Bakı Şəhəri Nəsimi Rayon Məhkəməsi Qərar — İş №3(006)-3157/2024

Azərbaycan Respublikası adından QƏRAR Bakı şəhəri İş № 3(006)-3157/2024 06.08.2024 BAKI ŞƏHƏRİ NƏSİMİ RAYON MƏHKƏMƏSİ Hakim Mustafayeva Solmaz Rafael qızının sədrliyi, məhkəmə iclas katib Əbdülhəsənova Aytən Ələsgər qızının katibliyi, inzibati xəta haqqında protokolu tərtib etmiş şəxs Bakı şəhəri Nəsimi RPİ-nin DYPŞ-nin YPX inspektoru, polis serjantı X1 və barəsində inzibati xəta haqqında iş üzrə icraat aparılan Şəxs iştirakları ilə xx.xx.1997-ci ildə Qax rayonu, Tasmalı kəndində anadan olmuş, Azərbaycan Respublikasının vətəndaşı, orta təhsilli, subay, Qax rayonu, Tasmalı kəndində qeydiyyatda olan, ünvan 1 ünvanında yaşayan Şəxs barəsində Bakı şəhəri Nəsimi Rayon Polis İdarəsindən daxil olmuş inzibati xəta haqqında materiallara baxaraq, müəyyən etdi̇ : Bakı şəhəri Nəsimi RPİ-nin DYPŞ-nin YPX inspektoru, polis serjantı X1 tərəfindən Şəxs barəsində Azərbaycan Respublikası İnzibati Xətalar Məcəlləsinin 511.1.1-ci maddəsində nəzərdə tutulmuş inzibati xəta haqqında protokol tərtib edilmişdir. Məhkəmə iclasında iştirak edən inzibati xəta haqqında protokolu tərtib etmiş şəxs Bakı şəhəri Nəsimi RPİ-nin DYPŞ-nin YPX inspektoru, polis serjantı X1 verdiyi ifadəsində bildirmişdir ki, Şəxs xx.xx.2024-cü il tarixdə Bakı şəhəri, Nəsimi rayonu, Rəşid Behbudov küçəsində “Volkswagen İD 6 Crozz Pro” markalı, **-RV-*** dövlət nömrə nişanlı avtomaşını yüksək surətlə idarə edərək “Kia Sorento” markalı, **-RM-*** dövlət nömrə nişanlı avtomaşınla sürət yarışını həyata keçirmişlər. Şəxs bölməyə dəvət edilmiş, izahatı alınmış və barəsində Azərbaycan Respublikası İXM-nin 511.1.1-ci maddələri ilə inzibati protokol tərtib edilmişdir. Göstərilənləri nəzərə alaraq Şəxs barəsində müvafiq inzibati tənbeh tədbirinin tətbiq edilməsini məhkəmədən xahiş etmişdir. Barəsində inzibati xəta haqqında iş üzrə icraat aparılan Şəxs məhkəmə iclasında törətdiyi inzibati xətada özünü təqsirli bilməyərək verdiyi izahatında göstərmişdir ki, o, xx.xx.2024-cü il tarixdə Bakı şəhəri, Nəsimi rayonu, Rəşid Behbudov küçəsində “Volkswagen İD 6 Crozz Pro” markalı, **-RV-*** dövlət nömrə nişanlı avtomaşını yüksək surətlə idarə etmiş, lakin sürət yarışını həyata keçirməmişdir. “Kia Sorento” markalı, **-RM-*** dövlət nömrə nişanlı avtomaşının sürücüsünü də tanımır. Göstərilənlərə əsasən iş üzrə icraata xitam verilməsini məhkəmədən xahiş etmişdir. Məhkəmə proses iştirakçılarını dinləyib, iş materiallarını araşdırıb hesab edir ki, barəsində inzibati xəta haqqında iş üzrə icraat aparılan şəxs Şəxs əməlində Azərbaycan Respublikası İXM-nin 511.1.1-ci maddəsində göstərilən əlamətlər yoxdur və buna görə onun barəsində başlanmış inzibati xəta haqqında iş üzrə icraata xitam verilməlidir. Belə ki, Azərbaycan Respublikası İnzibati Xətalar Məcəlləsinin 511.1-ci maddəsinə görə avtoxuliqanlıq, yəni mexaniki nəqliyyat vasitəsinin sürücüsü tərəfindən ictimai qaydanı və əhalinin dincliyini nümayişkaranə şəkildə pozan, cəmiyyətə açıqca hörmətsizlik ifadə