Bakı Şəhəri Nərimanov Rayon Məhkəməsi Qərar — İş №3(005)-599/2023

Azərbaycan Respublikası adından QƏRAR Bakı şəhəri İş № 3(005)-599/2023 06.03.2023 BAKI ŞƏHƏRİ NƏRİMANOV RAYON MƏHKƏMƏSİ Hakim Əlisoy Xalidə Kəramət qızının sədrliyi, Mayılzadə Gülzadə Çingiz qızının katibliyi, Şikayət vermiş şəxs X1 iştirakı ilə X1 Azərbaycan Respublikası DİN-nin Bakı şəhəri X4 İdarəsi tərəfindən qəbul edilmiş xx.xx.2023-cü il tarixli inzibati tənbeh vermə haqqında TP ******* qərardan verdiyi şikayətə məhkəmənin inzibati binasında, açıq məhkəmə iclasında baxaraq, məhkəmə MÜƏYYƏN ETDİ: X1 Azərbaycan Respublikası DİN-nin Bakı şəhər X4 İdarəsinin xx.xx.2023-cü il tarixli TP ******* saylı inzibati tənbeh vermə haqqında qərarından şikayətlə Bakı Şəhəri Nərimanov Rayon Məhkəməsinə müraciət edərək, qərarın ləğv edilməsi və inzibati xəta haqqında iş üzrə icraata xitam verilməsi barədə qərar qəbul edilməsini xahiş etmişdir. Şikayətinə əsasən X2 bildirmişdir ki, 31 yanvar 2023-cü il tarixdə etibarnamə əsasında idarə etdiyi “Chevrolet Malibu” minik markalı **-TP-*** d.n.n. nəqliyyat vasitəsini idarə edərkən xidməti avtomobildə hərəkət edən yol patrul xidmətinin əməkdaşı nəqliyyat vasitəsinin nömrə nişanını elan edərək saxlamağı barədə göstəriş vermiş, nəqliyyat vasitəsini saxladıqdan sonra polis əməkdaşı işıqforun qadağanedici (qırmızı) işığında yol ayrıcını keçdiyini səbəb kimi göstərərək barəsində Azərbaycan Respublikası İXM-nin 327.2-ci (svetoforun və ya nizamlayıcının qadağanedici işarəsi verilərkən hərəkətin davam etdirilməsinə görə) maddəsi ilə inzibati protokol tərtib ediləcəyini bildirmişdir. O, polis əməkdaşına havanın yağışlı olması səbəbindən yol səthinin sürüşkən olduğunu, kəskin tormuzlama etməsə artıq yol ayrıcına daxil olacağını nəzərə alaraq və qəza şəraitini yaratmamaq üçün işıqforun qadağanedici deyil, xəbərdaredici (sarı) işığında yol ayrıcını keçdiyini bildirdi. Eyni zamanda, nəqliyyat vasitədə əyləşən sərnişinin də dediklərini təsdiq etməsinə baxmayaraq polis əməkdaşı təkidlə qayda pozuntusuna yol verdiyini bildirdi və hərəkətin intensivliyini nəzərə alaraq, avtomobillərin axınına maneə yaratmamaq bəhanəsi ilə inzibati xəta haqqında protokol təqdim etmədən ərazidən uzaqlaşdı. Bundan sonra o da hərəkətini davam etdirdi. Bir müddət sonra, “Asanpay” proqram təminatı vasitəsi ilə daxil olan sms bildiriş əsasında ona məlum olmuşdur ki, yol patrul xidməti əməkdaşı tərəfindən barəsində qərar qüvvəsini almış 31 yanvar 2023-cü il tarixli İXP ******* nömrəli inzibati protokol tərtib edilmişdir. Hesab edir ki, barəsində tərtib olunmuş həmin protokol qanunsuzdur və başlanılmış inzibati icraat ləğv edilməlidir. Məhkəmə iclasında X2 şikayət ərizəsini müdafiə edərək təmin edilməsini xahiş etmişdir. Məhkəmədə inzibati işə baxılması zamanı görülmüş müvafiq tədbirlərə baxmayaraq, inzibati xəta haqqında qərar qəbul etmiş Azərbaycan Respublikası DİN-nin Bakı şəhər X4 İdarəsinin nümayəndəsi məhkəmə iclaslarında iştirak etməmişdir. Məhkəmə İXM-nin 133.2.4-cü maddəsinə əsasən işə iş üzrə icraat iştirakçısının iştirakı olmadan baxılmasını mümkün hesab etmişdir. İş materiallarında olan və məhkəmə iclasında tədqiq edilmiş Azərbaycan Respublikası DİN-nin Bakı şəhər X4 İdarəsi tərəfindən qəbul edilmiş xx.xx.2023-cü il tarixli TP ******* saylı inzibati tənbeh vermə haqqında qərara əsasən X2 xx.xx.2023-cü il tarixdə **-TP-*** dövlət qeydiyyat nişanlı, “Chevrolet Malibu” minik markalı avtomobili idarə edərkən üfüqi nişanlanma xətlərinin tələblərinə riayət etməyərək sola və ya geriyə dönmə qaydalarını pozmuş və nəticədə İXM-nin 327.2-ci maddəsində nəzərdə tutulan inzibati xətanı törətmişdir. X2 İXM-nin 327.2-ci maddəsində nəzərdə tutulan inzibati xəta törətdiyi üçün 60 manat məbləğində cərimə edilmişdir. X1 məhkəməyə daxil olan şikayətində qeyd etmişdir