Bakı Şəhəri Nəsimi Rayon Məhkəməsi Qərar — İş №3(006)-1393/2020

Azərbaycan Respublikası adından QƏRAR Bakı şəhəri İş № 3(006)-1393/2020 07.07.2020 BAKI ŞƏHƏRİ NƏSİMİ RAYON MƏHKƏMƏSİ Hakim Tağıyev Ceyhun Əlikram oğlunun sədrliyi, Nəcəfova Gülnar Sabir qızının katibliyi, Nəsimi rayon İcra və Probasiya şöbəsinin icra məmuru X2, zərərçəkmiş şəxs X1 barəsində inzibati xəta haqqında iş üzrə icraat aparılan şəxs Şəxs iştirakı ilə, xx xxxxxx 1978-ci il tarixdə Mingəçevir şəhərində anadan olmuş, Azərbaycan Respublikasının vətəndaşı, ünvan 1 ünvanında qeydiyyatda olan və dediyinə görə Bakı şəhəri, Kürdəxanı qəsəbəsində yaşayan Şəxs barəsində Azərbaycan Respublikasının İnzibati Xətalar Məcəlləsinin 528.1ci maddəsi ilə nəzərdə tutulmuş inzibati xəta haqqında materiala baxaraq, məhkəmə MÜƏYYƏN ETDİ: Şəxs Azərbaycan Respublikasının İnzibati Xətalar Məcəlləsinin 528.1-ci maddəsi ilə nəzərdə tutulmuş inzibati xətanı törətməsinə dair inzibati xəta haqqında protokol Bakı şəhəri Nəsimi Rayon Məhkəməsinə daxil olmuşdur. İnzibati xəta haqqında protokol və ona əlavə edilmiş sənədlərdən görünür ki, Bakı şəhəri Nəsimi Rayon Məhkəməsinin 2(006)-4136/2016 saylı xx xxx 2016-cı il tarixli icra sənədinə əsasən borclu Şəxs xx.xx.2016-cı il tarixdən başlayaraq xx xxxxxx 2003-c il təvəllüdlü X5 və xx xxxxxx 2005-ci il təvəllüdlü X6 yetkinlik yaşılarına çatana qədər saxlanmaları üçün hər uşaq üçün hər ay 117 manat olmaqla cəmi 234 manat sabit pul məbləğində aliment tutularaq X3 ödənilməlidir. Bundan sonra borclu şöbəyə dəvət edilib izahatı alınmışdır. O ödənişi ödəməyə imkanının olmadığını və işləmədiyini bildirmişdir. Göstərilənlərə əsasən borclu Şəxs Azərbaycan Respublikasının İnzibati Xətalar Məcəlləsinin 528.1-ci maddəsində nəzərdə tutulmuş inzibati xətanı törətmişdir. Məhkəmə iclasında iştirak edən Bakı şəhəri Nəsimi rayon İcra və Probasiya şöbəsinin icra məmuru X7 tərtib etdiyi inzibati xəta haqqında protokolu müdafiə etmiş və əlavə olaraq izahatında göstərmişdir ki, borclu aliment borcundan 2016-cı ildən bu yana iki ay ödəniş etsə də, lakin sonra heç bir ödəniş etməmişdir. İcra sənədi borclu tərəfindən tam icra edilməmişdir. Ümumilikdə onun aliment borcu üzrə 10.764 manat məbləğində borcu qalmışdır. Həmçinin onu da bildirdi ki, tələbkarla borclu öz aralarında razılığa gələrək borclunun anasının adına olan mənzili tələbkarına adına keçirməklə borcunu ödəyəcəyini bildirsə də, sonradan həmin mənzil ümumi həyətdə yerləşdiyinə görə həyətin sahibinin də razılığı tələb olunmuş, lakin həmin şəxsin yaşının çox olması səbəbindən notariat kontoruna gedə bilməməsini əsas gətirərək mənzili borclunun adına keçirməkdən imtina etmişdir. Bütün bunlar isə bir daha təsdiq edir ki, borclu Şəxsicra sənədinin icrasından qərəzli olaraq yayınır. Göstərilənlərə əsasən borclu Şəxs barəsində qanunauyğun tədbir görülməsini məhkəmədən xahiş etdi. Məhkəmə iclasında iştirak edən barəsində inzibati iş üzrə icraat aparılan şəxs Şəxs öz izahatında bildirmişdir ki, o,borcundan iki ay ödəniş etmiş, lakin sonra maddi vəziyyəti ilə bağlı ödəniş edə bilməmişdir. Həmçinin onuda təsdiqlədi ki, o tələbkarla əvvəl razılığa gəlib ki anasının adına olan mənizili tələbkarına adına keçirmək yolu ilə öz borcunu ödəyəcəkdir. Lakin həmin mənzili başqa şəxsin adına keçirmək üçün mənzilin yerləşdiyi ümumi həyətin sahibinin razılığı lazımolduğu üçün habelə həmin şəxsin yaşı çox olduğuna görə notariat kontoruna gedə bilməməsinə görə həmin mənzili tələbkarın adına keçirə bilməmişdir. O, borcu ödəməkdən imtina etmir. Sadəcə hal-hazırda işləmədiyi üçün maddi vəziyyəti ilə