Bakı Şəhəri Nəsimi Rayon Məhkəməsi Qərar — İş №3(006)-926/2021

Azərbaycan Respublikası adından QƏRAR Bakı şəhəri İş № 3(006)-926/2021 30.04.2021 BAKI ŞƏHƏRİ NƏSİMİ RAYON MƏHKƏMƏSİ Hakim Tağıyev Azər Heydər oğlunun sədrliyi, Lətifov Vəli Abdurəşid oğlunun katibliyi, Azərbaycan Respublikasının Dövlət Reklam Agentliyinin Bakı Şəhər Reklam İdarəsinin nümayəndəsi X2, barəsində inzibati xəta haqqında iş üzrə icraat aparılan şəxs Şəxs etibarnamə əsasında nümayəndəsi X1 iştirakları ilə, xx xxxx 1975-ci il tarixdə Lənkəran şəhərində anadan olmuş, Azərbaycan Respublikasının vətəndaşı, sahibkarlıq fəaliyyəti ilə məşğul olan (VÖEN: **********), ünvan 1 ünvanında qeydiyyatda olan Şəxs barəsində Azərbaycan Respublikasının İnzibati Xətalar Məcəlləsinin 428.7.1-ci maddəsi ilə toplanmış inzibati materiala açıq məhkəmə iclasında baxaraq, məhkəmə MÜƏYYƏN ETDİ: Şəxs Azərbaycan Respublikasının İnzibati Xətalar Məcəlləsinin 428.7.1-ci maddəsi ilə nəzərdə tutulmuş inzibati xətanı törətməsinə dair 16 mart 2021-ci il tarixli, MN ******* saylı inzibati xəta haqqında protokol və ona əlavə edilmiş sənədlər məhkəməyə daxil olmuşdur. İnzibati xəta haqqında protokola və ona əlavə edilmiş materiallara əsasən, 16 mart 2021-ci il tarixdə, saat 12:50-də Bakı Şəhər Reklam İdarəsi tərəfindən fərdi sahibkar Şəxs məxsus Bakı şəhəri, Nəsimi rayonu, Azadlıq prospekti 31 B ünvanında yerləşən “Access Gallary” adlı obyektin üzərində müvafiq icazə, texniki şərtlər pasportu və icazə müqaviləsi olmadan açıq məkanda reklam yerləşdirməsi faktı müəyyən edilmişdir. Bununla da, Şəxs Azərbaycan Respublikasının İXM-nin 428.7.1-ci maddəsində nəzərdə tutulmuş inzibati xətanı törətmişdir. Məhkəmə iclasında iştirak edən Bakı Şəhər Reklam İdarəsinin nümayəndəsi P.İ.Səbizov inzibati xəta haqqında iş üzrə icraata xitam verilib-verilməməsi məsələsini məhkəmənin mülahizəsinə buraxmışdır. Məhkəmə iclasında iştirak edən barəsində inzibati xəta haqqında iş üzrə icraat aparılan şəxs Şəxs etibarnamə əsasında nümayəndəsi A.M.Miriyev öz izahatında bildirmişdir ki, Şəxs tərəfindən 29 aprel 2021-ci il tarixdə 29 (iyirmi doqquz) manat 42 (qırx iki) qəpik məbləğində rüsum, 30 aprel 2021-ci il tarixdə 520 (beş yüz iyirmi) manat 67 (altmış yeddi) qəpik məbləğində rüsum ödənilmişdir. Bundan sonra, elə 05 may 2021-ci il tarixdə də onunla Bakı Şəhər Reklam İdarəsi arasında müvafiq müqavilə bağlanmışdır. Həmin halı təsdiq edən bütün sənədləri hazırda məhkəməyə təqdim edir. Göstərilənləri nəzərə alaraq, barəsində başlanılmış inzibati iş üzrə icraata xitam verilməsini məhkəmədən xahiş etmişdir. Məhkəmə proses iştirakçılarını dinləyib, toplanmış sübutlara məcmu halda hüquqi qiymət verərək hesab edir ki, Şəxs barəsində Azərbaycan Respublikasının İXM-nin 428.7.1-ci maddəsi ilə olan inzibati xəta haqqında iş üzrə icraata xitam verilməlidir. Belə ki, iş materiallarında olan 16 mart 2021-ci il tarixli, MN ******* saylı inzibati xəta haqqında protokoldan görünür ki, Şəxs Bakı şəhəri, Nəsimi rayonu, Azadlıq prospekti 31 B ünvanında müvafiq icazə, texniki şərtlər pasportu və icarə müqaviləsi olmadan açıq məkanda reklam yerləşdirməsi əməlinə yol vermiş, bununla da, Azərbaycan Respublikasının İXM-nin 428.7.1-ci maddəsində nəzərdə tutulmuş inzibati xətanı törətmişdir. İş materiallarında olan Azərbaycan Respublikasının Dövlət Reklam Agentliyinin Bakı Şəhər Reklam İdarəsinin fərdi sahibkar Şəxs ünvanladığı 17 mart 2021-ci il tarixli, Rİ-1/02-06/854 saylı məktubdan görünür ki, Şəxs Azərbaycan Respublikasının İXM-nin 428.7.1-ci maddəsində nəzərdə tutulmuş inzibati xətanı törətməsi