Bakı Şəhəri Nəsimi Rayon Məhkəməsi Qərar — İş №3(006)-4867/2023

Azərbaycan Respublikası adından QƏRAR Bakı şəhəri İş № 3(006)-4867/2023 23.10.2023 BAKI ŞƏHƏRİ NƏSİMİ RAYON MƏHKƏMƏSİ Nəsimi rayon məhkəməsinin hakimi Hüseynov Elməddin Mirpaşa oğlunun sədrliyi, məhkəmə iclas katibi Mehdiyev Nihal Elbəyi oğlunun katibliyi, Bakı şəhəri Nəsimi Rayon İcra şöbəsinin icra məmuru X4, barəsində inzibati xəta haqqında iş üzrə icraat aparılan şəxs Şəxs, zərərçəkmiş şəxs X2 iştirakları ilə xx.xx.1987-ci ildə Bakı şəhərində doğulmuş, Azərbaycan Respublikasının vətəndaşı, ali təhsilli, "xxxx" MMC-də icraçı direktor işləyən, evli, ünvan 1 ünvanında qeydiyyatda olan və yaşayan Şəxs barəsində Bakı şəhəri Nəsimi rayon İcra Şöbəsindən daxil olmuş inzibati xəta haqqında materiallara baxaraq, məhkəmə müəyyən etdi: Bakı şəhəri, Nəsimi rayon İcra Şöbəsinin icra məmuru X7 tərəfindən Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə inzibati xəta haqqında protokol tərtib edilmişdir ona görə ki, Bakı şəhəri Nəsimi rayon məhkəməsinin 2(006)-1265/2021 saylı, 27 yanvar 2021-ci il tarixli və Bakı şəhəri Nəsimi rayon məhkəməsinin e-2(006)-1645/2023 saylı, 13 aprel 2023-cü il tarixli icra vərəqələrinin icra edilməsi ilə bağlı icra məmurunun qanuni tələblərini yerinə yetirməmişdir. Barəsində inzibati xəta haqqında iş üzrə icraat aparılan Şəxs məhkəmə iclasında barəsində tərtib olunmuş inzibati xəta haqqında protokolla razılaşmayaraq verdiyi izahatında göstərdi ki, Bakı şəhəri Nəsimi rayon məhkəməsinin 2(006)-1265/2021 saylı, 27 yanvar 2021-ci il tarixli və və həmin məhkəmənin e-2(006)-1645/2023 saylı, 13 aprel 2023-cü il tarixli icra sənədləri barədə xəbərdar olmuş və aliment üzrə ödənişi tam olaraq icra edir. Əvvəllər maddi imkanı yaxşı olmadığından və həmçinin işləmədiyi üçün aliment üzrə ödənişləri tam olaraq ödəyə bilməmişdir. O, heç zaman alimenti ödəməkdən boyun qaçırmamış, sadəcə olaraq maddi imkanı onu vaxtı-vaxtında alimenti ödəməyə imkan verməmişdir. Qeyd olunanları nəzərə alaraq, barəsində olan inzibati xəta haqında iş üzrə icraata xitam verilməsini xahiş etmişdir. Məhkəmə iclasında zərərçəkmiş şəxs X5 verdiyi izahatında göstərdi ki, Bakı şəhəri Nəsimi rayon məhkəməsinin 2(006)-1265/2021 saylı, 27 yanvar 2021-ci il tarixli icra sənədinə əsasən xx.xx.2015-ci il təvəllüdlü X1 üçün 20 noyabr 2020-ci il tarixdən başlayaraq hər ay 170 manat sabit pul məbləğində alimentin Şəxs tutularaq onun xeyrinə ödənilməsi qət edilmişdir. Bundan əlavə, Bakı şəhəri Nəsimi rayon məhkəməsinin e- 2(006)-1645/2023 saylı, 13 aprel 2023-cü il tarixli icra sənədinə əsasən alimentin miqdarı artırılaraq 220 manat müəyyən olunmuşdur. Lakin qətnamələr qanuni qüvvəsini aldıqdan sonra aliment üzrə ona ödənişlər vaxtında verilməmiş, yalnız az bir hissəsi ödənilmişdir. Buna görə də, uşağının maddi ehtiyaclarını qarşılamaq ona çətin olduğundan aliment üzrə ödənişlərin tam olaraq ödənilməsini istəmişdir. Hal-hazırda Şəxs qarşı şikayətçi olmadığını bildirərək qanuna müvafiq qərarın qəbul edilməsini xahiş edir. Məhkəmədə Bakı şəhəri Nəsimi Rayon İcra şöbəsinin icra məmuru X6 verdiyi izahatında göstərmişdir ki, Bakı şəhəri Nəsimi rayon məhkəməsinin 2(006)-1265/2021 saylı, 27 yanvar 2021-ci il tarixli icra sənədinə əsasən xx.xx.2015-ci il təvəllüdlü X1 üçün 20 noyabr 2020-ci il tarixdən başlayaraq hər ay 170 manat sabit pul məbləğində alimentin Şəxs tutularaq X2 xeyrinə ödənilməsi qət