Bakı Şəhəri Nəsimi Rayon Məhkəməsi Qərar — İş №3(006)-1574/2025

Azərbaycan Respublikası adından QƏRAR Bakı şəhəri İş № 3(006)-1574/2025 14.03.2025 BAKI ŞƏHƏRİ NƏSİMİ RAYON MƏHKƏMƏSİ Hakim Mustafayeva Solmaz Rafael qızının sədrliyi, məhkəmə iclas katibi X1 qızının katibliyi, Nəsimi rayon prokurorunun köməkçisi X8, zərər çəkmiş şəxs X2 və barəsində inzibati xəta haqqında iş üzrə icraat aparılan şəxs Şəxs iştirakları ilə xx.xx.1975-ci ildə Bakı şəhərində anadan olmuş, Azərbaycan Respublikasının vətəndaşı, subay, orta təhsilli, işləməyən, ünvan 1 ünvanında qeydiyyatda olan, Şəxs barəsində Bakı şəhəri Nəsimi Rayon Prokurorluğundən daxil olmuş inzibati xəta haqqında işə açıq məhkəmə iclasında baxaraq, MÜƏYYƏN ETDİ: İnzibati xəta haqqında materialdan görünür ki, Şəxs xx.xx.2025-ci il tarixdə, ünvan 3 ünvanında yerləşən “Sofiya” şadlıq sarayının qarşısında aralarında yaranmış mübahisə zamanı bacısı X3 əl zərbələri ilə döyərək və sair zorakı hərəkətlər edərək sonuncuya qəsdən fiziki ağrı yetirmişdir. Nəticədə Şəxs tərəfindən Azərbaycan Respublikası İXM-in 157-ci maddəsində nəzərdə tutulmuş inzibati xəta törədilmişdir. Məhkəmə iclasında Bakı şəhəri Nəsimi rayon prokurorunun köməkçisi X11 bildirmişdir ki, Şəxs xx.xx.2025-ci il tarixdə, ünvan 3 ünvanında yerləşən “Sofiya” şadlıq sarayının qarşısında aralarında yaranmış mübahisə zamanı bacısı X3 əl zərbələri ilə döyərək və sair zorakı hərəkətlər edərək sonuncuya qəsdən fiziki ağrı yetirmişdir. Göstərilənlərə əsasən Şəxs Azərbaycan Respublikası İXM-nin 157-ci maddəsi ilə inzibati məsuliyyətə cəlb edilməsini məhkəmədən xahiş etdi. Məhkəmə iclasında barəsində inzibati xəta haqqında iş üzrə icraat aparılan Şəxs özünü təqsirli bilməyərək izahatında bildirmişdir ki, xx.xx.2025-ci il tarixdə saat 19:30 radələrində qızı ilə birlikdə evə gedən zaman ünvan 3 ünvanında yerləşən “Sofiya” şadlıq sarayının qarşısında bacısı Tamella və Aidə ilə rastlaşmış, bu zaman aralarında mübahisə baş vermiş, Tamella onun qızına qarşı nalayiq ifadə işlətdiyi üçün, o əsəbləşərək Tamellanın üz və boyun nahiyəsindən əli ilə tutub itələmişdir. Lakin, o X4 döyməmiş, sonuncuya hər hansı xəsarət yetirməmişdir. Qeyd etdiklərinin nəzərə alınaraq iş üzrə icraata xitam verilməsini xahiş etdi. Məhkəmə iclasında zərər çəkmiş şəxs X5 izahatında bildirmişdir ki, xx.xx.2025-ci il tarixdə saat 19:30 radələrində bacısı Aidə və digər bacısı Xatirə ilə birlikdə ünvan 3 ünvanında yerləşən “Sofiya” şadlıq sarayının qarşısından Şamaxinka istiqamətində gedərkən bacısı Şəxs və onun qızı Məryəm ilə rastlaşmışlar. Bu zaman aralarında yaranmış mübahisə zamanı Afaq onun üzərinə hücum çəkərək mobil telefon ilə baş nahiyəsinə bir neçə dəfə vurmuş, saçını yolmuş, qarın nahiyəsinə yumruqla vuraraq onu döymüşdür. O, Şəxs şikayətçidir və onun barəsində inzibati tənbeh tədbirinin tətbiq edilməsini məhkəmədən xahiş etdi. Məhkəmə iclasında şahid qismində dindirilmiş X6 bildirmişdir ki, xx.xx.2025-ci il tarixdə saat 19:30 radələrində bacısı Tamella və digər bacısı Xatirə ilə birlikdə ünvan 3 ünvanında yerləşən “Sofiya” şadlıq sarayının qarşısından Şamaxinka istiqamətində gedərkən bacısı Şəxs və onun qızı Məryəm ilə rastlaşmışlar. Bu zaman aralarında yaranmış mübahisə zamanı Afaq bacısı Tamellanın üzərinə hücum çəkərək mobil telefon ilə baş nahiyəsinə bir neçə dəfə vurmuş, saçını