Bakı Şəhəri Nəsimi Rayon Məhkəməsi Qərar — İş №3(006)-3633/2023

Azərbaycan Respublikası adından QƏRAR Bakı şəhəri İş № 3(006)-3633/2023 23.08.2023 BAKI ŞƏHƏRİ NƏSİMİ RAYON MƏHKƏMƏSİ Hakim Mustafayeva Solmaz Rafael qızının sədrliyi, Məhkəmə iclas katibi Fərəcova Təranə Aydın qızının katibliyi, Azərbaycan Respublikası Fövqəladə Hallar Nazirliyi X6 Xidməti 2-ci ərazi X6 İdarəsinin nümayəndəsi X1, Barəsində inzibati xəta haqqında iş üzrə icraat aparılan hüquqi şəxs Şəxsn (bundan sonra Şəxs MMC) qanuni təmsilçisi X2 iştirakları ilə, Şəxs MMC-nin Azərbaycan Respublikası İnzibati Xətalar Məcəlləsinin 518.1-ci maddəsi ilə inzibati məsuliyyətə cəlb edilməsinə dair materiala açıq məhkəmə iclasında baxaraq, MÜƏYYƏN ETDİ: Azərbaycan Respublikası Fövqəladə Hallar Nazirliyi X6 Xidməti 2-ci ərazi X6 İdarəsi tərəfindən Azərbaycan Respublikası İnzibati Xətalar Məcəlləsinin 518.1-ci maddəsinə əsasən Şəxs MMC-nin barəsində tərtib olunmuş inzibati material baxılması üçün Nəsimi Rayon Məhkəməsinə göndərilmişdir. İnzibati xəta haqqında protokola əsasən, Bakı şəhəri, Nəsimi rayonu, Abbasqulu Ağa Bakıxanov və Ceyhun Hacıbəyli küçələrinin kəsişməsi, 649-cu məhəllə ünvanında yerləşən Şəxs MMC-yə məxsus abituriyent hazırlıq kursunda keçirilmiş yanğın texniki müayinə zamanı yanğın təhlükəsizliyi standartlarının, normalarının və qaydalarının tələblərinin pozulduğu müəyyən edilmişdir. Məhkəmə iclasında Azərbaycan Respublikası Fövqəladə Hallar Nazirliyi X6 Xidmətinin nümayəndəsi X3 izahatında bildirdi ki, Bakı şəhəri, Nəsimi rayonu, Abbasqulu Ağa Bakıxanov və Ceyhun Hacıbəyli küçələrinin kəsişməsi, 649-cu məhəllə ünvanında yerləşən Şəxs MMC-yə məxsus abituriyent hazırlıq kursunda keçirilmiş planlı yanğıntexniki müayinə zamanı yanğın təhlükəsizliyi sahəsində çatışmazlıqlar aşkar olunmuş və bununla bağlı İXM-nin 518.1-ci maddəsinə əsasən xx.xx.2023-cü il tarixli, MN ******* saylı protokol tərtib olunaraq baxılması üçün məhkəməyə göndərilmişdir. Göstərilənlərə əsasən Şəxs MMC barəsində müvafiq inzibati tənbeh tətbiq edilməsini məhkəmədən xahiş etmişdir. Məhkəmə iclasında Şəxs MMC-nin qanuni təmsilçisi X4 məhkəməyə ünvanlamış ərizəsinə uyğun izahat verərək göstərdi ki, müəssisələri barəsində məhkəməyə təqim olunan bu protokol qanunsuz və əsassızdır. Belə ki, onlar A.Bakıxanov və C.Hacıbəyli küçələrinin kəsişməsində yerləşən və Azərbaycan Dövlət Neft və Sənaye Universitetinin balansında olan tələbə yataqxanasının birinci mərtəbəsində təlim-təhsil kursu kimi fəaliyyət göstərirlər. Qeyd olunan bina Azərbaycan Respublikasının Prezidentinin xx.xx.2016-cı il tarixli, 1149 nömrəli Fərmanı ilə təsdiq edilmiş “Tikinti və infrastruktur obyektləri ilə əlaqədar investisiya layihələrinin investorlar