Bakı Şəhəri Nəsimi Rayon Məhkəməsi Qərardad — İş №3(006)-137/2024

Azərbaycan Respublikası adından QƏRARDAD Bakı şəhəri İş № 3(006)-137/2024 10.01.2024 BAKI ŞƏHƏRİ NƏSİMİ RAYON MƏHKƏMƏSİ Mən, Bakı şəhəri Nəsimi Rayon Məhkəməsinin hakimi Pənahov Babək Əkbər oğlu, Şəxs barəsində Azərbaycan Respublikası İnzibati Xətalar Məcəlləsinin 338.7-ci maddəsi üzrə tərtib olunmuş xx.xx.2023-cü il tarixli, İXP ******* saylı inzibati xəta haqqında protokola və ona əlavə edilmiş sənədlərə məhkəmə iclasında baxılmağa hazırlayarkən M Ü Ə Y Y Ə N E T D İ M: İş materiallarına əsasən Şəxs xx.xx.2023-cü il tarixdə idarə etdiyi skuterlə Bakı şəhəri, Nəsimi rayonu, R.Rza küçəsi ilə B.Səfəroğlu küçəsinin kəsişməsində hərəkətdə olarkən “Stop” yol nişanının tələbini pozaraq yolayrıcına daxil olub B.Səfəroğlu küçəsi ilə düzünə hərəkətdə olan, X1 idarə etdiyi “Toyota Prius” markalı, **-FY-*** dövlət qeydiyyat nişanlı nəqliyyat vasitəsilə toqquşmuş, nəticədə A.Hüseynov dərəcəsi təyin olunmayan bədən xəsarəti almışdır. Bununla əlaqədar onun barəsində İnzibati Xətalar Məcəlləsinin 338.7-ci maddəsi üzrə inzibati xəta haqqında protokol tərtib edilmişdir. Hesab edirəm ki, aşağıdakı əsaslara görə inzibati xəta haqqında protokol və ona əlavə edilmiş sənədlər onu tərtib etmiş orqana geri qaytarılmalıdır. Azərbaycan Respublikası İnzibati Xətalar Məcəlləsinin 338.7-ci maddəsi bu Məcəllənin 338.4 və 338.5-ci maddələrində nəzərdə tutulmuş xətalar nəticəsində zərər çəkmiş şəxsin sağlamlığına yüngül bədən xəsarətinin yetirilməsinə və ya zərər çəkmiş şəxsə maddi zərər vurulmasına görə məsuliyyət nəzərdə tutur. Həmin Məcəllənin 338.4-cü maddəsində inzibati xətanın subyekti kimi velosipedçilər və moped idarə edən, 338.5-ci maddəsində isə at arabalarını (kirşəni) idarə edən və malqara ötürən şəxslər müəyyən olunmuşdur. Göründüyü kimi, İnzibati Xətalar Məcəlləsinin 338.7-ci maddəsində nəzərdə tutulmuş xətanın subyekti kimi skuter idarə edən şəxs nəzərdə tutulmamış, həmçinin bu maddə üzrə məsuliyyət yalnız zərər çəkmiş şəxsin sağlamlığına yüngül bədən xəsarətinin yetirilməsinə görə müəyyən olunmuşdur. Bundan əlavə, “Yol hərəkəti haqqında” Azərbaycan Respublikasının Qanununda skuterin anlayışı və onun mexaniki nəqliyyat vasitəsinə aid olub-olmaması müəyyən olunmamışdır. İnzibati Xətalar Məcəlləsinin 106.0.3-cü və 106.0.5-ci maddələrinə əsasən hakim, səlahiyyətli orqan (vəzifəli şəxs) inzibati xətalar haqqında işlərə baxarkən inzibati xəta haqqında protokol və işin digər materialları bu Məcəllənin tələblərinə müvafiq olaraq tərtib edilib-edilməməsini və mahiyyəti üzrə baxılması üçün işdə kifayət qədər sübutların toplanıb-toplanmaması məsələlərini həll edir. Həmin Məcəllənin 109.1.6-cı maddəsinə görə inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barəsində qərardad qəbul edilir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 109-cu maddəsini rəhbər tutaraq Q Ə R A R A A L D İ M: Şəxs barəsində Azərbaycan Respublikası İnzibati Xətalar Məcəlləsinin 338.7-ci maddəsi üzrə tərtib olunmuş xx.xx.2023-cü il tarixli, İXP ******* saylı inzibati xəta haqqında protokol və ona əlavə edilmiş sənədlər geri qaytarılsın. Qərardaddan şikayət verilə bilməz. Hakim Babək Pənahov