Bakı Şəhəri Nəsimi Rayon Məhkəməsi Qərar — İş №3(006)-1063/2020

Azərbaycan Respublikası adından QƏRAR Bakı şəhəri İş № 3(006)-1063/2020 26.10.2020 BAKI ŞƏHƏRİ NƏSİMİ RAYON MƏHKƏMƏSİ Bakı şəhəri Nəsimi Rayon Məhkəməsi Hakim Pənahov Babək Əkbər oğlunun sədrliyi, Məhkəmə iclasının katibi X2, İnzibati xəta haqqında iş üzrə qərardan şikayət vermiş şəxs X1 iştirakları ilə Bakı şəhəri Binəqədi Rayon Dövlət Yol Polisi Şöbəsi tərəfindən qəbul edilmiş xx.xx.2020-ci il tarixli, TP ******* saylı inzibati tənbeh vermə haqqında qərardan verilmiş şikayətə açıq məhkəmə iclasında baxaraq M Ü Ə Y Y Ə N E T D İ: X3 Bakı şəhəri Binəqədi Rayon Dövlət Yol Polisi Şöbəsi tərəfindən qəbul edilmiş xx.xx.2020-ci il tarixli, TP ******* saylı inzibati tənbeh vermə haqqında qərardan şikayətlə məhkəməyə müraciət edərək onun ləğv edilməsini xahiş edib göstərmişdir ki, 2020-ci ilin may ayının əvvəllərində yaşadığı ünvanda barəsində İnzibati Xətalar Məcəlləsinin 211-ci maddəsi üzrə Binəqədi Rayon Dövlət Yol Polisi Şöbəsinin Yol Patrul xidməti inspektoru X4 tərəfindən qəbul edilmiş inzibati tənbeh vermə haqqında qərarı almışdır. Qərara əsasən guya o xx.xx.2020-ci il tarixdə, saat 20 radələrində Binəqədi rayonu, Novxanı dairəsi ərazisində markası və dövlət qeydiyyat nişanı məlum olmayan avtomobili idarə edərkən karantin rejiminin pozulmasına yol vermişdir. Lakin qərarda aşkar edilmiş pozuntunun nədən ibarət olması qeyd olunmamışdır. Bu qərar İXP3205796 saylı inzibati xəta haqqında protokol əsasında qəbul edilsə də, həmin protokol barəsində məlumatı olmamışdır. Qəbul edilmiş qərar qanunsuz və əsassızdır. Belə ki, onun tərəfindən heç bir inzibati xəta törədilməmiş, karantin rejiminin tələbləri pozulmamışdır. Sözügedən qərarda qeyd olunan vaxtda, yəni xx.xx.2020-ci il, saat 20 radələrində o, Novxanı dairəsi ərazisində deyil, öz evində olmuşdur. Qərarın surətini aldıqdan sonra hadisə ilə bağlı 102 xidmətinə müraciət etmiş, heç bir nəticə əldə etmədiyindən məhkəməyə müraciət etməli olmuşdur. Eyni zamanda dəfələrlə tələb etməsinə baxmayaraq inzibati xəta haqqıında protokol ona təqdim edilməmişdir. Qeyd olunanları nəzərə alaraq Bakı şəhəri Binəqədi Rayon Dövlət Yol Polisi Şöbəsi tərəfindən qəbul edilmiş xx.xx.2020-ci il tarixli, TP ******* saylı inzibati tənbeh vermə haqqında qərarın ləğv olunmasını xahiş edir. Məhkəmə iclasında X3 şikayəti müdafiə edərək onun təmin olunmasını xahiş etdi. Məhkəmə iclasının yeri və vaxtı barədə rəsmi qaydada xəbərdarlıq edilməsinə baxmayaraq qərarı qəbul etmiş orqanın nümayəndəsi məhkəməyə gəlməmiş, bunun səbəbləri barədə məhkəməyə məlumat verilməmişdir. Məhkəmə işə nümayəndənin iştirakı olmadan baxılmasını mümkün hesab etmişdir. İş materiallarında olan xx.xx.2020-ci il tarixli, TP ******* saylı inzibati tənbeh vermə haqqında qərara əsasən X3 həmin tarixdə, saat 20 radələrində Binəqədi rayonu, Novxanı dairəsi ərazisində epidemiya əleyhinə rejim qaydalarını pozduğu üçün Azərbaycan Respublikası İnzibati Xətalar Məcəlləsinin 211-ci maddəsi ilə təqsirli bilinərək 100 manat cərimə edilmişdir. Məhkəmə iş materiallarını araşdırıb proses iştirakçısının izahatını dinləyərək belə nəticəyə gəlir ki, X3 tərəfindən verilmiş şikayət qismən təmin edilməlidir. Azərbaycan Respublikası İnzibati Xətalar Məcəlləsinin 48-ci maddəsinə