Bakı Şəhəri Nəsimi Rayon Məhkəməsi Qərar — İş №3(006)-811/2021

Azərbaycan Respublikası adından QƏRAR Bakı şəhəri İş № 3(006)-811/2021 19.03.2021 BAKI ŞƏHƏRİ NƏSİMİ RAYON MƏHKƏMƏSİ Hakim Hüseynov Elməddin Mirpaşa oğlunun sədrliyi, Mustafayeva İlhamə Mövlan qızının katibliyi, şikayətçi X1 iştirakı ilə, Bakı şəhəri Nəsimi rayon Polis İdarəsinin 22-ci Polis Bölməsinin sahə rəisi tərəfindən tərtib edilmiş xx xxxxxx 2021-ci il tarixli, MN ******* saylı inzibati xəta haqqında protokol əsasında qəbul edilmiş xx xxxxxx 2021-ci il tarixli, MN ******* saylı inzibati tənbeh vermə haqqında qərarından X2 tərəfindən verilmiş şikayətə açıq məhkəmə iclasında baxaraq, məhkəmə MÜƏYYƏN ETDİ: X2 şikayətlə məhkəməyə müraciət edərək Bakı şəhəri Nəsimi rayon Polis İdarəsinin 22-ci Polis Bölməsinin sahə rəisi tərəfindən tərtib edilmiş xx xxxxxx 2021-ci il tarixli, MN ******* saylı inzibati xəta haqqında protokol əsasında qəbul edilmiş xx xxxxxx 2021-ci il tarixli, MN ******* saylı inzibati tənbeh vermə haqqında qərarının ləğv edilməsini və inzibati iş üzrə icraata xitam verilməsini xahiş etmişdir. Şikayət onunla əsaslandırılmışdır ki, o, xx xxxxxx 2020-ci il tarixində saat 13:37 radələrində ***-***-**-** telefon nömrəsindən Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN xidmət) 8103 qısa nömrəsinə tibb xidmətindən istifadə etmək məqsədi ilə (diş ağrıları səbəbindən stomotoloji klinikaya getmək üçün) 1 kodu ilə SMS göndərmişdir (ş/v aze 16913878). O, evdən çıxma icazə SMS-i saat 13:37-də göndərdiyi halda, icazə SMS-nin cavabı saat 14:44-də gəlmişdir. Göründüyü kimi icazə SMS-i mövcud qaydalara zidd olaraq ASAN xidmət tərəfindən 15 dəqiqədən sonra gəlməli olduğu halda gəlməmiş, icazə SMS naməlum səbəbdən yalnız 1 saat 07 dəqiqədən sonra gəlmişdir. ASAN xidmətə bununla bağlı müraciət etdiyində ona bildirmişlər ki, 2021-ci ilin yanvar ayının 13-də icazə SMS-lərinin vaxtında gəlməsində texniki problemlər yaşanmış və bu DİN-nin portalında yaranmış problemlə əlaqədar olmuşdur. DİN-nin Qərargahından maraqlandıqda ona demişlər ki, məsuliyyəti yalnız “ASAN” xidmət daşıyır. Yəni, hər iki qurum problemin olduğuna baxmayaraq heç bir məsuliyyət daşımadığını bildirmiş və beləcə qanunvericilikdə təyin edilmiş qaydalara əməl olunmamışdır. Dişi ağrıdığı üçün və növbə tutduğu diş həkiminə vaxtında çatmaq məqsədi ilə yaşadığı evdən saat 14:00-da çıxaraq stomotoloji klinikaya getmişdir. Təxminən saat 14:10-da polis əməkdaşları ona yaxınlaşaraq şəxsiyyət vəsiqəni tələb edərək, onun evdən çıxma icazəsinin olmadığı üçün onu Bakı şəhəri DİN Nəsimi rayon 22 saylı polis bölməsinə aparmışlar. Polis bölməsində onu və 20 nəfər şəxsi pandemiya qaydalarını nəzərə almayaraq ölçüsü uyğun olmayan otağa salaraq, qanunsuz olaraq telefonunu və sənədini