Bakı Şəhəri Nəsimi Rayon Məhkəməsi Qərar — İş №3(006)-2261/2024

Azərbaycan Respublikası adından QƏRAR Bakı şəhəri İş № 3(006)-2261/2024 05.06.2024 BAKI ŞƏHƏRİ NƏSİMİ RAYON MƏHKƏMƏSİ Hakim Mustafayeva Solmaz Rafael qızının sədrliyi, məhkəmə iclas katibi Fərəcova Təranə Aydın qızının katibliyi, Bakı şəhər Nəsimi Rayon Polis İdarəsinin 20-ci polis şöbəsinin polis sahə inspektoru, polis mayoru X3, barəsində inzibati xəta haqqında iş üzrə icraat aparılan şəxs Rahimi Amirrezanin və tərcüməçi X1 iştirakları ilə xx.xx.2001-ci il tarixdə İran İslam Respublikasında anadan olmuş, İran İslam Respublikasının vətəndaşı, natamam ali təhsilli, tələbə, subay, Bakı şəhəri, Nəsimi rayonu, Bakıxanov prospekti 37, ADNSU-nun yataqxanası, otaq 434 ünvanında yaşayan Rahimi Amirrezanin Azərbaycan Respublikasının İnzibati Xətalar Məcəlləsinin 510 və 535.1-ci maddələri ilə nəzərdə tutulmuş inzibati xətanı törətməsinə dair inzibati xəta haqqında materiala açıq məhkəmə iclasında baxaraq MÜƏYYƏN ETDİ: Bakı şəhər Nəsimi Rayon Polis İdarəsinin 20-ci polis şöbəsinin polis sahə inspektoru, polis mayoru X5 tərəfindən Rahimi Amirreza barəsində Azərbaycan Respublikasının İnzibati Xətalar Məcəlləsinin 510 və 535.1-ci maddələrində nəzərdə tutulmuş inzibati xətaların törədilməsinə dair protokol tərtib edilmişdir ona görə ki, Rahimi Amirreza xx.xx.2024-cü il tarixdə Bakı şəhəri, Nəsimi rayonu, Azadlıq 97 ünvanında yerləşən “Koala” park yaxınlığında Şahid qarşı qeyri-etik hərəkətlər etməklə ictimai qaydanı pozmuş və polis əməkdaşlarının qanuni tələblərini yerinə yetirməmişdir. Məhkəmə iclasında inzibati protokolu tərtib etmiş şəxs Bakı şəhər Nəsimi Rayon Polis İdarəsinin 20-ci polis şöbəsinin polis sahə inspektoru, polis mayoru X5 izahatında göstərmişdir ki, xx.xx.2024-cü il tarixdə Şahid Bakı şəhəri, Nəsimi rayonu, Azadlıq 97 ünvanında yerləşən “Koala” parkı yaxınlığında tanımadığı xarici vətəndaş tərəfindən təhqir olunması və ona qarşı qeyri-etik hərəkətlər edilməsi barədə ərizəsi daxil olmuşdur. Həmin gün saat 19-20 radələrində qeyd olunan ünvanda xidmət apararkən xarici vətəndaş Rahimi Amirrezaya yaxınlaşaraq ondan çikayət daxil olduğunu izah etmək istəyərkən sonuncu tabesizlik edərək özünü təqdim etməkdən imtina etmişdir. Daha sonra yüksək səslə nalayiq ifadələrlə onların ünvanlarına söyüşlər söymüşdür. Sonra həmin şəxs xidməti avtomobilə əyləşdirilmiş və 20-ci PŞ-nə gətirilmişdir. Şöbədə aparılan İlkin araşdırma zaman məlum olmuşdur ki, həmin şəxs İran İslam Respublikasının vətəndaşı xx.xx.2001-ci il təvəllüdlü Rahimi Amirrezadır. Göstərilənləri nəzərə alaraq, Rahimi Amirrezanın barəsində müvafiq inzibati tənbeh tədbirinin tətbiq edilməsini məhkəmədən xahiş etmişdir. Məhkəmə iclasında barəsində inzibati xəta haqqında iş üzrə icraat aparılan şəxs Rahimi Amirreza özünü təqsirli bilərək izahatında göstərmişdir ki, xx.xx.2024-cü il tarixdə Bakı şəhəri, Nəsimi rayonu, Azadlıq prospektində yerləşən “Koala” parkda olduğu zaman bir nəfər qadını görmüş və ondan xoşu gəldiyi üçün yaxınlaşıb tanış olmaq istəmiş, lakin həmin qadın etiraz etdiyi üçün aralarında mübahisə baş vermişdir. Daha sonra polis əməkdaşları tərəfində saxlanıldığı zaman onların qanuni tələblərinə tabe olmayaraq ingilis dilində nalayiq ifadələr işlətmişdir. Bundan sonra polis əməkdaşları onu 20-ci PŞ-nə aparmışlar. Əməlindən peşmandır, bir daha belə hərəkət etməyəcəyinə söz verir. Məhkəmədən ona yüngül cəza verilməsini xahiş etmişdir. Məhkəmə iclasında şahid qismində dindirilmiş Şahid zahatında göstərmişdir ki, xx.xx.2024-cü il tarixdə Bakı şəhəri, Nəsimi rayonu ərazisində olan “MEM” mağazasına gəlmiş və avtomobilini Mirəli Qaşqay küçəsində 11016 parkinqində saxlamışdır. Parkinqə qoşulmağı unudub mağazaya girmişdir. Bir müddət sonra çölə çıxmış və xarici vətəndaşı görmüşdür. Həmin vaxt azparkinqin işçisi ilə danışarkən həmin şəxs onun yanından