tərəfindən “Tik-idarə et-təhvil ver” modeli çərçivəsində həyata keçirilməsinin şərtləri, tikinti və infrastruktur obyektlərinin növlərinə uyğun olaraq investorlar qarşısında qoyulan tələblər, bağlanılan müqavilələrin xüsusiyyətləri və şərtləri, investisiya qoyuluşu nəticəsində əldə olunacaq mal və xidmətlərin dəyərinin müəyyənləşdirilməsi Qaydasına” əsasən tikilmiş ilk bina olmuş, bununla əlaqədar İqtisadiyyat Nazirliyi ilə investor qismində çıxış edən “X7” MMC arasında xx.xx.2019-cu il tarixli müqavilə bağlanmışdır. Həmin müqaviləyə əsasən, binanın idarəetməsi "xxxx" MMC-yə həvalə edilmişdir. Müəssisləri ilə "xxxx" MMC arasında xx.xx.2020-ci il tarixli icarə müqaviləsi bağlanmış və qeyd olunan sahə tərəflərindən icarəyə götürülmüşdür. Həmin müqavilənin 7.2-ci bəndinə əsasən, müqaviləyə xitam verilmədiyi təqdirdə, hər dəfə 1 il müddətinə uzadılmış hesab edilir. Hazırda icarə münasibətləri davam etməkdədir. FHN tərəfindən təqdim olunan sənədlərə əsasən müəyyən olunur ki, müəssisə barəsində 6 pozuntu aşkar edilmişdir. 1-ci pozuntu ilə əlaqədar qeyd edir ki, yataqxana binası ilə əlaqədar bütövlükdə həm daşınmaz əmlakın icbari sığortası, həm də daşınmaz əmlakın istismarı ilə bağlı mülki məsuliyyətin icbari sığortası edilmişdir və buna dair müvafiq şəhadətnamələr məhkəməyə təqdim olunur. Müəssisəsinin icarəsində olan sahə də yataqxana binasının bir hissəsi olduğu üçün həmin şəhadətnamələr onların istifadəsində olan sahəyə də şamil edilir. 2-ci pozuntu ümumiyyətlə əsaslandırılmış, qeyri-müəyyən qeyd edilmiş, konkret pozuntu göstərilməmişdir. Qeyd olunmalıdır ki, tərəflərindən qanunvericiliyin tələblərinə uyğun olaraq yanğına cavabdeh şəxs təyin edilmiş, yanğına qarşı təlimlərdə cavabdeh şəxsin iştirakı təmin edilmişdir. 3-cü pozuntu ilə əlaqədar bildirir ki, qeyd edilən pozuntu ilə əlaqədar xx.xx.2022-ci il tarixli, 2839A, 2840A, 2841A və 2842A nömrəli sınaq protokolları təqdim edilmişdir. 4-cü pozuntuya dair onlar tərəfdən xx.xx.2023-cü il tarixli, 091/23 saylı müqavilə, razılaşma protokolu və akt təqdim edilmişdir. 5-ci pozuntu da 2-ci pozuntu ümumiyyətlə əsaslandırılmış, qeyri-müəyyən qeyd edilmiş, konkret pozuntu göstərilməmişdir. 6-cı pozuntu ilə əlaqədar xx.xx.2022-ci il tarixli, 10/007 saylı akt tərtib olunmuşdur. Göründüyü kimi qeyd edilən bütün pozuntular əsassız olmuş, qanunvericiliklə müəyyən edilmiş bütün tələblərə tərəflərindən riayət edilmişdir. Bu sənədlər FHN nümayəndələrinə də təqdim olunsa da, qərəzli mövqe sərgiləyərək protokol tərtib etmişlər. Məhkəməyə təqdim olunan sənədlərin bəzilərində "xxxx" MMC olaraq qeyd edilməsinin səbəbi barədə qeyd edə bilərik ki, yuxarıda göstərildiyi kimi yataqxana binası hazırda həmin MMC-nin idarəetməsindədir. Bina