Bakı Şəhəri Nəsimi Rayon Məhkəməsi Qərar — İş №3(006)-4741/2023

Azərbaycan Respublikası adından QƏRAR Bakı şəhəri İş № 3(006)-4741/2023 23.10.2023 BAKI ŞƏHƏRİ NƏSİMİ RAYON MƏHKƏMƏSİ Hakim Hüseynov Elməddin Mirpaşa oğlunun sədrliyi, Mustafayeva İlhamə Mövlan qızının katibliyi, barəsində inzibati xəta haqqında iş üzrə icraat aparılan hüquqi şəxs «X5» ASC-nin nümayəndəsi Nümayəndə iştirakları ilə, «X5» Açıq Səhmdar Cəmiyyəti (hüquqi ünvanı: Bakı şəhəri, Nəsimi rayonu, Rəşid Behbudov, ev 55, məhəllə 384; VÖEN: **********) barəsində Bakı şəhəri Nəsimi rayon İcra şöbəsindən daxil olmuş inzibati xəta haqqında işə açıq məhkəmə iclasında baxaraq, MÜƏYYƏN ETDİ: Nəsimi rayon İcra Şöbəsinin icra məmuru X1 tərtib etdiyi xx.xx.2023-cü il tarixli, MN ******* saylı inzibati xəta haqqında protokola görə Bakı şəhəri Nəsimi Rayon Məhkəməsinin xx.xx.2022-ci il tarixli, 2(006)-1183/2022 saylı icra vərəqəsinə əsasən «X5» ASC tərəfindən X3 xx.xx.2014-cü il tarixli kredit müqaviləsi üzrə əsassız hesablanmış 878,93 ABŞ dolları məbləğində qalıq borcun silinməsi, «X5» ASC-dən ödənilmiş 35 manat dövlət rüsumunun əvəzinin X2 xeyrinə tutulması qət edilmişdir. Lakin borclu öz üzərinə düşən vəzifələri icra etməmiş, icra sənədi üzrə icra məmurunun qanuni tələbini yerinə yetirməmişdir. Bununla da, o, Azərbaycan Respublikası İnzibati Xətalar Məcəlləsinin 528.1-ci maddəsində nəzərdə tutulmuş inzibati xətanı törətmişdir. Məhkəmə iclasının vaxtı və yeri barədə protokol tərtib etmiş orqan Nəsimi rayon İcra Şöbəsinin icra məmuruna və X3 qanunla nəzərdə tutulmuş qaydada poçt vasitəsi ilə bildiriş göndərilmişdir. Lakin tərəflər məhkəmə iclasına gəlməmiş və onlardan işə baxılmasının təxirə salınması barədə vəsatət daxil olmamışdır. Məhkəmə işə Nəsimi rayon İcra Şöbəsinin icra məmurunun və X2 iştirakı olmadan baxılmasını mümkün hesab edir. Məhkəmə iclasında barəsində inzibati xəta haqqında iş üzrə icraat aparılan hüquqi şəxs «X5» ASC-nin nümayəndəsi Nümayəndə bildirmişdir ki, Bakı şəhəri Nəsimi Rayon Məhkəməsinin xx.xx.2022-ci il tarixli, 2(006)-1183/2022 saylı qətnaməsi Bakı Apellyasiya Məhkəməsinin 2(103)-836/2023 saylı, 27 yanvar 2023-cü il tarixli Qərarına əsasən ləğv edildiyindən və həmin qərar üzrə X2 "xxxx" KB ASC-yə xx.xx.2014-cü il tarixli 1278nkBAY/14 nömrəli kredit müqaviləsi üzrə borcunun tam ödənildiyi və həmin müqavilə üzrə 878,93 ABŞ dolları borcun olmadığı müəyyən edildiyindən protokol tam olaraq əsassızdır. Qeyd olunanları nəzərə alaraq, iş üzrə icraata xitam verilməsini məhkəmədən xahiş etmişdir. Məhkəmə proses iştirakçısının izahatını dinləyib toplanmış sübutlara məcmu halda hüquqi qiymət verərək hesab edir ki, «X5» ASC-nin barəsində Azərbaycan Respublikasının İXM-nin 528.1-ci maddəsi ilə olan inzibati xəta haqqında iş üzrə icraata xitam verilməlidir. Belə