əsasən inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri və şəraiti aşkar etməkdən və inzibati xətaların qarşısını almaqdan ibarətdir. Həmin Məcəllənin 5.2-ci maddəsinə əsasən bu Məcəllə insan və vətəndaş hüquqlarının və azadlıqlarının dövlət orqanları (vəzifəli şəxslər) tərəfindən pozulmasının qarşısının alınmasını və onlara hörmət olunmasını təmin edir. Bu Məcəllənin 6.2-ci maddəsinə əsasən inzibati xətalar haqqında işlər üzrə icraatın təmin edilməsi tədbirləri tətbiq edilərkən, qanunvericiliyin tələblərinə əməl olunması yuxarı orqanların və vəzifəli şəxslərin idarə nəzarəti ilə, məhkəmə və prokuror nəzarəti ilə və şikayət etmək hüquqi ilə təmin edilir. Tədqiq edilmiş materiallardan görünür ki, X3 barəsində Binəqədi Rayon Dövlət Yol Polisi Şöbəsi tərəfindən İnzibati Xətalar Məcəlləsinin 211-ci maddəsi üzrə xx.xx.2020-ci il tarixli, TP ******* saylı inzibati tənbeh vermə haqqında qərar qəbul edilmişdir. Həmin qərarda şikayətçinin xx.xx.2020-ci il tarixdə, saat 20 radələrində nəqliyyat vasitəsini idarə edərkən karantin rejiminin tələblərini pozması qeyd olunsa da, həmin pozuntunun nədən ibarət olması öz əksini tapmamışdır. Eyni zamanda onun idarə etdiyi avtomobilin markası və dövlət qeydiyyat nişanı da qərarda göstərilməmişdir. Beləliklə, Bakı şəhəri Binəqədi Rayon Dövlət Yol Polisi Şöbəsi tərəfindən qeyd edilən inzibati xəta haqqında işə baxılarkən zəruri araşdırma aparılmadan və eyni zamanda barəsində icraat aparılan şəxsin iştirakı təmin olunmadan işə baxılaraq qərar qəbul olunmuşdur. İnzibati Xətalar Məcəlləsinin 61.3-cü maddəsinə əsasən inzibati xəta haqqında işə barəsində inzibati xəta haqqında iş üzrə icraat aparılan şəxsin iştirakı ilə baxılır. Həmin işə şəxsin iştirakı olmadan, yalnız o hallarda baxılır ki, işə baxılmasının yeri və müddətinin ona vaxtında bildirilməsi barədə məlumat olsun və ya işə baxılmasını təxirə salmaq haqqında ondan vəsatət daxil olmasın, yaxud belə vəsatət rədd edilmiş olsun. İnzibati Xətalar Məcəlləsinin 135.1.6-cı maddəsinə görə bu Məcəllə ilə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması inzibati xəta haqqında iş üzrə qərarın ləğv edilməsi və ya dəyişdirilməsi üçün əsasdır. Həmin Məcəllənin 134.1.4-cü maddəsinə görə inzibati xəta haqqında iş üzrə qərardan verilən şikayətə və ya protestə baxılaraq bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilə bilər. Göstərilənləri nəzərə alaraq məhkəmə hesab edir ki, şikayət qismən təmin edilməli, Bakı şəhəri Binəqədi Rayon Dövlət Yol Polisi Şöbəsi tərəfindən qəbul edilmiş xx.xx.2020-ci il tarixli, TP ******* saylı inzibati tənbeh vermə haqqında qərar ləğv edilməli və iş yenidən baxılması üçün həmin quruma göndərilməlidir. Qeyd edilənlərə əsasən və Azərbaycan Respublikası İnzibati Xətalar Məcəlləsinin 128- 130-cu və 133-135-ci maddələrini rəhbər tutaraq məhkəmə Q Ə R A R A A L D İ: Şikayət qismən təmin edilsin. Bakı şəhəri Binəqədi Rayon Dövlət Yol Polisi Şöbəsi tərəfindən qəbul edilmiş xx.xx.2020-ci il tarixli, TP ******* saylı inzibati tənbeh vermə haqqında qərar ləğv edilsin və iş baxılması üçün həmin quruma göndərilsin. Qərardan, onun surəti rəsmi qaydada verildiyi andan 10 gün müddətində Bakı şəhəri Nəsimi Rayon Məhkəməsi vasitəsi ilə Bakı Apellyasiya Məhkəməsinə şikayət verilə bilər. Hakim Babək Pənahov