Bakı Şəhəri Nəsimi Rayon Məhkəməsi Qərardad — İş №3(006)-4177/2023

Azərbaycan Respublikası adından QƏRARDAD Bakı şəhəri İş № 3(006)-4177/2023 08.09.2023 BAKI ŞƏHƏRİ NƏSİMİ RAYON MƏHKƏMƏSİ Mən, Bakı şəhəri Nəsimi Rayon Məhkəməsinin hakimi Pənahov Babək Əkbər oğlu, Bakı şəhəri Nəsimi Rayon Polis İdarəsi Dövlət Yol Polisi Şöbəsi tərəfindən Şəxs barəsində Azərbaycan Respublikası İnzibati Xətalar Məcəlləsinin 338.7-cü maddəsi üzrə tərtib olunmuş xx.xx.2023-cü il tarixli, İXP ******* saylı inzibati xəta haqqında protokolu və ona əlavə edilmiş sənədləri məhkəmə iclasında baxılmağa hazırlayarkən M Ü Ə Y Y Ə N E T D İ M: Protokola əsasən xx.xx.2006-cı il təvəllüdlü Şəxs xx.xx.2023-cü il tarixdə idarə etdiyi “Moon ZX50” markalı, 49m3 mühərrikli mopedlə ünvan 1 ünvanda hərəkətdə olarkən manevr qaydalarını pozduğu üçün eyni istiqamət üzrə hərəkət edən “Chevrolet Lacetti” markalı, **-UJ-*** dövlət qeydiyyat nişanlı avtomobil ilə toqquşmuş, nəticədə mopeddə olan sərnişin X1 yüngül dərəcəli bədən xəsarəti almışdır. İşin hallarından görünür ki, Şəxs hadisəni törədən və barəsində inzibati xəta haqqında protokol tərtib edilən zaman yetkinlik yaşına çatmamışdır. Azərbaycan Respublikası İnzibati Xətalar Məcəlləsinin 110.2-ci madəsinə əsasən yetkinlik yaşına çatmayanlar barəsində inzibati xətalar haqqında işlərə şəxsin yaşadığı yer üzrə baxılır. “Yaşayış yeri və olduğu yer üzrə qeydiyyat haqqında” Azərbaycan Respublikası Qanununun 3-cü maddəsinin 1-ci bəndinə əsasən Azərbaycan Respublikası vətəndaşının yaşayış yeri yalnız Azərbaycan Respublikası vətəndaşının şəxsiyyət vəsiqəsi ilə müəyyən edilir. Həm iş materiallarından, həm də “AZEMİS” Elektron Məhkəmə İnformasiya Sistemindən əldə olunmuş məlumata əsasən barəsində icraat aparılan yetkinlik yaşına çatmayan Şəxs yaşayış yeri Saatlı rayonu, Qazanbatan kəndidir. İnzibati Xətalar Məcəlləsinin 11.1-ci maddəsinə görə Azərbaycan Respublikasında inzibati xətalar haqqında işlər üzrə icraatın aparılması, inzibati xətalar haqqında işlər üzrə qərarların qəbul və icra edilməsi həmin vaxtda qüvvədə olan Azərbaycan Respublikasının inzibati xətalar qanunvericiliyinə uyğun olaraq həyata keçirilir. Göstərilənlərlə əlaqədar hesab edirəm ki, barəsində icraat aparılan şəxs inzibati xəta hadisəsi baş verən zaman yetkinlik yaşına çatmadığından və onun haqqında inzibati xəta haqqında işə yaşadığı yer üzrə baxılması nəzərdə tutulduğundan, hazırki protokol baxılması üçün Saatlı Rayon Məhkəməsinə göndərilməlidir. İnzibati Xətalar Məcəlləsinin 106.0.1-ci maddəsinə görə hakim, səlahiyyətli orqan (vəzifəli şəxs) inzibati xətalar haqqında işlərə baxarkən işin baxılmasının onun səlahiyyətinə aid olub-olmaması məsələlərini həll edir. Həmin Məcəllənin 109.1.7-ci maddəsinə əsasən inzibati xəta haqqında işin baxılmağa hazırlanması əgər bu məsələnin baxılması hakimin, orqanın (vəzifəli şəxsin) səlahiyyətinə aid deyildirsə, yaxud hakimə, kollegial orqanın üzvünə, vəzifəli şəxsə etiraz etmə barədə qərardad çıxarılmışdırsa, inzibati xəta haqqında protokolun və ya digər materialların baxılması üçün aidiyyəti üzrə göndərilməsi barədə qərardad qəbul edilir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 106, 109-110-cu maddələrini rəhbər tutaraq Q Ə R A R A A L D İ M: Bakı şəhəri Nəsimi Rayon Polis İdarəsi Dövlət Yol Polisi Şöbəsi tərəfindən Şəxs barəsində Azərbaycan Respublikası İnzibati Xətalar Məcəlləsinin 338.7-cü maddəsi üzrə tərtib olunmuş xx.xx.2023-cü il tarixli, İXP ******* saylı inzibati xəta haqqında protokol və ona əlavə edilmiş sənədlər aidiyyəti üzrə Saatlı Rayon Məhkəməsinə göndərilsin. Hakim Babək Pənahov