ümumilikdə yoxlanışlardan keçərkən də sənədlər həmin MMC-nin adına verilir. Göstərilənlər nəzərə alınmaqla iş üzrə icraata xitam verilməsi barədə qərar qəbul edilməsini məhkəmədən xahiş etmişdir. Məhkəmə proses iştirakçılarının izahatını dinləyib, iş materiallarını araşdırıraq belə qənaətə gəlir ki, Şəxs MMC Azərbaycan Respublikası İXM-nin 518.1-ci maddəsinin tələbini pozmuşdur. Belə ki, iş materiallarında olan “Sahibkarlıq sahəsində aparılan yoxlamaların vahid məlumat reyestri”ndən olan xx.xx.2023-cü il tarixli, KY231935133 saylı çıxarışdan görünür ki, Bakı şəhəri, Nəsimi rayonu, Abbasqulu Ağa Bakıxanov və Ceyhun Hacıbəyli küçələrinin kəsişməsi, 649-cu məhəllə ünvanında yerləşən Şəxs MMC-yə məxsus abituriyent hazırlıq kursunda plan üzrə xx.xx.2023-xx.xx.2023-cü il tarixdə müayinənin aparılmasına icazə verilir, İş materiallarında olan xx.xx.2023-cü il tarixli, 3185 saylı “Yanğın-texniki müayinə Aktı”dan görünür ki, Şəxs MMC-yə məxsus obyektin icbari qaydada sığorta olunması sənədi təqdim olunmamış, elektrik naqillərinin gərginliyə qarşı müqaviməti ölçülməmiş, yanğın xəbərverici qurğuların sazlığına mütəxəssis tərəfindən yoxlanması barədə sənəd təqdim olunmamış, mövcud ilkin od söndürən balonların tərkibinin yenilənməməsi barədə sənəd təqdim olunmamış, obyektin otaqları yanğın təhlükəsizliyinin norma və qaydalarına uyğun saxlanılmamışdır. Azərbaycan Respublikası İnzibati Xətalar Məcəlləsinin 518.1-ci maddəsinə əsasən mülkiyyət formasından asılı olmayaraq müəssisə, idarə və təşkilatlarda, ictimai yerlərdə, anbarlarda, yataqxanalarda və ya digər yaşayış sahələrində, meşələrdə və nəqliyyatda yanğın təhlükəsizliyi standartlarının, normalarının və qaydalarının tələblərinin pozulmasına və ya yerinə yetirilməməsinə görə - fiziki şəxslərə xəbərdarlıq edilir və ya onlar iyirmi manatdan otuz manatadək məbləğdə cərimə edilir, vəzifəli şəxslərə xəbərdarlıq edilir və ya onlar yüz manatdan yüz əlli manatadək məbləğdə, hüquqi şəxslər üç yüz əlli manatdan beş yüz manatadək məbləğdə cərimə edilir. “Yanğın təhlükəsizliyi haqqında” Azərbaycan Respublikası Qanununun 6-cı maddnin 2-ci hissəsinə görə yanğın təhlükəsizliyi sahəsində müəssisələrin yanğın təhlükəsizliyi tələblərinə riayət etmək, habelə Azərbaycan Respublikasının müvafiq icra hakimiyyəti orqanının və onun müvafiq qurumlarının, habelə onların vəzifəli şəxslərinin göstərişlərini, qərarlarını və digər qanuni tələblərini yerinə yetirmək; yanğın təhlükəsizliyinin təmin edilməsi tədbirlərini işləyib hazırlamaq və həyata keçirmək; yanğına qarşı təbliğat aparmaq, habelə öz işçilərinə yanğın təhlükəsizliyi tədbirlərini öyrətmək; yanğından müdafiə sistemlərini və vasitələrini, o cümlədən ilkin yanğınsöndürmə vasitələrini saz vəziyyətdə