Bakı Şəhəri Nəsimi Rayon Məhkəməsi Qərar — İş №3(006)-5079/2024

Azərbaycan Respublikası adından QƏRAR Bakı şəhəri İş № 3(006)-5079/2024 28.12.2024 BAKI ŞƏHƏRİ NƏSİMİ RAYON MƏHKƏMƏSİ Nəsimi rayon məhkəməsinin hakimi Hüseynov Elməddin Mirpaşa oğlunun sədrliyi, məhkəmə iclas katibi Mustafayeva İlhamə Mövlan qızının katibliyi, Bakı şəhəri Nəsimi Rayon İcra şöbəsinin icra məmuru X7, zərərçəkmiş şəxs X2 nümayəndəsi X3, barəsində inzibati xəta haqqında iş üzrə icraat aparılan şəxs Şəxs iştirakları ilə, xx xxxxxx 1988-ci ildə Masallı rayonu, Hüseynhacılı kəndində doğulmuş, Azərbaycan Respublikası vətəndaşı, orta təhsilli, evli, fərdi əməklə məşğul olan, ünvan 1 ünvanında qeydiyyatda olan Şəxs barəsində Bakı şəhəri Nəsimi rayon İcra Şöbəsindən daxil olmuş inzibati xəta haqqında materiallara baxaraq, məhkəmə müəyyən etdi: Bakı şəhəri, Nəsimi rayon İcra Şöbəsinin icra məmuru X12 tərəfindən Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə inzibati xəta haqqında protokol tərtib edilmişdir ona görə ki, Masallı Rayon Məhkəməsi 2(050)-179/2020 saylı, xx.xx.2020-ci il tarixli və həmin məhkəmənin 2(050)-168/2024 saylı, xx.xx.2024-cü il tarixli icra vərəqələrinin icra edilməsi ilə bağlı icra məmurunun qanuni tələblərini yerinə yetirməmişdir. Məhkəmə iclasında barəsində inzibati xəta haqqında iş üzrə icraat aparılan Şəxs izahatında göstərdi ki, Masallı Rayon Məhkəməsi 2(050)-179/2020 saylı, xx.xx.2020-ci il tarixli və həmin məhkəmənin 2(050)-168/2024 saylı, xx.xx.2024-cü il tarixli icra sənədləri barədə xəbərdar olmuş, əvvəllər hər ay müvafiq ödənişləri etmiş, lakin sonradan bir müddət işsiz olduğundan aliment üzrə ödənişləri tam ödəyə bilməmişdir. Bundan əlavə, o, ikinci dəfə ailə qurduğuna görə maddi problemləri yaranmışdır. Lakin hal-hazırda işləyir və ödənişləri hər ay ödəməkdə davam edəcəkdir. Qeyd olunanları nəzərə alaraq, barəsində olan inzibati xəta haqında iş üzrə icraata xitam verilməsini xahiş etmişdir. Məhkəmə iclasında X2 nümayəndəsi X9 verdiyi izahatında göstərdi ki, Şəxs Masallı Rayon Məhkəməsi 2(050)-179/2020 saylı, xx.xx.2020-ci il tarixli və həmin məhkəmənin 2(050)-168/2024 saylı, xx.xx.2024-cü il tarixli icra sənədlərini icra etməyərək, aliment borcunu tam olaraq ödəmir. Belə ki, əvvəlllər borclu tərəfindən aliment üzrə ödənişlər müəyyən məbləğdə edilsə də, borclu tərəfindən 2024-cü ilin may ayından etibarən aliment üzrə ödənişlər edilməmişdir. Bundan əlavə, 2022-ci ildən 2023-cü ilin may ayına qədər aliment ödənişləri edilməmişdir. Qeyd olunanları nəzərə alaraq, X13 barəsində qanuna müvafiq qərarın qəbul edilməsini xahiş edir. Məhkəmədə Bakı şəhəri Nəsimi Rayon İcra şöbəsinin icra məmuru X12 verdiyi izahatında göstərmişdir ki, Masallı Rayon Məhkəməsi 2(050)-179/2020 saylı, xx.xx.2020-ci il tarixli icra sənədinə əsasən Şəxs 12 aprel 2014-cü il təvəllüdlü X10 və 12 noyabr 2015-ci il təvəllüdlü X11 adlı uşaqların yetkinlik yaşına çatanadək saxlanılmaları üçün 20 fevral 2020-ci il tarixdən başlayaraq hər ay aylıq qazancının və ya başqa gəlirlərinin üçdə bir hissəsi miqdarında alimentin tutularaq X4 ödənilməsi qət edilmişdir. Bundan başqa, Masallı Rayon Məhkəməsi 2(050)-168/2024 saylı, xx.xx.2024-cü il tarixli icra sənədinə əsasən Şəxs 12 aprel 2014-cü il təvəllüdlü X5 və 12 noyabr 2015-ci il təvəllüdlü X1 üçün müəyyən edilmiş aliment miqdarı hər ay bir uşaq üçün 190 manat, ümumilikdə 