ki, barəsində tərtib olunan protokoldan və qərardan narazıdır, barəsində xəbəri və iştirakı olmadan İXP ******* nömrəli elektron protokol tərtib olunmuş və o, 60 manat məbləğində cərimə olunmuşdur. Ona həmin protokolun seriya nömrəsi mobil telefonuna SMS vasitəsi ilə foto və video çəkiliş olmadan göndərilmişdir. Bununla bağlı Baş X5 İdarəsinə elektron müraciət etsə də heç bir cavab verilməmişdir. Barəsində tərtib olunan qərar üzrə inzibati iş üzrə icraata xitam verilməsini xahiş etmişdir. Məhkəmə şikayətin dəlillərini nəzərdən keçirərək və iş materiallarını araşdıraraq hesab edir ki, şikayət təmin edilməli X1 İXM-nin 327.2-ci maddəsi ilə təqsirli bilinərək cərimə olunmasına dair Azərbaycan Respublikası DİN-nin Bakı şəhər X4 İdarəsi tərəfindən xx.xx.2023-cü il tarixli TP ******* saylı protokol əsasına qəbul edilmiş inzibati tənbeh vermə haqqında xx.xx.2023-cü il tarixli qərarı ləğv edilməli, inzibati xəta haqqında iş üzrə icraata xitam verilməlidir. İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və hərəkətsizlik) törətmiş şəxs inzibati məsuliyyətə cəlb olunur və tənbeh edilir. İXM-nin 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İXM-nin 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İXM-nin 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. İXM-nin 105.1-ci maddəsinə əsasən bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. İXM-nin 134.1-ci maddəsinə əsasən inzibati xəta haqqında iş üzrə qərardan verilən şikayətə və ya protestə baxılaraq göstərilən qərarlardan biri qəbul edilir: qərarın dəyişdirilmədən, şikayətin və ya protestin isə təmin edilmədən saxlanılması haqqında; bu Məcəllənin 135.1.2-135.1.5-ci maddələri ilə müəyyən edilmiş hallarda qərarın dəyişdirilməsi haqqında və ya qərarı ləğv edərək yeni qərarın çıxarılması haqqında; bu Məcəllənin 53-cü maddəsində nəzərdə tutulduğu hallarda qərarı ləğv edərək inzibati xəta haqqında iş üzrə icraata xitam verilməsi haqqında; bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında. Məhkəmə qeyd edir ki, X2 qərarda qeyd olunan halların müvafiq inzibati orqan tərəfindən araşdırılması üçün müraciət etsə də (iş üzrə şikayət vermiş şəxs dəvət edilməmiş, ehtimal olunan inzibati xətanın videogörüntüləri və digər sübutlar təqdim edilməmiş və s.), xx.xx.2023-cü il tarixli TP ******* nömrəli inzibati tənbeh vermə haqqında qərarda hər hansı sübuta istinad edilmədən qərar qəbul edilmişdir. Buna görə də məhkəmə prosessual qənaət prinsipini əsas tutaraq hesab edir ki, mübahisələndirilən qərarın məhkəmə tərəfindən ləğv edilməsi və araşdırılması üçün inzibati orqana (vəzifəli şəxsə) göndərilməsi nəticəsiz olacaqdır. Həmçinin, inzibati orqana məhkəmə iclasının vaxtı və yeri barədə məlumat verilərək sübutları təqdim etməsi təklif edilmiş, inzibati orqan tərəfindən hər hansı sübut məhkəməyə təqdim edilməmişdir. Beləliklə, qeyd olunanlara əsasən məhkəmə hesab edir ki, X2 tərəfindən verilmiş şikayət təmin edilməli, onun barəsində Bakı şəhəri DYPİ-nin TP seriyalı xx.xx.2023-cü il tarixli TP ******* nömrəli “İnzibati tənbeh vermə haqqında” qərarı ləğv edilməli və işə yenidən baxılması Azərbaycan Respublikası Daxili İşlər Nazirliyinin Bakı şəhər X5 İdarəsinə tapşırılmalıdır. Göstərilənlərə əsasən və Azərbaycan Respublikası İXM-nin 128, 129 və 133-136-cı maddələrini rəhbər tutaraq, məhkəmə QƏRARA ALDİ: Şikayət qismən təmin edilsin. X2 barəsində qəbul edilmiş TP seriyalı ******* nömrəli xx.xx.2023-cü il tarixli “İnzibati tənbeh vermə haqqında” elektron qərarı ləğv edilsin və işə yenidən baxılması Azərbaycan Respublikası Daxili İşlər Nazirliyinin Bakı şəhər X5 İdarəsinə tapşırılsın. Qərarın surəti təqdim edildiyi və ya alındığı gündən 10 gün müddətində Nərimanov Rayon Məhkəməsi vasitəsilə və ya bilavasitə Bakı Apellyasiya Məhkəməsinə şikayət verilə bilər. Hakim Xalidə Əlisoy