saxlamaq, onların başqa məqsədlərlə istifadə olunmasına yol verməmək; yanğından mühafizə bölmələrini bu Qanunla və digər qanunvericilik aktları ilə nəzərdə tutulmuş qaydada yaratmaq və saxlamaq; yanğınları söndürməkdə, onların törənməsi və yayılması səbəblərini və şəraitini müəyyənləşdirməkdə, habelə yanğın təhlükəsizliyi tələblərinin pozulmasında və yanğınların törənməsində təqsiri olan şəxslərin aşkar edilməsində yanğından mühafizə və yanğın nəzarəti qurumlarına köməklik göstərmək; müəssisələrin ərazisində yanğınların söndürülməsi zamanı yanğınsöndürmə üzrə əməliyyatların yerinə yetirilməsində iştirak edən yanğından mühafizə şəxsi heyətinə və yanğının söndürülməsinə cəlb olunmuş qüvvələrə müəyyənləşdirilmiş qaydada zəruri qüvvə və vəsaitlər, yanacaqsürtgü materialları, habelə ərzaq məhsulları və istirahət yerləri vermək; Azərbaycan Respublikasının müvafiq icra hakimiyyəti orqanının və onun bölmələrinin vəzifəli şəxsləri öz xidməti vəzifələrini yerinə yetirərkən onların ərazilərə, binalara, qurğulara və müəssisənin başqa obyektlərinə daxil olmasını təmin etmək; Azərbaycan Respublikasının müvafiq icra hakimiyyəti orqanının və onun bölmələrinin vəzifəli şəxslərinin tələbi ilə müəssisələrdə yanğın təhlükəsizliyi vəziyyəti barəsində, o cümlədən istehsal etdikləri məhsulun yanğın təhlükəsizliyi, habelə öz ərazilərində baş vermiş yanğınlar və onların nəticələri barəsində məlumatlar və sənədlər vermək; yanğınlar, mövcud yanğından müdafiə sistemlərinin və vasitələrinin nasazlığı, yolların və girişlərin vəziyyətindəki dəyişikliklər barədə Azərbaycan Respublikasının müvafiq icra hakimiyyəti orqanına və ya onun bölmələrinə ləngimədən məlumat vermək vəzifələrini yerinə yetirməlidirlər. Həmin Qanunun 36-cı maddəsinə əsasən bu Qanunun tələblərinin pozulması Azərbaycan Respublikasının Mülki, İnzibati Xətalar və Cinayət məcəllələrində nəzərdə tutulmuş hallarda məsuliyyətə səbəb olur. Azərbaycan Respublikası İXM-nin 3-cü maddəsinə əsasən, yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 9.1-ci maddəsinin tələbinə görə, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. Həmin Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Həmin Məcəllənin 31.3-cü maddəsinə əsasən hüquqi şəxslər barəsində inzibati tənbeh tətbiq edilərkən, inzibati xətanın xarakteri, inzibati xəta nəticəsində hüquqi şəxsin əldə etdiyi xeyrin həcmi və ya onun maraqlarının təmin edilməsinin xarakteri və dərəcəsi, hüquqi şəxsi xarakterizə edən hallar, o cümlədən onun maliyyə və əmlak vəziyyəti, xeyriyyəçilik və ya digər ictimai faydalı fəaliyyətlə məşğul olması, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə iclasında Şəxs MMC-nin məsuliyyətini yüngülləşdirən və ya ağırlaşdıran hallar