Polis İdarəsinin xx.xx.2024-cü il tarixli, EQ 24283496 nömrəli inzibati tənbeh vermə haqqında qərarı dəyişdirilmədən saxlanılmalıdır. Yuxarıda göstərilənlərə və Azərbaycan Respublikası İnzibati Xətalar Məcəlləsinin 128-137- ci maddələrini rəhbər tutaraq QƏRARA ALDİ: X1 AR DİN-in Baş Dövlət Yol Polis İdarəsinin xx.xx.2024-cü il tarixli, EQ 24283496 nömrəli inzibati tənbeh vermə haqqında qərarından verdiyi şikayət təmin edilməsin, həmin qərar dəyişdirilmədən saxlanılsın. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı şəhəri Nərimanov Rayon Məhkəməsi vasitəsilə və ya birbaşa Bakı Apellyasiya Məhkəməsinə apellyasiya şikayəti və ya protesti verilə bilər. Hakim Hafiz Kamranov