Bakı Şəhəri Nizami Rayon Məhkəməsi Qərar — İş №3(007)-102/2024

Azərbaycan Respublikası adından QƏRAR Bakı şəhəri İş № 3(007)-102/2024 06.02.2024 BAKI ŞƏHƏRİ NİZAMİ RAYON MƏHKƏMƏSİ Hakim Hacıyeva Mətanət İsfəndiyar qızının sədrliyi, məhkəmə iclasının katibi Dadaşova Emina Bəhruz qızının katibliyi, barəsində inzibati xəta haqqında iş üzrə qərar qəbul edilən şəxs X2, qərarından şikayət verilmiş Bakı şəhər Baş Polis İdarəsi X7 İdarəsinin nümayəndəsi Nümayəndə iştirakı ilə, Bakı şəhər Baş Polis İdarəsi X7 İdarəsi tərəfindən qəbul edilmiş xx.xx.2023-cü il tarixli, TP seriyalı, ******* nömrəli inzibati tənbeh vermə haqqında qərardan X2 verdiyi şikayətə məhkəmənin binasında, açıq məhkəmə iclasında baxaraq, MÜƏYYƏN ETDİ: X4 Bakı şəhər Baş Polis İdarəsi X7 İdarəsi tərəfindən qəbul edilmiş xx.xx.2023-cü il tarixli, TP seriyalı, ******* nömrəli inzibati tənbeh vermə haqqında qərardan şikayət verərək həmin qərarın ləğv edilməsini və inzibati xəta haqqında iş üzrə icraata xitam verilməsini xahiş etmişdir. Şikayət onunla əsaslandırılmışdır ki, 19 noyabr 2023-cü il tarixində özünə məxsus “Kia Sorento” markalı, **-NY-*** dövlət qeydiyyat nişanlı avtomobili ilə “Azneft” dairəsindən Neftçilər prospektinə doğru hərəkət edərkən yol patrul xidməti inspektoru Allahverdiyev Rauf ona saxla əmri vermiş və o, saxla əmrinə tabe olmuşdur. YPX inspektoru ona Niyazi küçəsindən “Azneft” dairəsinə daxil olarkən dairədən çıxmaqda olan digər nəqliyyat vasitəsinə yol vermədiyini və yol ayrıcının keçmə qaydasını pozduğunu bildirmişdir. O, qayda pozmadığını və Azərbaycan Respublikasının “Yol hərəkəti haqqında” Qanununun 1-ci maddəsinin 41-ci yarım bəndinə istinad edərək onun hərəkətinin digər nəqliyyat vasitəsinin hərəkətinə heç bir maneə yaratmadığını, qəflətən hərəkət sürətini və ya hərəkət istiqamətini dəyişdirməsinə səbəb olmadığını bildirmişdir. YPX inspektoru ona video görüntü təqdim etmiş, videogörüntüdə açıq-aşkar qayda pozmadığı yəni, digər nəqliyyat vasitəsinin qəflətən hərəkət istiqamətini və ya sürətini dəyişməməsi aydın şəkildə görünməsinə baxmayaraq ona protokol tərtib etmişdir. Həmin gün protokoldan BDYPİ-nə şikayət ünvanlamış və onun iştirakı ilə protokola yenidən baxılmasını tələb etmişdir. Sonra BPİ DYPİ-nin YPXŞ-nin inspektoru polis mayoru Rəşad Əliyev onu protokola yenidən baxılması üçün dəvət etmiş, orada Rəşad Əliyev ona eyni videogörüntünü göstərərək dairədə avtomobil ola-ola dairəyə girmək olmaz, demiş, o, isə bu fikrin “Yol hərəkəti haqqında” Qanunda olmadığını deyib, həmin Qanunun 1-ci maddəsinin 41-ci yarım bəndini təkrarlamışdır. Rəşad Əliyevin onun sözlərinə məhəl verməməsindən sonra ərazidə yerləşən digər kameraların görüntüsünü tələb etmiş, Rəşad Əliyev xx.xx.2023-cü il tarixində ərazidə yerləşən bütün kameraların işləmədiyini söyləyərək başqa videogörüntü olmadığını bildirmişdir. Bu zaman o, Rəşad Əliyevə YPX avtomobilinin dayandığı və videogörüntünü qeydə aldığı yerin çaşqınlığa səbəb yaratdığını, həmin istiqamətdən baxdıqda iki nəqliyyat vasitəsinin arasında olan 30-40 metrlik məsafənin düzgün qiymətləndirməsinin mümkün olmadığını bildirmişdir. Rəşad Əliyev bu fikirdə onunla razılaşdığını, lakin əlində başqa videogörüntü olmadığını bildirərək qərarın qüvvədə qalacağını söyləmişdir. O, isə öz növbəsində Rəşad Əliyevin fikirləri ilə razılaşmadığını, başqa videogörüntülərin olmaması və digər kameraların işləməməsinin onun səhvi olmadığını, şübhəli qərar varsa vətəndaşın lehinə qərar verilməli olduğunu bildirmişdir. Nəticədə onlar qərarı dəyişməyərək onun əleyhinə qərar qüvvədə qalmışdır. Video