Bakı Şəhəri Nəsimi Rayon Məhkəməsi Qərar — İş №3(006)-3742/2025

Azərbaycan Respublikası adından QƏRAR Bakı şəhəri İş № 3(006)-3742/2025 30.06.2025 BAKI ŞƏHƏRİ NƏSİMİ RAYON MƏHKƏMƏSİ Hakim Mustafayeva Solmaz Rafael qızının sədrliyi, Qasımova Leyla Nurəddin qızının katibliyi, Şikayət vermiş şəxs X1 iştirakı ilə, X1 Azərbaycan Respublikası DİN Baş X4 İdarəsi tərəfindən qəbul edilmiş xx.xx.2025-ci il tarixli, EQ 26716477 nömrəli inzibati tənbeh vermə haqqında qərardan şikayətinə açıq məhkəmə iclasında baxaraq, MÜƏYYƏN ETDİ: X2 şikayət ərizəsi ilə məhkəməyə müraciət edərək, Azərbaycan Respublikası DİN Baş X4 İdarəsi tərəfindən qəbul edilmiş xx.xx.2025-ci il tarixli, EQ 26716477 saylı inzibati tənbeh vermə haqqında qərarın ləğv edilməsini məhkəmədən xahiş etmişdir. Şikayət ərizəsi onunla əsaslandırılmışdır ki, xx.xx.2025-ci il tarixində idarə etdiyi **- AJ-*** dövlət qeydiyyat nişanlı avtomobilə EQ26716477 saylı protokol əsasında 100 AZN cərimə və 2 cərimə balı tətbiq edilmişdir. Cərimə, guya avtobus zolağında hərəkət etdiyinə görə İnzibati Xətalar Məcəlləsinin 327.1-1-ci maddəsinə əsasən verilmişdir. Protokolun tərtibi zamanı ona qarşı ədalətsiz ittiham irəli sürülmüşdür. Hadisə zamanı o, Səməd Vurğun küçəsindən sağa, Fizuli küçəsinə dönərək avtobus zolağının qırıq-qırıq xətlərlə ayrılmış hissəsinə daxil olmuş və yaxınlıqda yerləşən cibdə avtomobili saxlamışdır. Avtomobili çıxararkən isə həmin yol hissəsində nişanlama davamlı xəttlə göstərildiyi üçün alternativ marşrut olmadığına görə bir neçə metr avtobus zolağı ilə hərəkət etmişdir. Bu hərəkət qəsdən deyil, yolun nişanlanma vəziyyətinə görə məcburi olub və bu cərimə tətbiqinə əsas vermir. Çünki hərəkətin başlanğıcı qanunidir və məqsəd parklanma olub. EQ26716477 saylı inzibati protokolla ona qarşı tətbiq edilmiş cərimə və cərimə ballarının əsassız olduğunu sübut etmək məqsədilə hadisə yeri ilə bağlı sonradan çəkilmiş video görüntü mövcuddur. Qeyd edir ki, video görüntü hadisənin baş verdiyi anı deyil, hadisənin baş verdiyi yerin real vəziyyətinin (yol nişanlaması və avtobus zolağının) hüquqa uyğun olmadığını nümayiş etdirir. Bundan əvvəl xx.xx.2025-ci il tarixli müraciətlə DYP-yə şikayət etmişdir. Lakin BDYPİ-nin xx.xx.2025-ci il tarixdə Bakı şəhəri BPİ-nin DYPİ-nin rəisi polis polkovniki Rəşid Piriyevə 10 ğün müddətində araşdırmanın nəticəsi barədə BDYPİ-ə və vətəndaşa məlumat verilməsi xahis olunsa da, ona 43 gün sonra, 28.05.202-ci il tarixdə cavab məktubu gəlmiş, lakin cavabda qərarın qüvvədə saxlandığı bildirilmişdir. Bu müddət ərzində 29 manat dəbbə pulu hesablanmış, üstəlik xx.xx.2025-ci il tarixdən avtomobilə həbs qoyulacaqdır. Göstərilənləri nəzərə alaraq EQ26716477 saylı inzibati aktın ləğv edilməsi və tətbiq edilmiş 129 AZN məbləğində cərimə və 2 cərimə balının aradan qaldırılması barədə qərar qəbul edilməsi xahiş edilmişdir. Məhkəmə iclasında iştirak edən şikayət vermiş şəxs X2 yuxarıda göstərilən məzmunda izahat verərək şikayətinin təmin edilməsini, Azərbaycan Respublikası DİN Baş X4 İdarəsi tərəfindən qəbul edilmiş xx.xx.2025-ci il tarixli, EQ 26716477 saylı inzibati tənbeh vermə haqqında qərarın ləğv edilməsini məhkəmədən xahiş etmişdir. Məhkəmə iclasının vaxtı və yeri barədə lazımi qaydada məlumat verilməsinə baxmayaraq Azərbaycan Respublikası DİN BDYPİ-nin nümayəndəsi məhkəmə iclasına gəlməmişdir. Məhkəmə Azərbaycan Respublikası DİN BDYPİ-nin nümayəndəsinin iştirakı olmadan məhkəmə iclasının keçirilməsini mümkün hesab etmişdir. Məhkəmə şikayət vermiş şəxsin izahatını dinləyib, şikayəti və təqdim olunmuş materialları nəzərdən keçirərək hesab edir ki, şikayət əsassız olduğundan təmin olunmamalıdır. İş materiallarında olan Azərbaycan Respublikası DİN BDYPİ tərəfindən tərtib edilmiş xx.xx.2025-ci il tarixli, EQ 26716477 nömrəli inzibati xəta haqqında qərardan görünür ki, X2 xx.xx.2025-ci il tarixdə saat 09:58-də idarə etdiyi “FİAT DOBLO XÜSUSİ.TƏY.” markalı, **-AJ-*** dövlət qeydiyyat nişanlı avtomobillə İnzibati Xətalar Məcəlləsinin 327.1-1-ci maddəsində nəzərdə tutulan inzibati xətanı törətmiş və həmin maddədə nəzərdə tutulan inzibati xətanı törətdiyi üçün 100 manat məbləğində cərimə edilmişdir. İş materiallarına əlavə edilmiş Bakı şəhər Baş Polis İdarəsi X4 İdarəsinin xx.xx.2025ci il tarixli məktubundan görünür ki, Rəşad Zeynalovun Azərbaycan Respublikası DİN Baş X4 İdarəsinin rəhbərliyinə ünvanlanmış müraciətə baxılmış və inzibati xətanın aşkar olunması və sənədləşməsində hüquqazidd hərəkətlərə yol verilməsi halları müəyyən edilməmişdir. X2 tərəfindən təqdim olunan videogörüntüyə məhkəmə iclasında baxış zamanı qeyd olunan inzibati xətanın törədilməsi təsdiq edilir. 327.1-1-ci maddəsinə əsasən “Yol hərəkəti haqqında” Azərbaycan Respublikası Qanununun yol verdiyi hallar istisna olmaqla, 5.9, 5.10.1–5.10.3 nişanları ilə işarələnmiş, ümumi istifadədə olan nəqliyyat vasitələri üçün nəzərdə tutulmuş hərəkət zolağı olan yollarda hərəkət edən digər nəqliyyat vasitələrinin həmin zolaqda hərəkət etməsinə görə - yüz manat məbləğində cərimə edilir. Azərbaycan Respublikasının İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və hərəkətsizlik) törətmiş şəxs inzibati məsuliyyətə cəlb olunur və tənbeh edilir. Həmin Məcəllənin 12-ci maddəsinə əsasən həmin Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Azərbaycan Respublikasının İnzibati Xətalar Məcəlləsinin 21-ci maddəsinə əsasən, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Həmin Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Həmin Məcəllənin 128-ci maddəsinə əsasən barəsində qərar çıxarılmış fiziki şəxs inzibati xəta haqqında iş üzrə qərardan səlahiyyətli orqanın (vəzifəli şəxsin) qərarından yuxarı səlahiyyətli orqana (vəzifəli şəxsə) və ya məhkəməyə şikayət verə bilər. Həmin Məcəllənin 133.2.8-ci maddəsinə görə inzibati xəta haqqında iş üzrə qərardan verilən şikayətə və ya protestə baxılarkən qəbul edilmiş qərarın qanuniliyi və əsaslılığı iş üzrə olan və əlavə təqdim edilmiş materiallar əsasında yoxlanılır. Həmin Məcəlləsinin Azərbaycan Respublikası İnzibati Xətalar Məcəlləsinin 134.1.1-ci maddəsinə əsasən məhkəmə qərardan şikayətə baxarkən qərarın dəyişdirilmədən, şikayətin və ya protestin isə təmin edilmədən saxlanılması haqqında qərar qəbul edir. Beləliklə, məhkəmə hesab edir ki, X2 tərəfindən Azərbaycan Respublikasının İnzibati Xətalar Məcəlləsinin 327.1-1-ci maddəsi ilə inzibati xəta hadisəsinin törədilməsi iş materiallarında olan sübutlar ilə öz təsdiqini tapmışdır. Ona görə də X2 barəsində Azərbaycan Respublikası DİN Baş X4 İdarəsitərəfindən qəbul edilmiş xx.xx.2025-ci il tarixli, EQ 26716477 saylı inzibati tənbeh vermə haqqında qərarı qanunidir, şikayət əsassız olduğundan təmin edilməməli, barəsində şikayət verilən qərar dəyişdirilmədən saxlanılmalıdır. Göstərilənlərə əsasən və Azərbaycan Respublikasının İnzibati Xətalar Məcəlləsinin 128-130, 133-135-ci maddələrini rəhbər tutaraq, məhkəmə QƏRARA ALDİ: X1 Azərbaycan Respublikası DİN Baş X4 İdarəsi tərəfindən qəbul edilmiş xx.xx.2025-ci il tarixli, EQ 26716477 saylı inzibati tənbeh vermə haqqında qərardan verdiyi şikayət təmin edilməsin və qeyd edilən qərar dəyişdirilmədən saxlanılsın. Qərardan, onun surəti rəsmi qaydada verildiyi andan 10 gün müddətində Bakı şəhəri Nəsimi Rayon Məhkəməsi vasitəsi ilə Bakı Apellyasiya Məhkəməsinə şikayət verilə bilər. Sədrlik edən Solmaz Mustafayeva