Bakı Şəhəri Nərimanov Rayon Məhkəməsi Qərar — İş №3(005)-944/2023

Azərbaycan Respublikası adından QƏRAR Bakı şəhəri İş № 3(005)-944/2023 11.04.2023 BAKI ŞƏHƏRİ NƏRİMANOV RAYON MƏHKƏMƏSİ Hakim Əsədova Gültəkin Akif qızının sədrliyi Məmmədhəsənov Fərman Salman oğlunun katibliyi ilə, Şəxs barəsində Azərbaycan Respublikası İnzibati Xətalar Məcəlləsinin (bundan sonra - İXM) 338.7-ci maddəsi ilə Azərbaycan Respublikası Daxili İşlər Nazirliyi Bakı şəhəri Nərimanov rayon Polis İdarəsindən daxil olmuş inzibati xəta haqqında iş materiallarına məhkəmənin inzibati binasında, açıq məhkəmə iclasında baxaraq, məhkəmə MÜƏYYƏN ETDİ: Azərbaycan Respublikası Daxili İşlər Nazirliyinin Bakı şəhəri Nərimanov rayon Polis İdarəsindən daxil olmuş “Cinayət işinin başlanmasının rədd edilməsi barədə” Nərimanov RPİ-nin Təhqiqat şöbəsinin təhqiqatçısı, polis baş leytenantı Toğrul Məmmədovun 11 mart 2023-cü il tarixli qərarından və 27 mart 2023-cü il tarixli İXP ******* nömrəli inzibati xəta haqqında protokoldan görünür ki, Şəxs xx.xx.2023-cü il tarixdə saat 18:02 radələrində idarə etdiyi “Kuba X-Boss” markalı moped ilə Xətai prospekti istiqamətində düzünə getmək üçün zolağını dəyişmək istəyən zaman əsas zolaqla hərəkət edən “Lada 21103-minik” markalı ** BS *** dövlət qeydiyyat nişanlı avtomobili görməmiş və nəticə də mopedin arxa təkəri həmin avtomobilin sağ ön bufer hissəsinə çırpılmışdır. Bununla da, Şəxs tərəfindən İXM-in 338.7-ci maddəsində nəzərdə tutulmuş inzibati xəta törədilmişdir. Məhkəmə iclasının vaxtı və yeri barədə lazımi qaydada məlumatlandırılmasına baxmayaraq, barəsində inzibati xəta haqqında iş üzrə icraat aparılan şəxs, zərərçəkmiş şəxs və inzibati xəta haqqında protokol tərtib etmiş səlahiyyətli qurumun nümayəndəsi məhkəmə iclasına gəlməmişdir. Məhkəmə, işə qeyd olunan şəxslərin iştirakı olmadan baxılmasını mümkün hesab etmişdir. İş materiallarında olan və məhkəmə baxışında tədqiq edilmiş: Nərimanov RPİ-nin Növbətçi Hissəsinin məsul növbətçisi Elşad Cəfərov tərəfindən tərtib edilmiş HK-1 №-204 nömrəli, xx.xx.2022-ci il tarixli raportdan görünür ki, xx.xx.2023-cü il tarixdə saat 18:05-də ƏÇPA-nın 1-ci PB- nin əməkdaşı məlumat verdi ki, H.Əliyev Mərkəzinin yaxınlığında baş vermiş YNH-si zamanı xəsarət alan olmuşdur. Araşdırma müddətində izahatı alınmış Şəxs xx.xx.2023-cü il tarixdə baş vermiş yol-nəqliyyat hadisəsi ilə əlaqədar onu bildirmişdir ki, qeyd olunan tarixdə saat təxminən 18:02 radələrində icarə əsasında idarə etdiyi “KUBA X-Boss” markalı moped ilə Bakı şəhəri, Nərimanov rayonu, H.Əliyev prospekti ilə Koroğlu MT-sı istiqamətindən üzü Xətai prospekti Y.Səfərov küçəsi istiqamətində 3 zolaqdan ibarət köməkçi yoldan sağdan 3-cü zolaqla saat da 40 km sürətlə düzünə hərəkət edirmiş. O, idarə etdiyi moped ilə Xətai prospekti istiqamətində düzünə getmək üçün zolağını dəyişmək istəyən zaman əsas zolaqla hərəkət edən “Lada 21103-minik” markalı ** BS *** dövlət qeydiyyat nişanlı avtomobili görməmiş və nəticə də mopedin arxa təkəri həmin avtomobilin sağ ön bufer hissəsinə çırpılmışdır. Zərbənin təsirindən o, idarə etməni itirmiş və mopeddən yerə yıxılmışdır. Bundan sonra avtomobilin sürücüsü ona yaxınlaşaraq xəsarəti olub-olmadığını soruşmuşdur. Daha sonra isə ona xəstəxanaya getməyi təklif etmişdir. O, da bundan imtina etmişdir. Bundan sonra hadisə yerinə Nərimanov RPİ-nin əməkdaşı gələrək araşdırma aparmağa başlamışdır. O, da həmin araşdırmada iştirak etmişdir. Təhqiqat araşdırması zamanı izahatı alınmış X2 xx.xx.2023-cü il tarixdə baş vermiş yolnəqliyyat hadisəsi ilə əlaqədar onu bildirmişdir ki, qeyd olunan tarixdə saat təxminən 18:02 radələrində etibarnamə əsasında idarə etdiyi “21103- minik” markalı ** BS *** dövlət qeydiyyat nişanlı avtomobil ilə Bakı şəhəri, Nərimanov rayonu, H.