bağlı olaraq borcu tam həcmdə ödəyə bilmir. Göstərilən halların nəzərə alınmasını və iş üzrə ədalətli qərar qəbul edilməsini xahiş etmişdir. Məhkəmə iclasında iştirak edən zərərçəkmiş şəxs X4 öz izahatında bildirmişdir ki, borclu qərəzli olaraq icra sənədinin icrasından yayınır. Belə ki, onun kifayət qədər imkanı olmuşdur ki, borcu ödəsin. Borclu 2016-cı ildən bu yana kimi cəmi iki ay ödəniş etsə də lakin sonra qərəzli olaraq ödəniş etməmişdir. Göstərdiklərini nəzərə alaraq, məhkəmədən ədalətli qərar çıxarılmasını xahiş etdi. Məhkəmə proses iştirakçılarını dinləyib, inzibati xəta haqqında protokolu nəzərdən keçirib, toplanmış sübutlara məcmu halda hüquqi qiymət verərək hesab edir ki, Şəxs Azərbaycan Respublikasının İnzibati Xətalar Məcəlləsinin 528.1-ci maddəsində nəzərdə tutulan əməli törətməsi tam sübuta yetirilir. İş materiallarında olan Bakı şəhəri Nəsimi Rayon Məhkəməsinin 2(006)-4131/2016 saylı xx xxx 2016-cı il tarixli icra sənədindən görünür ki, borclu Şəxs xx.xx.2016-cı il tarixdən başlayaraq xx xxxxxx 2003-c il təvəllüdlü X5 və xx xxxxxx 2005-ci il təvəllüdlü X6 yetkinlik yaşılarına çatana qədər saxlanmaları üçün hər uşaq üçün hər ay 117 manat olmaqla cəmi 234 manat sabit pul məbləğində aliment tutularaq X3 ödənilməlidir. İş materiallarında olan xx xxxx 2020-ci il tarixli, MN ******* saylı inzibati xəta haqqında protokoldan görünür ki, borclu Şəxs icra məmurunun qanuni tələblərini yerinə yetirməyərək Azərbaycan Respublikasının İnzibati Xətalar Məvəlləsinin 528.1-ci maddəsinində nəzərdə tutulan inzibati xətanı törətmişdir. İş materiallarında olan xx xxxx 2020-ci il tarixli, MN ******* saylı inzibati xəta haqqında protokola ******* № 1 saylı əlavədən görünür ki, borclu Şəxs şöbəyə dəvət edilərək izahatı alınmış, o öz izahatında imkanı olmadığından ödəniş edə bilmədiyini bildirmişdir. Borclu icra sənədinin icrasından və icra məmurunun qanuni tələblərinin yerinə yetirməkdən yayınmışdır. İş materiallarında olan Bakı şəhəri Nəsimi rayon İcra şöbəsinin Şəxs ünvanladığı xx xxxx 2016-cı il tarixli 17/706150/5 saylı tələbin könüllü icrası haqqında bildirişdən görünür ki, icra vərəqəsində göstərilən tələbi könüllü yerinə yetirməsi üçün ona xəbardarlıq edilmişdir. İş materiallarında olan Bakı şəhəri Nəsimi Rayon Məhkəməinin xx xxxxxx 2016-cı il tarixli, 8(006)-1180/2016 qərardadından görünür ki, təqdimatın təmin edilməsi xx xxxxxx 1978-ci ildə ünvan 4 ünvanında qeydiyyatda olan Şəxs ölkədən getmək hüququnun müvəqqəti olaraq məhdudlaşdırılması qərara alınmışdır. İş materiallarında olan Bakı şəhəri Nəsimi rayon İcra və probasiya şöbəsinə ünvanlanmış ərizədən görünür ki, tələbkar borclu barəsində ciddi tədbirlər görülməsini və alimentin ödənilməsinin təmin edilməsini xahiş etmişdir. Təqdim edilmiş materiallar məhkəmə iclasında araşdırılarkən müəyyən edilmişdir ki, Bakı şəhəri Nəsimi Rayon Məhkəməsinin 2(006)-4136/2016 saylı xx xxx 2016-cı il tarixli icra sənədinə əsasən borclu Şəxs xx.xx.2016-cı il tarixdən başlayaraq xx xxxxxx 2003-c il təvəllüdlü X5 və xx xxxxxx 2005-ci il təvəllüdlü X6 yetkinlik yaşılarına çatana qədər saxlanması üçün hər uşaq üçün hər ay 117 manat olmaqla cəmi 234 manat sabit pul məbləğində aliment tutularaq X3 ödənilməlidir. Qeyd edilən icra sənədinin icrası ilə əlaqədar Nəsimi rayon İcra şöbəsi tərəfindən borclu Şəxs tələbin könüllü icrası barədə bildiriş göndərilməsinə, icra şöbəsinə dəvət edilməsinə, izahatı alınmasına baxmayaraq o, icra sənədi üzrə ödəniş etməmişdir. Məhkəmə hesab edir ki, borclu Şəxs yuxarıda qeyd edilən hərəkətləri məhkəmə qərarının icrası ilə əlaqədar