Bakı Şəhəri Nəsimi Rayon Məhkəməsi Qərardad — İş №3(006)-4559/2022

Azərbaycan Respublikası adından QƏRARDAD Bakı şəhəri İş № 3(006)-4559/2022 13.12.2022 BAKI ŞƏHƏRİ NƏSİMİ RAYON MƏHKƏMƏSİ Mən, Bakı şəhəri Nəsimi Rayon Məhkəməsinin hakimi Pənahov Babək Əkbər oğlu, Bakı şəhəri Nəsimi rayon İcra şöbəsinin icra məmuru tərəfindən "xxxx" ASC barəsində Azərbaycan Respublikası İnzibati Xətalar Məcəlləsinin 528.1-ci maddəsi üzrə tərtib olunmuş xx.xx.2022-ci il tarixli, MN ******* saylı inzibati xəta haqqında protokolu və ona əlavə edilmiş sənədləri məhkəmə iclasında baxılmağa hazırlayarkən M Ü Ə Y Y Ə N E T D İ M: İnzibati xəta haqqında protokola əsasən "xxxx" ASC Bakı şəhər Xəzər Rayon Məhkəməsinin xx.xx.2022-ci il tarixli, 2(003)-325/2022 saylı icra vərəqəsinin icrası ilə bağlı icra məmurunun qanuni tələblərini yerinə yetirməmişdir. Eyni zamanda protokoldan aydın olur ki, barəsində icraat aparılan hüquqi şəxsin nümayəndəsi onun tərtibatı zamanı iştirak etməmiş, icra məmuru tərəfindən aparılmış qeyddə isə "xxxx" ASC-nin səlahiyyətli nümayəndəsinin dəvət olunmasına baxmayaraq, onun gəlməməsi göstərilmişdir. Lakin, məhkəməyə inzibati xəta haqqında protokolun tərtib edilməsi haqqında barəsində icraat aparılan "xxxx" ASC-yə bu barədə verilmiş məlumatın rəsmi qaydada çatdırılmasını təsdiq edən sənədlər təqdim edilməmişdir. Bundan əlavə, işdə olan "xxxx" ASC tərəfindən Bakı şəhəri Nəsimi rayon İcra şöbəsinə ünvanlanmış xx.xx.2022-ci il tarixli, 01/522 saylı məktubda yuxarıda göstərilən icra sənədinin icra olunduğu qeyd edilmişdir. İnzibati Xətalar Məcəlləsinin 109.1.6-cı maddəsinə görə inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barəsində qərardad qəbul edilir. Yuxarıda sadalanları nəzərə alaraq hesab edirəm ki, təqdim edilmiş inzibati xəta haqqında protokol qanunvericiyilin tələblərinə riayət olunmaqla tərtib edilmədiyi üçün protokol ona əlavə edilmiş sənədlərlə birlikdə onu tərtib etmiş orqana geri qaytarılmalıdır. Göstərilənlərə əsasən və Azərbaycan Respublikası İnzibati Xətalar Məcəlləsinin 109cu maddəsini rəhbər tutaraq Q Ə R A R A A L D İ M: "xxxx" ASC barəsində Azərbaycan Respublikası İnzibati Xətalar Məcəlləsinin 528.1ci maddəsi üzrə tərtib olunmuş xx.xx.2022-ci il tarixli, MN ******* saylı inzibati xəta haqqında protokol ona əlavə edilmiş sənədlərlə birlikdə geri qaytarılsın. Hakim Babək Pənahov