əlindən almışlar. Polis bölməsində olan əksər şəxslər SMS icazə qaydalarını pozulması səbəbi ilə qanunsuz olaraq bir neçə saat ərzində bölmədə saxlanılmışlar. DİN Nəsimi rayon 22 saylı polis bölməsində baş leytenantı R.Aslanov tərəfindən tərtib olunmuş xx.xx.2021-ci il tarixli MN ******* saylı Protokolda tərtib olma vaxtı saat 14:35 göstərilsə də, onu yalnız 17:55-də yəni, atasının polis bölməsinə gəldikdən və qanunsuz saxlanılmasını deyərək buraxılmağını tələb etdikdən sonra, oradan buraxılmışdır. Bir nəçə saat ərzində onun valideyinləri onunla əlaqə saxlaya bilmədikləri üçün 102 xidmətinə və 22 Polis bölməsində zəng edib şikayət etmişlər. Bu şikayətə polis bölməsi məhəl qoymamışdır. Vətəndaşlara Xidmət və Sosial İnnovasiyaiar üzrə Dövlət Agentliyi (ASAN xidmət) tərəfindən göstərilən xidmət lazımınca yerinə yetirilmədiyi səbəbindən, yəni, onun evdən çıxma SMS icazəsini gec göndərdikləri üçün o, inzibati məsuliyyətə cəlb edilmişdir. Azərbaycan Respublikası İXM-nim 8.3-cü maddəsinə əsasən “İnzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir”. Azərbaycan Respublikası İXM-nin 9.1-ci bəndinə əsasən «İnzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır». Göstərilənləri nəzərə alaraq, Bakı şəhəri Nəsimi rayon Polis İdarəsinin 22-ci Polis Bölməsinin sahə rəisi tərəfindən tərtib edilmiş xx xxxxxx 2021-ci il tarixli, MN ******* saylı inzibati xəta haqqında protokol əsasında qəbul edilmiş xx xxxxxx 2021-ci il tarixli, MN ******* saylı inzibati tənbeh vermə haqqında qərarın ləğv edilməsi barədə qərar qəbul edilməsi xahiş edilmişdir. Məhkəmə iclasında iştirak edən şikayətçi X2 şikayət ərizəsinin məzmununa uyğun izahat verərək inzibati xəta haqqında iş üzrə icraata xitam verilməsini məhkəmədən xahiş etmişdir. Məhkəmə iclasının vaxtı və yeri barədə Bakı şəhəri Nəsimi rayon Polis İdarəsinin 22-ci Polis Bölməsinə lazımi qaydada məlumat verilsə də, Bakı şəhəri Nəsimi rayon Polis İdarəsinin 22-ci Polis Bölməsinin nümayəndəsi məhkəmə iclasında iştirak etməmiş və iştirak etməməsinin səbəbləri haqqında məhkəməyə məlumat verməmişdir. Məhkəmə Azərbaycan Respublikasının İnzibati Xətalar Məcəlləsinin 133.2.4-cü maddəsinə əsasən işə Bakı şəhəri Nəsimi rayon Polis İdarəsinin 22-ci Polis Bölməsinin nümayəndəsinin iştirakı olmadan baxılmasını mümkün hesab edir. Məhkəmə proses iştirakçısını dinləyib, şikayət ərizəsini və digər iş materiallarını araşdıraraq hesab edir ki, şikayət qismən təmin olunmalıdır. Azərbaycan Respublikası İnzibati Xətalar Məcəlləsinin 48-ci maddəsinə əsasən inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri və şəraiti aşkar etməkdən və inzibati xətaların qarşısını almaqdan ibarətdir. Həmin Məcəllənin 5.2-ci maddəsinə əsasən bu Məcəllə insan və vətəndaş hüquqlarının və azadlıqlarının dövlət