Bakı Şəhəri Nəsimi Rayon Məhkəməsi Qərardad — İş №3(006)-1870/2022

Azərbaycan Respublikası adından QƏRARDAD Bakı şəhəri İş № 3(006)-1870/2022 24.05.2022 BAKI ŞƏHƏRİ NƏSİMİ RAYON MƏHKƏMƏSİ Mən, Bakı şəhəri Nəsimi Rayon Məhkəməsinin hakimi Pənahov Babək Əkbər oğlu, Bakı şəhəri Nəsimi rayon İcra şöbəsinin icra məmuru tərəfindən Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi üzrə tərtib olunmuş 24.05.2022-ci il tarixli, MN ******* saylı inzibati xəta haqqında protokolu və ona əlavə edilmiş sənədləri məhkəmə iclasında baxılmağa hazırlayarkən MÜƏYYƏN ETDİM: Barəsində icraat aparılan şəxs Şəxs hazırda anlaqlı olub-olmaması şübhə altındadır. Belə ki, Bakı Baş Səhiyyə İdarəsinin 5 saylı şəhər poliklinikası tərəfindən verilmiş 04.01.2021-ci il tarixli arayışa əsasən Şəxs 2011-cu ildən “Baş beyin üzvi xəstəliyi nəticəsində kəskin nəzərəçarpan şəxsiyyət dəyişiklikləri (F 06.9)” diaqnozu ilə qeydiyyatdadır. Göstərilən məqam icra məmuru tərəfindən araşdırılmamış, barəsində icraat aparılan şəxsin hazırkı vəziyyəti, onun anlaqlı olub-olması dəqiqləşdirilmədən barəsində inzibati xəta haqqında protokol tərtib olunmuş və məsuliyyətə cəlb edilməsi məqsədilə baxılması üçün məhkəməyə təqdim edilmişdir. Halbuki, Azərbaycan Respublikası İnzibati Xətalar Məcəlləsinin 15-ci maddəsinə görə hüquqazidd əməl (hərəkət və ya hərəkətsizlik) törədən zaman şəxs anlaqsız vəziyyətdə olduqda, yəni xroniki psixi xəstəlik, psixi fəaliyyətin müvəqqəti pozulması, kəmağıllıq və ya başqa psixi xəstəlik nəticəsində öz əməlinin faktiki xarakterini və ictimai təhlükəliliyini dərk etmək və ya onu idarə etmək iqtidarında olmadıqda o, inzibati məsuliyyətə cəlb edilmir. Azərbaycan Respublikası İnzibati Xətalar Məcəlləsinin 109.1.6-cı maddəsinə görə inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə qərardad qəbul edilir. Beləliklə hesab edirəm ki, təqdim edilmiş materiallar natamam olduğundan və onu işə baxılarkən tamamlamaq mümkün olmadığındamn, inzibati xəta haqqında protokol onu tərtib etmiş orqana geri qaytarılmalıdır. Göstərilənlərə əsasən və Azərbaycan Respublikası İnzibati Xətalar Məcəlləsinin 109cu maddəsini rəhbər tutaraq QƏRARA ALDİM: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi üzrə tərtib olunmuş 24.05.2022-ci il tarixli, MN ******* saylı inzibati xəta haqqında protokol və ona əlavə edilmiş sənədlər geri qaytarılsın. Hakim Babək Pənahov