Bakı Şəhəri Nəsimi Rayon Məhkəməsi Qərar — İş №3(006)-2275/2023

Azərbaycan Respublikası adından QƏRAR Bakı şəhəri İş № 3(006)-2275/2023 23.05.2023 BAKI ŞƏHƏRİ NƏSİMİ RAYON MƏHKƏMƏSİ Hakim Tağıyev Azər Heydər oğlunun sədrliyi, Lətifov Vəli Abdurəşid oğlunun katibliyi, barəsində inzibati xəta haqqında iş üzrə icraat aparılan şəxs Şəxs iştirakları ilə, xx.xx.1969-cu il tarixdə Bakı şəhərində anadan olmuş, Azərbaycan Respublikasının vətəndaşı (FİN: xxxxxxx), Bakı şəhəri, ünvan 1 ünvanında qeydiyyatda olmaqla yaşayan Şəxs barəsində Azərbaycan Respublikası İnzibati Xətalar Məcəlləsinin 377-ci maddəsi üzrə Azərbaycan Respublikası Baş prokurorluğunun Cinayət təqibindən kənar icraatlar idarəsinin rəisi tərəfindən xx.xx.2023-cü il tarixdə qəbul edilmiş “İnzibati xəta haqqında iş üzrə icraatın başlanılması barədə” qərara və ona əlavə edilmiş sənədlərə açıq məhkəmə iclasında baxaraq, məhkəmə M Ü Ə Y Y Ə N E T D İ: Şəxs gizli qaydada informasiya alınması üçün nəzərdə tutulmuş texniki vasitələri satış məqsədi olmadan qanunsuz əldə etmişdir. Belə ki, o, internet informasiya ehtiyatı vasitəsilə xarici ölkədən “Mülki dövriyyənin müəyyən iştirakçılarına mənsub ola bilən və dövriyyədə olmasına xüsusi icazə əsasında yol verilən (mülki dövriyyəsi məhdudlaşdırılmış) əşyaların siyahısı haqqında” Azərbaycan Respublikası Qanununun 12-ci maddəsinə əsasən “Gizli qaydada informasiya alınması üçün nəzərdə tutulmuş texniki vasitələr”ə aid edilən 01 ədəd üzərində “SK Voice Recorder“ sözləri yazılmış elektron yaddaş kartı formasında olan səs yazan qurğusunu satış məqsədi olmadan sifariş edərək əldə etmişdir. Bununla da, Şəxs Azərbaycan Respublikası İnzibati Xətalar Məcəlləsinin 377-ci maddəsi ilə nəzərdə tutulmuş inzibati xətanı törətmişdir. Məhkəmə iclasında iştirak edən barəsində inzibati xəta haqqında iş üzrə icraat aparılan şəxs Şəxs bildirmişdir ki, o, həmin fləş kartı tərcümə işini asanlaşdırmaq məqsədi ilə sifariş etmiş, həmin fləş kart haqqında vəkilinə bildirdikdə sonuncu ona həmin məhsulun ölkədə qadağan olduğunu demişdir. Bunu bildikdən sonra həmin fləş kartdan imtina etmiş və ödədiyi pulu geri almışdır. Göstərilənləri nəzərə alaraq barəsində başlanılmış inzibati xəta haqqında iş üzrə icraata xitam verilməsini məhkəmədən xahiş etmişdir. Məhkəmə iclasının vaxtı və yeri barədə inzibati xəta haqqında iş üzrə icraat başlamış Azərbaycan Respublikası Baş prokurorluğunun Cinayət təqibindən kənar icraatlar idarəsinə rəsmi bildiriş göndərilsə də, inzibati xəta haqqında iş üzrə icraat başlamış Azərbaycan Respublikası Baş prokurorluğunun Cinayət təqibindən kənar icraatlar idarəsinin nümayəndəsi məhkəməyə gəlməmiş, bunun səbəbi barədə məlumat verilməmişdir. Məhkəmə işə Azərbaycan Respublikası Baş prokurorluğunun Cinayət təqibindən kənar icraatlar idarəsinin nümayəndəsinin iştirakı olmadan baxılmasını mümkün hesab etmişdir. Belə ki, iş materiallarında olan Azərbaycan Respublikası Dövlət Gömrük Komitəsi Hava Nəqliyyatında Baş Gömrük İdarəsinin xx.xx.2022-ci il tarixli yoxlama haqqında protokoluna əsasən 1 (bir) ədəd üzərində “SK Voice Recorder“ sözləri