Bakı Şəhəri Nəsimi Rayon Məhkəməsi Qərar — İş №3(006)-2146/2022

Azərbaycan Respublikası adından QƏRAR Bakı şəhəri İş № 3(006)-2146/2022 16.06.2022 BAKI ŞƏHƏRİ NƏSİMİ RAYON MƏHKƏMƏSİ Hakim: Pənahov Babək Əkbər oğlunun sədrliyi Məhkəmə iclasının katibi: X3 İnzibati xəta haqqında 19-cu polis şöbəsinin sahə inspektoru protokolu tərtib etmiş şəxs: X5 Barəsində icraat aparılan şəxs: Şəxs iştirakları ilə xx.xx.1994-cü il tarixdə Masallı rayonu, Sərçuvar kəndində anadan olmuş, Azərbaycan Respublikasının vətəndaşı (FİN: xxxxxxx), evli, Masallı rayonu, Sərçuvar kəndində qeydiyyatda olan Şəxs barəsində Azərbaycan Respublikası İnzibati Xətalar Məcəlləsinin 535.1-ci maddəsi üzrə tərtib olunmuş xx.xx.2022-ci il tarixli, MN ******* saylı inzibati xəta haqqında protokola və ona əlavə edilmiş sənədlərə açıq məhkəmə iclasında baxaraq məhkəmə M Ü Ə Y Y Ə N E T D İ: Şəxs polis əməkdaşının qanuni tələblərinə tabe olmayaraq nalayiq sözlərdən istifadə edərək tabesizlik göstərmişdir. Məhkəmə iclasında inzibati xəta haqqında protokolu tərtib etmiş şəxs Bakı şəhəri Nəsimi Rayon Polis İdarəsinin 19-cu polis şöbəsinin sahə inspektoru X7 izahat verərək göstərdi ki, X1 “102" xidmətinə zəng edərək və sonuncunun həyat yoldaşı X2 polis şöbəsinə müraciət edərək bildirmişlər ki, yaşadıqları Bakı şəhəri, Nəsimi rayonu, R.Məmmədov küçəsi, ev 15, mənzil 13-ün yaxınlığında “059” adı ilə fəaliyyət göstərən çay evini işlədən Ruslan adlı şəxsə obyektə yerləşdirdiyi mavi sayrışan işıqların ətrafdakıları və onları narahat etməsini nəzərə alaraq aradan qaldırması barədə dəfələrlə xəbərdarlıq etsələr də, Ruslan buna məhəl qoymamışdır. Bu səbəbdən də məsələnin həllini xahiş edirlər. Bununla əlaqədar izahatının alınması üçün Şəxs dəfələrlə şöbəyə dəvət edilməsinə baxmayaraq, nalayiq ifadələrdən istifadə edərək heç nədən qorxmadığını bildirmiş və gəlməkdən imtina etmişdir. Bu səbəbdən də özü şəxsən həmin şəxsin fəaliyyət göstərdiyi obyektə gedərək onu bir daha izahat vermək üçün dəvət etmiş, lakin Ruslan yenə də itaətsizlik göstərərək onun ünvanına nəlayiq ifadələr işlədərək heç yerə getməyəcəyini bildirmiş, eyni zamanda obyektin başqa şəxs tərəfindən işlətdiyini desə də, bu şəxsin kim olduğunu söyləməmişdir. Ona gör də o, hadisə yerinə əlavə polis əməkdaşlarını dəvət edib onların köməkliyi ilə onu 19-cu polis şöbəsinə gətirmişdir. Şöbədə olarkən Şəxs öz hərəkətlərini davam etdirmiş, ona hədə-qorxu gələrək işdən çıxartdıracağını söyləyərək izahat verməkdən imtina etmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs izahat verərək göstərdi ki, qeyd olunan çay evini artıq işlətmir, həmin obyektin fəaliyyətinə görə o, məsuliyyət daşımır. Hadisə ilə bağlı polis əməkdaşı ona zəng etdikdə qeyd olunanları eynilə bildirmiş, eyni zamanda obyektin fəaliyətinə görə məsul olan şəxsi məlumatlandırıb aidiyyəti olaraq polis əməkdaşlarına yönləndirəcəyini söyləmişdir. Lakin polis əməkdaşı prinsip olaraq onu şöbəyə dəvət etməyə davam etmiş, o da məsələ ilə heç bir aidiyyəti olmadığından gəlməkdən imtina etmişdir. O, heç bir qanun pozuntusuna yol verməmişdir. Məhkəmə proses iştirakçılarının izahatlarını dinləyib, iş materiallarını araşdırıb hesab edir ki, Şəxs tərəfindən Azərbaycan Respublikası İnzibati Xətalar Məcəlləsinin 535.1-ci maddəsində nəzərdə tutulmuş inzibati xətanın törədilməsi tam sübuta yetirilir. Buna görə də o, həmin maddə ilə təqsirli bilinərək inzibati məsuliyyətə cəlb edilməlidir. Azərbaycan Respublikası İnzibati Xətalar Məcəlləsinin 535.1-ci maddəsi polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə məsuliyyət müəyyən edir “Polis haqqında” Azərbaycan Respublikası Qanununun 7-ci maddəsinin İİ hissəsinə görə Azərbaycan Respublikasının ərazisində olan bütün hüquqi və fiziki şəxslər polis əməkdaşının qanuni tələblərini icra etməlidirlər. Həmin Qanunun 17-ci maddəsinin 1-ci bəndinə görə hər bir şəxsdən cinayətlərə və digər hüquqpozmalara, şəxsiyyət və ictimai asayiş üçün təhlükə törədən və onlara şərait yaradan hərəkətlərə son qoyulmasını tələb etmək polis əməkdaşının hüququdur. Azərbaycan Respublikası İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 9.1-ci maddəsinin tələbinə görə inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. Həmçinin bu Məcəllənin 84-cü maddəsinə görə inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. İnzibati Xətalar Məcəlləsinin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. İnzibati xəta haqqında işə baxılarkən Şəxs məsuliyyətini yüngülləşdirən və ya ağırlaşdıran hallar müəyyən edilmədi. Beləliklə, məhkəmə Şəxs törətdiyi inzibati xətanın xarakterini, onun şəxsiyyətini, əmlak vəziyyətini və s. halları nəzərə alaraq hesab edir ki, ona İnzibati Xətalar Məcəlləsinin 535.1-ci maddəsinin sanksiyasında nəzərdə tutulan inzibati həbs növündə tənbeh tədbiri tətbiq edilməlidir. Eyni zamanda iş materiallarında olan inzibati qaydada tutma haqqında protokoldan görünür ki, Şəxs xx.xx.2022-ci il tarixdə, saat 12:45-də tutulmuşdur. İnzibati Xətalar Məcəlləsinin 30.3-cü maddəsinə görə inzibati qaydada tutma müddəti inzibati həbs müddətinə daxil edilir. Göstərilənləri nəzərə alaraq və Azərbaycan Respublikası İnzibati Xətalar Məcəlləsinin 40-cı, 43-cü, 48-50-ci, 114-115-ci və 128-130-cu maddələrini rəhbər tutaraq məhkəmə Q Ə R A R A A L D İ: Şəxs Azərbaycan Respublikası İnzibati Xətalar Məcəlləsinin 535.1-ci maddəsində nəzərdə tutulmuş əməlin törədilməsində təqsirli bilinsin və ona 10 (on) gün müddətinə inzibati həbs tətbiq edilsin. İnzibati həbs müddətinin əvvəli 16 iyun 2022-ci il tarixdən, saat 12:45-dən hesablansın. Qərarın icrası Bakı şəhər Nəsimi Rayon Polis İdarəsinin 19-cu polis şöbəsinə və Daxili İşlər Nazirliyinə bilavasitə tabe olan İnzibati həbs olunanların saxlanılma mərkəzinə həvalə edilsin. Qərardan, onun surəti rəsmi qaydada verildiyi vaxtdan 10 (on) gün müddətində Bakı şəhəri Nəsimi Rayon Məhkəməsi vasitəsilə Bakı Apellyasiya Məhkəməsinə şikayət verilə bilər. Hakim Babək Pənahov