səbəbindən barəsində 16 mart 2021-ci il tarixli, MN ******* saylı inzibati xəta haqqında protokol tərtib edildiyi barədə məlumat verilmiş və həmin protokolun surəti ona göndərilmişdir. İş materiallarında olan 29 aprel 2021-ci il tarixli qəbzdən görünür ki, 29 (iyirmi doqquz) manat 42 (qırx iki) qəpik məbləğində rüsum həmin tarixdə Şəxs tərəfindən ödənilmişdir. İş materiallarında olan 30 aprel 2021-ci il tarixli qəbzdən görünür ki, 520 (beş yüz iyirmi) manat 67 (altmış yeddi) qəpik məbləğində rüsum həmin tarixdə Şəxs tərəfindən ödənilmişdir. Beləliklə, məhkəmə iclasında müəyyən edilmişdir ki, Şəxs açıq məkanda reklam yerləşdirilməsinə icazə alınması üçün 05 avqust 2019-cu il tarixdə Bakı Şəhər Reklam İdarəsinə rəsmi ərizə ilə müraciət etmiş, həmin ərizə müvafiq qurum tərəfindən qanunvericiliklə nəzərdə tutulmuş qaydada qəbul edilərək qeydiyyata alınmışdır. Lakin bundan sonra Bakı Şəhər Reklam İdarəsi tərəfindən dövlət rüsumunun və yayım haqqının ödənişi üçün nəzərdə tutulmuş rekvizitlər Şəxs qanunvericiliklə nəzərdə tutulmuş müddət ərzində təqdim edilməmiş, nəticədə sonuncu həmin ödənişləri özündən asılı olmayan səbəbdən ödəyə bilməmişdir. Buna baxmayaraq, 16 mart 2021-ci il tarixdə Bakı Şəhər Reklam İdarəsi tərəfindən Şəxs barəsində Bakı şəhəri, Nəsimi rayonu, Azadlıq prospekti 31 B ünvanında yerləşən “Access Gallary” adlı obyektin üzərində müvafiq icazə, texniki şərtlər pasportu və icazə müqaviləsi olmadan açıq məkanda reklam yerləşdirməsi faktı ilə bağlı Azərbaycan Respublikasının İXM-nin 428.7.1-ci maddəsi ilə inzibati xəta haqqında protokol tərtib edilmiş və 17 mart 2021-ci il tarixdə həmin protokol Şəxs ünvanına göndərilmişdir. Bundan dərhal sonra, Şəxs Bakı Şəhər Reklam İdarəsinə müraciət etmiş və yalnız sonuncunun bu müraciətindən sonra ödənişin edilməsi üçün rekvizitlər 28 aprel 2021-ci il tarixdə ona təqdim edilmişdir. Şəxs isə həmin rekvizitləri qəbul etdikdən sonra 30 aprel 2021-ci il tarixdə həm dövlət rüsumunu, həm də yayım haqqını tam şəkildə ödəmiş və bundan sonra Bakı Şəhər Reklam İdarəsi ilə 05 may 2021-ci il tarixdə müvafiq icazə müqaviləsi rəsmi şəkildə bağlanmışdır. Göründüyü kimi, Şəxs açıq məkanda reklam yerləşdirilməsi ilə bağlı icazə alınması üçün 05 avqust 2019-cu il tarixdə Bakı Şəhər Reklam İdarəsinə müraciət etmiş, lakin həmin qurum tərəfindən müvafiq rekvizitlər vaxtında təqdim edilmədiyi üçün o, dövlət rüsumunu və yayım haqqını ödəyə bilməmişdir. Bakı Şəhər Reklam İdarəsi tərəfindən Şəxs barəsində inzibati xəta haqqında protokol tərtib edilərkən bu hala əhəmiyyət verilməmiş, nəticədə, sonuncunun barəsində əsassız olaraq Azərbaycan Respublikasının İXM-nin 428.7.1-ci maddəsi ilə inzibati xəta haqqında protokol tərtib edilmişdir. Məhkəmə qeyd etməyi zəruri hesab edir ki, hazırda Şəxs və Bakı Şəhər Reklam İdarəsi arasında icazə müqaviləsi rəsmi şəkildə bağlandığı üçün Azərbaycan Respublikasının İXM-nin 428.7.1-ci maddəsi ilə nəzərdə tutulmuş inzibati xəta hadisəsi yoxdur. Belə ki, “Reklam haqqında” Azərbaycan Respublikası Qanununun 26.2-ci maddəsinə əsasən açıq məkanda reklam yerləşdirmək üçün reklam yayıcısı müvafiq icra hakimiyyəti orqanından icazə almalı, ərazinin, daşınmaz əmlakın mülkiyyətçisi və ya onlar barədə sərəncam vermək hüququ olan şəxslə müqavilə bağlamalıdır. Həmin müqavilə əsasında müvafiq icra hakimiyyəti orqanı tərəfindən reklama dair texniki şərtlər pasportu hazırlanır. Reklama dair texniki şərtlər pasportu mülkiyyətçiyə təqdim edildikdən sonra reklam yerləşdirilə bilər. Reklama dair texniki şərtlər pasportunun formasını müvafiq icra