Bakı Şəhəri Nəsimi Rayon Məhkəməsi Qərar — İş №3(006)-3323/2021

Azərbaycan Respublikası adından QƏRAR Bakı şəhəri İş № 3(006)-3323/2021 29.11.2021 BAKI ŞƏHƏRİ NƏSİMİ RAYON MƏHKƏMƏSİ Hakim Hüseynov Elməddin Mirpaşa oğlunun sədrliyi, məhkəmə iclasının katibi Mustafayeva İlhamə Mövlan qızının katibliyi ilə, X4 barəsində Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinin Bakı şəhər İdarəsi tərəfindən qəbul edilmiş 13.08.2021-ci il tarixli, MN ******* saylı inzibati xəta haqqında protokol əsasında qəbul edilmiş 23 avqust 2021-ci il tarixli, MN ******* saylı inzibati tənbeh vermə haqqında qərardan verilmiş şikayətə açıq məhkəmə iclasında baxaraq M Ü Ə Y Y Ə N E T D İ: X4 şikayətlə məhkəməyə müraciət edərək Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinin Bakı şəhər İdarəsinin 13.08.2021-ci il tarixli, MN ******* saylı inzibati xəta haqqında protokol əsasında qəbul edilmiş 23 avqust 2021-ci il tarixli, MN ******* saylı inzibati tənbeh vermə haqqında qərarın ləğv edilməsini xahiş etmişdir. Şikayət onunla əsaslandırılmışdır ki, X2 əmək hüquqlarının pozulması qənaətinə gələrək, Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinin Bakı şəhər İdarəsinə müraciət etmişdir. Həmin idarə X1 əmək hüquqlarının pozulmasına dair müraciətinə baxaraq, qanun pozuntusu aşkar etmiş və 23 avqust 2021ci il tarixli, MN ******* nömrəli inzibati tənbeh vermə haqqında qərarla "xxxx" MMC-nin direktoru kimi, onun barəsində Azərbaycan Respublikasının İnzibati Xətalar Məcəlləsinin 192.4-cü maddəsinə əsasən 700 (yeddi yüz) manat məbləğində cərimə təyin etmişdir. O, Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinin Bakı şəhər İdarəsinin inzibati xətalar haqqında iş üzrə 23 avqust 2021-ci il tarixli, MN ******* nömrəli inzibati tənbeh vermə haqqında qərardan Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinə şikayət verərək, qərarın ləğv edilməsini xahiş etmişdir. Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidməti onun verdiyi şikayətə baxaraq, qərarın ləğv olunmasını təmin etməmiş, sözügedən qərarı qüvvədə saxlamışdır. Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinin Bakı şəhər İdarəsinin “İnzibati tənbeh vermə haqqında” MN ******* nömrəli, 23 avqust 2021-ci il tarixli Qərarından (Qərar mənə 16 sentyabr 2021-ci il tarixində təqdim edilmişdir) onun tərəfindən 24 sentyabr 2021-ci il tarixində Bakı şəhəri Nəsimi Rayon Məhkəməsinə şikayət verilmişdir. Həmin şikayət və ona əlavə olunmuş sənədlər məhkəmənin 3(006)-2833/2021 nömrəli iş üzrə 24.09.2021-ci il tarixli Qərardadı ilə müəyyən edilmiş əsas ilə ona geri qaytarılmışdır (Qərardad ona 11 oktyabr 2021-ci il tarixində təqdim edilmişdir). Qərardadda göstərilən nöqsanları qaldıraraq, şikayəti yenidən məhkəməyə təqdim edilmişdir. Bildirir ki, X2 ilə "xxxx" MMC arasında 22.09.2020-ci il tarixdə əmək müqaviləsi bağlanmışdır və əmək müqaviləsinə əsasən hər ayın əmək haqqı ödənişi növbəti ayın 10-na qədər ödənilməlidir. 01 iyun 2021-ci il tarixində o, daxili audit yoxlama əmri imzalamışdır. Həmin tarixdən (01 iyun 2021-ci il) etibarən, bütün mağaza və anbarlarda audit yoxlamalarının icrasına başlanmışdır. 