ki, iş materiallarında olan Bakı şəhəri Nəsimi Rayon Məhkəməsinin xx.xx.2022-ci il tarixli, 2(006)-1183/2022 saylı icra vərəqəsindən görünür ki, «X5» ASC tərəfindən X3 xx.xx.2014-cü il tarixli kredit müqaviləsi üzrə əsassız hesablanmış 878,93 ABŞ dolları məbləğində qalıq borcun silinməsi, «X5» ASC-dən ödənilmiş 35 manat dövlət rüsumunun əvəzinin X2 xeyrinə tutulması qət edilmişdir. İş materiallarında olan Bakı Apellyasiya Məhkəməsinin 2(103)-836/2023 saylı, 27 yanvar 2023-cü il tarixli qərarından görünür ki, Bakı şəhəri Nəsimi Rayon Məhkəməsinin xx.xx.2022-ci il tarixli, 2(006)-1183/2022 saylı qərarı ləğv edilmiş, X2 "xxxx" KB ASC-yə xx.xx.2014-cü il tarixli 1278nkBAY/14 nömrəli kredit müqaviləsi üzrə borcunun tam ödənildiyi və həmin müqavilə üzrə 878,93 ABŞ dolları borcun olmadığı müəyyən edilmiş, iddia ərziəsinin verilməsinə görə ödənilmiş dövlət rüsumunun əvəzi kimi 35 manat "xxxx" KB ASC-dən alınaraq X3 verilməsi qərara alınmışdır. Azərbaycan Respublikasının İXM-nin 528.1-ci maddəsinə əsasən, məhkəmə və ya digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə - fiziki şəxslər beş yüz manatdan min manatadək məbləğdə cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, vəzifəli şəxslər min iki yüz manatdan iki min beş yüz manatadək məbləğdə, hüquqi şəxslər üç min manatdan beş min manatadək məbləğdə cərimə edilir. Beləliklə, məhkəmə araşdırması zamanı müəyyən edilmişdir ki, Bakı şəhəri Nəsimi Rayon Məhkəməsinin xx.xx.2022-ci il tarixli, 2(006)-1183/2022 saylı icra sənədi Bakı Apellyasiya Məhkəməsinin 2(103)-836/2023 saylı, 27 yanvar 2023-cü il tarixli qərarına əsasən ləğv edildiyindən icra sənədi üzrə «X5» ASC tərəfindən hər hansı icra tələbinin yerinə yetirilməsi zərurəti yoxdur . İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 8-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İnzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İnzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Bu Məcəllənin 53.1.1-ci maddəsinin tələbinə görə inzibati xəta hadisəsi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Qeyd edilən Məcəllənin 105.1-ci maddəsinə görə bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Göstərilənlərə əsasən məhkəmə hesab edir ki, borclu «X5» ASC tərəfindən məhkəmə qərarı icra edildiyindən inzibati xəta haqqında iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 53-cü və 105-ci maddələrini rəhbər tutaraq məhkəmə QƏRARA ALDİ: «X5» ASC barəsində Azərbaycan Respublikası İnzibati Xətalar Məcəlləsinin 528.1ci maddəsi ilə başlanılmış inzibati xəta haqqında iş üzrə icraata xitam verilsin. Qərardan, onun surəti rəsmi qaydada verildiyi vaxtdan 10 (on) gün müddətində Bakı şəhəri Nəsimi Rayon Məhkəməsi vasitəsilə Bakı Apellyasiya Məhkəməsinə şikayət verilə bilər. Hakim: Elməddin Hüseynov