380 manat müəyyən olunmaqla alınaraq X4 ödənilməsi qət edilmişdir. İcraata başlamaq haqqında qərarlar qəbul edilərək, tələbin könüllü qaydada icrasının təmin edilməsi üçün borclunun ünvanına bildirişlər göndərilmişdir. Şəxs bugünədək borcunun müəyyən hissəsini ödəmişdir. Görülmüş tədbirlərə və dəfələrlə edilmiş xəbərdarlıqlara baxmayaraq, imkanı olmamasını əsas gətirərək icra sənədini tam icra etməmişdir. Buna görə də, Şəxs barəsində xx.xx.2024-cü il tarixli, MN ******* saylı inzibati xəta haqqında protokol tərtib edilmişdir. Tələbkar uşağın saxlanması üçün aliment borcunun tam olaraq ödənilməsini tələb edir. Sonda Şəxs barəsində tərtib edilmiş inzibati xəta haqqında protokolu müdafiə etdiyini bildirmişdir. Məhkəmə işdə iştirak edən şəxsləri dinləyib, iş materiallarını araşdıraraq hesab edir ki, inzibati xəta haqqında iş üzrə icraata xitam verilməlidir. Belə ki, təqdim edilmiş icra işinin materiallarından görünür ki, Masallı Rayon Məhkəməsi 2(050)-179/2020 saylı, xx.xx.2020-ci il tarixli icra sənədinə əsasən Şəxs 12 aprel 2014-cü il təvəllüdlü X10 və 12 noyabr 2015-ci il təvəllüdlü X11 adlı uşaqların yetkinlik yaşına çatanadək saxlanılmaları üçün 20 fevral 2020-ci il tarixdən başlayaraq hər ay aylıq qazancının və ya başqa gəlirlərinin üçdə bir hissəsi miqdarında alimentin tutularaq X4 ödənilməsi qət edilmişdir. Təqdim edilmiş icra işinin materiallarından görünür ki, Masallı Rayon Məhkəməsi 2(050)-168/2024 saylı, xx.xx.2024-cü il tarixli icra sənədinə əsasən Şəxs 12 aprel 2014-cü il təvəllüdlü X5 və 12 noyabr 2015-ci il təvəllüdlü X1 üçün müəyyən edilmiş aliment miqdarı hər ay bir uşaq üçün 190 manat, ümumilikdə 380 manat müəyyən olunmaqla alınaraq X4 ödənilməsi qət edilmişdir. İş materiallarına əlavə edilmiş qəbzlərdən görünür ki, Şəxs tərəfindən müxtəlif tarixlərdə aliment üzrə ödənişlər edilmişdir. Azərbaycan Respublikası İnzibati Xətalar Məcəlləsinin 528.1-ci maddəsi məhkəmə və ya digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə məsuliyyəti müəyyən edir. Məhkəmə icra məmurunun, barəsində inzibati xəta haqqında iş üzrə icraat aparılan şəxsin, zərərçəkmiş şəxsin izahatlarını, eləcə də inzibati materialda olan sənədləri nəzərə alıb, icra işini nəzərdən keçirərək, iş üzrə sübutları qiymətləndirərək hesab edir ki, Şəxs əməlində Azərbaycan Respublikası İnzibati Xətalar Məcəlləsinin 528.1-ci maddəsində nəzərdə tutulmuş inzibati xətanın tərkibi mövcud deyil. Belə ki, məhkəmə iclasında barəsində inzibati qaydada icraat aparılan şəxsin və icra məmurunun izahatları əsasında, o cümlədən, məhkəməyə təqdim edilmiş icra işində olan sənədlərlə alimentin müəyyən hissəsinin barəsində inzibati icraat aparılan şəxsin kartından tutulma yolu ilə ödənilməsi müəyyən edilmişdir. İcra vərəqəsi Nəsimi rayon İcra Şöbəsinə daxil olduğu vaxtdan icra şöbəsinə dəvət edilərək izahatları alınmışdır ki, belə olan halda şəxsin üzürsüz səbəbdən icra məmurunun qanuni tələblərinin yerinə yetirilməməsindən söhbət gedə bilməz. Bununla yanaşı, “İcra haqqında” Qanunun 82.1-ci maddəsinə əsasən borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədi icra məmuru tərəfindən müəyyən olunmuş müddətdə üzrsüz səbəbdən icra olunmadıqda, icra məmuru borclunun Azərbaycan Respublikasının qanunvericiliyi ilə nəzərdə tutulmuş qaydada inzibati məsuliyyətə cəlb olunması üçün inzibati xəta haqqında protokol tərtib