edilmişdir. Bundan əlavə, Bakı şəhəri Nəsimi rayon məhkəməsinin e-2(006)-1645/2023 saylı, 13 aprel 2023-cü il tarixli icra sənədinə əsasən alimentin miqdarı artırılaraq 220 manat müəyyən olunmuşdur. İcraata başlamaq haqqında qərarlar qəbul edilərək, tələbin könüllü qaydada icrasının təmin edilməsi üçün borclunun ünvanına bildirişlər göndərilmişdir. Görülmüş tədbirlərə və dəfələrlə edilmiş xəbərdarlıqlara baxmayaraq, borclu tərəfindən tələbkara pul tam olaraq ödənilməmiş və barəsində xx.xx.2023-cü il tarixli, MN ******* saylı inzibati xəta haqqında protokol tərtib edilmişdir. Tələbkar borcun tam olaraq ödənilməsini tələb edir. Sonda Şəxs barəsində tərtib edilmiş inzibati xəta haqqında protokolu müdafiə etdiyini bildirmişdir. Məhkəmə işdə iştirak edən şəxsləri dinləyib, iş materiallarını araşdıraraq hesab edir ki, inzibati xəta haqqında iş üzrə icraata xitam verilməlidir. Belə ki, təqdim edilmiş icra işinin materiallarından görünür ki, Bakı şəhəri Nəsimi rayon məhkəməsinin 2(006)-1265/2021 saylı, 27 yanvar 2021-ci il tarixli icra sənədinə əsasən xx.xx.2015-ci il təvəllüdlü X1 üçün 20 noyabr 2020-ci il tarixdən başlayaraq hər ay 170 manat sabit pul məbləğində alimentin Şəxs tutularaq onun xeyrinə ödənilməsi qət edilmişdir. Bundan əlavə, Bakı şəhəri Nəsimi rayon məhkəməsinin e-2(006)-1645/2023 saylı, 13 aprel 2023-cü il tarixli icra sənədinə əsasən X1 üçün Bakı şəhəri Nəsimi rayon məhkəməsinin 2(006)-1265/2021 saylı, 27 yanvar 2021-ci il tarixli qətnaməsi ilə tutulan alimentin miqdarı dəyişdirilərək, cavabdeh Şəxs hər ay 220 manat sabit pul məbləğində alimentin tutularaq X2 xeyrinə ödənilməsi qət edilmişdir. İş materiallarına əlavə edilmiş 23 oktyabr 2023-cü il tarixli alimentin alınması haqqında qəbzdən görünür ki, Şəxs təqdim etdiyi aliment üzrə 2780 manat məbləğində ödəniş X5 tərəfindən qəbul edilmişdir. Azərbaycan Respublikası İnzibati Xətalar Məcəlləsinin 528.1-ci maddəsi məhkəmə və ya digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə məsuliyyəti müəyyən edir. Həmin Məcəllənin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 8-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İnzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İnzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Şəxs icra sənədinin icrası ilə bağlı icra məmurunun hansı qanuni tələbini yerinə yetirməməsi məhkəmə araşdrılması zamanı müəyyən edilməmiş, bu barədə mötəbər sübutlar məhkəməyə təqdim edilməmişdir. Azərbaycan Respublikası İnzibati Xətalar Məcəlləsinin 53.1.2-ci maddəsinin tələbinə görə inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Qeyd edilən Məcəllənin 105.1-ci maddəsinə görə bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Göstərilənlərə əsasən məhkəmə hesab edir ki, Şəxs icra sənədinin icrası ilə bağlı icra məmurunun qanuni tələblərini yerinə yetirməməsi məhkəmə araşdırması zamanı öz təsdiqini tapmadığından və bununla da onun hərəkətlərində inzibati xətanın tərkibi olmadığından inzibati xəta haqqında iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 53, 105, 114-115, 117, 129 və 130-cu maddələrini rəhbər tutaraq məhkəmə qərara aldı: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə başlanılmış inzibati xəta haqqında iş üzrə icraata xitam verilsin. Qərarın surəti rəsmi qaydada verildiyi gündən 10 (on) gün müddətində Nəsimi rayon Məhkəməsinə Nəsimi rayon məhkəməsi vasitəsi ilə şikayət verilə bilər. Hakim: Elməddin Hüseynov