yazılmış elektron yaddaş kartı formasında olan səs yazan qurğusu Bakı şəhəri, Nəsimi rayonu, Droqal döngəsi, 702-ci məhəllə, X3 yerləşən HNBGİ Skanlaşdırma və X1 Tətbiqi şöbəsinin inspektoru X2 tərəfindən aşkar edilərək müvafiq qaydada götürülmüşdür. İş materiallarında olan Azərbaycan Respublikası Dövlət Təhlükəsizlik Xidmətinin xx.xx.0222-ci il tarixli, 24/4299 saylı məktubunda qeyd olunur ki, “SK Voice Recorder” yazılı usb-fləş formasında olan qurğu gizli qaydada informasiya alınması üçün nəzərdə tutulmuş texniki vasitələr qismində istifadə edilə bilər və “Mülki dövriyyənin müəyyən iştirakçılarına mənsub ola bilən və dövriyyədə olmasına xüsusi icazə əsasında yol verilən (mülki dövriyyəsi məhdudlaşdırılmış) əşyaların siyahısı haqqında” Azərbaycan Respublikası Qanununun 12-ci bəndinə əsasən gizli qaydada informasiya alınması üçün nəzərdə tutulmuş texniki vasitələrə aid edilir. İş materiallarında olan Şəxs izahatından görünür ki, 2022-ci ilin iyul ayının əvvəlində “Ebay” internet mağazasında axtarış edib səsyazma cihazını 4 ABŞ dollarına sifariş vermişdir. Bildirmişdir ki, o, tərcüməçi xidməti göstərməklə məşğuldur. Həmin cihazı etdiyi tərcümələri yadında saxlamaq çətin olduğundan, yəni həm tərcüməni edib, həmdə qeydləri dəftərçəsində yazmağı çatdıra bilmədiyi üçün işini asanlaşdırmaq məqsədilə sifariş etmişdir. İş materiallarında olan Azərbaycan Respublikası Ədliyyə Nazirliyi Məhkəmə ekspertizası mərkəzinin 15 fevral 2023-cü il tarixli, 5/165-9/894 saylı rəyinə əsasən təqdim edilmiş üzərində “SK Voice Recorder” yazısı olan ağ rəngli “fləşkart” formasındakı səs yazıcı olan qurğunun satışına və qiymətinə dair Respublikada yerləşən ticarət məntəqələrində, eləcə də Mərkəzdə məlumat olmadığı üçün qiymətləndirmə aparmaq mümkün olmamışdır. Ekspertiza xərci 100 manat təşkil edir. İş materiallarında olan Azərbaycan Respublikasının Baş Prokurorluğunun İstintaq idarəsinin böyük prokuroru H.Mehrabov tərəfindən qəbul edilmiş 18 fevral 2023-cü il tarixli qərarla əməldə cinayət tərkibi olmadığından iş üzrə cinayət işinin başlanılması rədd olunmuşdur. İş materiallarında olan Azərbaycan Respublikası Baş prokurorluğunun Cinayət təqibindən kənar icraatlar idarəsinin rəisi tərəfindən xx.xx.2023-cü il tarixdə qəbul edilmiş “İnzibati xəta haqqında iş üzrə icraatın başlanılması barədə” qərara əsasən Şəxs barəsində İnzibati Xətalar Məcəlləsinin 377-ci maddəsi ilə inzibati xəta haqqında iş üzrə icraat başlanılmış, qərar, toplanmış material, habelə inzibati xətanın bilavasitə obyekti olmuş 01 ədəd üzərində “SK Voice Recorder” yazısı yazılmış “fləşkart” formasında olan səs yazıcı olan qurğusu Bakı şəhəri Nəsimi Rayon Məhkəməsinə göndərilmişdir. Məhkəmə iş materiallarını araşdırıb hesab edir ki, Şəxs tərəfindən Azərbaycan Respublikası İnzibati Xətalar Məcəlləsinin 377-ci maddəsində nəzərdə tutulmuş inzibati xətanın törədilməsi tam sübuta yetirilir. İnzibati Xətalar Məcəlləsinin 377-ci maddəsinə əsasən gizli qaydada informasiya alınması üçün nəzərdə tutulmuş texniki vasitələri satış məqsədi olmadan qanunsuz əldə etməyə görə - gizli qaydada informasiya