Bakı Şəhəri Nəsimi Rayon Məhkəməsi Qərar — İş №3(006)-3687/2023

Azərbaycan Respublikası adından QƏRAR Bakı şəhəri İş № 3(006)-3687/2023 29.08.2023 BAKI ŞƏHƏRİ NƏSİMİ RAYON MƏHKƏMƏSİ Hakim: Pənahov Babək Əkbər oğlunun sədrliyi Məhkəmə iclasının katibi: X1 Barəsində icraat aparılan şəxs: Şəxs MMC-nin nümayəndəsi X2 iştirakları ilə Şəxs MMC (hüquqi ünvanı: Bakı şəhəri, Nəsimi rayonu, Azadlıq prospekti, ev 67, mənzil 09, VÖEN:**********) barəsində Azərbaycan Respublikası İnzibati Xətalar Məcəlləsinin 430.4-cü maddəsi üzrə tərtib olunmuş xx.xx.2023-cü il tarixli, EP ******* saylı inzibati xəta haqqında protokola və ona əlavə edilmiş sənədlərə açıq məhkəmə iclasında baxaraq məhkəmə M Ü Ə Y Y Ə N E T D İ: Protokola görə Şəxs MMC 138.000,00 Avro məbləğində vəsaiti xx.xx.2021-ci il tarixdə Azərbaycan Respublikasından kənara köçürmüş, lakin ödənişin aparıldığı gündən 2 ildən artıq müddətin keçməsinə baxmayaraq həmin vəsait hesabına alınan malların ölkəyə idxalını təsdiq edən gömrük bəyannaməsi və ya idxal olunan xidmətlərin göstərilməsini təsdiq edən sənəd təqdim edilməmiş, qabaqcadan ödənilmiş valyuta vəsaiti xaricdən geri qaytarılmamışdır. Məhkəmədə barəsində icraat aparılan hüquqi şəxs Şəxs MMC-nin nümayəndəsi X4 izahatında göstərdi ki, cəmiyyət ilə Türkiyədə fəaliyyət göstərən “X6 and Treatment Technologies İNC” şirkəti arasında avadanlıqların alqı-satqısına dair xx.xx.2021-ci il tarixdə AGE/AL/PC/06-21/015 saylı müqavilə bağlanılmışdır. Bu müqavilə üzrə həmin şirkətin hesabına xx.xx.2021-ci il tarixdə 138.000,00 Avro vəsait köçürülmüşdür. **********5257, **********5790 və **********8956 saylı gömrük bəyannamələrinə əsasən köçürülən vəsait hesabına alınan mallar 2021-ci ilin avqust ayında ölkəyə idxal olunmuşlar. İş üzrə icraata xitam verilməsini xahiş edir. Məhkəmə iclasının vaxtı və yeri barədə məlumatlandırılması üzrə görülmüş tədbirlərə baxmayaraq, inzibati xəta haqqında protokolu tərtib etmiş Mərkəzi Bankın nümayəndəsi məhkəməyə gəlməmiş, bunun səbəbi barədə məlumat verilməmişdir. Məhkəmə işə onun iştirakı olmadan baxılmasını mümkün hesab etmişdir. İş materiallarında olan: • "xxxx" ASC tərəfindən xx.xx.2023-cü il tarixdə Mərkəzi Banka təqdim edilmiş məlumatda Şəxs MMC-nin xx.xx.2021-ci il tarixdə 138.000,00 Avro göndərildiyi, lakin ödənişin aparıldığı gündən 2 il müddətində malların ölkəyə idxalını təsdiq edən gömrük bəyannaməsi və ya idxal olunan xidmətlərin göstərilməsini təsdiq edən sənədlərin təqdim edilməməsi qeyd olunmuşdur; • Köçürmə sifarişinə əsasən Şəxs MMC tərəfindən Türkiyədə fəaliyyət göstərən “X6 and Treatment Technologies İNC” şirkətinin hesabına xx.xx.2021-ci il tarixdə xx.xx.2021-ci il tarixli, AGE/AL/PC/06-21/015 saylı müqavilə ilə bağlı 138.000,00 Avro məbləğində pul göndərilmişdir; • **********5257, **********5790 və **********8956 saylı gömrük bəyannamələrinə əsasən “X6 and Treatment Technologies İNC” şirkəti tərəfindən Şəxs MMC-yə xx.xx.2021ci il tarixli, AGE/AL/PC/06-21/015 saylı müqavilə üzrə göndərilmiş 56.217,68 Avro dəyərində mallar xx.xx.2021-ci il tarixdə, 56.217,68 Avro dəyərində mallar xx.xx.2021-ci il tarixdə və 19.870,72 Avro dəyərində mallar