icra məmurunun qanuni tələblərinin yerinə yetirilməməsi və icra məmuru tərəfindən müəyyən olunmuş müddətdə icra sənədinin üzrsüz səbəbdən icra edilməməsi kimi qiymətləndirilməlidir. «Ədalət mühakiməsinin həyata keçirilməsi zamanı «İnsan hüquqlarının və əsas azadlıqların müdafiəsi haqqında» Avropa Konvensiyası müddəalarının və İnsan Hüquqları üzrə Avropa Məhkəməsinin presedentlərinin tətbiqi haqqında» Azərbaycan Respublikası Ali Məhkəməsinin xx xxxx 2006-cı il tarixli, 5 nömrəli qərarının 6-cı bəndinə əsasən mülki işlər üzrə məhkəmə baxışı müddəti iddia ərizəsinin məhkəməyə daxil olduğu vaxtdan başlayır və məhkəmə qərarının icrasının başa çatmasına kimi davam edir. «İcra haqqında» Azərbaycan Respublikası Qanununun 82.1-ci maddəsinə əsasən borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədi icra məmuru tərəfindən müəyyən olunmuş müddətdə üzrsüz səbəbdən icra olunmadıqda, icra məmuru borclunun Azərbaycan Respublikasının qanunvericiliyi ilə nəzərdə tutulmuş qaydada inzibati məsuliyyətə cəlb olunması üçün inzibati xəta haqqında protokol tərtib edir və onu işin digər materialları ilə birlikdə müvafiq məhkəməyə göndərir. Azərbaycan Respublikasının İnzibati Xətalar Məcəlləsinin 528.1-ci maddəsinə əsasən, məhkəmə və ya digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə - fiziki şəxslər beş yüz manatdan min manatadək məbləğdə cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, vəzifəli şəxslər min iki yüz manatdan iki min beş yüz manatadək məbləğdə, hüquqi şəxslər üç min manatdan beş min manatadək məbləğdə cərimə edilir. Həmin Məcəllənin 3-cü maddəsinə əsasən, yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 9.1-ci maddəsinin tələbinə görə, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. Həmin Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Məhkəmə Şəxs barəsində inzibati tənbeh tətbiq edərkən onun törətdiyi inzibati xətanın xarakterini və ictimai təhlükəlilik dərəcəsini, inzibati xəta törədən şəxsin şəxsiyyətini, onun əmlak vəziyyətini, o cümlədən Azərbaycan Respublikasının İnzibati Xətalar Məcəlləsinin 32 və 33-cü maddələrində nəzərdə tutulmuş məsuliyyəti yüngülləşdirən və ağırlaşdıran halları nəzərə alır. Şəxs əməlində Azərbaycan Respublikasının İnzibati Xətalar Məcəlləsinin 32 və 33cü maddələri ilə nəzərdə tutulmuş məsuliyyəti yüngülləşdirən və ağırlaşdıran hallar müəyyən edilməmişdir. Məhkəmə Şəxs törətdiyi inzibati xətanın hallarını nəzərə alaraq hesab edir ki, onun barəsində Azərbaycan Respublikası İnzibati Xətalar Məcəlləsinin 528.1-ci maddəsinin sanksiyasında nəzərdə tutulmuş həbs növündə inzibati tənbeh tədbirinin tətbiq edilməsi məqsədəmüvafiqdir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 21, 43, 106-112, 114.1.1, 115.1, 115.5, 117, 128.2.1, 130.1 və 528.1-ci maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikasının İnzibati Xətalar Məcəlləsinin 528.1-ci maddəsi ilə təqsirli bilinərək barəsində 10 (on) gün müddətində inzibati həbs tətbiq edilsin. İnzibati həbs haqqında qərar dərhal icra edilsin. İnzibati həbsdə saxlamanın əvvəli xx xxxx 2020-ci il tarixdən saat 12:00-dan hesablansın. Şəxs Azərbaycan Respublikası Daxili İşlər Nazirliyi tərəfindən müəyyən edilən yerdə mühafizə altında saxlanılsın. Qərarın icrası Bakı şəhəri Nəsimi Rayon Polis İdarəsinə və Bakı şəhəri Nəsimi rayon İcra və probasiya şöbəsinə həvalə edilsin. Qərardan, surəti təqdim edildiyi və ya alındığı vaxtdan 10 (on) gün muddətində Bakı şəhəri Nəsimi Rayon Məhkəməsi vasitəsi ilə Bakı Apellyasiya Məhkəməsinə apelyasiya şikayəti verilə bilər. Sədrlik edən Hakim: Ceyhun Tağıyev