Bakı Şəhəri Nəsimi Rayon Məhkəməsi Qərar — İş №3(006)-3302/2025

Azərbaycan Respublikası adından QƏRAR Bakı şəhəri İş № 3(006)-3302/2025 13.06.2025 BAKI ŞƏHƏRİ NƏSİMİ RAYON MƏHKƏMƏSİ Bakı şəhəri Nəsimi rayon məhkəməsinin hakimi Hüseynov Elməddin Mirpaşa oğlunun sədrliyi, məhkəmə iclas katibi Mustafayeva İlhamə Mövlan qızının katibliyi, şikayət vermiş X1 iştirakı ilə, Barəsində inzibati xəta haqqında iş üzrə qərar qəbul edilmiş X1 Azərbaycan Respublikası DİN Baş Dövlət Yol Polis İdarəsinin EQ 27778485 saylı, 06 may 2025-ci il tarixli inzibati tənbeh vermə haqqında qərarından verdiyi şikayətinə açıq məhkəmə iclasında baxaraq məhkəmə müəyyən etdi: X2 Azərbaycan Respublikası DİN Baş Dövlət Yol Polis İdarəsinin EQ 27778485 saylı, 06 may 2025-ci il tarixli inzibati tənbeh vermə haqqında qərarından şikayət ərizəsi ilə məhkəməyə müraciət edərək həmin qərarın ləğv edilməsi və inzibati xəta haqqında iş üzrə icraata xitam verilməsi barədə qərar qəbul edilməsini xahiş etmişdir. Şikayət ərizəsi onunla əsaslandırılmışdır ki, o, 06 may 2025-ci ildə idarə etdiyi **- ES-*** dövlət qeydiyyat nişanlı, “Hyundai İ 30” markalı minik avtomobili ilə M.Cəlal küçəsi ilə “Tərlan” şadlıq sarayı tərəfdən Şamaxinka deyilən yer istiqamətində hərəkət edərkən saat 08:53 dəqiqədə svetofordan yaşıl işıqda keçmişdir. Lakin sonradan saat 10-00-da ona mobil telefonla zəng olunmuş və bildirilmişdir ki, o, svetoforun qırmızı işığında keçdiyi üçün inzibati xətanın aşkar edilməsində istifadə olunan texniki vasitənin məlumatına əsasən onun barəsində elektron qərar tərtib olunmuşdur. Axşam saat 18-47-da isə onun telefon nömrəsinə “SMSRadar.az” saytından “77ES397 nömrəli avtomobil 100 azn 3 bal cərimə edilmişdir. Endirim:10 azn.Tarix:xx.xx.2025 18:40. Madde:327.2 məzmunlu mesaj gəldiyini görmüşdür. O hərəkət edərkən svetoforun yaşıl işığında hərəkətimi davam etdirdiyinə əmin olduğundan təəccüb etmişdir. Həmin yerə-M.Cəlal küçəsinə getmişdir. onun barəsində tərtib olunmuş protokolda göstərilən guya qırmızı işıqda keçdiyi svetoforun iş mexanizmini müşahidə etmişdir. Görmüşdür ki, o, keçdiyi yerdə yolun gediş və gəliş istiqamətlərində svetoforun işıqlarının yanma vaxtları fərqlidir. Belə ki, o hərəkət elədiyi istiqamətdə svetoforun qırmızı işığı əks istiqamətdəki svetofordan təxminən 20 saniyə gec yanır. O da həmin anda svetoforu keçmişdir. Ən maraqlısı odur ki, həmin yerdə bir nəfər dayanıb piyadalar üçün qoyulmuş svetoforun iş mexanizmini dəyişən qurğuya lazımsız komandalar verir. Odur ki, Nəsimi rayon Dövlət yol polisi Şöbəsinə geridönüş zəngi edib vəziyyəti danışmış və onun törətdiyi inzibati xətanın video görüntülərinin niyə ona göndərilmədiyini xəbər almış və həmin görüntüləri tələb etmişdir. Bir qayda olaraq, inzibati xəta törədildiyi barədə SMSRadar saytına həm inzibati xəta haqqında fotoşəkillər, həm də video görüntülər qoyulur. Lakin indiki