Bakı Şəhəri Nizami Rayon Məhkəməsi Qərardad — İş №3(007)-1168/2020

Azərbaycan Respublikası adından QƏRARDAD Bakı şəhəri İş № 3(007)-1168/2020 07.08.2020 BAKI ŞƏHƏRİ NİZAMİ RAYON MƏHKƏMƏSİ Mən, Bakı Şəhəri Nizami Rayon Məhkəməsinin hakimi Mehdiyev Nəriman Hüseynqulu oğlu, “xxxxxxxxxxxxx” MMC barəsində Azərbaycan Respublikası İXM-nin 347-ci maddəsi ilə tərtib edilmiş xx.xx.2020-ci il tarixli AP ******* nömrəli inzibati xəta haqqında protokolu və ona əlavə edilmiş sənədləri nəzərdən keçirərək, MÜƏYYƏN ETDİM: “xxxxxxxxxxxxx” MMC barəsində Azərbaycan Respublikası İXM-nin 347-ci maddəsi ilə tərtib edilmiş xx.xx.2020-ci il tarixli AP ******* nömrəli inzibati xəta haqqında protokol və ona əlavə edilmiş sənədlər baxılması üçün Bakı Şəhəri Nizami Rayon Məhkəməsinə göndərilmişdir. Daxil olmuş materialı nəzərdən keçirib, hesab edirəm ki, inzibati xəta haqqında protokol və ona əlavə olunmuş sənədlər protokolu tərtib etmiş orqana geri qaytarılmalıdır. Təqdim edilən sənədlərdən görünür ki, inzibati xəta haqqında protokol hüquqi şəxsin barəsində tərtib olunsa da, hüquqi şəxsə dair zəruri məlumatlar, xüsusən hüquqi ünvanı, tam və dəqiq adı özündə əks etdirən Kommersiya hüquqi şəxslərin dövlət qeydiyyatına dair reyestrdən çıxarış əldə edilərək inzibati araşdırma materialına əlavə edilməmişdir. İşin baxılmağa hazırlanması zamanı müəyyən edilmişdir ki, inzibatı xəta haqqında protokol VÖEN nömrəsi ********** nömrəli olan “xxxxxxxxxxxxx” QSC-nin deyil, “xxxxxxxxxxxxx” MMC-nin barəsində tərtib edilmişdir. “Elektron Məhkəmə İnformasiya Sistemi”ndə qeydə alınmış məlumata əsasən ********** nömrəli VÖEN üzrə vergi ödəyicisi təşkilati-hüquqi forması X3 kimi qeydə alınmış “xxxxxxxxxxxxx”-dur, təşkilati-hüquqi forması X1 “xxxxxxxxxxxxx”un vergi ödəyicisi kimi qeydiyyatı isə aşkar edilməmişdir. Azərbaycan Respublikası İnzibati Xətalar Məcəlləsinin: 75.0.1 və 75.0.2-ci maddələrinə əsasən inzibati xəta haqqında iş üzrə aşağıdakılar müəyyən edilməlidir: inzibati xəta hadisəsi (inzibati xəta törədilmişdirmi); inzibati xəta törətmiş şəxs. 99.2-ci maddəsinə əsasən inzibati xətalara dair məlumatlara inzibati xəta haqqında iş üzrə icraata başlamaq səlahiyyəti olan vəzifəli şəxs tərəfindən baxılır. Həmin məlumatlarda inzibati xətanın əlamətlərinin olması və inzibati xəta haqqında iş üzrə icraatı rədd edən halların olmaması inzibati xəta haqqında işin başlanmasına əsasdır; 106-cı maddəsinə əsasən hakim, səlahiyyətli orqan (vəzifəli şəxs) inzibati xətalar haqqında işlərə baxarkən həmin maddədə imperativ formada sadalanmış digər məsələlərlə yanaşı həmçinin işin baxılmasının onun səlahiyyətinə aid olub-olmadığını, eləcə də işin digər materiallarının bu Məcəllənin tələblərinə müvafiq tərtib edilibedilmədiyini həll etməlidir; 109.1.6-cı maddəsinə əsasən inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə qərardad qəbul edilir. Göründüyü kimi, inzibati xəta törədən şəxs düzgün müəyyən olunmamış, inzibati icraat vergi ödəyicisi kimi qeydiyyata alınmamış “xxxxxxxxxxxxx” MMC-nin barəsində aparılmaqla protokol tərtib edilərək baxılması üçün məhkəməyə göndərilmiş, bununla inzibati xətalar qanunvericiliyinin müvafiq norma və tələbləri pozulmuşdur. Qeyd olunanlara əsasən hesab edirəm ki, təqdim edilmiş materiallar natamam olduğu və işə baxılarkən tamamlamaq mümkün olmadığı üçün “xxxxxxxxxxxxx” MMC barəsində tərtib olunmuş inzibati xəta haqqında protokol və ona əlavə olunmuş sənədlər protokolu tərtib etmiş orqana geri qaytarılmalıdır. Şərh olunanlara əsaslanaraq və Azərbaycan Respublikası İXM-nin 106, 128-130-cu maddələrini rəhbər tutaraq, QƏRARA ALDİM: “xxxxxxxxxxxxx” MMC barəsində Azərbaycan Respublikası İXM-nin 347-ci maddəsi ilə tərtib edilmiş xx.xx.2020-ci il tarixli AP ******* nömrəli inzibati xəta haqqında protokol və ona əlavə edilmiş sənədlər Bakı şəhəri Nizami rayon Polis İdarəsinin Dövlət Yol Polis Şöbəsinə geri qaytarılsın. Hakim Nəriman Mehdiyev