edən, yol hərəkəti qaydalarının davamlı olaraq pozulması ilə müşayiət olunan aşağıdakı qərəzli hərəkətlərə: 511.1.1. aşkar surətdə iki və ya daha artıq mexaniki nəqliyyat vasitəsinin iştirakı ilə sürət yarışının həyata keçirilməsinə görə - nəqliyyat vasitəsini idarə etmək hüququ bir il müddətinə məhdudlaşdırılmaqla beş yüz manatdan yeddi yüz əlli manatadək məbləğdə cərimə edilir və ya nəqliyyat vasitəsini idarə etmək hüququ bir il müddətinə məhdudlaşdırılmaqla işin hallarına görə, pozuntunu törədənin şəxsiyyəti nəzərə alınmaqla, on beş gündən bir ayadək müddətə inzibati həbs tətbiq olunur. Məhkəmədə müəyyən edildi ki, inzibati xəta haqqında protokol video görüntü əsasında tərtib edilmiş, barəsində inzibati xəta haqqında iş üzrə icraat aparılan şəxsin həmin xətanı törtməsinə dair yeganə sübut kimi həmin video görüntü məhkəməyə təqdim edilmişdir. Məhkəmə tərəfindən video görüntülərə baxılmış, görüntülərdə “Volkswagen İD 6 Crozz Pro” markalı, **-RV-*** qeydiyyat nömrə nişanlı avtomobilin sürücüsünün digər avtomobil “Kia Sorento” markalı, **-RM-*** dövlət nömrə nişanlı avtomaşının arxası ilə yüksək sürətlə hərəkət etməsi müəyyən edilmişdir. Məhkəmə hesab edir ki, Şəxs idarə etdiyi avtomobili yüksək sürətlə idarə etməsi sürət yarışının həyata keçirilməsi kimi qiymətləndirilə bilməz. Belə ki, avtoxuliqanlıq, yəni mexaniki nəqliyyat vasitəsinin sürücüsü tərəfindən ictimai qaydanı və əhalinin dincliyini nümayişkaranə şəkildə pozan, cəmiyyətə açıqca hörmətsizlik ifadə edən, yol hərəkəti qaydalarının davamlı olaraq pozulması kimi qiymətləndirilə bilməz. İnzibati Xətalar Məcəlləsinin 8-ci maddəsinə əsasən, inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İnzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Həmin Məcəllənin 75.0.3-cü maddəsinə görə, inzibati xəta haqqında iş üzrə şəxsin inzibati xətanı törətməkdə təqsiri sübut edilməlidir. Həmin Məcəllənin 114.2.1-ci maddəsinə əsasən bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi barədə qərar çıxarılır. Məhkəmə hesab edir ki, Şəxs hərəkətlərində Azərbaycan Respublikası İnzibati Xətalar Məcəlləsinin 511.1.1-ci maddəsində göstərilən inzibati xəta tərkibi yoxdur və iş üzrə icraata xitam verilməlidir. Azərbaycan Respublikası İnzibati Xətalar Məcəlləsinin 12-ci maddəsinə görə bu Məcəllə ilə qorunan ictimai münasibətlərə qəsd edən, hüquqa zidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Həmin Məcəllənin 53.1.2-ci maddəsinə görə inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 48-51, 115-117, 128-130 maddələrini rəhbər tutatarq, məhkəmə qəraraaldı: Barəsində inzibati xəta haqqında iş üzrə icraat aparılan şəxs Şəxs əməlində Azərbaycan Respublikası İnzibati Xətalar Məcəlləsinin 511.1.1-ci maddəsində göstərilən inzibati xəta tərkibi olmadığına görə inzibati xəta haqqında iş üzrə icraata xitam verilsin. Qərarın surəti rəsmi qaydada verildiyi gündən 10 (on) gün müddətində Bakı Apelyasiya Məhkəməsinə Nəsimi Rayon Məhkəməsi vasitəsi ilə şikayət verilə bilər. Hakim Solmaz Mustafayeva