görüntüdə açıq-aşkar qayda pozmadığını görünməsinin, ərazidə bir neçə TŞ kamerası olmasına baxmayaraq ona heçbir əlavə videogörüntü təqdim edilməməsini nəzərə alaraq barəsində çıxarılmış TP ******* saylı, xx.xx.2023 tarixli inzibati xəta haqqında qərarı ləğv edib iş üzrə icraatın ləğv edilməsi barədə qərar qəbul edilməsini xahiş etmişdir. Məhkəmə iclasında barəsində inzibati xəta haqqında iş üzrə qərar qəbul edilən şəxs X4 şikayətin məzmununa uyğun izahat verərək məhkəmədən Bakı şəhər Baş Polis İdarəsi X7 İdarəsi tərəfindən qəbul edilmiş xx.xx.2023-cü il tarixli, TP seriyalı ******* nömrəli inzibati tənbeh vermə haqqında qərarın ləğv edilməsini və inzibati xəta haqqında iş üzrə icraata xitam verilməsini xahiş etmişdir. Məhkəmə iclasında qərarından şikayət verilmiş Bakı şəhər Baş Polis İdarəsi X7 İdarəsinin nümayəndəsi Nümayəndə izahat verərək bildirmişdir ki, sürücü hesab edir ki, “Yol hərəkəti haqqında” Qanunun 42-ci maddəsinin 15-ci hissəsində yol nişanları ilə hərəkət üstünlüyü müəyyən edilməmişdirsə, dairəvi hərəkət təşkil olunmuş yolayrıcına daxil olan sürücü dairədə hərəkət edən nəqliyyat vasitələrinə yol verməməlidir. O, haradan müəyyən etdi ki, həmin sürücüyə maneə yaratmamışdır. Rəşad müəllim də sürücüyə dairədə avtomobil olduğu halda nə üçün dairəyə daxil olmasını qeyd etmişdir. Sürücünün qeyd etdiyi yol vermə ümumi anlayışdır. “Yol hərəkəti haqqında” Azərbaycan Respublikasının Qanununun 42-ci maddəsi manevr qaydalarına aiddir, 42-ci maddənin 15ci bəndi isə konkret yol verməkdir, yəni dairəvi hərəkət təşkil olunmuş yolayrıcına daxil olan sürücü dairədə hərəkət edən nəqliyyat vasitələrinə yol verməlidir. Niyazov Kənanın dairəyə daxil olan avtomobilə yol verməməsi mübahisəsizdir. İnspekor isə bu hadisəni vizual aşkarlamış, həmin sürücünü saxlayıb onun barəsində protokol tərtib etmişdir. Qeyd olunanları nəzərə alaraq şikayətin təmin olunmaması barədə qərar qəbul edilməsini xahiş etmişdir. Məhkəmə şikayəti və təqdim olunmuş materialları nəzərdən keçirərək hesab edir ki, şikayət əsassız olduğundan təmin olunmamalıdır. İşdə olan və məhkəmə baxışında tədqiq edilmiş: - Bakı şəhər Baş Polis İdarəsi X7 İdarəsi tərəfindən qəbul edilmiş xx.xx.2023-cü il tarixli inzibati tənbeh vermə haqqında qərardan görünür ki, X4 xx.xx.2023-cü il tarixdə idarə etdiyi “Kia Sorento” minik markalı, **-NY-*** dövlət qeydiyyat nişanlı avtomobillə “Azneft” dairəsi istiqamətində hərəkətdə olarkən yolayrıcını keçmə qaydasını pozmuşdur. X1 Azərbaycan Respublikası İXM-nin 327.2-ci maddəsində nəzərdə tutulan inzibati xətanı törətməkdə təqsirli bilinib 80 manat məbləğində cərimə edilmişdir. Məhkəməyə təqdim edilmiş videogörüntüyə məhkəmə iclasında baxış keçirilən zaman X2 Azərbaycan Respublikası İnzibati Xətalar Məcəlləsinin 327.2-ci maddəsində nəzərdə tutulmuş inzibati xətanı törətməsi öz təsdiqini tapmışdır. Azərbaycan Respublikası İnzibati Xətalar Məcəlləsinin 128.1-ci maddəsinə əsasən barəsində qərar çıxarılmış fiziki şəxs, yetkinlik yaşına çatmayanların qanuni nümayəndəsi, hüquqi şəxsin nümayəndəsi, zərərçəkmiş şəxs, müdafiəçi və nümayəndə, həmçinin bu Məcəllənin 43.2-ci maddəsində nəzərdə tutulan vəzifəli şəxs inzibati xəta haqqında iş üzrə qərardan şikayət, prokuror isə protest verə bilər. Həmin Məcəllənin 48-ci maddəsinə əsasən inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri və şəraiti aşkar etməkdən və inzibati xətaların qarşısını almaqdan ibarətdir. Həmin Məcəllənin 76-cı maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, müvafiq icra hakimiyyəti orqanının müəyyən etdiyi orqanın (qurumun) informasiya sistemində, habelə digər dövlət informasiya sistemlərində (ehtiyatlarında) aşkar olunan məlumatlarla, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Həmin Məcəllənin 84.2-ci maddəsinə əsasən isə heç bir sübutun qabaqcadan müəyyən edilmiş qüvvəsi yoxdur. Həmin Məcəllənin 99.1.1-ci maddəsinə əsasən inzibati xəta hadisəsinin mövcudluğunu göstərən kifayət qədər halların səlahiyyətli vəzifəli şəxs tərəfindən bilavasitə və ya xüsusi texniki vasitələrin köməyi, eləcə də müvafiq icra hakimiyyəti orqanının müəyyən etdiyi orqanın (qurumun) informasiya sistemi, habelə digər dövlət informasiya sistemləri (ehtiyatları) vasitəsi ilə aşkar edilməsi inzibati xəta haqqında iş üzrə icraata başlamağa səbəbdir. Həmin Məcəllənin 133.2.8-ci maddəsinə əsasən inzibati xəta haqqında iş üzrə qərardan verilən şikayətə və ya protestə baxılarkən qəbul edilmiş qərarın qanuniliyi və əsaslılığı iş üzrə olan və əlavə təqdim edilmiş materiallar əsasında yoxlanılır. Məhkəmə inzibati tənbeh vermə haqqında qərardan şikayət verən şəxs X3 istinad edilən inzibati xətaya qanunvericiliyin sübutlar və sübutetmə ilə bağlı müddəaları baxımından yanaşaraq hesab edir ki, inzibati məsuliyyətə səbəb olan əməlin əsası kimi məhkəmədə tədqiq edilmiş sübutlar həqiqiliyinə, yaranma mənbəyinə və əldə edilməsi hallarına görə sübut kimi qəbul ediləndir, sübutların hüquqi qüvvəsini şübhə altına alan hallar yoxdur, sübutların məcmusu inzibati xətaya qiymət verilməsi baxımından kifayət edir və onun əməli düzgün olaraq İXM-nin 327.2-ci maddəsi ilə tövsif edilmişdir. Hazırda da şikayətin dəlilləri sözügedən qərarın ləğv edilməsi üçün əsas kimi çıxış etmir. Onun hərəkətlərinə münasibətdə əməlin inzibati xəta olmasını aradan qaldıran hallar, həmçinin inzibati məsuliyyətindən azad edilməsi üçün əsaslar yoxdur. Azərbaycan Respublikası İnzibati Xətalar Məcəlləsinin 134.1-ci maddəsinə əsasən inzibati xəta haqqında iş üzrə qərardan verilən şikayətə və ya protestə baxılaraq aşağıdakı qərarlardan biri qəbul edilir: 134.1.1. qərarın dəyişdirilmədən, şikayətin və ya protestin isə təmin edilmədən saxlanılması haqqında; 134.1.2. bu Məcəllənin 135.1.2 – 135.1.5-ci maddələri ilə müəyyən edilmiş hallarda qərarın dəyişdirilməsi haqqında və ya qərarı ləğv edərək yeni qərarın çıxarılması haqqında; 134.1.3. bu Məcəllənin 135.1.5-1-ci maddəsində nəzərdə tutulduğu hallarda qərarı ləğv edərək inzibati xəta haqqında iş üzrə icraata xitam verilməsi haqqında; 134.1.4. bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında; 134.1.5. şikayətə və ya protestə baxılarkən inzibati xəta haqqında iş üzrə qərarı buna səlahiyyəti çatmayan hakimin, orqanın (vəzifəli şəxsin) qəbul etdiyi müəyyən olunduqda, qərarın ləğv edilməsi və işin aidiyyəti üzrə baxılmaq üçün göndərilməsi haqqında. Şərh edilən normaları rəhbər tutaraq məhkəmə hesab edir ki, xx.xx.2023-cü il tarixli, TP seriyalı, ******* nömrəli inzibati tənbeh vermə haqqında qərarın ləğv edilməsi barədə X2 verdiyi şikayət əsassız olduğu üçün təmin edilməməlidir. Göstərilənlərə əsaslanaraq və Azərbaycan Respublikası İXM-nin 128, 129 və 133-136-cı maddələrini rəhbər tutaraq, məhkəmə QƏRARA ALDİ: Bakı şəhər Baş Polis İdarəsi X7 İdarəsi tərəfindən qəbul edilmiş xx.xx.2023-cü il tarixli, TP seriyalı, ******* nömrəli inzibati tənbeh vermə haqqında qərardan X2 verdiyi şikayət təmin edilməsin. Qərarın surəti rəsmi qaydada verildiyi vaxtdan 10 (on) gün müddətində Bakı şəhəri Nizami Rayon Məhkəməsi vasitəsilə və ya birbaşa Bakı Apellyasiya Məhkəməsinə şikayət və ya protest verilə bilər. Sədrlik edən Mətanət Hacıyeva