Bakı Şəhəri Nərimanov Rayon Məhkəməsi Qərardad — İş №3(005)-4093/2025

Azərbaycan Respublikası adından QƏRARDAD Bakı şəhəri İş № 3(005)-4093/2025 01.10.2025 BAKI ŞƏHƏRİ NƏRİMANOV RAYON MƏHKƏMƏSİ Mən, Bakı şəhəri Nərimanov Rayon Məhkəməsinin hakimi Babayev Kamal Yunis oğlu Azərbaycan Respublikası Ədliyyə Nazirliyi Bakı şəhəri Nərimanov Rayon İcra Şöbəsi tərəfindən «X3 Liseyi» barəsində Azərbaycan Respublikası İnzibati Xətalar Məcəlləsinin (bundan sonra - İXM) 528.1-ci maddəsi üzrə tərtib olunmuş inzibati xəta haqqında protokolu və ona əlavə edilmiş sənədləri məhkəmə iclasında baxılmağa hazırlayarkən MÜƏYYƏN ETDİM: Azərbaycan Respublikası Ədliyyə Nazirliyi Bakı şəhəri Nərimanov Rayon İcra Şöbəsi tərəfindən «X3 Liseyi» barəsində İXM-in 528.1-ci maddəsində nəzərdə tutulmuş inzibati xətanın törətməsinə dair MN ******* nömrəli, 30 sentyabr 2025-ci il tarixli protokol tərtib edilərək baxılması üçün məhkəməyə göndərilmişdir. İnzibati xəta haqqında protokoldan görünür ki, Bakı şəhəri Nərimanov Rayon Məhkəməsinin 16(005)-370/2025 saylı, xx.xx.2025-ci il tarixli icra sənədinin icrası tələb olunmuş, lakin borclu icra məmurunun qanuni tələblərini yerinə yetirməmişdir. Nəticədə «X3 Liseyi» tərəfindən İXM-nin 528.1-ci maddəsində nəzərdə tutulmuş inzibati xəta törədilmişdir. İşin baxılmağa hazırlanması zamanı müəyyən edilmişdir ki, icraata başlamaq haqqında qərarla xx.xx.2025-ci il tarixdən X1 tanış olduğu görünsə də, həmin şəxsin «X3 Liseyi» ilə bağlılığını təsdiq edən sənəd iş materiallarına əlavə edilməmiş, həmçinin «X3 Liseyi» (onun vəzifəli şəxsi) həmin icra vərəqəsinin icrası ilə əlaqədar icra məmurunun qanuni tələblərini yerinə yetirməməsinin nədə ifadə olunması tam olaraq əks etdirilməmiş, müvafiq sübutlar (mümkün halda akt və s.) məhkəməyə təqdim edilməmişdir. Protokolda borclunun icra sənədinin icrasından qərəzli olaraq yayınması qeyd edilsə də, yayınmanın səbəbləri icra məmuru tərəfindən araşdırılmamış, formal protokol tərtib edilməklə baxılması üçün məhkəməyə təqdim edilmişdir. İXM-in 109.1.6-cı maddəsinə görə inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barəsində qərardad qəbul edilir. Belə olan halda məhkəmə hesab edir ki inzibati xəta haqqında protokol və ona əlavə olunmuş sənədlər natamam şəkildə tərtib olunduğundan onu tərtib etmiş orqana geri qaytarılmalıdır. Qeyd olunanlara əsasən və İXM-in 109-cu maddəsini rəhbər tutaraq, məhkəmə QƏRARA ALDİ: «X3 Liseyi» nin Azərbaycan Respublikası İnzibati Xətalar Məcəlləsinin 528.1-ci maddəsi ilə nəzərdə tutulmuş inzibati xətanı törətməsinə dair tərtib olunmuş inzibati xəta haqqında protokol və ona əlavə olunmuş sənədlər Azərbaycan Respublikası Ədliyyə Nazirliyi Bakı şəhəri Nərimanov Rayon İcra Şöbəsinə geri qaytarılsın. Qərar qətidir, şikayət verilə bilməz. Hakim Kamal Babayev