müəyyən edilmədi. Beləliklə, məhkəmə Şəxs MMC-nin törətdiyi inzibati xətanın xarakterini, hüquqi şəxsi xarakterizə edən halları və s. nəzərə alaraq hesab edir ki, ona İnzibati Xətalar Məcəlləsinin 518.1-ci maddəsinin sanksiyasında nəzərdə tutulmuş həddə cərimə növündə tənbeh tətbiq olunmalıdır. Eyni zamanda məhkəmə onu da qeyd edir ki, Şəxs MMC-yə inzibati cərimə şərti olaraq tətbiq edilməli, qurum tərəfindən 1 ay müddətində törədilmiş hüquqpozma aradan qaldırıldığı təqdirdə, hüquqi şəxs ona tətbiq edilmiş inzibati cərimədən azad edilməlidir. İnzibati Xətalar Məcəlləsinin 25.7-ci maddəsinə əsasən bu Məcəllənin 116.1-ci maddəsi ilə müəyyən edilmiş hallarda inzibati cərimə şərti olaraq tətbiq edilir. Həmin Məcəllənin 116.1-ci maddəsinə görə eyni inzibati xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsi halları istisna olmaqla, bu Məcəllənin 192.6, 192.10, 192.11, 201, 203, 209, 279.0.1, 393-1.2, 393-1.4, 394.0.5, 394.0.7, 395, 518.1, 532, 533-1, 536, 537.2, 539, 540.3 – 540.5, 541 – 544, 551.2, 557.2 və 603-cü maddələrində nəzərdə tutulan inzibati xətanı törətmiş şəxs barəsində səlahiyyətli orqan (vəzifəli şəxs) inzibati cərimənin şərti olaraq tətbiq edilməsi haqqında qərar çıxarır. Bu Məcəllənin 116.2-ci maddəsinə əsasən inzibati cərimənin şərti olaraq tətbiq edilməsi haqqında qərarda şəxsin törətdiyi hüquqpozmanı aradan qaldırması üçün müddət nəzərdə tutulur. Bu müddət bir ayadək, yaxud hüquqpozmanın aradan qaldırılmasının mürəkkəbliyi və bunun üçün əlavə vaxtın tələb olunması nəzərə alınaraq bir aydan iki ayadək müəyyən olunur. Qeyd olunan Məcəllənin 116.3-cü maddəsinə görə bu Məcəllənin 116.2-ci maddəsində nəzərdə tutulan müddətdə hüquqpozma aradan qaldırılarsa, inzibati cərimə ödənilmir. Əks təqdirdə, inzibati cərimənin şərti olaraq tətbiq edilməsi haqqında qərarda nəzərdə tutulan cərimə ödənilməlidir. Cərimənin ödənilməsi şəxsi törətdiyi hüquqpozmanın aradan qaldırılması öhdəliyindən azad etmir. Yuxarıda göstərilənlərə əsasən və Azərbaycan Respublikası İXM-nin 40, 43, 48-50, 114-115 və 128-130-cu maddələrini rəhbər tutaraq məhkəmə QƏRARA ALDİ: Şəxs MMC Azərbaycan Respublikası İXM-nin 518.1-ci maddəsi ilə nəzərdə tutulmuş inzibati xətanı törətməkdə təqsirli bilinərək 350 (üç yüz əlli) manat məbləğində cərimə edilsin. Şəxs MMC-yə bu cərimə şərti olaraq tətbiq edilsin və qurum tərəfindən 1 ay müddətində törədilmiş hüquqpozma aradan qaldırıldığı təqdirdə Şəxs MMC bu qərarla tətbiq edilmiş inzibati cərimədən azad edilsin. Qərarın surəti rəsmi qaydada verildiyi gündən 10 (on) gün müddətində qərardan Bakı şəhəri Nəsimi Rayon Məhkəməsi vasitəsi ilə və ya bilavasitə Bakı Apellyasiya Məhkəməsinə apellyasiya şikayəti verilə bilər. Sədrlik edən Solmaz Mustafayeva