Bakı Şəhəri Nəsimi Rayon Məhkəməsi Qərar — İş №3(006)-1844/2021

Azərbaycan Respublikası adından QƏRAR Bakı şəhəri İş № 3(006)-1844/2021 22.07.2021 BAKI ŞƏHƏRİ NƏSİMİ RAYON MƏHKƏMƏSİ Hakim: Pənahov Babək Əkbər oğlunun sədrliyi Məhkəmə iclasının katibi: X2 İnzibati xəta haqqında protokolu X1 tərtib etmiş şəxs: Zərər çəkmiş şəxs: Zərərçəkmiş şəxs Barəsində inzibati xəta haqqında Şəxs iş üzrə icraat aparılan şəxs: iştirakları ilə xx.xx.1988-ci ildə Ağdam rayonunda anadan olmuş, Azərbaycan Respublikasının vətəndaşı (FİN: xxxxxxx), evli, orta təhsilli, işləməyən, Ağdam şəhəri, Nizami küçəsi, ev 30, mənzil 14-də qeydiyyatda olan, Bakı şəhəri, Nəsimi rayonu, İ.Həmidov küçəsi, ev 48, mənzil 02-də yaşayan Şəxs barəsində Azərbaycan Respublikası İnzibati Xətalar Məcəlləsinin 227-ci maddəsi üzrə tərtib olunmuş 21 iyul 2021-ci il tarixli, MN ******* saylı inzibati xəta haqqında protokola və ona əlavə edilmiş sənədlərə açıq məhkəmə iclasında baxaraq məhkəmə M Ü Ə Y Y Ə N E T D İ: Şəxs 20.07.2021-ci il tarixdə, saat 03 radələrində ünvan 1 ünvanda Zərərçəkmiş şəxs məxsus 300 manat dəyərində kondisioner aqreqatını oğurlamışdır. İnzibati xəta haqqında protokolu tərtib etmiş Bakı şəhəri Nəsimi Rayon Polis İdarəsinin 21-ci polis bölməsinin sahə inspektoru X3 izahatında göstərdi ki, Zərərçəkmiş şəxs şikayəti əsasında aparılmış araşdırma nəticəsində məlum olmuşdur ki, Şəxs 20.07.2021-ci il tarixdə, gecə saat 03 radələrində ünvan 1 ünvanda Zərərçəkmiş şəxs məxsus 300 manat dəyərində kondisioner aqreqatını oğurlamışdır. Onu da qeyd edir ki, Şəxs barəsində hal-hazırda oxşar əməllərlə bağlı bir neçə araşdırma materialları var. Şəxs inzibati məsuliyyətə cəlb edilməsini xahiş edir. Məhkəmə iclasında zərər çəkmiş şəxs Zərərçəkmiş şəxs izahatında göstərdi ki, ünvan 1 ünvanda yerləşən obyektdə səsyazma studiyasının sahibi olaraq faaliyyət göstərir. Həmin obyektdə şəxsi vəsaiti hesabına “Elenberg” markalı kondisioner alaraq quraşdırmış, onun aqreqat hissəsi bayırda yerləşdirilmişdir. 20.07.2021-ci il tarixdə, saat 02:30-dək işdə olmuş, həmin günü axşam saat 18 radələrində obyektə gəldiyi zaman kondisionerin aqreqat hissəsinin yerində olmadığını görmüşdür. Ona 300 manat dəyərində ziyan vurulmuşdur. Əmlakı qaytarılsa da, Şəxs şikayətçidir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs izahat verərək göstərdi ki, 19.07.2021-ci il tarixdə, saat 23 radələrində evdən çıxaraq yaşadığı ünvanın qarşısında gəzmiş, sonra da Azadlıq prospekti istiqamətində gəzərək vaxtının keçirmişdir. 