edir və onu işin digər materialları ilə birlikdə müvafiq məhkəməyə göndərir. Məhkəmə qeyd edir ki, şəxsin icra sənədini icra etməməsi onun maddi imkanının olmaması və müəyyən müddət işsiz olması ilə əlaqədardır. Buna baxmayaraq o, işlədiyi müddət ərzində aldığı məvacibin müəyyən hissəsinin alimentə tutulmasına şərait yaradaraq ödənişlər etmişdir. Göründüyü kimi Şəxs borcunu müəyyən qədər ödəmişdir. Hazırki halda nə məhkəməyə təqdim edilmiş sənədlərlə, nə də məhkəmə iclasında iştirak edən icra məmurunun və barəsində inzibati qaydada icraat aparılan şəxsin izahatlarında göstərdikləri xüsusatlarla Şəxs məhkəmə qərarını məhz üzürsüz səbəbdən icra etməmə halı öz təsdiqini tapmamışdır. Məhkəmə onu da qeyd edir ki, iş materiallarından görünür ki, məhkəmə qətnaməsi icraya yönəlməsindən müəyyən müddət keçməsinə baxmayaraq icra məmuru məhkəmə qətnaməsinin icrası üçün Azərbaycan Respublikasının “İcra haqqında” Qanununda nəzərdə tutulmuş lazımi tədbirləri görmədən (işlə təmin olunmasının təmin edilməsi Dövlət Məşğulluq Xidmətində qeydiyyata durması hüququnun izah edilməsi, adına məhkəmə qətnaməsinin icrasının yönəldilə biləcəyi hər hansı əmlakın olub-olmamasının müəyyən edilməsi və.s.), yəni qətnamənin icrası üçün qanunvericiliklə nəzərdə tutulmuş bütün imkanlar tükənmədən inzibati xəta haqqında protokol tərtib etmişdir. Halbuki, Azərbaycan Respublikası Konstitusiya Məhkəməsinin “Azərbaycan Respublikası İnzibati Xətalar Məcəlləsinin 528.1-ci maddəsinin həmin Məcəllənin 9.2 və 35- ci maddələri baxımından şərh edilməsinə dair” 04 sentyabr 2018-ci il tarixli qərarında göstərilmişdir ki, məhkəmə və digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsi mütləq inzibati həbslə nəticələnməməli, icra məmurları müxtəlif qanuni vasitələrlə məhkəmə aktlarının icrasının təmin edilməsi üçün şərait yaratmalı və yalnız bütün imkanlar tükəndikdən sonra sərt inzibati və cinayət təsiri tədbirlərindən istifadə etməlidirlər. Azərbaycan Respublikası İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 8-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İnzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İnzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Şəxs icra sənədinin icrası ilə bağlı icra məmurunun hansı qanuni tələbini yerinə yetirməməsi məhkəmə araşdrılması zamanı müəyyən edilməmiş, bu barədə mötəbər sübutlar məhkəməyə təqdim edilməmişdir. Azərbaycan Respublikası İnzibati Xətalar Məcəlləsinin 53.1.2-ci maddəsinin tələbinə görə inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Qeyd edilən Məcəllənin 105.1-ci maddəsinə görə bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Göstərilənlərə əsasən məhkəmə hesab edir ki, Şəxs icra sənədinin icrası ilə bağlı icra məmurunun qanuni tələblərini yerinə yetirməməsi məhkəmə araşdırması zamanı öz təsdiqini tapmadığından və bununla da, onun hərəkətlərində inzibati xətanın tərkibi olmadığından inzibati xəta haqqında iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 53, 105, 114-115, 117, 129 və 130-cu maddələrini rəhbər tutaraq məhkəmə qərara aldı: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə başlanılmış inzibati xəta haqqında iş üzrə icraata xitam verilsin. Qərarın surəti rəsmi qaydada verildiyi gündən 10 (on) gün müddətində Nəsimi rayon Məhkəməsinə Nəsimi rayon məhkəməsi vasitəsi ilə şikayət verilə bilər. Hakim Elməddin Hüseynov