halda xətanın video görüntülərinin sayta qoyulmaması şübhə doğurur. Ona həmin görüntüləri verməmişlər. O “Azərsu”da işlədiyi üçün işdən çıxmağa vaxtım olmadığından yalnız məzuniyyətə çıxandan sonra, xx.xx.2025ci il tarixdə Nəsimi rayon Dövlət yol polisi Şöbəsinə getmiş və onun törətdiyi inzibati xətanın video görüntülərinin ona təqdim olunmasını tələb etmiş, ona inzibati xəta haqqında EQ27778485 nömrəli qərarı vermişlər, inzibati xətanın video görüntülərini isə verməkdən imtina etmişlər. O məhkəməyə müraciət edəcəyini bildirdikdə məhkəmənin yerində araşdırma aparacağını demişlər. Hesab edir ki, onun barəsində xx.xx.2025-ci il tarixdə tərtib olunmuş EQ 27778485 nömrəli elektron protokol və qərar qanunsuzdur. Belə ki, onun əməlində inzibati xəta tərkibi yoxdur, ona görə də onun barəsində tərtib edilmiş elektron protokol və qərar ləğv edilməlidir. Qeyd olunanları nəzərə alaraq, EQ 27778485 saylı, 06 may 2025-ci il tarixli inzibati tənbeh vermə haqqında qərarın ləğv edilməsini və iş üzrə icraata xitam verilməsini xahiş etmişdir. Məhkəmə iclasında X2 şikayət ərizəsinin məzmununa uyğun izahat verib şikayətinin təmin edilməsini xahiş etdi. Məhkəmə iclasının yeri və vaxtı barədə rəsmi qaydada xəbərdarlıq edilməsinə baxmayaraq Baş Dövlət Yol Polis İdarəsinin nümayəndəsi məhkəmə iclasına gəlməmiş, gəlməməsinin səbəbləri barədə məhkəməyə məlumat verməmişdir. Məhkəmə işə həmin qurumun nümayəndəsinin iştirakı olmadan baxılmasını mümkün hesab etmişdir. Məhkəmə proses iştirakçılarını dinləyib, iş materiallarını araşdıraraq, belə nəticəyə gəlir ki, şikayət təmin edilməməlidir. Belə ki, məhkəməyə təqdim edilmiş EQ 27778485 nömrəli, 06 may 2025-ci il tarixli inzibati tənbeh vermə haqqında qərardan görünür ki, X2 xx.xx.2025-ci il tarixdə idarə etdiyi “Hyundai İ 30 Minik” markalı, **-ES-*** dövlət nömrə nişanlı avtomobillə Bakı şəhəri, Mir Cəlal küçəsində hərəkətdə olarkən svetoforun və ya nizamlayıcının qadağanedici işarəsi verilərkən hərəkətini davam etdirmiş və barəsində Azərbaycan Respublikası İXM-nin 327.2-ci maddəsinə müvafiq olaraq inzibati xəta haqqında protokol tərtib olunmuşdur. Məhkəməyə təqdim edilən CD diskə baxış keçirilərkən müəyyən edilmişdir ki, X2 idarə etdiyi “Hyundai İ 30 Minik” markalı, **-ES-*** dövlət nömrə nişanlı avtomobillə Bakı şəhəri, Mir Cəlal küçəsində küçəsində hərəkətdə olarkən svetoforun və ya nizamlayıcının qadağanedici işarəsi verilərkən hərəkətini davam etdirmişdir. “Yol hərəkəti haqqında” Azərbaycan Respublikası Qanunun 1-ci maddəsinin 41-ci bəndinin tələbinə görə yol vermək — sürücünün hərəkəti davam etdirməsi və ya yenidən hərəkətə başlaması, hər hansı manevr etməsi başqa nəqliyyat vasitələrinin sürücülərini və piyadaları qəflətən hərəkət istiqamətini və ya sürəti dəyişdirməyə məcbur edəbiləcəyi halda, onun hərəkəti davam etdirməməsi və ya yenidən hərəkətə başlamaması, manevr