Bakı Şəhəri Nərimanov Rayon Məhkəməsi Qərar — İş №3(005)-4885/2025

Azərbaycan Respublikası adından QƏRAR Bakı şəhəri İş № 3(005)-4885/2025 02.12.2025 BAKI ŞƏHƏRİ NƏRİMANOV RAYON MƏHKƏMƏSİ Hakim Babayev Kamal Yunis oğlunun sədrliyi, İbrahimova Ramilə Namiq qızının katibliyi ilə, Barəsində protokol tərtib olunan qərardan şikayət vermiş şəxs X1 iştirakları ilə, X1 Azərbaycan Respublikası DİN-nin Nərimanov rayon X4 İdarəsinin X5 şöbəsi tərəfindən qəbul edilmiş xx.xx.2025-ci il tarixli, EQ seriyalı 28626362 saylı inzibati tənbeh vermə haqqında qərardan verdiyi şikayətə məhkəmənin inzibati binasında, açıq məhkəmə iclasında baxaraq, məhkəmə MÜƏYYƏN ETDİ: X1 Azərbaycan Respublikası DİN-nin Nərimanov rayon X4 İdarəsinin X5 şöbəsi tərəfindən qəbul edilmiş xx.xx.2025-ci il tarixli, EQ seriyalı 28626362 saylı qərarından şikayətlə Bakı Şəhəri Nərimanov Rayon Məhkəməsinə müraciət edərək, qərarın ləğv edilməsi və inzibati xəta haqqında iş üzrə icraata xitam verilməsini xahiş etmişdir. Şikayətdə qeyd edilmişdir ki, o, 22 iyul 1997-ci il tarixdə anadan olmuşdur, mülkiyyətində **-SV-*** dövlət qeydiyyat nişanlı, "Dong Feng" markalı avtomobil mövcuddur. Azərbaycan Respublikası Nərimanov rayon X5 Şöbəsi tərəfindən tərtib edilmiş EQ/28626362 saylı, xx.xx.2025-ci il tarixli protokol əsasında qəbul edilmiş xx.xx.2025-ci il tarixli qərara əsasən, xx.xx.2025-ci il tarixdə F.X.Xoyski küçəsində idarə etdiyi **-SV-*** dövlət qeydiyyat nişanlı, "Dong Feng" markalı avtomobil İXM-nin 346.4-cü maddəsinə görə 80 manat məbləğində cərimə edilmişdir. Hesab edir ki, barəsində verilmiş qərar əsassızdır və ləğv edilməlidir. Şikayətə əlavə olunmuş foto şəkillərə nəzər saldıqda tətbiq olunmuş İXM-nin 346.4-cü maddəsində təsbit olumuş pozuntu onun tərəfindən törədilməmişdir. Bildirmişdir ki, foto şəkillərdən aydın surətdə görsənir ki, idarə etdiyi avtomobildən sağda 1.16.2 nişanlanma xətti mövcuddur. Əlavə olaraq bildirir ki, xətanın törədildiyi tarix xx.xx.2025-ci il qeyd olunsada, barəsində protokol və qərar xx.xx.2025-ci ildə tərtib edilmişdir və xx.xx.2025-ci il tarixdə kabinetinə yerləşdirilmişdir. Məhkəmədən qərarın ləğv edilməsini xahiş edir. Məhkəmə iclasında qərardan şikayət vermiş şəxs X2 şikayət ərizəsinin məzmununa uyğun izahat verərək, Nərimanov rayon polis idarəsi tərəfindən qəbul edilmiş xx.xx.2025-ci il tarixli, EQ seriyalı 28626362 saylı inzibati tənbeh vermə haqqında elektron qərarın ləğv edilməsini və iş üzrə icraata xitam verilməsini xahiş etmişdir. Qeyd etmişdir ki, avtobus zolağı ilə hərəkətdə olduğu zolaq arasında təhlükəsizlik adacığı olduğundan hərəkətdə olduğu zolaq birinci zolaq hesab edilməklə, maddənin tərkibi formalaşmamışdır. Belə ki, “Yol Hərəkəti haqqında” Qanuna müvafiq olaraq, onun olduğu zolaq birinci zolaq hesab edilir. Bu səbəbdən də əməllərində xəta tərkibi yoxdur. Eyni zamanda, inzibati tənbeh vermə haqqında qərar elektron qərar formasında real vaxt rejimində də tərtib edilməmişdir ki, bu da onun hüquqlarını pozmaqdadır. Məhkəmə iclasının yeri və vaxtı barəsində məlumat verilməsinə baxmayaraq məhkəmə iclasında inzibati qərar qəbul edən qurumun nümayəndəsi iştirak etməmişdir. Məhkəmə onun iştirakı