Əliyev prospekti ilə Koroğlu MT-sı istiqamətindən üzü Xətai prospekti Y.Səfərov küçəsi istiqamətində 3 zolaqdan ibarət əsas yolda sağdan 2-ci zolaqla saat da 25 km sürətlə düzünə hərəkət edirmiş. O, idarə etdiyi avtomobil ilə düzünə hərəkətdə olan zaman köməkçi yolla hərəkət edən mopedin sürücüsü onun əsas yolla getdiyinə fikir vermədən qəflətən onun hərəkət etdiyi zolağa daxil olmaq istəmişdir. Bu zaman mopedin arxa təkəri ilə onun idarə etdiyi avtomobilin ön sağ bufer hissəsi toqquşmuşdur. Zərbənin təsirindən mopedin sürücüsü idarə etməni itirmiş və yerə yıxılmışdır. Bundan sonra o, dərhal həmin şəxsə yaxınlaşaraq xəsarəti olub-olmadığını soruşub, ona xəstəxanaya getməyi təklif etmişdir. Lakin mopedin sürücüsü bundan imtina etmişdir. Bundan sonra hadisə yerinə Nərimanov RPİ-nin əməkdaşı gələrək araşdırma aparmağa başlamışdır. O, da həmin araşdırmada iştirak etmişdir. “Cinayət işinin başlanmasının rədd edilməsi barədə” 11 mart 2023-cü il tarixli qərardan görünür ki, qərarın təsviri hissəsində göstərilənlərə əsasən əməlində cinayət tərkibi olmadığına görə Şəxs barəsində cinayət işi başlanılması rədd edilmiş, qərarın surətinin və toplanmış materialın sürücü X1 barəsində İXM-in 338.7-ci maddəsinin tələbinə əsasən inzibati tənbeh tədbiri görülməsindən ötrü Nərimanov RPİ-nin DYPŞ-yə göndərilməsi qərara alınmışdır. Məhkəmə qeyd edir ki, İXM-in 338.7-ci maddəsində nəzərdə tutulmuş inzibati xətanın Şəxs tərəfindən törədilməsi məhkəmə iclasında tədqiq edilmiş inzibati xəta haqqında protokol, ekspert rəyi, eləcə də inzibati materialda olan digər sənədlərlə sübuta yetirilmişdir. İXM-in 31.2-ci maddəsinə əsasən fiziki şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. İş üzrə məsuliyyəti yüngülləşdirən və ağırlaşdıran hallar mövcud deyildir. İXM-in: 3-cü maddəsində inzibati məsuliyyətin əsasları müəyyən edilmişdir. Həmin maddənin tələbinə əsasən yalnız həmin Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir; 6.1-ci maddəsinə əsasən inzibati xətalara görə inzibati tənbeh həmin Məcəlləyə uyğun olaraq tətbiq edilir; 12.1-ci maddəsinə əsasən həmin Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur; 31.4-cü maddəsinə əsasən bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yalnız yuxarı həddi müəyyən edildikdə, tətbiq edilən inzibati tənbeh onun yuxarı həddinin üçdə birindən az ola bilməz; 38.3-cü maddəsinə görə cinayət işinin başlanması rədd edildikdə və ya cinayət işinə xitam verildikdə, lakin şəxsin əməllərində inzibati xəta tərkibinin bütün əlamətləri olduqda, inzibati tənbeh cinayət işinin başlanmasının rədd edilməsi və ya ona xitam verilməsi haqqında qərar qəbul edildiyi gündən ən geci üç ay keçənədək verilə bilər; 55.2-ci maddəsinə əsasən fiziki şəxslər barəsində inzibati xətalar haqqında işlər üzrə məsrəflər dövlət hesabına ödənilir. Hüquqi şəxslər barəsində inzibati xətalar haqqında işlər üzrə məsrəflər isə həmin şəxslərin üzərinə qoyulur; 338.7-ci maddəsinə əsasən bu Məcəllənin 338.4 - 338.6-cı maddələrində nəzərdə tutulmuş xətalar nəticəsində zərər çəkmiş şəxsin sağlamlığına yüngül bədən xəsarətinin yetirilməsinə və ya zərər çəkmiş şəxsə maddi zərər vurulmasına görə səksən manatdan yüz manatadək məbləğdə cərimə edilir. Məhkəmə, törədilmiş inzibati xətanın xarakterini, inzibati xətanı törətmiş şəxsin şəxsiyyətini, məsuliyyəti yüngülləşdirən və ağırlaşdıran halların müəyyən edilməməsini nəzərə alıb, iş üzrə sübutları qiymətləndirərək hesab edir ki, Şəxs İXM-in 338.7-ci maddəsində nəzərdə tutulmuş inzibati xətanı törətməkdə təqsirli bilinməli və ona həmin maddənin sanksiyasında nəzərdə tutulmuş inzibati cərimə növündə tənbeh tədbiri tətbiq edilməlidir. Qeyd olunanlara əsasən və İXM-in 43, 114 və 115-ci maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikası İnzibati Xətalar Məcəlləsinin 338.7-ci maddəsində nəzərdə tutulmuş inzibati xətanı törətməkdə təqsirli bilinsin və barəsində 100 (bir yüz) manat məbləğində inzibati cərimə növündə tənbeh tədbiri tətbiq edilsin. Qərarın surəti rəsmi qaydada verildiyi vaxtdan 10 (on) gün müddətində Azərbaycan Respublikası İnzibati Xətalar Məcəlləsinin 129-cu maddəsində müəyyən edilmiş qaydada Bakı Apellyasiya Məhkəməsinə şikayət verilə bilər. Hakim : Gültəkin Əsədova