keçmişdir. Düşünmüşdür ki, həmin şəxs çıxıb getmiş, lakin o, mağazaya təkrar girmək istəyərkən xarici vətəndaş arxadan ona yaxınlaşaraq xarici dildə bir söz demişdir. Ona ingilis dilində başa düşmədiyini deyən zaman həmin şəxs ona Azərbaycan dilində onunla tanış olmaq istədiyini demişdir. Sonra xarici vətəndaş onunla yenə ingilis dilində danışaraq təkidlə onun telefon nömrəsini istəmişdir. Həmin şəxs hətta telefonunun ekranını açıq halda ona uzadarkən o da həyəcanlanaraq şirniyyat mağazasına qaçıb girmişdir. İş materiallarında olan inzibati qaydada tutma haqqında xx.xx.2024-cü il tarixli protokoldan görünür ki, Rahimi Amirreza xx.xx.2024-cü il tarixdə saat 20:00-da inzibati qaydada tutulmuşdur. Azərbaycan Respublikası İXM-nin 510-cu maddəsi xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə, 535.1-ci maddəsi isə polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə məsuliyyət müəyyən edir. “Polis haqqında” Azərbaycan Respublikası Qanununun 7-ci maddəsinin İİ hissəsinə görə Azərbaycan Respublikasının ərazisində olan bütün hüquqi və fiziki şəxslər polis əməkdaşının qanuni tələblərini icra etməlidirlər. Həmin Qanunun 17-ci maddəsinin 1-ci bəndinə görə hər bir şəxsdən cinayətlərə və digər hüquqpozmalara, şəxsiyyət və ictimai asayiş üçün təhlükə törədən və onlara şərait yaradan hərəkətlərə son qoyulmasını tələb etmək polis əməkdaşının hüququdur. Azərbaycan Respublikasının İXM-nin 3-cü maddəsinə əsasən, yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 9.1-ci maddəsinin tələbinə görə, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. Həmin Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Məhkəmə Bakı şəhər Nəsimi Rayon Polis İdarəsinin 20-ci polis şöbəsinin polis sahə inspektoru, polis mayoru X5 tərəfindən tərtib edilmiş xx.xx.2024-cü il tarixli, MN ******* saylı inzibati xəta haqqında protokolu nəzərdən keçirib, məhkəmə iclasında iştirak edən şəxsləri dinləyib, iş materiallarını araşdırıb hesab edir ki, Rahimi Amirrezanın Azərbaycan Respublikası İXM-nin 510 və 535.1-ci maddələrində nəzərdə tutulan əməlləri törətməsi toplanmış sübutlarla təsdiqini tapır. Ona görə də o, inzibati məsuliyyətə cəlb edilməlidir. Azərbaycan Respublikası İXM-nin 34.3-cü maddəsinə əsasən şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Bu halda törədilmiş xətalardan hər hansı birinə görə nəzərdə tutulmuş əlavə tənbehlərdən biri əsas tənbehə əlavə edilə bilər. Həmin Məcəllənin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə iclasında Rahimi Amirrezanın məsuliyyətini yüngülləşdirən və ağırlaşdıran hallar müəyyən edilməmişdir. Beləliklə, məhkəmə Rahimi Amirrezanın törətdiyi inzibati xətaların xarakterini, onun şəxsiyyətini, iş üzrə digər halları nəzərə alaraq hesab edir ki, X4 Xətalar Məcəlləsinin 510 və 535.1-ci maddələri ilə təqsirli bilinərək İnzibati Xətalar Məcəlləsinin 34.3-cü maddəsinə əsasən barəsində həmin Məcəllənin 535.1-ci maddəsində nəzərdə tutulan həbs inzibati tənbeh tədbirinin tətbiq edilməsi məqsədə müvafiqdir. Göstərilənlərə əsasən və Azərbaycan Respublikası İnzibati Xətalar Məcəlləsinin 43, 49-51, 114-115, 117, 129 və 130-cu maddələrini rəhbər tutaraq məhkəmə QƏRARA ALDİ: Rahimi Amirreza Azərbaycan Respublikası İnzibati Xətalar Məcəlləsinin 510 və 535.1-ci maddələrində nəzərdə tutulmuş inzibati xətanı törətməkdə təqsirli bilinərək 08 (səkkiz) gün müddətinə inzibati həbs edilsin. Həbs etmənin əvvəli 04 iyun 2024-cü il tarixdən saat 20:00-dan hesablansın. Qərarın icrası Bakı şəhəri Nəsimi RPİ-nin 20-ci polis şöbəsinə və Azərbaycan Respublikası Daxili İşlər Nazirliyinin İnzibati X2 Məntəqəsinə həvalə edilsin. Qərarın surəti rəsmi qaydada verildiyi gündən 10 (on) gün müddətində qərardan Bakı şəhəri Nəsimi Rayon Məhkəməsi vasitəsi ilə və ya bilavasitə Bakı Apellyasiya Məhkəməsinə apellyasiya şikayəti və ya protesti verilə bilər. Sədrlik edən Solmaz Mustafayeva