alınması üçün nəzərdə tutulmuş texniki vasitələr müsadirə edilməklə, iki yüz manatdan dörd yüz manatadək məbləğdə cərimə edilir. Azərbaycan Respublikası Prezidentinin 2005-ci il 12 sentyabr tarixli 292 nömrəli Fərmanı ilə təsdiq edilmiş “Mülki dövriyyənin müəyyən iştirakçılarına mənsub ola bilən və dövriyyədə olmasına xüsusi icazə əsasında yol verilən (mülki dövriyyəsi məhdudlaşdırılmış) əşyaların dövriyyəsinə xüsusi icazə verən mərkəzi icra hakimiyyəti orqanlarının Siyahısı”nın 12-ci bəndinə görə gizli qaydada informasiya alınması üçün nəzərdə tutulmuş texniki vasitələrin dövriyyəsinə xüsusi icazə verən - Azərbaycan Respublikasının Dövlət Təhlükəsizliyi Xidmətidir (rabitə şəbəkələrindən gizli qaydada informasiya alınması üçün nəzərdə tutulmuş texniki vasitələrə münasibətdə Azərbaycan Respublikasının Xüsusi Dövlət Mühafizə Xidməti). Eyni zamanda məhkəmə tərəfindən o da müəyyən olunur ki, hazırkı inzibati xəta haqqında protokolun tərtib edilməsinə əsas olmuş cinayət işinin başlanılmasının rədd edilməsi haqqında qərar 18 fevral 2023-cü il tarixdə qəbul edilmişdir. Hazırda isə həmin tarixdən 03 aydan artıq müddət keçmişdir. İnzibati Xətalar Məcəlləsinin 38.3-cü maddəsinə görə cinayət işinin başlanması rədd edildikdə və ya cinayət işinə xitam verildikdə, lakin şəxsin əməllərində inzibati xəta tərkibinin bütün əlamətləri olduqda, inzibati tənbeh cinayət işinin başlanmasının rədd edilməsi və ya ona xitam verilməsi haqqında qərar qəbul edildiyi gündən ən geci üç ay keçənədək verilə bilər. İnzibati Xətalar Məcəlləsinin 53.1.6-cı maddəsinə görə bu Məcəllənin 38-ci maddəsində nəzərdə tutulmuş müddətlər başa çatdıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 105.1-ci maddəsinə görə bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Beləliklə məhkəmə hesab edir ki, Şəxs Azərbaycan Respublikası İnzibati Xətalar Məcəlləsinin 377-ci maddəsində nəzərdə tutulmuş əməli törətməkdə təqsirli bilinməli, lakin İnzibati Xətalar Məcəlləsinin 38-ci maddəsində nəzərdə tutulmuş müddət keçdiyindən iş üzrə icraata xitam verilməli, eyni zamanda inzibati xətanın bilavasitə obyekti olmuş predmet müsadirə edilməli, ekspertiza xərci üzrə 100 manat məsrəf isə həmin Məcəllənin 55.2-ci maddəsinə müvafiq olaraq dövlət hesabına ödənilməlidir. Yuxarıda göstərilənləri nəzərə alaraq və Azərbaycan Respublikası İnzibati Xətalar Məcəlləsinin 40, 43, 48-50, 114-115 və 128-130-cu maddələrini rəhbər tutaraq məhkəmə Q Ə R A R A A L D İ: Şəxs Azərbaycan Respublikası İnzibati Xətalar Məcəlləsinin 377-ci maddəsində nəzərdə tutulmuş xətanı törətməkdə təqsirli bilinsin, lakin məsuliyyətə cəlb etmə müddəti keçdiyindən iş üzrə icraata xitam verilsin. İnzibati xətanın bilavasitə obyekti olmuş “SK Voice Recorder” yazısı yazılmış “fləşkart” formasında olan səs yazıcı qurğu dövlət nəfinə müsadirə edilsin. Ekspertiza xərci üzrə 100 (yüz) manat məsrəf dövlət hesabına ödənilsin. Qərardan, onun surəti rəsmi qaydada verildiyi vaxtdan 10 (on) gün müddətində Bakı şəhəri Nəsimi Rayon Məhkəməsi vasitəsilə Bakı Apellyasiya Məhkəməsinə şikayət verilə bilər. Hakim: Azər Tağıyev