etməməsidir. Həmin Qanunun 42-ci maddəsinin 1-ci hissəsinin tələbinə görə sürücü hərəkətə başlamazdan, yerdəyişməzdən, dönməzdən, ötməzdən və dayanmazdan qabaq müvafiq istiqamətə dönmək üçün xarici işıq siqnallarının köməyi ilə, bunlar olmadıqda və ya nasazlıq yarandıqda isə əl işarələri ilə siqnal verməlidir. Bu zaman manevr təhlükəsiz olmalı və hərəkətin digər iştirakçıları üçün maneə yaratmamalıdır. Həmin Qanunun 75-ci maddəsinin İİ hisssinin tələbinə görə əgər yolayrıcında, o cümlədən yolun hərəkət hissələrinin kəsişmə yerində, yaxud yolayrıcından və ya kəsişmə yerindən bilavasitə sonra tıxac yaranıbsa və bu, sürücünü dayanmağa məcbur edərək digər istiqamətlərdən nəqliyyat vasitələrinin hərəkəti üçün maneə yaradacaqsa, sürücünün belə yolayrıcına və ya 1.25 nişanlanması ilə işarələnmiş kəsişmə yerinə daxil olması qadağandır. Azərbaycan Respublikası İnzibati Xətalar Məcəlləsinin 327.2-ci maddəsinə əsasən svetoforun və ya nizamlayıcının qadağanedici işarəsi verilərkən hərəkətin davam etdirilməsinə, 3.1 “Giriş qadağandır” yol nişanının tələblərinin və ya sərnişin daşıma, əks istiqamətli hərəkət zolağına çıxmaqla ötmə və ya manevr etmə, yolayrıcını keçmə qaydalarının pozulmasına, ümumi istifadədə olan nəqliyyat vasitələrinin, yaxud adamlar daşınan yük avtomobillərinin sərnişinlərlə yanacaqdoldurma məntəqəsinə daxil olmasına, 1.1, 1.3 və 1.11 üfüqi nişanlanma xətlərinin tələblərinə riayət etməyərək sola və ya geriyə dönməyə, yaxud maneəni kənardan keçməyə görə inzibati məsuliyyət yaradır. Məhkəmə araşdırılması zamanı müəyyən edilmişdir ki, X2 xx.xx.2025-ci il tarixdə idarə etdiyi “Hyundai İ 30 Minik” markalı, **-ES-*** dövlət nömrə nişanlı avtomobillə Bakı şəhəri, Mir Cəlal küçəsində hərəkətdə olarkən svetoforun və ya nizamlayıcının qadağanedici işarəsi verilərkən hərəkətini davam etdirmiş və bununla da Azərbaycan Respublikası İnzibati Xətalar Məcəlləsinin 327.2-ci maddəsində nəzərdə tutulan inzibati xətanı törətmişdir. Məhkəmə hesab edir ki, X2 tərəfindən Azərbaycan Respublikası İnzibati Xətalar Məcəlləsinin 327.2-ci maddəsində nəzərdə tutulmuş inzibati xətanın törədilməsi məhkəmə baxışı zamanı öz təsdiqini tapdığından şikayətin dəlilləri əsassızdır və inzibati xəta haqqında iş üzrə qəbul edilmiş EQ 27778485 saylı, 06 may 2025-ci il tarixli qərar qanuni və əsaslıdır. Göstərilənlərə əsasən və Azərbaycan Respublikası İnzibati Xətalar Məcəlləsinin 130, 133-134 və 136-cı maddələrini rəhbər tutaraq məhkəmə QƏRARA ALDİ: Barəsində inzibati xəta haqqında iş üzrə qərar qəbul edilmiş X1 Azərbaycan Respublikası DİN Baş Dövlət Yol Polis İdarəsinin EQ 27778485 saylı, 06 may 2025-ci il tarixli inzibati tənbeh vermə haqqında qərarından verdiyi şikayət təmin edilməsin. Qərarın surəti rəsmi qaydada alındığı gündən 10 (on) gün müddətində Bakı Apellyasiya Məhkəməsinə şikayət və ya protest verilə bilər. Hakim: Elməddin Hüseynov