20.07.2021-ci il tarixdə, saat 03 radələrində H.Sarabski küçəsinə doğru dönmüş və yolun sol tərəfində bir yeraltından giriş-çıxışı olan, çöldən də heç bir reklam və yazısı olmayan bir yerə gözü sataşmış, bayırda quraşdırılan kondisionerin aqreqatını görmüşdür. Pandemiya ilə əlaqədar uzun müddət işsiz qaldığı üçün həmin aqreqatı oğurlamaq qərarına gəlmişdir. Bundan sonra onu söküb belində daşıyaraq yaşadığı ünvanın yaxınlığında gizlətmiş, həmin günü saat 12 radələrində taksi ilə “Laçın” univermağına gedərək bu malı tanımadığı şəxsə 110 manata satmışdır. Əldə etdiyi pula uşaqlarını parka aparıb gəzdirmiş, qalan vəsaitə isə evinə ərzaq almışdır. İİİ qrup əlildir. Məhkəmə, proses iştirakçılarının izahatlarını dinləyib, habelə iş materiallarını araşdırıb hesab edir ki, Şəxs tərəfindən Azərbaycan Respublikası İnzibati Xətalar Məcəlləsinin 227-ci maddəsində nəzərdə tutulmuş inzibati xətanın törədilməsi tam sübuta yetirilir. Buna görə də o, həmin maddə ilə təqsirli bilinərək inzibati məsuliyyətə cəlb edilməlidir. Azərbaycan Respublikası İnzibati Xətalar Məcəlləsinin 227-ci maddəsi xırda talama, yəni oğurlama, mənimsəmə, israfçılıq, qulluq mövqeyindən sui-istifadə və ya dələduzluq yolu ilə özgəsinin əmlakını talamağa görə məsuliyyət müəyyən edir. Həmin maddənin “Qeyd” hissəsinə görə talanmış əmlakın dəyəri beş yüz manatdan yuxarı olmadıqda, bu, xırda talama hesab edilir. İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 9.1-ci maddəsinin tələbinə görə inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. Həmçinin bu Məcəllənin 84-cü maddəsinə görə inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. İnzibati Xətalar Məcəlləsinin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə iclasında Şəxs məsuliyyətini yüngülləşdirən və ağırlaşdıran hallar müəyyən edilmədi. Beləliklə, məhkəmə Şəxs törətdiyi inzibati xətanın xarakterini, onun şəxsiyyətini, əmlak vəziyyətini və s. halları nəzərə alaraq hesab edir ki, ona İnzibati Xətalar Məcəlləsinin 227-ci maddəsinin sanksiyasında nəzərdə tutulan inzibati həbs növündə tənbeh tədbiri tətbiq edilməli, bu zaman həmin Məcəllənin 30.2 və 31.4-cü maddələrinin tələbləri nəzərə alınmalıdır. Eyni zamanda iş materiallarında olan inzibati qaydada tutma haqqında protokoldan görünür ki, Şəxs 21.07.2021-ci il tarixdə, saat 15:00-da tutulmuşdur. İnzibati Xətalar Məcəlləsinin 30.3-cü maddəsinə görə inzibati qaydada tutma müddəti inzibati həbs müddətinə daxil edilir. Göstərilənləri nəzərə alaraq və Azərbaycan Respublikası İnzibati Xətalar Məcəlləsinin 40-cı, 43-cü, 48-50-ci, 114-115-ci və 128-130-cu maddələrini rəhbər tutaraq məhkəmə Q Ə R A R A A L D İ: Şəxs Azərbaycan Respublikası İnzibati Xətalar Məcəlləsinin 227-ci maddəsində nəzərdə tutulmuş əməli törətməkdə təqsirli bilinsin və ona 25 (iyirmi beş) gün müddətinə inzibati həbs tətbiq edilsin. İnzibati həbs müddətinin əvvəli 21 iyul 2021-ci il tarixdən, saat 15:00-dan hesablansın. Qərarın icrası Bakı şəhər Nəsimi Rayon Polis İdarəsinin 21-ci polis bölməsinə və Daxili İşlər Nazirliyinə bilavasitə tabe olan İnzibati həbs olunanların saxlanılma mərkəzinə həvalə edilsin. Qərardan, onun surəti rəsmi qaydada verildiyi vaxtdan 10 (on) gün müddətində Bakı şəhəri Nəsimi Rayon Məhkəməsi vasitəsilə Bakı Apellyasiya Məhkəməsinə şikayət verilə bilər. Hakim Babək Pənahov