orqanları (vəzifəli şəxslər) tərəfindən pozulmasının qarşısının alınmasını və onlara hörmət olunmasını təmin edir. Bu Məcəllənin 6.2-ci maddəsinə əsasən inzibati xətalar haqqında işlər üzrə icraatın təmin edilməsi tədbirləri tətbiq edilərkən, qanunvericiliyin tələblərinə əməl olunması yuxarı orqanların və vəzifəli şəxslərin idarə nəzarəti ilə, məhkəmə və prokuror nəzarəti ilə və şikayət etmək hüquqi ilə təmin edilir. İnzibati Xətalar Məcəlləsinin 61.3-cü maddəsinə əsasən inzibati xəta haqqında işə barəsində inzibati xəta haqqında iş üzrə icraat aparılan şəxsin iştirakı ilə baxılır. Həmin işə şəxsin iştirakı olmadan, yalnız o hallarda baxılır ki, işə baxılmasının yeri və müddətinin ona vaxtında bildirilməsi barədə məlumat olsun və ya işə baxılmasını təxirə salmaq haqqında ondan vəsatət daxil olmasın, yaxud belə vəsatət rədd edilmiş olsun. Bakı şəhəri Nəsimi rayon Polis İdarəsinin 22-ci Polis Bölməsi tərəfindən qeyd edilən inzibati xəta haqqında işə baxılarkən qanunvericiliyin yuxarıda göstərilmiş tələblərinə riayət olunmamış, barəsində icraat aparılan şəxsin iştirakı təmin olunmadan və zəruri araşdırma aparılmadan işə baxılaraq qərar qəbul olunmuşdur. İnzibati Xətalar Məcəlləsinin 135.1.6-cı maddəsinə görə bu Məcəllə ilə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması inzibati xəta haqqında iş üzrə qərarın ləğv edilməsi və ya dəyişdirilməsi üçün əsasdır. Həmin Məcəllənin 134.1.4-cü maddəsinə görə inzibati xəta haqqında iş üzrə qərardan verilən şikayətə və ya protestə baxılaraq bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilə bilər. Göstərilənləri nəzərə alaraq məhkəmə hesab edir ki, şikayət qismən təmin edilməli, Bakı şəhəri Nəsimi rayon Polis İdarəsinin 22-ci Polis Bölməsinin sahə rəisi tərəfindən tərtib edilmiş xx xxxxxx 2021-ci il tarixli, MN ******* saylı inzibati xəta haqqında protokol əsasında qəbul edilmiş xx xxxxxx 2021-ci il tarixli, MN ******* saylı inzibati tənbeh vermə haqqında qərarı ləğv edilməli və iş yenidən baxılması üçün həmin quruma göndərilməlidir. Qeyd edilənlərə əsasən və Azərbaycan Respublikası İnzibati Xətalar Məcəlləsinin 128-130-cu və 133-135-ci maddələrini rəhbər tutaraq məhkəmə QƏRARA ALDİ: Şikayət qismən təmin edilsin. Bakı şəhəri Nəsimi rayon Polis İdarəsinin 22-ci Polis Bölməsinin sahə rəisi tərəfindən tərtib edilmiş xx xxxxxx 2021-ci il tarixli, MN ******* saylı inzibati xəta haqqında protokol əsasında qəbul edilmiş xx xxxxxx 2021-ci il tarixli, MN ******* saylı inzibati tənbeh vermə haqqında qərarı ləğv edilsin və iş baxılması üçün həmin quruma göndərilsin. Qərardan, onun surəti rəsmi qaydada verildiyi andan 10 gün müddətində Bakı şəhəri Nəsimi Rayon Məhkəməsi vasitəsi ilə Bakı Apellyasiya Məhkəməsinə şikayət verilə bilər. Hakim: Elməddin Hüseynov