10 iyun 2021-ci il tarixində X1 anbardar işlədiyi Neftçala 1 mağazasında audit yoxlanışı baş tutmuş və daxili yoxlama aktına əsasən əskiklər aşkarlanmışdır. Daxili yoxlama aktına əsasən X2 əskik gələn mallara görə tam maddi məsuliyyət daşıdığını öz izahatında qeyd etmişdir. Buna baxmayaraq, X1 əmək haqqısı vaxtında və tam ödənilmişdir. Ona heç bir ziyan vurulmamışdır. Göründüyü kimi, ümumiyyətlə, inzibati xəta hadisəsi olmamışdır, o, inzibati xəta tərkibli əməl törətməmişdir. Onun heç bir təqsiri olmamışdır və bu səbəbdən də sübuta yetirilməmişdir. İXM-nin 3-cü maddəsinin tələbləri pozulmuşdur. Qeyd olunanları nəzərə alaraq, Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinin Bakı şəhər İdarəsinin 13.08.2021-ci il tarixli, MN ******* saylı inzibati xəta haqqında protokol əsasında qəbul edilmiş 23 avqust 2021-ci il tarixli, MN ******* saylı inzibati tənbeh vermə haqqında qərarının ləğv edilməsini xahiş edir. Məhkəmə iclasının vaxtı və yeri barədə Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinin Bakı şəhər İdarəsinə və şikayətçiyə lazımi qaydada məlumat verilsə də, Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinin Bakı şəhər İdarəsinin nümayəndəsi və şikayətçi məhkəmə iclasında iştirak etməmiş və iştirak etməmələrinin səbəbləri barədə məhkəməyə məlumat verməmişlər. Məhkəmə Azərbaycan Respublikasının İnzibati Xətalar Məcəlləsinin 133.2.4-cü maddəsinə əsasən işə Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinin Bakı şəhər İdarəsinin nümayəndəsinin və şikayətçinin iştirakı olmadan baxılmasını mümkün hesab edir. İş materiallarında olan 13.08.2021-ci il tarixli, MN ******* saylı inzibati xəta haqqında protokol əsasında qəbul edilmiş 23 avqust 2021-ci il tarixli, MN ******* saylı inzibati tənbeh vermə haqqında qərara əsasən X4 tərəfindən X1 əmək haqqısının hesablanmasında və ödənilməsində qanun pozuntusuna yol verildiyi üçün İXM-nin 192.4-cü maddəsi ilə təqsirli bilinərək 700 manat məbləğində inzibati cərimə edilmişdir. Azərbaycan Respublikası İnzibati Xətalar Məcəlləsinin 48-ci maddəsinə əsasən inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri və şəraiti aşkar etməkdən və inzibati xətaların qarşısını almaqdan ibarətdir. Göründüyü kimi, Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinin Bakı şəhər İdarəsinin sahə inspektoru tərəfindən qeyd edilən inzibati xəta haqqında işə baxılarkən qanunvericiliyin yuxarıda göstərilmiş tələblərinə tam riayət olunmamış, barəsində icraat aparılan şəxslə bağlı zəruri araşdırma aparılmadan işə baxılaraq qərar qəbul olunmuşdur. İnzibati Xətalar Məcəlləsinin 135.1.6-cı maddəsinə görə bu Məcəllə ilə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması inzibati xəta haqqında iş üzrə qərarın ləğv edilməsi və ya dəyişdirilməsi üçün əsasdır. Həmin Məcəllənin 134.1.4-cü maddəsinə görə inzibati xəta haqqında iş üzrə qərardan verilən şikayətə və ya protestə baxılaraq bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilə bilər. Göstərilənləri nəzərə alaraq məhkəmə hesab edir ki, şikayət qismən təmin edilməli, Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinin Bakı şəhər İdarəsinin sahə inspektoru tərəfindən qəbul edilmiş 13.08.2021-ci il tarixli, MN ******* saylı inzibati xəta haqqında protokol əsasında qəbul edilmiş 23 avqust 2021-ci il tarixli, MN ******* saylı inzibati tənbeh vermə haqqında qərar ləğv edilməli və iş yenidən baxılması üçün həmin quruma göndərilməlidir. Qeyd edilənlərə əsasən və Azərbaycan Respublikası İnzibati Xətalar Məcəlləsinin 128-130-cu və 133-135-ci maddələrini rəhbər tutaraq məhkəmə QƏRARA ALDİ: Şikayət qismən təmin edilsin. Azərbaycan Respublikasının Əmək və Əhalinin Sosial Müdafiəsi Nazirliyi yanında X3 Xidmətinin Bakı şəhər İdarəsi tərəfindən qəbul edilmiş 13.08.2021-ci il tarixli, MN ******* saylı inzibati xəta haqqında protokol əsasında qəbul edilmiş 23 avqust 2021-ci il tarixli, MN ******* saylı inzibati tənbeh vermə haqqında qərar ləğv edilsin və iş baxılması üçün həmin quruma göndərilsin. Qərardan, onun surəti rəsmi qaydada verildiyi andan 10 gün müddətində Bakı şəhəri Nəsimi Rayon Məhkəməsi vasitəsi ilə Bakı Apellyasiya Məhkəməsinə şikayət verilə bilər. Hakim: Elməddin Hüseynov