olmadan məhkəmə iclasının keçirilməsini mümkün hesab etmişdir. İş materiallarında olan və məhkəmə iclasında tədqiq edilmiş: Azərbaycan Respublikası DİN-nin Nərimanov rayon X4 İdarəsinin X5 şöbəsi tərəfindən qəbul edilmiş xx.xx.2025-ci il tarixli, EQ seriyalı 28626362 saylı inzibati tənbeh vermə haqqında qərardan görünür ki, X2 **-SV-*** dövlət qeydiyyat nişanlı nəqliyyat vasitəsini idarə edərkən xx.xx.2025-ci il tarixdə saat 17:07-də İXM-in 346.4-cü maddəsində nəzərdə tutulan inzibati xətanı törətmişdir. X2 İXM-in 346.4-cü maddəsində nəzərdə tutulan inzibati xəta törətdiyi üçün 80 manat məbləğində cərimə edilmişdir. İş materallarına əlavə edilmiş fotoşəkillərdən görünür ki, nəqliyyat vasitəsi təhlükəsizlik adacağı üzərində durmaqla, nəqliyyat vasitəsindən sərnişin düşürməkdədir. Hüquqi məsələlər Azərbaycan Respublikası İnzibati Xətalar Məcəlləsinin: 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və hərəkətsizlik) törətmiş şəxs inzibati məsuliyyətə cəlb olunur və tənbeh edilir. 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İXM-nin 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. 124.3-cü maddəsinə əsasən barəsində inzibati xəta haqqında iş üzrə icraat aparılan şəxs inzibati xəta hadisəsinin mövcudluğu ilə razılaşmadıqda, səlahiyyətli vəzifəli şəxs inzibati xəta haqqında protokol tərtib edir. 124.4-cü maddəsinə əsasən inzibati tənbeh tətbiq etmə haqqında qərar və ya inzibati xəta haqqında protokol operativ nəqliyyat vasitəsində quraşdırılmış bort-kompüter vasitəsilə tərtib olunaraq dərhal, yaxud belə kompüter olmadıqda həmin günün sonunadək müvafiq icra hakimiyyəti orqanının mərkəzi informasiya sistemində yerləşdirilir və barəsində inzibati xəta haqqında iş üzrə icraat aparılan şəxsə bu Məcəllənin 125.2.1-ci maddəsində nəzərdə tutulmuş qaydada bu barədə məlumat verilir. İnzibati tənbeh tətbiq etmə haqqında qərarın və ya inzibati xəta haqqında protokolun kağız daşıyıcıda surəti səlahiyyətli orqan (vəzifəli şəxs) tərəfindən yerindəcə barəsində inzibati xəta haqqında iş üzrə icraat aparılan şəxsə, həmçinin belə müraciəti olduqda inzibati xəta haqqında iş üzrə zərər çəkmiş şəxsə verilir. Bu Məcəllənin 124.3-cü maddəsində nəzərdə tutulmuş hallarda inzibati xəta haqqında protokol baxılması üçün yuxarı səlahiyyətli orqana (vəzifəli şəxsə) göndərilir. Yuxarı səlahiyyətli orqan (vəzifəli şəxs) tərəfindən həmin iş üzrə qəbul edilən qərar qəbul edildiyi gün müvafiq icra hakimiyyəti orqanının mərkəzi informasiya sistemində yerləşdirilir və barəsində inzibati xəta haqqında iş üzrə icraat aparılan şəxsə həmin qərar barədə bu Məcəllənin 125.2-ci maddəsində nəzərdə tutulmuş qaydada məlumat verilir. 134.1, 134.1.4-cü maddələrinə əsasən inzibati xəta haqqında iş üzrə qərardan verilən şikayətə və ya protestə baxılaraq bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilir. 346.4-cü maddəsinə əsasən yanqoşqusu olmayan motosikletlər, mopedlər, velosipedlər və kiçik elektrik nəqliyyat vasitələri istisna olmaqla, digər nəqliyyat vasitələrinin yolun hərəkət hissəsinin kənarında ikinci və sonrakı cərgələrdə dayanmasına və ya durmasına görə səksən manat məbləğində cərimə edilir. Sübutların