xx.xx.2021-ci il tarixdə ölkəyə idxal olunmuş, bu barədə həmin sənədlər üzərində "xxxx" ASC tərəfindən müvafiq qeydlər aparılmışdır. Beləliklə məhkəmədə müəyyən edilir ki, Şəxs MMC Türkiyədə fəaliyyət göstərən “X6 and Treatment Technologies İNC” şirkətinin hesabına xx.xx.2021-ci il tarixli, AGE/AL/PC/06-21/015 saylı müqaviləyə əsasən xx.xx.2021-ci il tarixdə 138.000,00 Avro məbləğində pul göndərmiş, bunun müqabilində həmin vəsait hesabına alınan 132.306,08 Avro dəyərində mallar qanunvericiliklə müəyyən edilmiş 02 il müddəti ərzində ölkəyə vaxtında idxal olunsalar da, 5.693,92 Avro dəyərində malın gətirilməsi təmin edilməmişdir. “Azərbaycan Respublikasının rezident və qeyri-rezidentlərinin xarici valyuta əməliyyatlarının aparılması Qaydaları”nın 4.3.1.3-cü bəndinə Azərbaycan Respublikası Mərkəzi X5 20 fevral 2020-ci il tarixli 06/1 nömrəli qərarı ilə edilmiş dəyişikliyə əsasən qabaqcadan ödəniş aparıldıqda banka ödənişin təyinatını, şərtlərini və məbləğini əks etdirən sənəd təqdim edilir. Qabaqcadan ödəniş müqabilində malların ölkəyə idxalını (xidmətlərin göstərilməsini) təsdiq edən gömrük bəyannaməsi (xidmətlərin göstərilməsini təsdiq edən sənəd) banka təqdim olunmalıdır və ya xeyrinə qabaqcadan ödənişin edildiyi şəxs və ya üçüncü şəxs tərəfindən qabaqcadan ödənilmiş məbləğ geri qaytarılmalıdır. Müvafiq sənədlər ödənişin aparıldığı gündənən geci 02 (iki) il müddətində banka təqdim edilmədikdə və ya qabaqcadan ödənilmiş məbləğ geri qaytarılmadıqda və bu zaman idxal edilməyən malların (göstərilməyən xidmətlərin) və ya geri qaytarılmayan məbləğin qalıq dəyəri 10.000 (on min) ABŞ dolları ekvivalenti məbləğindən çox olduqda, bank tərəfindən qabaqcadan ödəniş əməliyyatına dair bütün sənədlər 05 (beş) iş günü ərzində Azərbaycan Respublikasının Mərkəzi Bankına təqdim edilir. Hazırki işdən göründüyü kimi, geri qaytarılmayan məbləğin qalıq dəyəri 10.000 ABŞ dollarından (1 Avro=1,84 AZN, 1 ABŞ dolları=1,70 AZN) azdır, bu da inzibati xəta tərkibini yaratmır. Azərbaycan Respublikası İnzibati Xətalar Məcəlləsinin 430.4-cü maddəsinə avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə məsuliyyət nəzərdə tutur. Azərbaycan Respublikası İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 12.1-ci maddəsinə görə bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Bu Məcəllənin 53.1.2-ci maddəsinin tələbinə görə inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Qeyd edilən Məcəllənin 105.1-ci maddəsinə görə bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Məhkəmə göstərilənləri nəzərdən keçirərək hesab edir ki, hazırkı iş üzrə inzibati xəta tərkibi olmadığından Şəxs MMC barəsində başlanılmış iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 48-50, 114-115 və 128-130-cu maddələrini rəhbər tutaraq məhkəmə Q Ə R A R A A L D İ: Şəxs MMC barəsində Azərbaycan Respublikası İnzibati Xətalar Məcəlləsinin 430.4cü maddəsi ilə başlanılmış inzibati xəta haqqında iş üzrə icraata xitam verilsin. Qərardan, onun surəti rəsmi qaydada verildiyi vaxtdan 10 (on) gün müddətində Bakı şəhəri Nəsimi Rayon Məhkəməsi vasitəsilə Bakı Apellyasiya Məhkəməsinə şikayət verilə bilər. Hakim Babək Pənahov