yolmuş, qarın nahiyəsinə yumruqla vuraraq Tamellanı döymüşdür. İş materiallarına əlavə edilmiş “İnzibati xəta haqqında iş üzrə icraatın başlanması haqqında” 14 mart 2025-ci il tarixli qərardan görünür ki, Şəxs barəsində Azərbaycan Respublikasının İXM-nin 157-ci maddəsi ilə inzibati xəta haqqında iş üzrə icraat başlanması qərara alınmışdır. İş materiallarına əlavə edilmiş Azərbaycan Respublikası Səhiyyə Nazirliyi “Məhkəmə- Tibbi Ekspertiza və X9” X15 xx.xx.2025-ci il tarixli, 13 saylı rəyindən görünür ki, X2 bədən səthində aşkar olunmuş xəsarətlər-sol bazu nahiyəsinin qançırı, hər iki yanaq və boyun nahiyəsinin sıyrıqları küt əşyanın (əşyaların) təsirindən müayinədən 1-2 gün əvvəl əmələ gəlmişdirlər, qərarın təsviri hissəsində göstərilən xx.xx.2025-ci il tarixdə əmələ gələ bilərdilər, həm ümumilikdə və həm də ayrı-ayrılıqda sağlamlığa zərə vurmayan xəsarətlərə aid edildiyindən dərəcələri təyin edilmir. X2 bədən səthində aşkar edilmiş xəsarətin xarakterini və lokalizasiyasına əsasən demək olar ki, həmin xəsarətlərin qərarın təsviri hissəsində göstərilən şəraitdə əmələ gəlmələri istisna olunmur. Məhkəmə inzibati xəta haqqında materialları araşdırıb, tərəfləri dinləyib hesab edir ki, Şəxs Azərbaycan Respublikasının İnzibati Xətalar Məcəlləsinin 157-ci maddəsində nəzərdə tutulmuş inzibati xətanı törətməsi tam sübuta yetir, ona görə də o, inzibati məsuliyyətə cəlb edilməlidir. Məhkəmə, barəsində inzibati xəta haqqında iş üzrə icraat aparılan şəxs Şəxs törətdiyi əməli etiraf etməməsi barədə izahatını inandırıcı hesab etmir və həmin izahatın inzibati məsuliyyətdən yaxa qurtarmaq məqsədilə verilməsi nəticəsinə gəlir. Azərbaycan Respublikasının İnzibati Xətalar Məcəlləsinin 157-ci maddəsinə əsasən döymə və sair zorakı hərəkətlərlə qəsdən fiziki ağrı yetirməyə görə - üç yüz manatdan beş yüz manatadək məbləğdə cərimə edilir və ya işin hallarına görə, xətanı törədənin şəxsiyyəti nəzərə alınmaqla, iki ayadək müddətə inzibati həbs tətbiq olunur. Həmin Məcəllənin 3-cü maddəsinə əsasən, yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 9.1-ci maddəsinin tələbinə görə, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. Həmin Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Həmin Məcəllənin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edərkən xətanın xarakterini, inzibati xəta törədən şəxsin şəxsiyyətini, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə iclasında Şəxs məsuliyyətini yüngülləşdirən və ağırlaşdıran hallar müəyyən edilməmişdir. Məhkəmə Şəxs şəxsiyyətini, törədilmiş inzibati xətanın xarakterini və iş üzrə olan digər halları nəzərə alaraq onun barəsində Azərbaycan Respublikasının İnzibati Xətalar Məcəlləsinin 157-ci maddəsinin sanksiyasında nəzərdə tutulmuş inzibati cərimə növündə inzibati tənbeh edilməsini məqsədəmüvafiq hesab edir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 114, 117, 128-130-cu maddələrini rəhbər tutaraq QƏRARA ALDİ: Şəxs Azərbaycan Respublikası İnzibati Xətalar Məcəlləsinin 157-ci maddəsi ilə nəzərdə tutulan inzibati xətanı törətməkdə təqsirli bilinərək 300 (üç yüz) manat inzibati cərimə edilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı şəhəri Nəsimi Rayon Məhkəməsi vasitəsi ilə və ya bilavasitə Bakı Apellyasiya Məhkəməsinə apellyasiya şikayəti və ya protesti verilə bilər. Sədrlik edən Solmaz Mustafayeva