qiymətləndirilməsi və məhkəmənin hüquqi mövqeyi: Məhkəmə qeyd edir ki, barəsində inzibati xəta haqqında iş üzrə icraat aparılan şəxs X2 barəsində inzibati xəta haqqında iş üzrə qərar qəbul edilərkən, inzibati orqan heç bir araşdırma aparmadan və qanunvericiliyin müvafiq normaları pozulmaqla X2 barəsində xx.xx.2025-ci il tarixli, EQ seriyalı 28626362 saylı inzibati tənbeh vermə haqqında qərar qəbul etmiş, bununla da X1 hüquqlarını pozmuşdur. Belə ki, iş materiallarına əlavə edilmiş sənədlərdən müəyyən edilir ki, barəsində inzibati xəta haqqında iş üzrə icraat aparılan şəxs X2 tərəfindən törədilmiş inzibati xəta xx.xx.2025-ci il tarixdə saat 17:07-də qeydə alınmışdır. Azərbaycan Respublikası İXM-nin 122.1-ci maddəsinə əsasən, bu Məcəllənin ...... 346.4-cü maddəsində nəzərdə tutulmuş xəta xüsusi texniki vasitələrin köməyi ilə aşkar edildikdə real vaxt rejimində elektron qərar tərtib edilir. Lakin, tərtib edilmiş qərar nəzərdən keçirilərkən qərarın real vaxt rejimində tərtib edilmədiyi, hadəsədən 3 ay sonra tərtib edildiyi müəyyən edilmişdir. Hazırda həmin ziddiyyətin texniki yanlışlıq və ya kobud pozuntu olmasını aydınlaşdırmaq mümkün deyildir İnzibati orqana məhkəmə iclasının vaxtı və yeri barədə əvvəlcədən məlumat verilməsinə baxmayaraq, məhkəmədə iştirak etməmiş, inzibati xəta hadisənin mövcudluğunu sübut etməmişlər. Məhkəmə hesab edir ki, inzibati xəta haqqında icraat aparılarkən səlahiyyətli orqan (vəzifəli şəxs) İXM-lə müəyyən edilmiş işin faktiki hallarını tam, hərtərəfli araşdırmadan X2 barəsində inzibati xəta haqqında qərar qəbul edərək, sonuncunun hüquqlarını pozmuşdur. Həmin xüsusatı araşdırmaq məqsədilə və nəqliyyat vasitəsini idarə etmiş şəxs barəsində qərar qəbul etmək məqsədilə hazırda yeni araşdırma aparılmalıdır. Bundan əlavə, hadisənin qeydə alındığı yerin videogörüntülərinə baxılmalı, sözügedən hərəkət zolağının birinci və ya ikinci hərəkət zolağı olması məsələsi aydınlaşdırılmalıdır. Ona görə də, şikayət qismən təmin edilməli, Azərbaycan Respublikası Daxili İşlər Nazirliyinin Baş X5 İdarəsinin vəzifəli şəxsi tərəfindən qəbul edilmiş X2 İXM-nin 346.4-cü maddəsi ilə cərimə olunmasına dair xx.xx.2025-ci il tarixli, EQ seriyalı 28626362 saylı qərar ləğv edilməli və videogörüntülərə və digər sübutlara baxış keçirilməklə işə yenidən baxılması üçün Azərbaycan Respublikası Daxili İşlər Nazirliyinin Nərimanov RPİ X5 İdarəsinə geri qaytarılmalıdır. Göstərilənlərə əsasən və Azərbaycan Respublikası İXM-nin 128, 129 və 133-136-cı maddələrini rəhbər tutaraq, məhkəmə QƏRARA ALDİ: Şikayət qismən təmin edilsin. Azərbaycan Respublikası DİN-nin Nərimanov rayon X4 İdarəsinin X5 şöbəsinin vəzifəli şəxsi tərəfindən qəbul edilmiş X1 İnzibati Xətalar Məcəlləsinin 346.4-cü maddəsi ilə cərimə olunmasına dair xx.xx.2025-ci il tarixli, EQ seriyalı 28626362 saylı inzibati tənbeh vermə haqqında qərar ləğv edilsin və işə yenidən baxılması üçün Azərbaycan Respublikası DİN-nin Nərimanov rayon X4 İdarəsinin X5 şöbəsinə qaytarılsın. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı Şəhəri Nərimanov Rayon Məhkəməsi vasitəsilə və ya birbaşa Bakı Apellyasiya Məhkəməsinə şikayət verilə bilər. Hakim Kamal Babayev