hakimiyyəti orqanı təsdiq edir. Azərbaycan Respublikası Prezidentinin 2017-ci il 19 dekabr tarixli fərmanı ilə təsdiq edilmiş “Açıq məkanda reklam yerləşdirilməsinə icazə verilməsi və bu sahədə nəzarətin həyata keçirilməsi” Qaydasının 2.1-ci maddəsinə əsasən, açıq məkanda reklam yerləşdirilməsinə icazə (bundan sonra – icazə) alınması üçün reklam yayıcısı (reklam qurğusunun mülkiyyətçisi, digər reklam daşıyıcısının isə sahibi) “İnzibati icraat haqqında” Azərbaycan Respublikası Qanununun 29-cu və 30-cu maddələrində nəzərdə tutulmuş qaydada müvafiq quruma ərizə təqdim edir. Ərizə müvafiq qurum tərəfindən “İnzibati icraat haqqında” Azərbaycan Respublikası Qanununun 31-ci maddəsinə uyğun olaraq qəbul edilir və qeydiyyata alınır. Həmin Qaydanın 2.7-ci maddəsinə əsasən, müvafiq qurum təqdim olunmuş ərizəyə və ona əlavə edilmiş sənədlərə baxılmasının nəticəsi əsasında ərizənin qeydiyyata alındığı tarixdən 7 iş günündən gec olmayaraq reklam yayıcısına icazə üçün dövlət rüsumunu ödəməsi vəzifəsi barədə bildiriş göndərir və ya icazənin verilməsindən imtina haqqında inzibati akt qəbul edir. Həmin Qaydanın 2.9-cu maddəsinə əsasən, icazə verilməsinə görə “Dövlət rüsumu haqqında” Azərbaycan Respublikasının Qanununa uyğun olaraq Azərbaycan Respublikası Prezidentinin müəyyən etdiyi məbləğdə dövlət rüsumu müvafiq qurumun verdiyi bildiriş alındığı tarixdən 5 iş günü ərzində reklam yayıcısı tərəfindən ödənilir və ödənişi təsdiq edən sənəd müvafiq quruma təqdim olunur. Həmin Qaydanın 2.10-cu maddəsinə əsasən, dövlət rüsumunun ödənilməsi faktını təsdiq edən sənəd reklam yayıcısı tərəfindən müvafiq quruma təqdim edildikdən sonra 2 iş günündən gec olmayaraq: 2.10.1. icazə, həmçinin reklama dair texniki şərtlər pasportu hazırlanaraq reklam yayıcısına təqdim edilir və ya sifarişli poçt göndərişi vasitəsilə göndərilir; 2.10.2. reklam yayıcısı ilə icazə müqaviləsi bağlanılır. Azərbaycan Respublikasının İnzibati Xətalar Məcəlləsinin 3-cü maddəsinə əsasən, yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 8.1-ci maddəsinə əsasən, barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. Həmin Məcəllənin 8.2-ci maddəsinə əsasən, inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. Həmin Məcəllənin 8.3-cü maddəsinə əsasən, inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Həmin Məcəllənin 53.0.1-ci maddəsinə əsasən inzibati xəta hadisəsi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 105.1-ci maddəsinə əsasən həmin Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Həmin Məcəllənin 109.2-ci maddəsinə əsasən, bu Məcəllənin 53 və 104.1-ci maddələrində nəzərdə tutulmuş hallar olduqda inzibati xəta haqqında iş üzrə icraata xitam verilməsi və ya inzibati xəta haqqında iş üzrə icraatın dayandırılması barədə qərar qəbul edilir. Beləliklə, məhkəmə hesab edir ki, hazırkı iş üzrə barəsində inzibati xəta haqqında protokol tərtib edilmiş şəxs Şəxs münasibətdə təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) mövcud deyildir. Ona görə də, Şəxs barəsində Azərbaycan Respublikasının İnzibati Xətalar Məcəlləsinin 428.7.1-ci maddəsi ilə başlanılmış inzibati iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 40, 43, 48-51, 114-117, 128-130-cu maddələrini rəhbər tutaraq, məhkəmə QƏRARA ALDİ: Şəxs barəsində Azərbaycan Respublikasının İnzibati Xətalar Məcəlləsinin 428.7.1-ci maddəsi ilə başlanılmış inzibati iş üzrə icraata xitam verilsin. Qərardan 10 gün müddətində Bakı Şəhəri Nəsimi Rayon Məhkəməsi vasitəsi ilə Bakı Apelyasiya Məhkəməsinə apelyasiya şikayəti və ya protesti verilə bilər. Hakim: Azər Tağıyev